ທ່ານ ສຈ ປອ ກິແກ້ວ ໄຂຄໍາພິທູນ ຄະນະເລຂາທິການ.

ສ້າງຂື້ນເມື່ອ ວັນພະຫັດ, 23 ສິງຫາ 2018 07:52

ທ່ານ ສຈ ປອ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ ເລຂາຄະນະພັກ ຫົວໜ້າຄະນະໂຄ ສະນາອົບຮົມສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນ ໂຄສະນາສຶກສານະຄອນ ໂຮ່ຈີ່ມິນ ສສ. ຫວຽດນາມ.

      ໃນວັນທີ 17 ສິງຫາ 2018 ຜ່ານມາ. ທີ່ຫ້ອງຮັບແຂກຊັ້ນ (5) ຂອງຄະນະໂຄສະນາອົບຮົມສູນກາງພັກ. ທ່ານ ສຈ ປອ ກິແກ້ວ ໄຂຄໍາພິທູນ  ຄະນະເລຂາທິການສູນກາງພັກ ເລຂາຄະນະພັກ

ຫົວໜ້າຄະນະໂຄສະນາອົບຮົມສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນ ໂຄສະນາສຶກສາ ນະຄອນ ໂຮ່ຈີ່ມິນ ສສ. ຫວຽດນາມ ເຊິ່ງນໍາໂດຍ ສະຫາຍ ເຈິ່ນທິທື ຄະນະປະຈໍາພັກ ຫົວໜ້າໂຄສະນາສຶກ ສາ ນະຄອນ ໂຮ່ຈີ່ມິນ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະຮ່ວມເຮັດວຽກກັບຄະນະໂຄສະນາອົບຮົມນະຄອນຫຼວງວຽງຈັນ, ເຂົ້າຮ່ວມມີ: ບັນດາຫົວໜ້າ ພາຍໃນຄອສພ.

     ໃນໂອກາດດັ່ງກ່າວ ທ່ານ ສຈ ປອ ກິແກ້ວ ໄຂຄໍາພິທູນ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການເດີນ ທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະຮ່ວມເຮັດວຽກກັບຄະນະໂຄສະນາອົບຮົມນະຄອນຫຼວງວຽງຈັນຂອງ ສະຫາຍ ເຈິ່ນທິທື ພ້ອມດ້ວຍຄະນະ ໃນຄັ້ງນີ້; ຊຶ່ງເປັນການປະກອບສ່ວນເຂົ້າໃນການຮັດແໜ້ນຄວາມສາມັກຄີ, ການຊ່ວຍເຫຼືອເຊິ່ງກັນ ແລະ ກັນລະຫວ່າງໂຄສະນາສຶກສາ ນະ ຄອນ ໂຮ່ຈີ່ມິນ ແລະ ຄະນະໂຄສະນາອົບຮົມນະຄອນຫຼວງວຽງຈັນ ທັງເປັນການປະກອບສ່ວນເພີ່ມພູນຄູນສ້າງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການພົວພັນຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ແມ່ນໂຄສະນາຂອງສອງນະຄອນ ໃຫ້ເຂົ້າສູ່ລ່ວງເລິກ ແລະ ແໜ້ນແຟ້ນຍິ່ງໆຂຶ້ນ. ພ້ອມນັ້ນທ່ານ ຍັງກ່າວເຖິງການພົບປະແລກປ່ຽນບົດຮຽນຮ່ວມກັນໃນການເສີມສ້າງສາຍພົວພັນ ແລະ ການໄປມາຫາສູ່ ລະຫວ່າງ ໂຄສະນາອົບ ຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາ ສສ ຫວຽດນາມ ໃຫ້ມີການພັດທະນາຂຶ້ນເປັນກ້າວໆ, ສະພາບການເຄື່ອນໄຫວໃນການປະຕິບັດໜ້າທີ່ວຽກງານໃນໄລຍະຜ່ານມາຂອງ ໂຄສະນາອົບຮົມສູນກາງພັກປະຊາຊົນປະຕິວັດລາວ, ສະຖຽນລະພາບທາງດ້ານການເມືອງ, ການຂະຫຍາຍຕົວຂອງເສດຖະກິດ-ສັງຄົມ, ວຽກງານຕ່າງປະເທດອັນເປັນພົ້ນເດັ່ນ ແລະ ອື່ນໆ ໃຫ້ສະຫາຍ ເຈິ່ນທິທື ພ້ອມດ້ວຍຄະນະ ໄດ້ຊາບ; ນອກນັ້ນ ທ່ານ ຍັງໄດ້ກ່າວຄໍາອວຍພອນຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງ ສະຫາຍ ເຈິ່ນທິທື ພ້ອມດ້ວຍຄະນະ ຈົ່ງປະສົບຜົນສໍາເລັດຢ່າງຈົບງາມ.