ພິທີເປີດຊຸດຝຶກອົບຮົມ ວຽກງານໂຄສະນາປາຖະກະຖາ...

ລາຍລະອຽດ

ສ້າງຂື້ນເມື່ອ ວັນຈັນ, 07 ຕຸລາ 2019 02:42

ຂຽນໂດຍ ມາລາ

ພິທີເປີດຊຸດຝຶກອົບຮົມ ວຽກງານໂຄສະນາປາຖະກະຖາ

ໃຫ້ພະນັກງານຫຼັກແຫຼ່ງເມືອງນອງ ແຂວງສະຫວັນນະເຂດ

    ໃນລະຫວ່າງວັນທີ 23 - 25 ກັນຍາ 2019 ຜ່ານມານີ້ ກົມໂຄສະນາ ຂອງຄະນະໂຄສະນາອົບຮົມສູນກາງພັກ ໄດ້ສົມທົບກັບ ຄະນະໂຄສະນາອົບຮົມແຂວງ

ສະຫວັນນະເຂດແລະ ຄະນະໂຄສະນາອົບຮົມເມືອງນອງ ຈັດຊຸດຝຶກອົບຮົມວຽກງານໂຄສະນາ - ປາຖະກະຖາຂື້ນຢູ່ທີ່ສະໂມສອນຂອງເມືອງນອງ ໃຫ້ກຽດເຂົ້າຮ່ວມພິທີເປີດ ມີທ່ານ ລຳແກ້ວ ແສງໜູທອງ ວ່າການເລຂາພັກເມືອງ, ເຈົ້າເມືອງເມືອງນອງ, ມີ ທ່ານ ນາງ ບົວລີ ບັນຊາລິດ ຄະນະພັກ, ຫົວໜ້າ ກົມໂຄສະນາ ຄະນະໂຄສະນາອົບຮົມສູນກາງພັກ, ທ່ານ ແກ້ວອຸດອນ ແກ້ວດວງດີ ຮອງຫົວໜ້າຄະນະໂຄສະນາອົບຮົມ ແຂວງສະຫວັນນະເຂດ ພ້ອມດ້ວຍຄະນະຮັບຜິດຊອບຈາກຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມເມືອງ ບັນດາແຂກທີ່ຖືກເຊີນ, ນັກຝຶກອົບຮົມ ເຊິ່ງມີບັນດາຄະນະພັກເມືອງ, ຄະນະພັກຮາກຖານ, ຫົວໜ້າ - ຮອງຫົວໜ້າ ຫ້ອງການ, ຫົວໜ້າໜ່ວຍງານ, ກຳລັງ ປກຊ - ປກສ ແລະ ນາຍບ້ານ - ຮອງນາຍບ້ານ ຈຳນວນທັງໝົດ 49 ທ່ານ, ຍິງ 11 ທ່ານ.

    ໃນພິທີເປີດ ທ່ານ ລຳແກ້ວ ແສງໜູທອງ ວ່າການເລຂາພັກເມືອງ, ເຈົ້າເມືອງເມືອງນອງ ໄດ້ເໜັ້ນໜັກວ່າ:  ຄະນະ ຮັບຜິດຊອບ ແລະ ນັກຝຶກອົບຮົມຈົ່ງຍົກສູງ, ມີຄວາມຮັບຜິດຊອບໃນການຝຶກອົບຮົມ, ຜ່ານຜ່າຄວາມຫຍຸ້ງຍາກ ແລະ ກຳ ແໜ້ນບົດຮຽນ ເພື່ອເປັນພື້ນຖານ ໃນການໝູນໃຊ້ບົດຮຽນດັ່ງກ່າວເຂົ້າໃນວຽກງານແຕ່ລະຫ້ອງການ, ແຕ່ລະຂະແໜງການຂອງໃຜລາວໃຫ້ມີຜົນສຳເລັດ.

          ເອກະສານທີ່ນຳມາຝຶກອົບຮົມໃນຄັ້ງນີ້ ປະກອບມີ 4 ບົດຄື:

1.     ບັນຫາພື້ນຖານຂອງວຽກງານໂຄສະນາ.

2.     ຝຶກຝົນ ຄວາມສາມາດໃນການຂຽນເອກະສານ.

3.   ຄຸນລັກສະນະ ແລະ ສິລະປະໃນການປາກເວົ້າ.

4.    ບັນດານິຕິກຳ ແລະ ບາງບົດຮຽນ ໃນການເຄື່ອນໄຫວວຽກງານໂຄສະນາ. ພ້ອມກັນນັ້ນ ນັກຝຶກອົບຮົມ ຍັງໄດ້ເຮັດ ທົດລອງໃນການຂຶ້ນ ປາຖະກະຖາ ແລະ ພ້ອມກັນປະກອບຄຳຄິດຄຳເຫັນ ແລກປ່ຽນບົດຮຽນເຊິ່ງກັນ ແລະ ກັນ ເພື່ອໃຫ້ກາຍເປັນນັກປາຖະ ກະຖາຜູ້ທີ່ຂຽນດີເວົ້າເກັ່ງຂອງຂະແໜງການຕ່າງໆໃນອະນາຄົດ.

    ໃນພິທີປິດຊຸດຝຶກອົບຮົມ ທ່ານ ສຸກສາຄອນ ໂພທິລາດ ກຳມະການປະຈຳພັກເມືອງ, ຫົວໜ້າຄະນະຈັດຕັ້ງເມືອງ ແລະ ໄດ້ມີ ຄຳເຫັນໂອ້ລົມຕໍ່ກັບນັກຝຶກອົບຮົມວ່າ: ເພື່ອຍົກສູງຄວາມຮູ້ຄວາມສາມາດ, ທີ່ພວກເຮົາໄດ້ຄົ້ນຄວ້າຮ່ຳຮຽນມາໃນໄລຍະ 3 ວັນນັ້ນ ຮຽກຮ້ອງໃຫ້ນັກຝຶກອົບຮົມເອົາໃຈໃສ່ ສືບຕໍ່ຄົ້ນຄວ້າກຳແໜ້ນບັນດາບົດຮຽນ ຄວາມຮັບຮູ້ທີ່ຮຽນມາໃຫ້ເລິກເຊິ່ງຕື່ມ ເພື່ອປັບປຸງວຽກງານຕົວຈິງໃຫ້ລະອຽດຈະແຈ້ງ ໝາຍຄວາມວ່າ: ຖືເອົາວຽກງານການໂຄສະນາ ສຶກສາອົບຮົມໄປຄຽງຄູ່ກັບການຈັດຕັ້ງນຳພາເຮັດຕົວຈິງ; ເພື່ອເພີ່ມທະວີຄວາມເອົາໃຈໃສ່ແກ້ໄຂບັນຫາ ແລະ ຄວາມຂັດຂ້ອງ ໝອງໃຈຂອງປະຊາຊົນ ເປັນຕົ້ນແມ່ນ ບັນຫາແກ້ໄຂປະກົດການຫຍໍ້ທໍ້, ບັນຫາການຜະລິດເປັນສິນຄ້າ, ການແກ້ໄຂຄວາມທຸກຍາກ, ບັນຫາການນຳພາສ້າງສາພັດທະນາປະເທດຊາດ ແລະ ອື່ນໆ…

• < ຕໍ່ໄປ
• ຕໍ່ໄປ >