ອົບຮົມຄວາມຮູ້ພື້ນຖານດ້ານການເມືອງ-ການປົກຄອງ
ການສ້າງບ້ານພັດທະນາ ແລະ ອົບຮົມປະຊາຊົນລຽບຕາມຊາຍແດນ
ໃນລະຫວ່າງ ວັນທີ 29-30/7/2020 ກົມອົບຮົມ ຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງຫຼວງນ້ຳທາ ແລະ ຄະນະໂຄສະນາອົບຮົມເມືອງລອງ ໄດ້ສົມທົບກັນຈັດຕັ້ງຊຸດຝຶກອົບຮົມຄວາມຮູ້ພື້ນຖານດ້ານການເມືອງ-ການປົກຄອງການສ້າງບ້ານພັດທະນາ ແລະ ອົບຮົມປະຊາຊົນລຽບຕາມຊາຍແດນ ຢູ່ສະໂມສອນກຸ່ມບ້ານຊຽງກົກ ໃຫ້ກຽດເປັນປະທານຮ່ວມຂອງທ່ານ ປອ ວັນລາຕີ ຄຳວານວົງສາ ຮອງຫົວໜ້າກົມອົບຮົມ ຄອສພ, ທ່ານ ບຸນສາງ ອິນມະນີ ຮອງຫົວໜ້າຄະນະໂຄສະນາອົບຮົມແຂວງຫຼວງນ້ຳທາ ແລະ ຫົວໜ້າຄະນະໂຄສະນາອົບຮົມເມືອງລອງ, ທ່ານ ໄມ່ຄຳມຸນ ກອງສິີລິ ຄະນະພັກຮາກຖານກຸ່ມບ້ານຊຽງກົກ ເປົ້າໝາຍເຂົ້າຮ່ວມ ປະກອບມີ 6 ບ້ານ ຄື: ບ້ານຊຽງກົກໃໝ່,ບ້ານຊຽງກົກເກົ່າ, ບ້ານປຸງຊາຍ, ບ້ານຈ່າຍີ, ບ້ານຫ້ວຍກຸ່ມ ແລະ ບ້ານຈ່າແກ້ວ.
ຊຸດອົບຮົມຄັ້ງນີ້ ມີຜູ້ເຂົ້າຮ່ວມທັງໝົດ ຈຳນວນ 37 ທ່ານ, ຍິງ 8 ທ່ານ, ໃນນັ້ນ ມີເລຂາຄະນະພັກຮາກຖານ 1 ສະຫາຍ, ເລຂາໜ່ວຍພັກ 4 ສະຫາຍ, ຊາວຫນຸ່ມບ້ານ 6 ທ່ານ, ສະຫະພັນແມ່ຍິງບ້ານ 8 ທ່ານ, ນາຍບ້ານ ແລະ ຮອງນາຍບ້ານ 11 ທ່ານ, ປກສ ຂອງ 6 ບ້ານ 7 ທ່ານ.
ຊຶ່ງນຳໃຊ້ 2 ເອກະສານ ເຂົ້າໃນການຝຶກອົບຮົມຄວາມຮູ້ພື້ນຖານດ້ານການເມືອງ-ການປົກຄອງການສ້າງບ້ານພັດທະນາ ແລະ ອົບ ຮົມປະຊາຊົນລຽບຕາມຊາຍແດນເຊິ່ງລວມມີ 6 ບົດ:
ບົດທີ 1: ຊາດລາວ ຄົນລາວ ແລະ ມູນເຊື້ອອັນສະຫງ່າລາສີຂອປະຊາຊົນລາວ.
ບົດທີ 2: ລະບົບການເມືອງ ແລະ ການປົກຄອງໃນລະບອບປະຊາທິປະໄຕ ປະຊາຊົນ.
ບົດທີ 3: ຍົກສູງຄວາມສາດນໍາພາຂອງຫນ່ວຍພັກບ້ານສ້າງຫົວຫນ່ວຍປອດໃສ, ເຂັ້ມແຂງ, ໜັກແໜ້ນ
ບົດທີ 4: ການສ້າງບ້ານເປັນຫົວຫນ່ວຍພັດທະນາ.
ບົດທີ 5: ແກ້ໄຂຄວາມທຸກຍາກ ແລະ ການຜະລິດເປັນສິນຄ້າ.
ບົດທີ 6: ເອກະສານຄວາມຮູ້ພື້ນຖານກ່ຽວກັບຊາຍແດນ (ເອກະສານອົບຮົມປະຊາຊົນບັນດາເຜົ່າທີ່ຢູ່ລຽບຕາມຊາຍແດນ) ລວມມີ 17 ຄໍາຖາມ 17 ຄໍາຕອບ.
ຊຸດອົບຮົມຄັ້ງນີ້ເປັນການຍົກລະດັບຄວາມຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ແກ່ສະມາຊິກພັກ-ພະນັກງານ, ເລຂາພັກກຸ່ມບ້ານ, ເລຂາໜ່ວຍພັກບ້ານ, ຄູ-ອາຈານ, ປກຊ-ປກສ, ກອງຫຼອນບ້ານ ແລະ ອົງການຈັດຕັ້ງມະຫາຊົນຂອງບ້ານ ໃຫ້ກາຍເປັນຜູ້ນຳທີ່ເຂັ້ມແຂງ ແລະ ເປັນນັກພັດທະນາກອນທີ່ຫ້າວຫັນ, ດີເດັ່ນສາມາດນຳເອົາບົດຮຽນດັ່ງກ່າວໄປສຶກສາອົບຮົມປະຊາຊົນຢູ່ພາຍໃນບ້ານຂອງຕົນ ພ້ອມທັງເປັນເຈົ້າການໃນການແກ້ໄຂຄວາມທຸກຍາກ ແລະພັດທະນາບ້ານຂອງຕົນໃຫ້ກາຍເປັນບ້ານພັດທະນາໃນອະນາຄົດ.
ພາຍຫຼັງສຳເລັດການຝຶກອົບຮົມແລ້ວ ໄດ້ມີພິທີມອບໃບຢັ້ງຢືນໃຫ້ນັກຝຶກອົບຮົມ ຊຶ່ງມອບໂດຍ ທ່ານ ບຸນສາງ ອິນມະນີ ຮອງຫົວໜ້າຄະນະໂຄສະນາອົບຮົມແຂວງ.