ຄະນະໂຄສະນາອົບຮົມສູນກາງພັກ ເປີດກອງປະ..

ສ້າງຂື້ນເມື່ອ ວັນພະຫັດ, 23 ສິງຫາ 2018 07:59

ຄະນະໂຄສະນາອົບຮົມສູນກາງພັກ ເປີດກອງປະຊຸມສ້າງ​ແຜນ​ກຳນົດ​ພະນັກງານ​ນຳພາ-​ຄຸ້ມ​ຄອງ ຂອງ​ຄະນະ​​ໂຄສະນາ​ອົບຮົມ​ສູນ​ກາງ​ພັກ.

        ​ໃນ​ວັນ​ທີ 20 ສິງຫາ 2018 ຜ່ານ​ມາ, ຄະນະ​ໂຄສະນາ​ອົບຮົມ​ສູນ​ກາງ​ພັກ​ ໄດ້​ເປີດ​ກອງ​ປະຊຸມ​ສ້າງ​ແຜນ​ກຳນົດ​ພະນັກງານ​ນຳພາ-​ຄຸ້ມ​ຄອງ ຂອງ​ຄະນະ​ໂຄສະນາ​ອົບຮົມ​ສູນ​ກາງ​ພັກຂຶ້ນ ທີ່​ຫ້ອງ​ປະຊຸມ​​ໃຫ່ຍຂອງ​ຄະນະ​ໂຄສະນາ​ອົບຮົມ​ສູນ​ກາງ​ພັກ (ຫຼັກ 6).

​ໂດຍ​ພາຍ​ໃຕ້​ການ​ເປັນ​ປະທານ​ຂອງ ທ່ານ ສຈ.ປອ ກິ​ແກ້ວ ​ໄຂ​ຄຳ​ພິທູນ ຄະນະ​ເລຂາທິການ​ສູນ​ກາງ​ພັກ ​ເລຂາ​ຄະນະ​ພັກ ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ, ມີບັນ ດາ​ຄະນະ​ພັກ, ຮອງ​ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ, ພະນັກງານ​ປະຕິວັດ​ ອະ​ວຸ​ໂສ​ບຳນານ, ອະ​ດີດ​ຮອງ​ ຄອສພ, ຜູ້ຕາງໜ້າຄະນະ​ຈັດຕັ້ງສູນ​ກາງ​ພັກ, ຫົວໜ້າກົມ, ຮອງ​ກົມ, ຫົວໜ້າພະ​ແນ​ກ, ຮອງ​ພະນັກ ພ້ອມ​ດ້ວຍ​ພະນັກງານ​ວິຊາ​ການ ທົ່ວ ຄອສພ ​ເຂົ້າຮ່ວມ​ຢ່າງ​ພ້ອມພຽງ.

          ​ໃນ​ພິທີ ທ່ານ ສຈ.ປອ ກິ​ແກ້ວ ​ໄຂ​ຄຳ​ພິທູນ ​ໄດ້​ຍົກໃຫ້ເຫັນຈຸດປະສົງ ແລະ ຄວາມໝາຍສຳຄັນ ຂອງ ການສ້າງແຜນກຳນົດພະນັກງານນຳພາ-ຄຸ້ມຄອງ ເຊິ່ງເປັນມາດຕະຖານວັດແທກ, ເປັນພື້ນຖານການເລືອກເຟັ້ນ ສ້າງແຜນກຳນົດ, ກໍ່ສ້າງ, ບຳລຸງ, ຕີລາຄາ, ສັບຊ້ອນ,ຈັດວາງ, ແຕ່ງຕັ້ງພະນັກງານເຂົ້າໃນຕຳແໜ່ງນຳພາ-ຄຸ້ມ ຄອງ​ແຕ່ລະ​ຂັ້ນ ໃຫ້ຖືກຕ້ອງເໝາະສົມ, ທັງເປັນບ່ອນອີງໃຫ້ພະນັກງານ ສະມາຊິກພັກ ຕ້ອງຝຶກຝົນຫຼໍ່ຫຼອມ ຕົນເອງທາງດ້ານຕ່າງໆ, ມີຄວາມເປັນເອກະພາບສູງຕໍ່ແນວທາງນະໂຍບາຍຂອງພັກ, ມີຄວາມຮັບຜິດຊອບສູງ ຕໍ່ໜ້າທີ່ການເມືອງ, ມີຄຸນສົມບັດ ສິນທຳປະຕິວັດ ເພື່ອກ້າວໄປເຖິງການເປັນພະນັກງານນຳພາ-ຄຸ້ມຄອງໃນຕໍ່ ໜ້າ.

          ຫຼັງຈາກນັ້ນ ທ່ານ ອານົງສັກ ອິນທະວົງ ຄະນະພັກ ຫົວໜ້າກົມຈັດຕັ້ງ ຄອສພ ໄດ້ຂຶ້ນຜ່ານບົດສະຫຼຸບ ການສ້າງແຜນກຳນົດພະນັກງານຂັ້ນນຳພາ-ຄຸ້ມຄອງ ຂອງຄະນະໂຄສະນາອົບຮົມສູນກາງພັກ, ພ້ອມທັງຕີລາຄາ ດ້ານດີ ແລະ ດ້ານອ່ອນ ຂອງການກຳນົດຕຳແໜ່ງງານໃນໄລຍະຜ່ານມາ. ພ້ອມນັ້ນ ທ່ານ ສີ​ປະ​ເສີດ ​ແສນ​ສະ ຫວັດ ຄະນະ​ພັກ ຮອງ​ຫົວໜ້າ ຄອສພ ​ກໍໄດ້ຂຶ້ນຜ່ານ​ມະຕິ​ຕົກລົງ​ຂອງ​ຄະນະ​ພັກ ຄະນະ​ໂຄສະນາ​ອົບຮົມ​ສູນ​ກາງ​ພັກ ວ່າ​ດ້ວຍ​ມາດຕະຖານ​ຂອງ​ພະນັກງານ​ນຳພາ-​ຄຸ້ມ​ຄອງ ຂອງ​ຄະນະ​ໂຄສະນາ​ອົບຮົມ​ສູນ​ກາງ​ພັກ ຕໍ່ທີ່​ປະຊຸມ. ​ເພື່ອ​ສ້າງ​ຄວາມ​ຮັບ​ຮູ້, ​ເຂົ້າ​ໃຈ ພ້ອມ​ກັນ​ນຳ​ໄປ​ຈັດຕັ້ງປະຕິບັດ​ໃຫ້​ຖືກຕ້ອງ ​ແລະ ມີ​ປະສິດທິ​ຜົນ.