ພິທີເປີດຊຸດຝຶກອົບຮົມກ່ຽວກັບການໂຄສະນາຜ່ານສື່ ...

ສ້າງຂື້ນເມື່ອ ວັນພະຫັດ, 31 ຕຸລາ 2019 01:53
ຂຽນໂດຍ ອິດໄຊທອງ ສົມມະນີ

ພິທີເປີດຊຸດຝຶກອົບຮົມກ່ຽວກັບການໂຄສະນາຜ່ານສື່ ແລະ ການນຳໃຊ້ເຕັກນິກຂອງສື່ສຳລັບອົງການສື່ມວນຊົນລາວທີ່ນະຄອນຫຼວງປັກກິງ ສປ ຈີນ(22/10-11/11/2019)

    ໃນຕອນເຊົ້າຂອງວັນທີ 22 ຕຸລາ 2019 ຜ່ານມາຢູ່ທີ່ສະຖາບັນຄົ້ນຄວ້າ ແລະ ຝຶກອົບຮົມກົມໃຫຍ່ວິທະຍຸ-ໂທລະພາບແຫ່ງຊາດຈີນ, ນະຄອນຫຼວງປັກກິງ

ສປ ຈີນ ໄດ້ເປີດຊຸດຝຶກອົບຮົມກ່ຽວກັບການໂຄສະນາຂອງສື່ໃຫ້ແກ່ສື່ມວນຊົນລາວສຳລັບປີ 2019 ໂດຍການເຂົ້າຮ່ວມເປັນປະທານ ແລະ ໃຫ້ກຽດກ່າວເປີດພິທີໂດຍທ່ານ ຫລົວ ຢູນ ຫຼົງ ຫົວໜ້າຫ້ອງການພົວພັນສາກົນສະຖາບັນຄົ້ນຄວ້າວິທະຍຸ-ໂທລະພາບແຫ່ງຊາດຈີນ, ຝ່າຍລາວນຳໂດຍທ່ານ ສົມຄວນ ມາສຸວັນ ຮອງຫົວໜ້າກົມປະຊາສຳພັນສຳນັກງານນາຍົກລັດຖະມົນຕີສປປ ລາວ, ມີນັກວິທະຍາກອນຈາກ ສປ ຈີນ ແລະ ນັກສຳມະນາກອນຈາກກະຊວງ, ອົງການຂອງສປປ ລາວເຂົ້າຮ່ວມທັງໝົດ 21 ທ່ານ, ຍິງ 7 ທ່ານ. ຊຸດຝຶກອົບຮົມຈະໄດ້ດຳເນີນໄປເປັນເວລາ 21 ວັນນັບຕັ້ງແຕ່ວັນທີ 22 ຕຸລາ ຫາ 11 ພະຈິກ 2019ຈຶ່ງຈະສໍາເລັດ.

    ຊຸດຝຶກອົບຮົມຄັ້ງນີ້ນັກສຳມະນາກອນຈະໄດ້ຮຽນຮູ້ກ່ຽວກັບວຽກງານການໂຄສະນາຜ່ານສື່ ແລະ ການນຳໃຊ້ເຕັກນິກເຂົ້າໃນວຽກງານວິຊາສະເພາະໃນຮູບແບບໃໝ່ທັງເປັນການຍົກລະດັບຄວາມຮູ້, ຄວາມສາມາດໃນການນຳໃຊ້ສື່ໃນຍຸກປັດຈຸບັນໃຫ້ມີຄວາມທັນສະໄໝ, ອີກດ້ານໜື່ງກໍເປັນການແລກປ່ຽນບົດຮຽນທາງດ້ານວັດທະນະທຳ-ສັງຄົມ ແລະ ຮັດແໜ້ນຄວາມສາມັກຄີ ແລະ ສາຍພົວພັນອັນດີງາມທີ່ມີມູນເຊື້ອລະຫວ່າງລາວ-ຈີນ, ຈີນ-ລາວ ໃຫ້ນັບມື້ນັບມີຄວາມແໜ້ນແຟ້ນຂື້ນເລື່ອຍໆ.

    ນອກຈາກນັ້ນ, ບັນດານັກສຳມະນາກອນຍັງຈະໄດ້ໄປທັດສະນະສຶກສາຢູ່ບັນດາສະຖາບັນສື່ມວນຊົນຂອງຈີນ ແລະ ທ່ຽວຊົມບັນດາແຫຼ່ງທ່ອງທ່ຽວທາງວັດທະນະທຳທີ່ມີສື່ສຽງຂອງ ສປ ຈີນຕື່ມອີກເພື່ອລົງເບີ່ງຕົວຈິງລະຫວ່າງທິດສະດີກັບພຶດຕິກຳ ແລະ ຮຽນຮູ້ບັນດາວັດທະນະທຳທີ່ມີອາລິຍະທຳທີ່ເກົ່າແກ່ຂອງ ສປຈີນ.