ກອງປະຊຸມໃຫຍ່ຄັ້່ງທີ I ຂອງໜ່ວຍສະຫະພັນແມ່ຍິງກົມຂໍ້ມູນຂ່າວສານ

ສ້າງຂື້ນເມື່ອ ວັນອັງຄານ, 06 ສິງຫາ 2019 02:56
ຂຽນໂດຍ ຄອນສະຫວັນ

ກອງປະຊຸມໃຫຍ່ຄັ້່ງທີ I ຂອງໜ່ວຍສະຫະພັນແມ່ຍິງກົມຂໍ້ມູນຂ່າວສານ

          ໃນຕອນບ່າຍຂອງວັນທີ 29 ກໍລະກົດ 2019 ທີ່ຜ່ານມາ. ໜ່ວຍສະຫະພັນແມ່ຍິງຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ໄດ້ຈັດກອງປະຊຸມໃຫຍ່ຄັ້ງທີ I ຂອງຕົນຂື້ນທີ່ຫ້ອງປະຊຸມຊັ້ນ 5

ຄະນະໂຄສະນາອົບຮົມສູນກາງພັກ; ພາຍໃຕ້ການເປັນປະທ່ານຮ່ວມ ສະຫາຍ ນາງ ບົວລີ ບັນຊາລິດ ຄະນະພັກ, ປະທານສະຫະພັນແມ່ຍິງ, ຜູ້ຊີ້ນຳອົງການຈັດຕັ້ງມະຫາຊົນ ຄະນະໂຄສະນາອົບຮົມສູນກາງພັກເຂົ້າຮ່ວມມີ ສະຫາຍ ທ່ານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວສານ, ມີຜູ້ຕ່າງໜ້າໜ່ວຍສະຫະພັນແມ່ຍິງບັນດາກົມ, ສະມາຊິກແມ່ຍິງ, ຕ່າງໜ້າສະຫະພັນກຳມະບານ ແລະ ຊາວໜຸ່ມພາຍໃນກົມຂໍ້ມູນຂ່າວສານເຂົ້າຮ່ວມຢ່າງພ້ອມພຽງ.

          ໃນກອງປະຊຸມໄດ້ຜ່ານຮ່າງບົດລາຍງານການເມືອງເຊິ່ງໄດ້ສະຫຼຸບຕີລາຄາ, ຈຸດດີ, ຈຸດອ່ອນ ແລະ ຂໍ້ຄົງຄ້າງໃນການເຄື່ອນໄຫວປະຕິບັດໜ້າທີວຽກງານຂອງໜ່ວຍໃນໄລຍະ 5 ປີ ຜ່ານມາ ແລະ ວາງທິດທາງແຜນການ, ວຽກງານຈຸດສຸມໃນ 5 ປີຕໍ່ໜ້າ; ນອກຈາກນັ້ນຄະນະໜ່ວຍແມ່ຍິງກົມຂໍ້ມູນຂ່າວສານຊຸດເກົ່າໄດ້ຜ່ານບົດສຳຫຼວດການຊີ້ນຳ-ນຳພາໃນໄລຍະຜ່ານມາ ພ້ອມທັງລາໜ້າທີ່ ແລະ ປ່ອນບັດຄັດເລືອກເອົາຄະນະໜ່ວຍແມ່ຍິງຊຸດໃໝ່, ເຊິງມີຜູ້ລົງສະໝັກເລືອກຕັ້ງໃນຄະນະໜ່ວຍແມ່ຍິງຊຸດໃໝ່ຈຳນວນ 3 ສະຫາຍຄື: ສະຫາຍ ນາງ ຄຳສີ ວອນທານີ, ສະຫາຍ ນາງ ທິບພະຈັນ ວົງລໍຄຳ ແລະ ສະຫາຍ ນາງ ສົມພິນິດ ວົງສົມບັດ, ໃນນັ້ນເລືອກເອົາຄະນະໜ່ວຍຊຸດໃໝ່ 2 ສະຫາຍ, ຜ່ານການປ່ອນບັດຄັດເລືອກຕັ້ງສາມາດເລືອກໄດ້ 2 ສະຫາຍຄື:

  1. ສະຫາຍ ນາງ ຄຳສີ ວອນທານີ ເປັນຫົວໜ້າໜ່ວຍສະຫະພັນແມ່ຍິງກົມຂໍ້ມູນຂ່າວສານຊຸດໃໝ່.
  2. ສະຫາຍ ນາງ ທິບພະຈັນ ວົງລໍຄຳ ເປັນຮອງຫົວໜ້າໜ່ວຍສະຫະພັນແມ່ຍິງກົມຂໍ້ມູນຂ່າວສານຊຸດໃໝ່.

          ໃນພິທີດັ່ງກ່າວຍັງໄດ້ຮັບກຽດຈາກສະຫາຍ ນາງ ບົວລີ ບັນຊາລິດ ຄະນະພັກ, ປະທານສະຫະພັນແມ່ຍິງ, ຜູ້ຊີ້ນຳອົງການຈັດຕັ້ງມະຫາຊົນ ຄະນະໂຄສະນາອົບຮົມສູນກາງພັກ ມີຄຳເຫັນໂອ້ລົມຕໍ່ກອງປະຊຸມເຊິ່ງກ່ອນອຶ່ນທ່ານໄດ້ສະແດງຄວາມຍີນດີຍ້ອງຍໍຊົມເຊີຍຕໍ່ຜົນງານອັນໃຫຍ່ຫຼວງໃນການເຄື່ອນໄຫວໃນໄລຍະ 5 ປີທີ່ຜ່ານມາເຊິ່ງມັນສະແດງອອກໃນການເອົາໃຈໃສ່, ເປັນເຈົ້າການຈັດຕັ້ງປະຕິບັດຕໍ່ໜ້າທີ່ວຽກງານ, ມີສະຕິຕໍ່ການຈັດຕັ້ງ, ຄວາມຈົ່ງຮັກພັກດີຕໍ່ພັກ ແລະ ລັດ, ປະກອບສ່ວນເຄື່ອນໄຫວວຽກງານຂອງຕົນຢ່າງຕັ້ງໜ້າ. ນອກນັ້ນ, ທ່ານ​ຍັງ​ໄດ້ຮຽກຮ້ອງມາຍັງຄະນະໜ່ວຍຊຸດໃໝ່ ແລະ ສະມາຊິກແມ່ຍິງ ທຸກສະຫາຍ ຈົ່ງເພີ່ມທະວີຄວາມສາມັກຄີເປັນເອກະພາບ ພ້ອມກັນບຸກບືນພັດທະນາຕົນເອງຢ່າງຮອບດ້ານເປັນຕົ້ນທາງດ້ານທິດສະດີ, ແນວທາງ ແລະ ວຽກງານວິຊາສະເພາະ, ເຊີດຊູນ້ຳໃຈຮັກຊາດ, ເປັນເຈົ້າຕົນເອງ ແລະ ເພີ່ມທະວີຄວາມຮັບຜິດຊອບເຂົ້າໃນການຈັດຕັ້ງປະຕິບັດວຽກງານ.