ຍົກສູງການເມືອງ-ແນວຄິດ ໃຫ້ພະນັກງານກຸ່ມບ້ານນໍ້າຮາງ ເມືອງສໍາພັນ ແຂວງຜົ້ງສາລີ
ຊຸດອົບຮົມຄັ້ງນີ້ໄດ້ຈັດຂຶ້ນທີ່ສະໂມສອນກອງຮ້ອຍທະຫານຊາຍແດນ 115 ກຸ່ມບ້ານນໍ້າຮາງ ເມືອງສໍາພັນ ແຂວງຜົ້ງສາລີ ເປັນເວລາ 3 ວັນ ເລີ່ມແຕ່ວັນທີ 09-11/03/2021 ພາຍໃຕ້ການເປັນປະທານຮ່ວມຂອງ ສະຫາຍ ເພັງ ສຸລິເປົາ ຮອງຫົວໜ້າຄະນະໂຄສະນາອົບຮົມແຂວງຜົ້ງສາລີ ເປັນຜູ້ກ່າວເປີດຊຸດອົບຮົມ, ສະຫາຍ ຄໍາກອງ ທໍາມະເທວາ ຮອງຫົວໜ້າກົມອົບຮົມ ແລະ ສະຫາຍ ວັນໄຊ ອິນທະຈອນ ຫົວໜ້າກຸ່ມບ້ານນໍ້າຮາງ.
ຊຸດອົບຮົມຄັ້ງນີ້ມີຜູ້ເຂົ້າຮ່ວມອົບຮົມທັງໝົດ 43 ທ່ານ, ຍິງ 4 ທ່ານ ຊຶ່ງມາຈາກ 5 ບ້ານ ທີ່ຂຶ້ນກັບກຸ່ມບ້ານນໍ້າຮາງ, ມີສະມາຊິກພັກທັງໝົດ 21 ສະຫາຍ, ຍິງ 0 ສະຫາຍ. ໃນນັ້ນ, ມີເລຂາໜ່ວຍພັກບ້ານ 4 ສະຫາຍ, ຮອງເລຂາໜ່ວຍພັກບ້ານ 4 ສະຫາຍ, ປກສ ກຸ່ມບ້ານ, ກອງຮ້ອຍທະຫານຊາຍ 115, ກອງກໍ່ສ້າງຮາກຖານການເມືອງ 212,ແນວໂຮມບ້ານ, ຊາວໜຸ່ມບ້ານ, ສະຫະພັນແມ່ຍິງບ້ານ, ກອງຫຼອນບ້ານ, ນັກຮົບເກົ່າ, ແພດ ແລະ ອາຈານສອນ.ເນື້ອໃນເອກະສານອົບຮົມຄັ້ງນີ້ໄດ້ນໍາໃຊ້ 2ເອກະສານຄື: ເອກະສານຄວາມຮູ້ພື້ນຖານດ້ານການເມືອງ-ການປົກຄອງ, ການສ້າງບ້ານພັດທະນາ ແລະ ເອກະສານອົບຮົມປະຊາຊົນທີ່ຢູ່ລຽບຕາມຊາຍແດນ.
ຜ່ານການອົບຮົມການເມືອງ-ແນວຄິດໃຫ້ແກ່ຄະນະພັກກຸ່ມບ້ານ, ເລຂາ, ຮອງເລຂາໜ່ວຍພັກ, ອົງການປົກຄອງບ້ານ, ຫົວໜ້າໜ່ວຍງານ, ອົງການຈັດຕັ້ງມະຫາຊົນຂອງບ້ານ, ປກສ, ປກຊໄດ້ຍົກສູງຄວາມຮັບຮູ້-ເຂົ້າໃຈຕໍ່ແນວທາງນະໂຍບາຍຂອງພັກ-ລັດ,ພາລະບົດບາດ, ໜ້າທີ່ຄວາມຮັບຜິດຊອບຂອງຕົນ, ເພີ່ມສະຕິຕື່ນຕົວ,ເປັນເຈົ້າການປະກອບສ່ວນເຂົ້າໃນການປົກປັກຮັກສາຊາຍແດນ, ບ້ານຂອງຕົນ, ນໍາພາປະຊາຊົນທໍາການຜະລິດເປັນສິນຄ້າ ເພື່ອແກ້ໄຂຄວາມທຸກຍາກ ແລະ ສ້າງບ້ານຂອງຕົນໃຫ້ເປັນກາຍເປັນບ້ານພັດທະນາເທື່ອລະກ້າວ. ພາຍຫຼັງສໍາເລັດຊຸດອົບຮົມໄດ້ມີການມອບໃບຢັ້ງຢືນໃຫ້ນັກສໍາມະນາກອນຜູ້ທີ່ເຂົ້າຮ່ວມຊຸດຝຶກອົບຮົມດ່ັງກ່າວ.
ຂ່າວ: ຈ໋າຍໜໍ່ ພົມປັນຍາ