ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກລົງເຄື່ອນໄຫວມອບເວັບໄຊ ໃຫ້ ຄະນະໂຄສະ...

ລາຍລະອຽດ

ສ້າງຂື້ນເມື່ອ ວັນຈັນ, 12 ສິງຫາ 2019 03:40

ຂຽນໂດຍ katekeo

ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກລົງເຄື່ອນໄຫວມອບເວັບໄຊໃຫ້ຄະນະໂຄສະນາອົບຮົມແຂວງຫົວພັນ

     ໃນວັນທີ 22-29 ພຶສະພາ 2019 ຜ່ານມາ. ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ໄດ້ລົງມອບສິດ​ນຳ​ໃຊ້​ເວັບໄຊ ພ້ອມ​ທັງ​ຝຶກ​ອົບຮົມວິທີ

​ການ​ນຳ​ໃຊ້ ​ແລະ ການຄຸ້ມ​ຄອງໃຫ້ຄະນະໂຄສະນາອົບຮົມແຂວງ ຫົວພັນ ນໍາໂດຍ ທ່ານ ນາງ ມອນສະຫວັນ ແສນໄຕ ຮອງຫົວໜ້າກົມຂໍ້ມູນຂ່າວສານ ພ້ອມດ້ວຍຄະນະ,  ທ່ານ ແປ້ນ  ໄຊຍະທໍາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງຫົວພັນ  ແລະ ນັກສຳມະນາກອນຂອງຄະນະໂຄສະນາອົບຮົມແຂວງ ໄດ້ເຂົ້າຮ່ວມທັງໝົດມີ 8 ທ່ານ, ຍິງ 3 ທ່ານ.

    ຈຸດປະສົງໃນການລົງ​ໄປ​​ເຄື່ອນໄຫວວຽກງານຢູ່ແຂວງໃນ​ຄັ້ງນີ້ ເພື່ອມອບສິດນຳໃຊ້ເວັບໄຊ, ໃຫ້ຄະນະໂຄສະນາອົບຮົມແຂວງເພື່ອນຳໃຊ້ເຂົ້າໃນການໂຄສະນາການເຄືອນໄຫວວຽກງານໂຄສະນາອົບຮົມແຂວງ,ເພື່ອເປັນການຍົກສູງຄຸນນະພາບວຽກງານໂຄສະນາອົບຮົມໃນໄລຍະໃຫມ່ເພື່ອຫັນເປັນທັນສະໄໝ ທາງດ້ານຂໍ້ມູນຂ່າວສານ ແລະ ທັງເປັນການຍົກລະດັບຄວາມຮູ້ຄວາມສາມາດທາງດ້ານການນຳໃຊ້ ແລະ ການຄຸ້ມຄອງເວັບໄຊໃຫ້ແກ່ພະນັກງານໂຄສະນາອົບຮົມແຂວງ ເຊິ່ງໄດ້ຝືກອົບຮົມກ່ຽວກັບການປ້ອນຂ່າວ, ຮູບພາບ, ວີດີໂອ ຂື້ນເວັບໄຊ ແລະ ການແກ້ໄຂໂມດູນຕ່າງໆເທິງໜ້າເວັບໄຊ ໃຫ້ແກ່ພະນັກງານຜູ້ຮັບຜິດຊອບວຽກງານດັ່ງກ່າວແນ່ໃສ່ຍົກລະດັບຄວາມຮູ້ຄວາມສາມາດໃຫ້ພະນັກງານວິຊາການໄອທີ ຂອງຄະນະໂຄສະນາອົບຮົມແຂວງ ໃຫ້ນັບມື້ສູງຂຶ້ນ ແລະ ເຂົ້າໃຈເລິກເຊິ່ງ ເຖິງບົດບາດຂອງເຕັກໂນໂລຢີ, ຂໍ້ມູນຂ່າວສານ (ເວັບໄຊ), ເພື່ອນຳໃຊ້ເຂົ້າໃນວຽກງານວິຊາສະເພາະຂອງຕົນເວົ້າລວມ, ເວົ້າສະເພາະ ແມ່ນການໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງກວ້າງຂວາງ ແລະ ທົ່ວເຖິງໂດຍການຜ່ານໜ້າກະດານເອເລັກໂຕຼນິກ   (ເວັບໄຊ) ໃຫ້ມີບາດກ້າວຂະຫຍາຍຕົວຂື້ນເລື້ອຍໆ.

      ໃນ​ໂອກາ​ດດັ່ງກ່າວ ​​ທີ​ມງານ​ທີ່​ລົງ​ໄປກໍ່​ໄດ້​ມອບ​​ເງິນ ສົມທົບ​ໃຫ້​ຄະນະ​ໂຄສະນາ​ອົບຮົມ​ແຂວງ ຈຳນວນ 3.000.000 ກີບ ​ເພື່ອ​ໝູນໃຊ້ເຂົ້າໃນວຽກງານເວັບໄຊສຂອງແຂວງ ​ໃຫ້​ມີ​ຄວາມ​ສະດວກ ​ແລ​ະ ທັນ​ສະ​ໄໝຂຶ້ນ​ເປັນ​ກ້າວໆ.

      ພາຍຫຼັງສິ້ນສຸດການຝືກອົບຮົມແລ້ວ ທ່ານ ນາງ ມອນສະຫວັນ ແສນໄຕ ຮອງຫົວໜ້າກົມຂໍ້ມູນຂ່າວສານ, ຄະນະໂຄສະນາອົບຮົມສູນກາງພັກ ໄດ້ຕາງໜ້າໃຫ້ຄະນະນຳຂັ້ນສູນກາງມອບສິດນຳໃຊ້ເວັບໄຊໃຫ້ແກ່ຄະນະໂຄສະນາອົບຮົມແຂວງຫົວພັນ ຢ່າງເປັນທາງການ

• < ຕໍ່ໄປ
• ຕໍ່ໄປ >