ກົມສັງລວມ ຄະນະໂຄສະນາອົບຮົມສູນກາງພັກ ສົມທົບກັບ ຄະນະໂຄສະນາອົບຮົມແຂວງ ສາລະວັນ ຈັດຕັ້ງຝຶກອົບຮົມວຽກງານສັງລວມ–ຫາງສຽງສັງຄົມ ຄັ້ງທີ III ຂຶ້ນທີ່ ແຂວງສາລະວັນ.
ໃນລະຫວ່າງ ວັນທີ 12-13 ກໍລະກົດ 2022 ກົມສັງລວມ ຄະນະໂຄສະນາອົບຮົມສູນກາງພັກ ໄດ້ສົມທົບກັບ ຄະນະໂຄສະນາອົບຮົມແຂວງສາລະວັນ ຈັດຕັ້ງຊຸດຝຶກອົບຮົມວຽກງານສັງລວມ-ຫາງສຽງສັງຄົມ ຂຶ້ນທີ່ຫ້ອງປະຊຸມ VIP ຂອງຫ້ອງວ່າການປົກຄອງແຂວງສາລະວັນ. ພາຍໃຕ້ການເປັນປະທານ ແລະ ກ່າວເປີດ ຂອງທ່ານ ຈັນສະໝອນ ພົມມະແສງ ຄະນະປະຈຳພັກແຂວງ, ຫົວໜ້າຄະນະໂຄສະນາແຂວງສາລະວັນ ໃຫ້ກຽດເຂົ້າຮ່ວມ ຂອງທ່ານ ນ. ແສງຕານ ແກ້ວອິນດາປິງ ຫົວໜ້າກົມສັງລວມ ຄະນະໂຄສະນາອົບຮົມສູນກາງພັກ, ພ້ອມດ້ວຍຄະນະຮັບຜິດ ຊອບຊຸດຝຶດອົບຮົມ ແລະ ມີນັກສໍາມະນາກອນ ເຂົ້າຮ່ວມທັງໝົດ 57 ສະຫາຍ, ຍິງ 14 ສະຫາຍ.
ການຈັດຕັ້ງຝຶກອົບຮົມໃນຄັ້ງນີ້ ແມ່ນເພື່ອເຮັດໃຫ້ຜູ້ເຂົ້າຮ່ວມຝຶກອົບຮົມ ມີຄວາມຮັບຮູ້ ແລະ ເຂົ້າໃຈ ບັນຫາພື້ນຖານກ່ຽວກັບວຽກງານຫາງສຽງສັງຄົມ, ວິທີການເກັບກໍາ ແລະ ການນໍາໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ, ການສ້າງຕາໜ່າງເພື່ອນຮ່ວມງານ ແລະ ວຽກງານຄົ້ນຄວ້າສັງລວມ ທັງໝົດນີ້ກໍເພື່ອຍົກສູງຄວາມຮັບຮູ້-ເຂົ້າໃຈຢ່າງເລິກເຊິ່ງ, ຮັບຮູ້ພາລະບົດບາດ ແລະ ຄວາມສໍາຄັນ ຕໍ່ກັບບັນດາບັນຫາດັ່ງກ່າວ ເພື່ອເຮັດໃຫ້ນັກສໍາມະນາກອນສາມາດນໍາໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຂອງຕົນ ແລະ ສາມາດເປັນເສນາທິການໃຫ້ແກ່ຄະນະພັກ, ຄະນະນໍາ ໃນການສະຫຼຸບສັງລວມບັນດາບັນຫາຕ່າງໆ ເຊັ່ນ: ດ້ານດີທີ່ຄວນສົ່ງເສີມ ແລະ ດ້ານຫຍໍ້ທໍ້ທີ່ຄວນປັບປຸງແກ້ໄຂ ເພື່ອສະເໜີໃຫ້ຂັ້ນເທິງຊອກຫາວິທີການແກ້ໄຂໃຫ້ຖຶກຕ້ອງ ແລະ ທັນການ.
ໃນພິທີປິດຊຸດຝຶກອົບຮົມ ໄດ້ຮັບຟັງການໂອ້ລົມ ຂອງທ່ານ ບຸນທະວີ ດວງລາສີ ຮອງ ເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ ໂດຍທ່ານໄດ້ຍົກໃຫ້ເຫັນເຖິງຄວາມສໍາຄັນ ຂອງວຽກງານສັງ ລວມ-ຫາງສຽງສັງຄົມ ເຊິ່ງເປັນວຽກໜຶ່ງທີ່ຈໍາເປັນ ແລະ ມີຄວາມສໍາຄັນໃນການນໍາພາ-ຊີ້ນໍາຂອງພັກ ແລະ ການຄຸ້ມຄອງ-ບໍລິຫານຂອງລັດ ພ້ອມນັ້ນ, ຍັງໄດ້ເນັ້ນໃຫ້ຄະນະພັກຂອງບັນດາຫ້ອງການ, ກົມກອງ ແລະ ພາກສ່ວນທີ່ກ່ຽວຂ້ອງ ຍົກສູງຄວາມຮັບຜິດຊອບໃນການຕິດຕາມບັນດາການເຄື່ອນໄຫວ ແລະ ສະພາບແນວຄິດ-ຫາງສຽງສັງຄົມຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ທີ່ມີຕໍ່ການເຄື່ອນໄຫວວຽກງານດ້ານຕ່າງໆໃນແຕ່ລະຂົງເຂດ ໃນຄວາມຮັບຜິດຊອບຂອງຕົນ ພ້ອມທັງເປັນເຈົ້າການວິເຄາະ, ວິໄຈບັນຫາທີ່ເກີດຂຶ້ນໃຫ້ລະອຽດ, ຈະແຈ້ງ, ຖືກຕ້ອງຊັດເຈນ ແລະ ຊອກຫາວິທີການແກ້ໄຂໃຫ້ຖືກຕ້ອງ ແລະ ທັນການ.
