ຄະນະໂຄສະນາອົບຮົມສູນກາງພັກ ຮ່ວມກັບ ສູນ...

ສ້າງຂື້ນເມື່ອ ວັນສຸກ, 12 ກໍລະກົດ 2019 08:42
ຂຽນໂດຍ ສົມພິນິດ

ຄະນະໂຄສະນາອົບຮົມສູນກາງພັກ ຮ່ວມກັບ ສູນກາງແນວລາວສ້າງຊາດ ຈັດພິທີປາຖະກະຖາລະ ນຶກວັນຄ້າຍວັນເກີດ ຂອງປະທານ ສຸພານຸວົງ ຄົບຮອບ 110 ປີ.

      ໃນຕອນເຊົ້າຂອງວັນທີ 10 ກໍລະກົດ 2019 ຜ່ານມາ, ຄະນະໂຄສະນາອົບຮົມສູນກາງພັກ ຮ່ວມກັບ ສູນກາງແນວລາວສ້າງຊາດ ໄດ້ຈັດພິທີປາຖະກະຖາລະນຶກວັນຄ້າຍວັນເກີດ ຂອງປະທານ ສຸພານຸວົງ ຄົບຮອບ 110 ປີ

ຂຶ້ນທີ່ ຫ້ອງປະຊຸມໃຫຍ່ ຄອສພ (ຫຼັກ6);   ໃຫ້ກຽດປາຖະກະຖາໂດຍ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ເຂົ້າຮ່ວມມີ: ເລຂາ, ຮອງເລຂາຄະນະພັກກະຊວງ, ອົງການ, ບັນດາຫົວໜ້າສື່ມວນຊົນ, ຫົວໜ້າກົມ, ຮອງກົມ, ພະແນກການຕ່າງໆ ແລະ ພະນັກງານພາຍໃນ ຄອສພ ກໍໄດ້ເຂົ້າຮ່ວມຢ່າງພ້ອມ ພຽງ.

        ໃນພິທີປາຖະກະຖາຄັ້ງນີ້ ທ່ານ ປອ ໄຊສົມພອນ ພົມວິຫານ ໄດ້ຍົກໃຫ້ເຫັນເຖິງຊີວິດການ ເຄື່ອນໄຫວ ແລະ ຜົນງານການເຄື່ອນໄຫວປະຕິວັດ, ຄຸນງາມຄວາມດີ ຂອງປະທານ ສຸພານຸວົງ ເຊິ່ງ ທ່ານ ແມ່ນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ເປັນນັກຮົບຮັກຊາດຜູ້ ທໍາອິດ ທີ່ໄດ້ເສຍສະຫຼະທຸກສິ່ງທຸກຢ່າງເພື່ອການປະຕິວັດຕະຫຼອດມາ ແລະ ທ່ານກໍແມ່ນຜູ້ໜຶ່ງທີ່ມີ ສະຕິ ແລະ ລະບຽບວິໄນຕໍ່ການຈັດຕັ້ງສູງ, ນັບຖືໝູ່ຄະນະ, ມີຄວາມເອື້ອເຝື້ອເພື່ອແຜ່ຮັກແພງ ມິດ ສະຫາຍຢ່າງຈິງໃຈ ບໍ່ວ່າຈະຢູ່ໃນຖານະຕໍາແໜ່ງໃດເພິ່ນກໍໄດ້ທຸ່ມເທ່ເຫື່ອແຮງ, ອຸທິດຄວາມຮູ້ຄວາມ ສາມາດ ເພື່ອພາລະກິດປະຕິວັດ, ເພື່ອຊາດ ແລະ ເພື່ອປະຊາຊົນຢ່າງບໍລິສຸດໃຈ, ເວົ້າລວມ ພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວທຸກທົ່ວໜ້າ; ເວົ້າສະເພາະປະທານ ສຸພານຸວົງ ໄດ້ເດີນຕາມ ເສັ້ນທາງຂອງພັກ, ຄວາມສາມາດ, ຄຸນນະທໍາ ແລະ ອິດທິພົນຂອງທ່ານໄດ້ກາຍເປັນສິ່ງກະຕຸກຊຸກຍູ້ ປຸກລະດົມດຶງດູດປະຊາຊົນເຜົ່າຕ່າງໆ, ຊັ້ນຄົນທີ່ຢູ່ພາຍໃນ ແລະ ຕ່າງປະເທດ ພ້ອມກັນປະກອບ ສ່ວນສ້າງກ້ອນກໍາລັງສາ ມັກຄີເປັນຈິດໜຶ່ງໃຈດຽວ ເຊິ່ງເປັນປັດໃຈອັນສໍາຄັນທີ່ຮັບປະກັນໄຊຊະນະ ຂອງ ການປະຕິວັດຂອງປະເທດເຮົາໃນແຕ່ລະໄລຍະ ສະນັ້ນ ຜົນງານ, ແບບແຜນການດໍາລົງຊີວິດ ແລະ ຄຸນງາມ ຄວາມດີຂອງປະທານ ສຸພານຸວົງ ໄດ້ກາຍເປັນແວ່ນແຍງອັນໃສແຈ້ງ ແລະ ທັງເປັນ ບົດຮຽນອັນລໍ້າຄ່າໃຫ້ແກ່ຄົນຮຸ່ນຫຼັງໄດ້ສືບທອດ ຮໍ່າຮຽນເອົາແບບຢ່າງ ແລະ ຖືກຈາລຶກໄວ້ໃນປະ ຫວັດສາດຂອງຊາດເຮົາຢ່າງບໍ່ມີວັນລືມ.