ຄະນະໂຄສະນາອົບຮົມສູນກາງພັກ ຮ່ວມກັບ ກະຊວງ...

ສ້າງຂື້ນເມື່ອ ວັນພຸດ, 24 ເມສາ 2019 08:08

ຄະນະໂຄສະນາອົບຮົມສູນກາງພັກ ຮ່ວມກັບ ກະຊວງການຕ່າງປະເທດ ຈັດພິທີປາຖະກະຖາກ່ຽວກັບສະພາບການທີ່ພົ້ນເດັ່ນຂອງພາກພຶ້ນ-ສາກົນ ແລະ ນະໂຍບາຍການຕ່າງປະເທດຂອງພັກເຮົາ.

       ໃນຕອນບ່າຍຂອງວັນທີ 22 ເມສາ 2019 ຜ່ານມາ, ຄະນະໂຄສະນາອົບຮົມສູນກາງພັກ ຮ່ວມກັບ ກະຊວງການຕ່າງປະເທດ ຈັດພິທີປາ ຖະກະຖາກ່ຽວກັບສະພາບການທີ່ພົ້ນເດັ່ນຂອງພາກພຶ້ນ

ແລະ ສາກົນ ຂຶ້ນທີ່ ຫ້ອງປະຊຸມໃຫຍ່ ຄອສພ (ຫຼັກ6); ໃຫ້ກຽດປາຖະກະຖາໂດຍ ທ່ານ ສະເຫລີມໄຊ ກົມມະສິດ ກໍາມະການສູນກາງພັກ, ລັດຖະມົນຕີກະ ຊວງການຕ່າງປະເທດ; ເຂົ້າຮ່ວມມີ: ບັນດາຮອງເລຂາຄະນະພັກ, ຄະນະນໍາຂອງບັນດາກະຊວງ-ອົງ ການອ້ອມຂ້າງຂັ້ນສູນ ກາງ, ຫົວໜ້າ, ຮອງຫົວໜ້າບັນນາທິການສື່ມວນຊົນ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ພະນັກງານວິຊາການ ຂອງ ຄະນະໂຄສະນາອົບຮົມສູນກາງພັກ ແລະ ພະນັກງານທີ່ເຮັດວຽກງານການເມືອງ-ແນວຄິດຂອງອົງ ການພັກ ແລະ ລັດ.

       ໃນພິທີດັ່ງກ່າວ ທ່ານ ສະເຫລີມໄຊ ກົມມະສິດ ໄດ້ຍົກໃຫ້ເຫັນເຖິງທັດສະນະກ່ຽວກັບການຕີລາຄາສະພາບການໃນພາກພຶ້ນ ແລະ ສາກົນ ທີ່ນັບນື້ນັບມີການຜັນແປຢ່າງວ່ອງໄວ, ສະລັບຊັບຊ້ອນ ແລະ ຄາດຄະເນໄດ້ຍາກ ເປັນຕົ້ນແມ່ນບັນຫາຂໍ້ຂັດແຍ່ງລະຫວ່າງປະເທດມະຫາອໍານາດ, ບັນຫາການກໍ່ການຮ້າຍ, ບັນຫາຕາເວັນອອກກາງ, ບັນຫາອະທິ ປະໄຕ, ເຊື້ອຊາດ, ສາສະໜາ, ການປະທ້ວງຮຽກ ຮ້ອງສິດ, ບັນຫາການອົບພະຍົບ, ຂໍ້ຂັດແຍ່ງທາງດ້ານເສດຖະກິດ-ການຄ້າ, ການຂໍຖອນຕົວອອກຈາກສະຫະພາບເອີຣົບຂອງອັງກິດ ແລະ ອື່ນໆ. ບັນຫາຂ້າງເທີງນັ້ນລ້ວນແລ້ວແຕ່ມີການຜັນແປໄປໃນຫຼາຍຮູບແບບທີ່ມີລັກສະນະຮຸນແຮງ ແລະ ຂະຫຍາຍເປັນວົງກວ້າງ. ນອກຈາກນັ້ນ ທ່ານຍັງຍົກໃຫ້ເຫັນເຖິງມາດຕະການ ແລະ ແຜນການໃນຕໍ່ໜ້າຂອງວຽກງານການຕ່າງປະເທດ; ຕໍ່ກັບສະພາບການທີ່ມີຄວາມສັບສົນທີ່ມີທັງກາລະໂອກາດ ແລະ ສິ່ງທ້າທ້າຍນີ້, ສປປ ລາວ ພາຍໃຕ້ການນໍາພາອັນສະຫຼາດສ່ອງໃສຂອງພັກ ກໍຄືການນໍາຂັ້ນສູງຂອງ ສປປ ລາວ ໃນແຕ່ລະຍຸກສະໄໝ ໄດ້ດໍາເນີນນະໂຍບາຍການຕ່າງປະເທດຢ່າງຄ່ອງແຄ້ວ, ສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ສ້າງຄວາມໄວ້ເນື້ອເຊື່ອໃຈໃຫ້ແກ່ບັນດາປະເທດເພື່ອນມິດຢູ່ໃກ້ຢູ່ໄກ, ພ້ອມນັ້ນຍັງເຮັດໃຫ້ບົດບາດ ແລະ ອິດທິພົນຂອງ ສປປ ລາວນັບມື້ນັບສູງ ຂຶ້ນໃນເວທີພາກພຶ້ນ ແລະ ສາກົນ ສາ ມາດຍາດໄດ້ ຜົນສໍາເລັດໃນການເຄື່ອນໄຫວວຽກງານຕ່າງປະເທດໄດ້ຫຼາຍດ້ານ, ສືບຕໍ່ຢຶດໝັ້ນແນວທາງການຕ່າງ ປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອໍານວຍໃຫ້ແກ່ການສ້າງສາພັດທະນາປະ ເທດຊາດໃຫ້ນັບມື້ນັບເຂັ້ມແຂງກ້າວໄປສູ່ເປົ້າໝາຍເພື່ອເຮັດໃຫ້ປະເທດຊາດ ຫຼຸດພົ້ນອອກຈາກສະ ຖານະພາບດ້ອຍພັດທະນາ ແລະ ສ້າງປະເທດໃຫ້ເປັນປະເທດທີ່ມັ່ງຄັ່ງ, ປະຊາຊົນມີຄວາມຜາສຸກ, ສັງຄົມມີຄວາມຍຸດຕິທໍາ, ປະຊາທິປະໄຕມີຄວາມປອງດອງ ແລະ ສີວິໄລ; ພ້ອມນັ້ນ ທ່ານຍັງໄດ້ເໜັ້ນໜັກໃຫ້ທຸກພາກສ່ວນຕ້ອງໄດ້​ພ້ອມ​ກັນ​ສຸ່ມ​ໃສ່​ຄົ້ນຄວ້າ​ຢ່າງ​ຈິງ​ຈັງ ​ເພື່ອ​ສ້າງ​ແຜນ​ຍຸດ​ທະ​ສາດ​ໃນໄລຍະ​ຍາວ​ກ່ຽວ​ກັບ​ການ​ເຄື່ອນ​ໄຫວ​ທາງດ້ານການ​ທູດ​ຮັບ​ໃຊ້​ເສດຖະກິດ ​ໃຫ້​ມີ​ປະສິດທິ​ຜົນ, ປະສົມ​ປະສານ​ຢ່າງ​ກົມກຽວ ລະ ຫວ່າງ​ ການ​ທູດດ້ານ​ການ​ເມືອງ, ການ​ທູດ​ເສດຖະກິດ, ການ​ທູດ​ກິລາ-ວັດທະນະ​ທໍາ ​ແລະ ການ​ທູດ​ປະຊາຊົນ ​ເພື່ອ​ນໍາ​ເອົາ​ຜົນ​ປະ​ໂຫຍ​ດສູງ​ສຸດມາ​ໃຫ້ປະ​ເທດ​ຊາດ.