ທ່ານເອກອັກຄະລັດຖະທູດ ສປປ ເກົາຫຼີເຂົ້າຢ້ຽມຂຳນັບ...

ສ້າງຂື້ນເມື່ອ ວັນຈັນ, 12 ສິງຫາ 2019 08:14
ຂຽນໂດຍ ຄອນສະຫວັນ

ທ່ານເອກອັກຄະລັດຖະທູດ ສປປ ເກົາຫຼີເຂົ້າຢ້ຽມຂຳນັບ ທ່ານ ສີປະເສີດ ແສນສະຫວັດ ຮອງຫົວໜ້າຄະນະໂຄສະນາອົບຮົມສູນກາງພັກ

 

ໃນຕອນເຊົ້າວັນທີ 07 ສິງຫາ 2019 ຜ່ານມາ. ສະຫາຍ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ

ໄດ້ຕ້ອນຮັບການເຂົ້າຢ້ຽມຂຳນັບຂອງສະຫາຍ ລີ ຢົງ ຊົນ ເອກອັກຄະລັດຖະທູດຜູ້ມີອຳນາດເຕັມແຫ່ງ ສປປ ເກົາຫຼີປະຈຳ ສປປ ລາວເນື່ອງໃນໂອກາດທີ່ທ່ານໄດ້ມາເປັນເອກອັກຄະລັດຖະທູດຜູ້ມີອຳນາດເຕັມແຫ່ງ ສປປ ເກົາຫຼີປະຈຳ ສປປ ລາວຜູ້ໃໝ່.

          ໃນໂອກາດດັ່ງກ່າວ ສະຫາຍ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການມາຢ້ຽມຢາມແລະ ເຮັດວຽກ ຢູ່ ຄອສພ ຂອງສະຫາຍ ລີ ຢົງ ຊົນ ເອກອັກຄະລັດຖະທູດ ສປປ ເກົາຫຼີປະຈຳ ສປປລາວ. ການພົບປະສອງຝ່າຍໃນຄັ້ງນີ້ ໄດ້ສະແດງໃຫ້ເຫັນເຖິງການຮັດແໜ້ນຄວາມສາມັກຄີທີ່ເປັນມູນເຊື້ອລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ- ສປປ ເກົາຫຼີ.

          ສະຫາຍ ລີ ຢົງ ຊົນ ເອກອັກຄະລັດຖະທູດ ສປປ ເກົາຫຼີປະຈຳ ສປປລາວຍັງໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນຖານະເພື່ອນມິດທີ່ສະໜິດສະໜົມຮ່ວມອຸດົມການດຽວກັນ, ພ້ອມໃນນັ້ນທ່ານໄດ້ລາຍງານສະພາບການທີ່ພົ້ນເດັ່ນ, ຜົນງານການເຄື່ອນໄຫວ ແລະ ການປະຕິບັດໜ້າທີ່ວຽກງານ ຂອງຕົນຢູ່ ສປປລາວໃຫ້ ສະຫາຍ ສີປະເສີດ ແສນສະຫວັດ ຊາບໂດຍສັງເຂບ.

ຈຸດປະສົງຂອງການຢ້ຽມຢາມ ແລະ ພົບປະໃນຄັ້ງນີ້ກໍເພື່ອແລກປ່ຽນບົດຮຽນປຶກສາຫາລືກ່ຽວກັບວຽກງານໂຄສະນາອົບຮົມພາຍໃຕ້ຫົວຂໍ້ດັ່ງລຸ່ມນີ້:

  1. ຮູບການ ແລະ ວິທີການເຊື່ອມຊືມວຽກງານແນວຄິດຂອງພັກຕໍ່ການຈັດຕັ້ງພັກ ແລະ ມວນຊົນ.
  2. ເນື້ອໃນໂຄສະນາວຽກງານແນວຄິດຂອງພັກໃນປັດຈຸບັນ.
  3. ເນື້ອໃນສຶກສາອົບຮົມຈິດໃຈຮັກຊາດ ແລະ ຮູບແບບ.
  4. ຮູບການ ແລະ ວິທີການຕີລາຄາຈຸດດີ, ຈຸດອ່ອນທີ່ສະແດງໃຫ້ເຫັນໃນທົ່ວສັງຄົມ.
  5. ການເຄື່ອນໄຫວ ແລະ ຕີລາຄາຜົນງານພະນັກງານຮາກຖານໂຄສະນາກໍຄືຜູ້ໂຄສະນາ, ຜູ້ບັນຍາຍ ຫຼື ຜູ້ປາຖະກະຖາ.
  6. ປະເພດຂອງອຸປະກອນ, ພາຫະນະໂຄສະນາ ແລະ ວິທີໃຊ້.
  7. ຂໍ້ກຳນົດຕໍ່ການກະທຳທີ່ບໍ່ແມ່ນລັດທິສັງຄົມນິຍົມ(Non-socialist practices) ຢູ່ ສປປລາວ ແລະ ການກະທຳໃດຖືວ່າບໍ່ແມ່ນການກະທຳທີ່ບໍ່ແມ່ນລັດທິສັງຄົມນິຍົມ.

          ສະຫາຍ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກຍັງໄດ້ສະແດງຄຳຄິດເຫັນ, ຕອບຄຳຖາມເຈາະຈິ້ມຂອງສະຫາຍ ລີ ຢົງ ຊົນ ຢ່າງກົງໄປກົງມາຢ່າງຖີ່ຖ້ວນຕາມແນວທາງນະໂຍບາຍຂອງພັກ ແລະ ບັນດາມະຕິທີ່ສໍາຄັນເພື່ອເປັນການຍູ້ແຮງເຂົ້າໃນການຈັດຕັ້ງຜັນຂະຫຍາຍເຂົ້າສູ່ຕົວຈິງແຕ່ສູນກາງລົງຮອດທ້ອງຖິ່ນແລະ ຮາກຖານ; ເຊື່ອມຊຶມກໍາແໜ້ນເນື້ອໃນຈິດໃຈກອງປະຊຸມໃຫຍ່ຄັ້ງທີ Xຂອງພັກ ແລະ ໄດ້ຮັບຮອງເອົາແນວຄິດຂອງປະທານ ໄກສອນ ພົມວິຫານ ເປັນແນວທາງຊີ້ນຳຂອງພັກ ປປລາວ. ນອກນັ້ນ ທ່ານຍັງໄດ້ສະແດງຄວາມຊົມ​ເຊີຍ​ຕໍ່​ຜົນສຳ​ເລັດ​​ໃນການ​ປະຕິບັດ​ໜ້າ​ທີ່​ການ​ທູດຢູ່ ສປປ ລາວ ​ຂອງ ທ່ານ ລີ ຢົງ ຊົນ ​ເຊິ່ງ​ເປັນ​ການ​ປະກອບສ່ວນ​ສຳຄັນເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມືລະຫວ່າງ ສປປ ລາວ ​ແລະ ສປປ ເກົາຫຼີ ​ໃຫ້​ນັບ​ມື້​ກ້າວໜ້າ​ຂະຫຍາຍຕົວ​ຂຶ້ນ​ໄປ​ເລື້ອຍໆ ແລະ ​ສະ​ແດງ​ຄວາມ​ເຊື່ອ​ໝັ້ນ​ວ່າສອງພັກ-ລັດປະຊາຊົນສອງຊາດລາວ ແລະ ສ ປປເກົາຫຼີຈະ​ສືບ​​ພົວພັນ​ຮ່ວມ​ມືນັບມື້ນັບກ້າວສູ່ລວງເລິກ.