ກົມພາສີ ປາຖະກະຖາ ເລົ່າຄືນມູນເຊື້ອຂອງຊາດ

ສ້າງຂື້ນເມື່ອ ວັນຈັນ, 04 ພະຈິກ 2019 03:53
ຂຽນໂດຍ ແກ້ວຈຳປາ

ກົມພາສີ ປາຖະກະຖາ ເລົ່າຄືນມູນເຊື້ອຂອງຊາດ

    ເພື່ອຫວນຄືນມູນເຊື້ອ ວັນຊາດທີ2 ທັນວາ ທີ່ຈະມາເຖິງນີ້ ໃນວັນທີ 25 ຕຸລາ 2019 ພະນັກງານກົມພາສີ, ກະຊວງການເງິນ ໄດ້ຮັບຟັງປາຖະກະຖາເລົ່າ

ຄືນມູນເຊື້ອ ວັນຊາດທີ 2 ທັນວ່າ ຄົບຮອບ 44 ປີ. ໂດຍໃຫ້ກຽດປາຖະກະຖາໂດຍ ທ່ານ ສີປະເສີດ ແສນສະຫວັດ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ເຂົ້າຮ່ວມຟັງ ມີທ່ານ ບຸນປະເສີດ ສີກຸນລະບຸດ ຮັກສາການ ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ສະມາຊິກພັກ-ພະນັກງານກອງພາສີ ຂອງຂະແໜງການພາສີເຂົ້າຮ່ວມ ທັງໝົດ 65 ສະຫາຍ, ຍິງ 27 ສະຫາຍ. ໃນໂອກາດດັງກ່າວ ທ່ານໄດ້ຍົກໃຫ້ເຫັນປະຫວັດຄວາມເປັນມາຂອງຊາດລາວ ໃນໄລຍະຕໍ່ສູ້ກູ້ຊາດ ຕ້ານພວກຈັກກະພັດຜູ້ຮຸກຮານ ລ່າເມືອງຂື້ນແບບເກົ່າ ແລະ ຈັກກະພັດລ່າເມືອງຂຶ້ນແບບໃໝ່ ໂດຍພາຍໃຕ້ ການຊີ້ນຳ-ນຳພາຂອງພັກອມມູນນິດອິນດູຈີນ ໃນປີ1945. ພາຍຫຼັງພັກປະຊາຊົນປະຕິວັດລາວໄດ້ຮັບການສ້າງຕັ້ງຂື້ນໃນປີ 1955 ກໍໄດ້ສືບຕໍ່ນຳພາຂະບວນການຕໍ່ສູ້ຈົນສາມາດຍາດໄດ້ໄຊຊະນະຢ່າງສົມບູນ ແລະ ສາທາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວໃນປີ1975.

    ພ້ອມດຽວກັນນັ້ນທ່ານໄດ້ ຍົກໃຫ້ເຫັນເຖິງຄວາມໝາຍຄວາມສຳຄັນຂອງມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X ຂອງພັກ, ໃນການຈັດຕັ້ງປະຕິບັດເຂົ້າໃນໜ້າທີ່ວຽກງານໃຫ້ຖືກຕ້ອງ ແລະ ສອດຄອງເວົ້າລວມ ເວົ້າສະເພາະກໍແມ່ນ ວຽກພາສີໃນໄລຍະໃໝ່ ເພື່ອເຮັດໃຫ້ວຽກງານພາສີ ມີຄວາມເຂັ້ມແຂງໃນການສ້າງລາຍຮັບຂອງຊາດໃຫ້ບັນລຸຕາມການມອບໝາຍຈາກຂັ້ນເທິງ ເພື່ອປະກອບສ່ວນເຂົ້າໃນການພັດທະນາປະເທດຊາດໃຫ້ອຸດົມຮັ່ງມີໃນຕໍ່ໜ້າ.

    ໃນຕອນທ້າຍ ທ່ານໄດ້ເນັ້ນໃຫ້ພະນັກງານພາຍໃນກົມພາສີ ໃຫ້ເອົາໃຈໃສ່ຄົ້ນຄ້ວາກຳແໜ້ນ ວຽກງານການເມືອງ-ແນວຄິດ, ທັງຮັກສາມູນເຊື້ອຄວາມສາມັກຄີພາຍໃນ ແລະ ເອົາໃຈໃສ່ເຮັດວຽກງານວິຊາສະເພາະຂອງຕົນ ໃຫ້ໄດ້ຕາມເປົ້າໝາຍທີ່ວາງໄວ້.