ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 63 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 43 ປີ.  

ພາລະບົດບາດ

   ໃນ​ວັນ​ທີ 21 ມີນາ 2013 ຜ່ານມາ ກົມ​ການ​ເມືອງ​ສູນ​ກາງ​ພັກ ​ໄດ້​ມີ​ມະຕິ​ຕົກລົງ ​ເລກທີ 04/ກມສພ ວ່າ​ດ້ວຍ​ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ ຄະນະ​ໂຄສະນາ​ອົບຮົມ​ສູນ​ກາງ​ພັກ ປ່ຽນ​ແທນ​ຂໍ້​ຕົກລົງສະບັບ​ເລກທີ 09 /ຄລສພ ,ລົງວັນ​ທີ 23/09/2009. ຫາກ​​ເວົ້າ​ເຖິງ​ພາລະ​ບົດບາດ​ແລ້ວ​ມີ​ຫລາຍຈຸດ​ທີ່ສຳຄັນ ​ເຊັ່ນ: ຄະນະ​ໂຄສະນາ​ອົບຮົມ​ສູນ​ກາງ​ພັກ​ ແມ່ນ​ອົງການ​ວິຊາ​ສະ​ເພາະ ກ່ຽວກັບ​ວຽກ​ງານ​ການ​ເມືອງ-​ແນວ​ຄິດ ​ຢູ່​ຂັ້ນສູນ​ກາງ; ທັງ​ມີ​ພາລະ​ບົດບາດນຳ​ພາ-ຊີ້​ນຳ​ໃຫ້​ເລິກ​ເຊິ່ງ​ແທດ​ເຖິງ ຮັບປະກັນ​ຫລັກການ​ລວມສູນ​ເປັນ​ເອກະ​ພາບ​ຂອງ​ສູນ​ກາງ​ພັກ​ໃນ​ການ​ເຄື່ອນ​ໄຫວ​ ວຽກ​ງານ​ໂຄສະນາ-ອົບຮົມ​ການ​ເມືອງ​-​ແນວ​ຄິດ​ຂອງ​ພັກ. ສຳລັບ​ລາຍ​ລະອຽດ​ມີ​ດັ່ງ​ນີ້:

ຫມວດ​ທ່ີ I

ວ່າ​ດ້ວຍ​ທ່ີ​ຕັ້ງພາລະ​ບົດບາດ

ມາ​ດຕາ 1: ວ່າ​ດ້ວຍ​ທ່ີ​ຕັ້ງ.

ຄະນະ​ໂຄສະນາ​ອົບຮົມ​ສູນກາງ​ພັກ, ຂຽນ​ຊື່​ຫຍໍ້​ດ້ວຍ​ຕົວ​ອັກສອນ ( ຄອສພ ) ​ແມ່ນ​ອົງການ​ຈັດຕັ້ງຫນຶ່ງ​ຂອງ​ພັກ, ​ມີ​ຖານະ​ເທົ່າ​ກັບ​ຄະນະ​ຂອງ​ພັກຂັ້ນສູນ​ກາງ​ພັກ ​ແລະ ກະຊວງ - ອົງການ​ຂອງ​ລັດ.

ມາດຕາ 2: ວ່າ​ດ້ວຍ​ພາລະ​ບົດບາດ.

ຄະນະ​ໂຄສະນາ​ອົບຮົມ​ສູນ​ກາງ​ພັກ ມີ​ພາລະ​ບົດບາດ​ເປັນ​ເສນາ​ທິການ​ໃຫ້​ແກ່​ຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອງ​ສູນ​ກາງ​ພັກ, ຄະນະ​ເລຂາທິການ​ສູນ​ກາງ​ພັກ ​ແລະ​ລັດຖະບານ​ໃນ​ການຄົ້ນຄ້ວາ​ແນວທາງ, ​ແຜນ​ນະ​ໂຍບາຍ ​ແລະ ນະ​ໂຍບາຍ​ຂົງ​ເຂດ ວຽກ​ງານ​ການ​ເມືອງ-​ແນວ​ຄິດ; ​ແມ່ນ​ອົງການ​ວິຊາ​ສະ​ເພາະ ກ່ຽວ​ກັບ​ວຽກ​ງານ​ການ​ເມືອງ​ ​ແນວ​ຄິດ​ຢູ່​ຂັ້ນສູນ​ກາງ, ທັງ​ມີ​ພາລະ​ບົດບາດນຳ​ພາ​ຊີ້​ນຳ​ໃຫ້​ເລິກ​​ເຊິ່ງ​ແທດ​ເຖິງ, ຮັບປະກັນ ຫລັກການ​ລວມສູນ​ເປັນ​ເອກະ​ພາບ ຂອງ​ສູນ​ກາງ​ພັກ​ໃນ​ການ​ເຄື່ອນ​ໄຫວ​ວຽກ​ງານ​ໂຄສະນາ ອົບຮົມການ​ເມືອງ-​ແນວ​ຄິດ​ຂອງ​ພັກ.

ຫມວດ​ທີ II

ວ່າດ້ວຍຫນ້າ​ທີ່ ແລະ ​ຂອບ​ເຂດ​ສິດ

ມາດຕາ 3: ວ່າ​ດ້ວຍ​ຫນ້າ​ທ່ີ.

3.1 ຄົ້ນຄ້ວາ​ກໍາແຫນ້ນ​ໂຄງການ​ການ​ເມືອງ, ມະຕິ​ຂອງ​ກອງ​ປະຊຸມ​ໃຫ່ຍ ​ແລະ ກອງປະຊຸມ​ສູນ​ກາງ​ພັກ​ ແຕ່ລະຄັ້ງ ກໍ​ຄື​ແນວທາງ, ​ແຜນ​ນະ​ໂຍບາຍ​ຂອງ​ພັກ, ​ແຜນ​ພັດທະນາ ​ເສດຖະກິດ-ສັງຄົມ ​ແລະ ລະບຽບກົດຫມາຍ​ຂອງ​ລັດ. ຈາກ​ນັ້ນຈຶ່ງ​ຜັນ​ຂະຫຍາຍ​ເປັນ​ແຜນງານ ​ແລະ ​ໂຄງການ ​ເພື່ອ​ເຜີຍ​ແຜ່​ອະທິບາຍ​ໃຫ້​ສະມາຊິກ​ພັກ, ພະນັກງານ ​ແລະ ປະຊາຊົນ​ບັນ​ເຜົ່າ, ບັນດາ​ຊັ້ນຄົນ​ໃນ​ສັງຄົມ​ ໄດ້​ຮັບ​ຮູ້, ​ເຂົ້າ​ໃຈ​ ພ້ອມ​ກັນນັ້ນກໍ​ໂຄສະນາ​ປຸກລະດົມ​ການຈັດຕັ້ງປະຕິບັດ​ໃຫ້​ປະກົດ​ ເປັນ​ຈິງ.

3.2 ປະຕິບັດ​ຕາມ​ມະຕິ​ຕົກລົງ ​ແລະ ການ​ຊີ້​ນໍາ​ຂອງ​ກົມ​ການ​ເມືອງ​ສູນ​ກາງ​ພັກ, ຄະນະ​ເລຂາທິການ​ສູນ​ກາງ​ພັກກ່ຽວ​ກັບ​ການ​ເຄື່ອນ​ໄຫວ​ວຽກ​ງານ​ການ​ເມືອງ-​ແນວຄິດ​ໃນ ​ແຕ່ລະ​ໄລຍະ​ຢ່າງ​ເຂັ້ມງວດ ​ແລະ ລາຍ​ງານ​ຜົນ​ໄດ້​ຮັບ​ໃຫ້​ຊາບ​ເປັນ​ປະຈໍາ.

3.3 ຕິດຕາມ​ກໍາ​ແຫ້ນ​ນສະພາບ​ແນວ​ຄິດ-ຫາງ​ສຽງ​ສັງຄົມ ລວມທັງ​ສະພາບ​ພົ້ນ​ເດັ່ນ ຢູ່​ພາຍ​ໃນ​ແລະຢູ່​ຕ່າງປະ​ເທດ​ ທີ່​ມີ​ຜົນ​ກະທົບ​ຕໍ່​ແນວ​ຄິດ-ຈິດຕະລາດ​ຂອງ ​ຄົນ​ໃນ​ສັງຄົມ ​ແລະ ຕໍ່​ຄວາມ​ຫມັ້ນຄົງ​ຂອງ​ລະບອບ​ການ​ປົກຄອງ​ຂອງ​ພວກ​ເຮົາ; ພ້ອມ​ທັງ​ເປັນ​ເຈົ້າການຄົ້ນຄ້ວາ, ສະ​ເຫ​ນີວິທີ​ການ ​ແລະ​ ມາດ​ຕະການ​ແກ້​ໄຂ​ ຢ່າງ​ເປັນ​ທາງ​ການ​ຕໍ່​ກົມ​ການ​ເມືອງ ​ແລະ ຄະນະ​ເລຂາ​ທິການ​ສູນ​ກາງ​ພັກ.

3.4 ສ້າງ​ເອກະສານ​ປາ​ຖາ​ກ​ະຖາ​ໂຄສະນາ​ອະທິບາຍ ກ່ຽວ​ກັບ​ແນວທາງ,​ ແຜນ​ນະ ໂຍບາຍ​ຂອງ​ພັກ, ​ແຜນ​ພັດທະນາ​ເສດຖະກິດ-ສັງຄົມ, ນະ​ໂຍບາຍ​ ແລະ​ ກົດຫມາຍ​ຂອງລັດ; ກ່ຽວ​ກັບ​ສະພາບ​ພົ້ນ​ເດັ່ນ​ຢູ່​ພາຍ​ໃນ ​ແລະ​ ຕ່າງປະ​ເທດ ຕໍ່​ແຕ່ລະ​ເປົ້າຫມາຍ​ໃຫ້​ແທດເຫມາະ ​ແລະ​ ທັນ​ການ.

3.5 ສ້າງ​ເອກະສາ​ນອົບຮົມ​ຄວາມ​ຮູ້​ກ່ຽວ​ກັບ​ທິດ​ສະ​ດີມາກ-​ເລ​ນິນ, ກ່ຽວ​ກັບ​ພຶດຕິ​ກຳ ​ແລະ​ ບົດຮຽນ​ການ​ສ້າງ​ສັງຄົມ​ນິຍົມ; ຄວາມ​ຮູ້​ກ່ຽວ​ກັບ​ການ​ນຳພາ​ຂອງ​ພັກ, ການ​ຄຸ້ມ​ຄອງ​ຂອງ​ລັດ ​ແລະ ການ​ເສີມ​ຂະຫຍາຍ​ສິດ​ເປັນ​ເຈົ້າຂອງ​ປະຊາຊົນ; ຄວາມ​ຮູ້​ກ່ຽວ​ກັບ​ປະຫວັດສາດ, ມູນ​​ເຊື້ອ​ຂອງ​ຊາດ ​ແລະ ຂອງ​ພັກ ລວ​ມທັງ​ຄວາມ​ຮູ້​ດ້ານ​ການ​ທຳ​ມະຫາ​ກິນ​ທີ່ມີ​ປະສິດທິ​ຜົນ,​ເປັນຕົ້ນ​ແມ່ນ​ ການ​ຜະລິດ​ເປັນ​ສິນຄ້າ ​ແລະ ການ​ບໍລິການ​ສ້າງ​ລາຍ​ໄດ້​ແກ້​ໄຂ​ຄວາມທຸກ​ຍາກ ​ແລະ​ ສ້າງ​ຄວາມ​ຮັ່ງມີ​ແກ່​ຄອບຄົວ; ຄວາມ​ຮູ້​ກ່ຽວ​ກັບ​ການ​ສືບ​ທອດ​ເສີມ​ຂະຫຍາຍ​ວັດທະນະທໍາ​ຂອງ​ຊາດ ກໍ​ຄື​ການ​ສ້າງ​ຄວາມ​ສີວິ​ໄລ ທາງ​ດ້ານ​ຈິດ​ໃຈ ​ແລະ ຄຸນສົມບັດ​ສິນ​ທຳ​ປະຕິວັດ; ຄວາມ​ຮູ້ກ່ຽວ​ກັບ​ການ​ປົກ​ປັກ​ຮັກສາ ​ແລະ ຟື້ນ​ຟູ​ບູລະນະ​ຊັບພະ ຍາກ​ອນທຳ​ມະ​ຊາດ ​ແລະ​ ສິ່ງ​​ແວດ​ລ້ອມ; ຄວາມ​ຮູ້​ດ້ານ​ການ​ພົວພັນ​ຮ່ວມ​ມື ​ແລະ ການ​ເຊື່ອມ​ໂຍງ​ກັບ​ເພື່ອນ​ມິດສາ​ກົນ; ຄວາມ​ຮູ້​ກ່ຽວ​ກັບ​ການ​ສ້າງ​ຄວາມ​ຫມັ້ນຄົງ​ໃຫ້​ແກ່​ລະບອບ ປະຊາທິປະ​ໄ​ຕປະຊາຊົນ.

3.6 ຊອກ​ຮູ້​ວິທີ​ການ ​ແລະ​ ບົດຮຽນ​ຂອງ​ພັກ​ປະ​ເທດ​ອ້າຍ​ນ້ອງ ກ່ຽວ​ກັບ​ວຽກ​ງານ​ການເມືອງ-​ແນວ​ຄິດ; ປະກອບສ່ວນ​ເຂົ້າ​ໃນ​ການຄົ້ນຄ້ວາ​ທິດ​ສະ​ດີ ​ແລະ ​ສະຫລຸບ​ບົດຮຽນ ຈາກ​ພຶດຕິ​ກຳ​ຂອງ​ພັກ​ເຮົາ.

3.7 ເຂົ້າຮ່ວມ​ ແລະ​ ປະສານ​ສົມທົບ​ກັບ​ບັນດາ​ກະຊວງ-ອົງການ​ກ່ຽວຂ້ອງ​ຂອງ​ລັດ 

3.7.1 ສ້າງ​ແລະ​ປັບປຸງ​ກົດຫມາຍ,ນະ​ໂຍບາຍ, ກົນ​ໄກ ​ແລະ​ ລະບຽບ​ການ​ ຕ່າງໆ ທີ່ກ່ຽວຂ້ອງ​ກັບ​ວຽກ​ງານ​ການ​​ເມືອງ-​ແນວ​ຄິດ​ຂອງ​ພັກ.

3.7.2 ກໍານົດທິດ​ທາງ​ການ​ເຄື່ອນ​ໄຫວ​ດ້ານ​ວັດທະນະທໍາ​ ແລະ ການ​ໂຄສະນາ​ຖະແຫລ​ງຂ່າວ; ລວ​ມທັງ​ການ​ຄຸ້ມ​ຄອງ​ສື່​ມວນ​ຊົນ, ການ​ພິມຈໍາຫນ່າຍ, ການ​ທຸລະ​ກິດ​ສິ່ງ​ພິມ ​ແລະ ການບໍລິການ​ດ້ານ​ອິນ​ເຕີ​ເນັດ ​ ແລະ ສື່​ສັງຄົມ​ປະ​ເພດ​ຕ່າງໆ.

3.7.3 ສົ່ງ​ເສີມ​ການ​ປະດິດຄິດ​ແຕ່ງ ​ແລະ ປຸກລະດົມຊຸກຍູ້​ຂະ​ບວນການ​ ແຂ່ງຂັນ​ ຮັກ​ຊາດ ​ແລະ ພັດທະນາ.

3.7.4 ຄົ້ນຄ້ວາຕີ​ລາຄາ ​ແລະ ດໍາເນີນ​ມາດ​ຕະການ​ອັນ​ເຫມາະ​ສົມ, ທັນ​ການ​ໃນ ການ​ຕອບ​ຕ້ານ​ການ​ໂຄສະນາ​ບິດ​ເບືອນ, ປັ່ນ​ປວ່ນຂອງ​ພວກ​ເຮົາ​ບໍ່​ດີ.

3.7.5 ສ້າງ​ຫລັກສູດ ​ແລະ ​ໂຄງການ​ສິດສອນ​ທິດ​ສະ​ດີ, ​ແນວທາງ​ຂອງ​ພັກ ​ ແລະວິຊາ​ສັງຄົມ-ການ​ເມືອງ​ຢູ່​ໃນ​ສະ​ຖາ​ບັນ​ການ​ສຶກສາ​ຊັ້ນຕ່າງໆ ​ແລະ​ ໂຮງຮຽນ​ການ​ເມືອງ-​ການ​ປົກຄອງ​ທຸກຂັ້ນ.

3.8 ສ້າງ​ແລະ​ປັບປຸງ​ເອກະສານ​ພ້ອມ​ທັງ​ຊີ້​ນໍາ​ແລະ ປະສານ​ສົມທົບ​ກັບ​ຄະນະ​ພັກ ຄະນະ​ໂຄສະນາ​ອົບຮົມ​ທ້ອງ​ຖິ່​ນ ຈັດຕັ້ງຊຸດ​ອົບຮົມ​ຄວາມ​ຮູ້​ດ້ານ​ການ​​ເມືອງ-ການ​ປົກຄອງ ​ແລະ ສ້າງ​ບ້ານ​ພັດທະນາ​ໃຫ້​ແກ່​ສະມາຊິກ​ພັກ, ພະນັກງານ ​ແລະ ປະຊາຊົນ​ຜູ້​​ເປັນ​ ຫລັກ​ແຫ່​ລງ ຢູ່​ຮາກ​ຖານ​ບ້ານ; ອົບຮົມ​ຄວາມ​ຮູ້​ກ່ຽວກັບ​ພັກ​ໃຫ້​ມະຫາຊົນ ​ແລະ ສະມາຊິກ​ໃຫມ່.

3.9 ຈັດຕັ້ງງຝຶກ​ອົບຮົມ​ຍົກ​ລະດັບ​ຄວາມ​ຮູ້ດ້ານ​ທິດ​ສະ​ດີ,​ ແນວທາງ ​ແລະ​ ວິຊາ​ສະ​ເພາະດ້ານ​ກາ​ນ​ເມື​ອງ-​ແນວ​ຄິດ ​ເວົ້າລວມ ​ແລະ ຄວາມ​ຮູ້​ດ້ານ​ໂຄສະນາ​ອົບຮົມ ​ເວົ້າສະ​ເພາະ​ໃຫ້​ແກ່​ພະນັກງານ​ໂຄສະນາ​ອົບຮົມ​ໃ​ນຂອບ​ ເຂດ​ທົ່ວ​ປະ​ເທດ; ສະຫນອງ​ຂໍ້​ມູນ​ ຂ່າວສານ, ວັດ​ຖຸອຸ​ປະກອນ ​ແລະ ​ເຄື່ອງມື​ຮັບ​ໃຊ້​ວຽກງານ​ອັນຈຳ​ເປັນ​ໃຫ້​ແກ່​ຄະນະ​ໂຄສະນາ​ອົບຮົມ​ຂັ້ນຕ່າງໆ.

3.10 ຈັດຕັ້ງການ​ໂຄສະນາ​ປະຈັກ​ຕາ​ເຄື່ອນ​ທີ່ ​ແລະ ການ​ໂຄສະນາ​ຜ່ານ​ສື່​ຕ່າງໆ​ເພື່ອ​ ເຄື່ອນ​ໄຫວ​ໂຄສະນາ-ນຳພາ​ແນວ​ຄິດ​ປະຊາຊົນ​ໃຫ້​ໄດ້​ຢ່າງ​ກ້ວາງ​ຂວາງ​ທົ່ວ​ເຖິງ, ​ເປັນຕົ້ນ ​ແມ່ນ​ໃນ​ເຂດ​ຈຸດ​ສຸມ​ຕ່າງໆ.

3.11 ນໍາ​ໃຊ້​ກໍາລັງ​ແ​ຮງຂອງ​ບັນຊັ້ນຄົນ ​ແລະ ​ຜູ້​ມີ​ເງື່ອນ​ໄຂ​ຄວາມ​ສາມາດ​ເຂົ້າ​ໃນ​ວຽກ​ງານ​ໂຄສະນາ​ອົບຮົມ​ຂອງ​ພັກ; ຈັດຕັ້ງຕຳ​ແຫນ່ງ ​ແລະ ​ເພື່ອນ​ຮ່ວມ​ງານ​ດ້ານ​ການ​ໂຄສະນາ​ອົບຮົມ​ໃຫ້​ເປັນ​ລະບົບ ​ແລະ ​ເຄື່ອນ​ໄຫວ​ເປັນ​ປະຈຳ, ທັງ​ມີ​ການ​ຕີ​ລາຄາ​ ເລືອກ​​ເຟັ້ນ​ເອົາ​ຜູ້ດີ​ເດັ່ນ ​ເພື່ອ​ຍ້ອງຍໍ​ໃນ​ແຕ່ລະ​ປີ.

3.12 ປະສານ​ສົມທົບ​ກັບ​ອົງກາ​ນທີ່ກ່ຽວຂ້ອງ​ຈັດຕັ້ງການ​ໂຄສະນາຕໍ່​ຕ່າງປະ​ເທດ.

3.13 ພົວພັນ​ຮ່ວມ​ມື​ກັບ​ອົງກາ​ນກ່ຽວຂ້ອງ​ຂອງ​ພັກ​ປະ​ເທ​ດອ້າຍ​ນ້ອງ;​ເຂົ້າຮ່ວມ​ ການ​ສໍາ​ມະ​ນາແລະ​ໄປ​ທັດສະນະ​ສຶກສາຄົ້ນຄ້ວາ​ຖອດຖອນ​ບົດຮຽນ​ຢູ່​ພາຍ​ໃນແລະຕ່າງປະ​ເທດ.

3.14 ສ້າງ ​ແລະ​ປັບ​ພື້ນຖານ​ໂຄ່ງ​ລາງ​ສໍານັກງານ, ອົງການ,ປະກອບ​ພາຫະນະ ,ວັດຖຸ​ ອຸປະກອນ​ຕ່າງໆ ​ເພື່ອ​ມີ​ຄວາມ​ສະດວກ​ໃນ​ການ​ເຮັດ​​ວຽກ​ງາ​ນ; ພື້ນຖານ​ໂຄງ​ລ່າງ​ຂໍ້​ມູນ​ຂ່າວສານ ​ເພື່ອສະຫນອງ​ໃຫ້​ແກ່​ການຄົ້ນຄ້ວາ ​ແລະ ​ການ​ເຮັດ​ວຽກ​ງານ​​ໂຄສະນາ​ອົບຮົມ​ໃຫ້​ມີ​ເນື້ອ​ໃນ​​ເລິກ​ເຊິ່ງກ້ວາງ​ຂວາງ ​ແລະ ວ່ອງ​ໄວ​ທັນ​ການ.

ມາດຕາ 4: ວ່າ​ດ້ວຍ​ສິດ.

4.1 ພົວພັນ​ປະສານ​ສົມທົບ, ຕິດຕາມ​ກວດກາ, ຊຸກ​ຍູ້ ​ແລະ​ ປະກອບ​ຄວາມ​ເຫັນ​ກ່ຽວ​ກັບ ​ແຜນການ, ​ໂຄງການ​ວຽກ​ງານ​ໂຄສະນາ-ອົບຮົມ, ລວມທັງ​ການ​ປັປບຸງ​ສັບ​ຊ້ອນ​ ບຸກຄະລາ​ກອນ​ທີ່​ເຮັດ​ວຽກ​ງານ​ດັ່ງກ່າວ​ຂອງ ຄະນະ​ໂຄສະນາ​ອົບຮົມ​ທ້ອງ​ຖິ່ນ ​ໃນທົ່ວ​ປະ​ເທດ.

4.2 ​ເຂົ້າຮ່ວມ​ກອງ​ປະຊຸມ​ຕ່າງໆ​ທີ່ພົວພັນ​ເຖິງ​ວຽກ​ງານ​ກາກ​ນ​ເມືອງ-​ແນວ​ຄິດ​ ທີ່ຂັ້ນ​ເທິງ, ຂະ​ແຫນງ​ການ, ອົງການ ​ແລະ ທ້ອງ​ຖິ່ນ​ຈັດ​ຂຶ້ນ;​ໄດ້​ຮັບ​ຂໍ້ມູນ​ຂ່າວສານ​ອັນ​ຈຳ​ເປັນ​ເພື່ອ ຮັບ​ໃຊ້​ໃຫ້​ແກ່​ວຽກ​ງານ​ໂຄສະນາ ​ແລະ ສຶກສາ​ອົບຮົມ.

4.3 ອອກ​ຄໍາ​ແນະນໍາ​ແລະ ​ແຈ້ງ​ການ​ຕ່າງໆ​ເຖິງ​ຄະນະ​ພັກ ຂະ​ແຫນງ-ອົງການ​ ຕ່າງໆ ອ້ອມ​ຂ້າງ​ສູນ​ກາງ ​ແລະ ທ້ອງ​ຖິ່ນ​ກ່ຽວ​ກັບ​ວຽກ​ງານ​ໂຄສະນາ​-ອົບຮົມ.

4.4 ຮຽກ​ໂຮງ​ປະຊຸມ​ພະນັກງານ​ໂຄສະນາ​ອົບຮົມ ຫລື ​ຜູ້​ຮັບຜິດຊອບ​ວຽກ​ງານ​ການ​ເມືອງ​-ແນວ​ຄິດ​ຈາກ​ທ້ອງ​ຖິ່ນ-ຂະ​ແຫນງ​ການ-ອົງການ​ອ້ອມ​ຂ້າ​ງສູນ​ກາງ ​ເພື່ອ​ປຶກສາ​ຫາລື, ຄົ້ນຄ້ວາ​ແກ້​ໄຂ​ບັນຫາ ຫລື ​ເຜີຍ​ແຜ່​ແນະນຳ​ກ່ຽວ​ກັບ​ທິດ​ທາງ, ວິທີ​ການ ​ແລະ ມາດ​ຕະການ​ດຳ​ເນີນ​ວຽກ​ງານ​ໂຄສະນາ​ອົບຮົມ.

4.5 ປະສານ​ສົມທົບ​ກັບ​ອົງການ​ຈັດຕັ້ງ ​ແລະ ບຸກຄົນ​ທີ່​ມີ​ຖານະ​ບົດບາດ ​ເພື່ອ​ເຮັດ​ ວຽກງານ​ໂຄສະນາອົບຮົມ.

4.6 ​ແຕ່ງຕັ້ງ, ຍົກ​ຍ້າຍ, ປົດ​ຕໍາ​ແຫນ່​ງ, ປະຕິບັດ​ນະ​ໂຍບາຍ, ຍ້ອງຍໍ​ສັນລະ​ເສີນ, ປະຕິບັດ​ວິ​ໄນ​ຕໍ່​ພະນັກງານ, ລັດຖະກອນ​ທີ່ຢູ່​ພາຍ​ໃຕ້​ການ​ຄວບ​ຄຸມ​ຂອງ​ຕົນ​ຕາມ​ລະບຽບ​ການ.

4.7 ຄຸ້ມ​ຄອງ​ກົງຈັກ​ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ​ສໍານັກງານ, ການ​ໃຊ້​ຈ່າຍງົບປະມານ, ການ​ນຳ​​ໃຊ້​ພາຫະນະ​ວັດຖຸ​ອຸປະກອນ​ຕ່າງໆ ​ຂອງ​ພັກ-ລັດ​ ມອບ​ຫ​ມາຍ​ໃຫ້​ມີ​ປະສິດທິ​ຜົນ.

4.8 ​ເຊັນ​ສັນຍາ, ອະນຸ​ສັນຍາ, ບົດ​ບັນທຶກ​ຊ່ວຍ​ຈໍາຕ່າງໆ​ໃນ​ການພົວພັນ​ຮ່ວມ​ມື​ກັບ​ ອົງການ​ການ​ເມືອງ-​ແນວ​ຄິດ​ຂອງ​ພັກ-ລັດ ປະ​ເທດ​ອ້າຍ​ນ້ອງ ​ແລະ ​ເພື່ອນ​ມິດ​ກ່ຽວ​ກັບ​ວຽກງານ​ໂຄສະນາ-ອົບຮົມ​ບົນ​ພື້ນຖານ​ກົດຫມາຍ​ ແລະ​ກ ານ​ຕົກລົງ​ຂອງ ຂັ້ນ​ເທິງ.

ຫມວດ​ທີ III

ວ່າ​ດ້ວຍ​ໂຄ​ງປະກອບ​ບຸກຄະລາ​ກອນ ​ແລະ ກົງຈັກ​ການຈັດຕັ້ງ

ມາດຕາ 5 : ​ໂຄງ​ປະກອບ​ບຸກຄະລາ​ກອນ.

5.1 ຄະນະ​ໂຄສະນາ​ອົບຮົມ​ສູນ​ກາງ​ພັກ​ ປະກອບ​ດ້ວຍ : ຫົວຫນ້າ 1 ສະຫາຍ ​ ແລະ ມີ​ຮອງ​ຫົວຫນ້າ​ຈໍານວນ​ຫນຶ່ງ, ​ເຊິ່ງ​ໄດ້​ຮັບການ​ແຕ່ງຕັ້ງ ຫລື ​ປົດ​ຕໍາ​ແຫນ່​ງ ຈາກກົມ​ການ​ເມືອງ​ສູນ​ກາງ​ພັກ, ຕາມ​ການສະ​ເຫນີຂອງຄະນະ​ຈັດຕັ້ງສູນ​ກາງ​ພັກ.

- ຫົວຫນ້າ​ຄະນະ​ເປັນ​ຜູ້ອໍານວຍ​ຄວບ​ຄຸມ​ການ​ດໍາ​ເນີນ​ວຽກ​ງານ​ທັງ​ຫມົດ ​ແລະ ມີ​ຄວາມ​ຮັບຜິດຊອບ​ຕໍ່ຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອງ​ສູນ​ກາງ​ພັກ ​ແລະ ຄະນະ​ເລຂາທິການ​ສູນ​ກາງ​ພັກ ​ຕາມ​ພາລະ​ບົດບາດ​ທີ່ກຳນົດ​ໄວ້.

ບັນດາ​ຮອງ​ຫົວຫນ້າ​ຄະນະ​ເປັນ​ຜູ້​ຊ່ວຍ​ຫົວຫນ້າ​ໃນ​ການ​ອຳນວຍ​ຄວບ​ຄຸມ​ ວຽກງານ, ມີ​ຄວາມ​ຮັບຜິດຊອບ​ຕໍ່ຫົວຫນ້າ​ຄະນະ​ໃນ​ການ​ດຳ​ເນີນ​ວຽກ​ງານ​ໃດ​ຫນຶ່ງ​ຕາມ​ການແບ່ງ​ງານ ​ແລະ ​ໄດ້​ຮັບ​ມອບ​ຫມາຍ​ຈາກ​ຫົວຫນ້າ​ຄະນະ. ຫົວຫນ້າ​ຄະນະ​ອາດ​ຈະ​ມອບ​ໃຫ້​ຜູ້​ຮອງ​ໃດ​ຫນຶ່ງ​ເປັນ​ຜູ້​ປະຈຳການ ຫລື​ ວ່າການ​ແທນ​ໃນ​ເມື່ອ​ຈຳ​ເປັນ.

5.2 ຄະນະ​ໂຄສະນາ​ອົບຮົມ​ສູນ​ກາງ​ພັກ​ ມີ​ຫົວຫນ້າ​ຫ້ອງການ ​ແລະ ບັນດາ​ຫົວຫນ້າກົມ ​ແລະ ທຽບ​ເທົ່າ ຊຶ່ງ​ໄດ້​ຮັບ​ການ​ແຕ່ງຕັ້ງ ຫລື​ ປົດ​ຕໍາແຫນ່​ງ ຈາກ ຄະນະ​ເລຂາທິການສູນ​ກາງ​ພັກ ຕາມ​ການສະ​ເຫ​ນີຂອງ​ຄະນະ​ຈັດຕັ້ງສູນ​ກາງ​ພັກ, ບົນ​ພື້ນຖານ​ການ​ເຫັນ​ດີ​ຂອງ​ຄະນະ​ໂຄສະນາ​ອົບຮົມ​ສູນ​ກາງ​ພັກ; ມີ​ຮອງ​ຫົວຫນ້າ​ຫ້ອງການ, ບັນດາ​ຮອງ​ຫົວຫນ້າ​ກົມ ​ແລະ ທຽບ​ເທົ່າ; ມີ​ຫົວຫນ້າ​ພະ​ແນ​ກ,ຮອງ​ຫົວຫນ້າ​ພະ​ແນ​ກ ຊຶ່ງ​ໄ​ດ້ຮັບ​ການ​ແຕ່ງຕັ້ງ ຫລື​ ປົດ​ຕຳ​ແ​ຫນ່ງຈາກ​ຫົວຫນ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ, ຕາມ​ການຄົ້ນຄ້ວາ​ນຳ​ສະ​ເຫນີຂອງ ກົມ​ຈັດຕັ້ງ-ພະນັກງານ ຊຶ່ງ​ໄດ້​ຮັບ​ການ​ເຫັນ​ດີເອກະ​ພາບ​ກັບ ຫ້ອງການ, ກົມ ​ແລະ ທຽບ​ເທົ່າ​ທີ່​ຜູ້ກ່ຽວ​ສັງກັດ​ຢູ່.

5.3 ຄະນະ​ໂຄສະນາ​ອົບຮົມ​ສູນ​ກາງ​ພັກ​ ຍັງ​ປະກອບ​ມີ​ພະນັກງານ ວິຊາ​ການ ​ແລະ ພະນັກງານ​ບໍລິຫານ​ຕາມ​ຕໍາ​ແຫນ່​ງ ຫລື ຕາມ​ຄວາມ​ຮຽກຮ້ອງ​ຕ້ອງການ​ຂອງ​ຫນ້າ​ທີ່ວຽກ​ງານ​ ຕົວ​ຈິງ.

ມາດຕາ 6: ກົງຈັກ​ການ​ຕັ້ງປະກອບ​ດ້ວ​ຍ:

1.ຫ້ອງການ

2. ກົມ​ຈັດຕັ້ງ-ພະນັກງານ.

3. ກົມ​ໂຄສະນາ.

4. ກົມ​ອົບຮົມ.

5. ກົມ​ສັງລວມ.

6. ກົມ​ຂໍ້​ມູນ​ຂ່າວສານ.

7. ວາລະສານ​ໂຄສະນາ.

8. ວາລະສານ​ອາ​ລຸນ​ໃຫມ່.

ມາດຕາ 7: ​ ​ເພື່ອ​ປະກອບ​ຕິ​ບັດ​ພາລະ​ບົດບາດ​ຂອງ ຄະນະ​ໂຄສະນາ​ອົບຮົມ​ສູນ​ກາງ​ພັກ​ ໃຫ້​ໄດ້ຮັບ​ຜົນ​ດີ, ມອບ​ໃຫ້​ຫົວຫນ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ​ເປັນ​ຜູ້​ ກຳນົດ​ເປັນ ອັນ​ລະອຽດ​ກ່ຽວ​ກັບພາລະ​ບົດບາດ​ຂອງ​ຫ້ອງການ, ບັນດາ​ກົມ, ​ ແຕ່​ລະ​ພະ​ແນ​ກ ​ໂດຍ​ໃຫ້ສອດຄ່ອງ​ກັບ ມະຕິ​ຕົກ​ລົງ​ສະບັບ​ນີ້.

ຫມວດ​ທີ IV

ວ່າ​ດ້ວຍ​ລະບອບ​ວິທີ​ເຮັດ​ວຽກ.

ມາດຕາ 8 : ຄະນະ​ໂຄສະນາ​ອົບຮົມ​ສູນ​ກາງ​ພັກ ​ເຄື່ອນ​ໄຫວ ​ແລະ ດໍາເນີນ​ງານ​ຕາມ​ຫລັກການ​ດັ່ງ​ນີ້:

8.1 ປະຕິບັດ​​ແບບ​ແຜນ​ນໍາພາ ​ແລະ ​ເຮັດ​ວຽກ​ຕາມ​ຫລັການລວມສູນ​ປະຊາທິປະ​ໄຕ ​ ແລະ​ ບອບ​ວິທີ​ເຮັດ​ວຽກ​ເປັນ​ຫມູ່​ຄະນະ, ຮັບປະກັນ​ປະຊາທິປະ​ໄຕ ປະຕິບັດ​ລະບອບ​ປະຊຸມ​ໃນ​ການ​ຕົກລົງ​ຕັດສິນ​ບັນຫາ​ສຳຄັນ​ຕ່າງໆ; ມີ​ການ​ແບ່ງ​ງານ, ​ ແບ່ງ​ຄວາມ​ຮັບຜິດຊອບ​ໃຫ້ແຕ່​ລະສະ​ຫາຍ​ຢ່າງ​ຈະ​ແຈ້ງ, ​ໂດຍ​ມີ​ການ​ສົມທົບ​ກຳແຫ້ນ​ນກັບ​ລະບອບ​ຫົວຫນ້າ; ພ້ອມ​ທັງຕິດຕາມ, ກວດກາ, ຊຸກ​ຍູ້ ​ແລະ​ ສະຫລຸບ​ຕີ​ລາຄາ​ການ​ດຳ​ເນີນ​ງານ​ຢ່າງ​ເປັນ​ປົກກະຕິ.

8.2 ຮັບປະກັນ​ການ​ປະຕິບັດ​ຫລັກການ​ລວມສູນ​​ເປັນ​ເອກະ​ພາບໃນ​ການ​ດໍາເນີນ​ ວຽກ​ງານໂຄສະນາ-ອົບຮົມ, ​ເປັນ​ເຈົ້າການຄົ້ນຄ້ວາ​ກໍາແຫ້ນ​ນ​ແຜນການ, ທິດ​ທາງ, ຫນ້າ​ທີ່ ຈຸດ​ສຸມ​ຂອງ​ວຽກ​ງານ​ໂຄສະນາ​ອົບຮົມ​ແຕ່ລະ​ໄລຍະ, ຈາກ​ນັ້ນ ຈຶຶ່ງ​ເຜີຍ​ແຜ່​ແນະນຳ​ໃຫ້​ຂະ​ແຫນງ​ການ, ອົງການອ້ອມ​ຂ້າງ​ສູນ​ກາງ ​ແລະ ທ້ອງ​ຖິ່ນນຳ​ໄປ​ຈັດຕັ້ງປະຕິບັດ​ໃຫ້​ເກີດ​ຜົນ ​ເປັນ​ຈິງ.

8.3 ປະຕິບັດ​ລະບອບ​ລາຍ​ງານ​ການ​ເຄື່ອນ​ໄຫວ​ວຽກ​ງານ​ໂຄສະນາ​ອົບຮົມ​​ໃຫ້​ກົມ​ການ​ເມືອງ​ສູນ​ກາງ​ພັກ, ຄະນະ​ເລຂາທິການ​ສູນກາງ​ພັກ ຊາ​ບ​ເປັນ​ປະຈໍາ; ພ້ອມ​ກັນນັ້ນກໍ​ນຳ​ເອົາ​ຄວາມ​ເຫັນ​ຊີ້​ນຳ​ຂອງ​ກົມ​ການ​ເມືອງ​ພັກ ​ແລະ ຄະນະ​​ເລຂາທິການ​ສູນ​ກາງ​ພັກ ​ໄປ​ຈັດຕັ້ງປະຕິບັດຢ່າງ​ເປັນ​ເຈົ້າການ ​ແລະ ​ໄດ້​ຮັບ​ຜົນ​ດີ.

8.4 ປະສານ​ສົມທົບ​ກັບ​ຄະນະ​ພັກຂະ​ແຫນງ​ການ ​ແລະ​ ທ້ອງ​ຖິ່ນ ​ໃນ​ການ​ປະຕິບັດ ພາລະ​ບົດບາດ ​ແລະ ຫນ້າ​ທີ່ຂອງ​ຕົນ​ເພື່ອ​ນໍາພາ-ຊີ້​ນໍາ​ການ​ດໍາ​ເນີນ​ວຽກ​ງານ​ໂຄສະນາ​ອົບຮົມ​ໃຫ້​ແທດ​ເຫມາະ​ກັບ​ເງື່ອນ​ໄຂ ​ແລະ​ ສະພາບ​ຂອງ​ແຕ່​ລະ​ບ່ອນ​ໃຫ້​ໄດ້​ຮັບ​ຜົນ​ດີ.

8.5 ປະຕິ​ບັດ​ລະບອບ​ເຮັດ​ວຽກ​ຕິດ​ແທດກັບ​ຮາກ​ຖານ, ຮັບ​ເອົາ​ການ​ສ່ອງແສງ​ລາຍ​ງານ​ຈາກ​ທ້ອງ​ຖິ່ນ ​ແລະ​ ຂະ​ແຫນງ​ການ​ຕ່າງໆ ​ເປັນປະ​ຈໍາ​ອາທິດ,​ ແຕ່ລະ​ເດືອນ; ​ເປັນ​ເຈົ້າການ ຄົ້ນຄ້ວາ, ວິິ​ໄຈ-​ໄຈ້​ແຍກ, ສະຫລຸບ​ສັງ​ລວມ ​ແລະ ​ແກ້​ໄຂ​ບັນຫາ​ ຕົວ​ຈິງ​ຕາ​ມພາລະ​ບົດບາດ, ຫນ້າ​ທີ່ ແລະ ສິດ​ຂອງຕົນ.

8.6 ປະຕິບັດ​ລະບອບ​ປະຊຸມ​ປະຈໍາເດືອນ, 3 ​ເດືອນ, 6 ​ເດືອນ, 1 ປີ ຫລື ປະຊຸມ ວິສາມັນ​ຖ້າ​ເຫັນ​ວ່າ​ມີ​ຄວາມ​ຈໍາ​ເປັນ; ປະຕິບັດ​ລະບອບ​ປະຊຸມ​ພະນັກງານ​ໂຄສະນາ​ອົບຮົມ​ທົ່ວ​ປະ​ເທດ​ ປີ​ລະຄັ້ງ; ຖ້າ​ຫາກ​ວ່າ​ມີ​ຄວາມ​ຈຳ​ເປັນ​ກໍ​ສາມາດ​ ຮຽກ​ປະຊຸມ​ໄດ້​ຕາມ​ຄວາມ​ເຫມາະ​ສົມ.

ຫມວດ V

ວ່າ​ດ້ວຍ​ບົດ​ບັນຍັດ​ສຸດ​ທ້າຍ.

ມາດຕາ 9: ວ່າ​ດ້ວຍ​ກາ​ປະ​ທັບ ​ແລະ​ ງົບປະມານ.

9.1 ຄະນະ​ໂຄສະນາ​ອົບຮົມ​ສູນ​ກາງ​ພັກ ມີ​ກາ​ປະທັບ​ຂອງ​ຕົນ 1 ຫນ່ວຍ ​ແລະ ມີ​ ກາ​ປະ​ທັບ ຫ້ອງການ, ບັນດາ​ກົມ ​ແລະ ທຽບ​ເທົ່າ; ພະແນ​ກ​ການ​ເງິນອ​ະນຸຍາດ​ໃຫ້​ມີກາປະ​ທັບ​ເພື່ອນ​ໄ​ຊ້​ເຂົ້າ​ໃນ​ວຽກ​ງານ​ທາງ​ລັດຖະການ.

9.2 ຄະນະ​ໂຄສະນາ​ອົບຮົມ​ສູນ​ກາງ​ພັກ ​ເປັນ​ຫົວຫນ່ວຍ​ງົບປະມານ​ຫນຶ່ງ ຊຶ່ງ​ໄດ້​ຮັບຈາກ​ງົບປະມາ​ນຂອງ​ລັດ ​ເພື່ອ​ໃຊ້​ຈ່າຍ​ຮັບ​ໃຊ້​ເຂົ້າ​ໃນ​ວຽກ​ງານ​ຂອງ​ຕົ​ນ ຄື​ກັບ​ ອົງການ​ຂອງ​ສູນ​ກາງ ​ແລະ ກະຊວງ - ອົງການຈັດຕັ້ງຂອງ​ລັດ.

ມາດຕາ 10​: ຄະນະ​ໂຄສະນາ​ອົບຮົມສູນ​ກາງ​ພັກ, ບັນດາ​ອົງການ​ຂອງ​ພັກ-ລັດ, ອົງການ​ແນວ​ລາວ​ສ້າງ​ຊາດ ​ແລະ ອົງການຈັດຕັ້ງມະຫາຊົນຂັ້ນສູນ​ກາງ ບັນດາ​ແຂວງ, ນະຄອນ​ຫລວງ ຈົ່ງ​ຮັບ​ຮູ້ ​ແລະ ຈັດຕັ້ງປະຕິບັດ​ຕາມ​ມະ​ຕົກລົງ​ສະບັບ​ນີ້​ຢ່າງ​ເຂັ້ມງວດ.

ມາດຕາ 11: ມະຕິ​ຕົ​ກລົງ​ສະບັບ​ນີ້​ມີ​ຜົນ​ໃຊ້​ໄດ້​ນັບ​ແຕ່​ມື້​ລາຍ​​ເຊັນ​ເປັນຕົ້ນ​ໄປ ​ແລະ ປ່ຽນ​ແທນ​ຂໍ້ຕົກລົງ ສະບັບ​​ເລກທີ 09 / ຄລສພ ,ລົງ​ວັນ​ທີ 23 / 9 /2009.

ກົດໝາຍແຫ່ງ ສປປ ລາວ

ຊົມເຊີມວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 60 ປີ

ຊົມເຊີມວັນສ້າງຕັ້ງ ສປປ ລາວ ຄົບຮອບ 40 ປີ ຢ່າງສຸດໃຈ.

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

ເຊື່ອມຕໍ່ເວບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624

ຈຳນວນຄົນອອນໄລ໌ທ

ມີ 68  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

956111
ມື້ນີ້ມື້ນີ້1352
ມື້ວານນີ້ມື້ວານນີ້1559
ອາທິດນີ້ອາທິດນີ້5862
ເດືອນນີ້ເດືອນນີ້19517
ທັງໝົດທັງໝົດ956111