ພິທີພົບປະລະຫວ່າງຜູ້ມີສິດເລືອກຕັ້ງ ກັບ ສະມາຊິກ..

ສ້າງຂື້ນເມື່ອ ວັນພຸດ, 27 ມີນາ 2019 07:00

ພິທີພົບປະລະຫວ່າງຜູ້ມີສິດເລືອກຕັ້ງ ກັບ ສະມາຊິກສະພາແຫ່ງຊາດ ຊຸດທີ VIII ປະຈໍາເຂດເລືອກຕັ້ງທີ 1 ນະຄອນ ຫຼວງວຽງຈັນ ຢູ່ທີ່ຄະນະໂຄສະນາອົບຮົມສູນກາງພັກ.

       ໃນຕອນບ່າຍຂອງວັນທີ 14 ມີນາ 2019 ຜ່ານມາ, ຄະນະໂຄສະນາອົບຮົມສູນກາງພັກ ໄດ້ໃຫ້ກຽດຕ້ອນຮັບ ສະມາຊິກສະພາແຫ່ງຊາດ ຊຸດທີ VIII ປະຈໍາເຂດເລືອກຕັ້ງທີ I ນະຄອນຫຼວງວຽງຈັນ ຂຶ້ນທີ່ ຫ້ອງປະຊຸມໃຫຍ່ ຄອ ສພ (ຫຼັກ 6)

ເຊິ່ງນໍາໂດຍ ທ່ານ ປອ ນາງ ພອນເພັດ ບຸບຜາ ຮອງປະ ທານກໍາມາທິການວັດທະນະທໍາ-ສັງຄົມ ສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ VIII ປະຈໍາເຂດເລືອກຕັ້ງທີ I ນະຄອນຫຼວງວຽງຈັນ; ທ່ານ ນາງ ຄໍາຟອງ ພູມວົງໄຊ ຮອງປະທານ ສະພາປະຊາຊົນ ນະຄອນຫຼວງວຽງ ຈັນ, ຮອງປະທານ ຄະນະສະມາຊິກສະພາແຫ່ງຊາດ ຊຸດທີ VIII ປະຈໍາເຂດເລືອກຕັ້ງທີ I ນະຄອນຫຼວງວຽງຈັນ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ I; ທ່ານ ປຣະຈິດ ໄຊຍະວົງ ຮອງປະທານສະພາການຄ້າ ແລະ ອຸດສະ ຫະກໍາ ນະຄອນຫຼວງວຽງຈັນ, ປະທານສະມາ ຄົມຜູ້ຈັດສົ່ງສິນຄ້າລະຫວ່າງປະ ເທດ, ສະມາຊິກສະພາແຫ່ງຊາດ ຊຸດທີ VIII; ເຂົ້າຮ່ວມມີ: ທ່ານ ປອ ຄໍາໝັ້ນ ຈັນທະລັງສີ ຮອງເລຂາຄະນະ ພັກ ຮອງຫົວໜ້າຄະນະໂຄສະ ນາອົບຮົມສູນກາງພັກ, ບັນດາຄະນະພັກ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ຕະຫຼອດຮອດພະນັກງານວິຊາການທົ່ວ ຄອສພ ເຂົ້າຮ່ວມຢ່າງພ້ອມພຽງ.

      ໃນພິທີ ທ່ານ ນາງ ສົມພອຍ ພົມມະຈັກ ຫົວໜ້າຫ້ອງການ ຄອສພ ໄດ້ຂຶ້ນກ່າວຈຸດປະສົງໃນການພົບປະຄັ້ງນີ້ ແມ່ນເພື່ອຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນະຄອນຫຼວງ ຊຸດທີ I ແລະ ຮັບຟັງຄໍາຄິດຄໍາເຫັນ, ຄໍາສະເໜີຂອງບັນດາທ່ານພະນັກງານຫຼັກແຫຼ່ງພາຍໃນ ຄອສພ ກໍຄືຜູ້ມີສິດເລືອກຕັ້ງຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ບັນຫາສັງຄົມ; ຫຼັງຈາກນັ້ນ ທ່ານ ປອ ຄໍາໝັ້ນ ຈັນທະລັງສີ ໄດ້ໃຫ້ກຽດຂຶ້ນຜ່ານບົດລາຍງານສະພາບການເຄື່ອນໄຫວປະຕິບັດໜ້າທີ່ວຽກງານອັນພົ້ນເດັ່ນທາງດ້ານວຽກງານການເມືອງ ແລະ ວິຊາສະເພາະໃນໄລຍະຜ່ານມາ, ພາ ລະບົດບາດ, ໜ້າທີ່ຕົ້ນຕໍຂອງ ຄະນະໂຄສະນາອົບຮົມສູນກາງພັກ ຕໍ່ພິທີດັ່ງກ່າວ; ໃນການພົບປະຄັ້ງນີ້ ສສຊ ໄດ້ພັດປ່ຽນກັນລາຍງານຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ I ເຊິ່ງໃນກອງປະຊຸມໄດ້ມີການພິຈາລະນາ ແລະ ຮັບຮອງເອົາຫຼາຍບັນຫາສໍາຄັນຂອງຊາດ ເປັນຕົ້ນແມ່ນບົດລາຍງານຂອງນາຍົກລັດຖະມົນຕີກ່ຽວກັບການເຄື່ອນໄຫວວຽກງານທີ່ພົ້ນເດັ່ນຂອງ ລັດຖະບານປະຈໍາປີ 2018 ແລະ ທິດທາງແຜນການປະຈໍາປີ 2019; ບົດລາຍງານກ່ຽວກັບການຈັດຕັ້ງປະຕິບັດວຽກງານໃນຂົງເຂດຕ່າງໆ, ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ຄວາມຫຍຸ້ງຍາກທາງດ້ານແຜນງົບປະມານ, ເງິນຕາ, ການພັດທະນາເສັ້ນທາງລົດໄຟລາວ-ຈີນ, ລາຄາສິນຄ້າໃນທ້ອງຕະຫຼາດ ແລະ ບັນຫາໜີ້ສິນຄຸມເຄືອ, ການສໍ້ໂກ່ງຊັບພົນລະເມືອງ, ການສໍ້ລາດບັງຫຼວງທີ່ນັບມື້ນັບມີທ່າອ່ຽງເພີ້ມຂຶ້ນ, ຄວາມບໍ່ໂປ່ງໃສໃນຂະບວນການຍຸຕິທໍາ ທີ່ຕ້ອງໄດ້ຮັບການແກ້ໄຂຢ່າງເປັນທໍາ ແລະ ຮີບດ່ວນ; ນອກນັ້ນ ຍັງໄດ້ມີການສະເໜີຄໍາຄິດຄໍາເຫັນຂອງ ບັນດາພະນັກງານຫຼັກແຫຼ່ງຂອງ ຄອສພ ຕໍ່ ສສຊ ເພື່ອນໍາໄປຄົ້ນຄວ້າພິຈາລະນາ ແລະ ແກ້ໄຂບັນດາບັນຫາເຫຼົ່ານັ້ນໃຫ້ຕົກໄປເທື່ອລະກ້າວ.