ຄະນະໂຄສະນາອົບຮົມ ແຂວງຫົວພັນ ຈັດພິທີປາຖະກະຖາ...

ສ້າງຂື້ນເມື່ອ ວັນຈັນ, 01 ເມສາ 2019 03:57
ຂຽນໂດຍ ຄອນສະຫວັນ

ຄະນະໂຄສະນາອົບຮົມ ແຂວງຫົວພັນ ຈັດພິທີປາຖະກະຖາລະນຶກວັນເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 73 ປີ ແລະ ວັນສ້າງຕັ້ງພັກປະຊາຊົນລາວ ຄົບຮອບ 64 ປີ.

        ໃນວັນທີ 22 ມີນາ 2019 ຜ່ານມາ, ຄະນໂຄສະນາອົບຮົມ ແຂວງຫົວພັນ ໄດ້ຈັດພິທີປາຖະກະຖາ 2 ວັນປະ ຫວັດສາດທີ່ສໍາຄັນຂອງພັກ ຂອງຊາດຄື: ວັນລະນຶກວັນເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 73 ປີ ( 21 ມີນາ

1946–21 ມີນາ 2017 ) ແລະ ວັນສ້າງຕັ້ງພັກປະຊາຊົນລາວ ຄົບຮອບ 64 ປີ (22 ມີນາ 1955 - ​22 ມີນາ 2018 ) ຂຶ້ນທີ່ ຫໍວັດທະນາທໍາແຂວງ; ໂດຍການເປັນປະທານຂອງ ທ່ານ ເພີດ ມາປັນຍາ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ເຂົ້າຮ່ວມມີ: ການນໍາຂັ້ນແຂວງ, ກອງບັນຊາການທະຫານ, ກອງບັນຊາການຕໍາຫຼວດ, ສະມາຊິກພັກ, ພະນັກງານ-ລັດຖະກອນ, ນັກຮຽນ, ນັກສຶກສາ ອ້ອມຂ້າງເທດສະບານແຂວງ  ທັງໝົດ 500 ຄົນ, ຍິງ 200 ຄົນ.

       ໃນພິທີທ່ານ ເພີດ ມາປັນຍາ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ຫວນຄືນມູນ ເຊື້ອຄວາມໝາຍ ຄວາມສໍາຄັນຂອງວັນເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 73 ປີ ແລະ ວັນສ້າງຕັ້ງພັກປະຊາຊົນລາວ ຄົບຮອບ 64 ປີ ທັງຍົກໃຫ້ເຫັນມູນເຊື້ອປະຫວັດສາດ ​ແຫ່ງການ​ຕໍ່ສູ້ກູ້ຊາດ ອັນພິລະອາດຫານ ທີ່ເຕັມໄປດ້ວຍການເສຍສະຫຼະຊີວິດ, ເລືອດເນື້ອຂອງກອງທັບ ແລະ ປະຊາຊົນລາວບັນດາເຜົ່າພາຍໃຕ້ການນໍາພາອັນສະຫຼາດສ່ອງໃສ ຂອງພັກປະຊາຊົນປະຕິວັດລາວ ຕ້ານການຮຸກຮານຂອງພວກລ່າເມືອງຂຶ້ນແບບເກົ່າ ແລະ ແບບໃໝ່; ເວົ້າລວມ ເວົ້າສະເພາະ ບັ້ນຮົບປ້ອງກັນຕົວເມືອງທ່າແຂກເຊິ່ງແມ່ນບັ້ນຮົບທີ່ມີການຕໍ່ສູ້ດຸເດືອດຂ້ຽວຂາດເຕັມໄປດ້ວຍການເສຍສະຫຼະຊີວິດຂອງບັນດາພະນັກງານ, ທະຫານ ແລະ ປະຊາຊົນຊາວເມືອງທ່າແຂກເປັນຈຳນວນຫຼວງຫຼາຍອັນໄດ້ເຮັດໃຫ້ເລືອດຂອງທະຫານອາສາສະໝັກຫວຽດນາມ ແລະ ກອງທັບປະຊາຊົນລາວໄຫຼເຈືອຈານກັນບົນແຜນດິນຂອງຕົວເມືອງທ່າແຂກເຊິ່ງເປັນແວ່ນແຍງອັນເຫຼື້ອມໃສຂອງນໍ້າໃຈສູ້ຮົບຢ່າງພິລະອາດຫານບໍ່ຍອມຈໍານົນ ຂອງກອງທັບ ແລະ ປະຊາຊົນເມືອງທ່າແຂກ ກໍຄືການບັນຊາທີ່ເດັດດ່ຽວໜ່ຽວແໜ້ນ ຂອງຄະນະກອງບັນຊາການກໍາລັງປະກອບອາວຸດພວກເຮົາ ໂດຍແມ່ນ ປະທານ ສຸພານຸວົງ ເປັນຜູ້ນໍາໜ້າ ເຊິ່ງໄດ້ຝັງເລິກຢູ່ໃນດວງໃຈຂອງປະຊາຊົນລາວ ແລະ ຫວຽດນາມ ຈົນຊົ່ວກາລະນານ. ​ໃນການປາຖະກະຖາຄັ້ງນີ້ ແມ່ນເພື່ອ​ສ້າງ​ຄວາມ​ຮັບ​ຮູ້​ເຂົ້າ​ໃຈ​ຢ່າງເລິກເຊິ່ງໃຫ້ແກ່​ພະນັກງານ​ - ລັດຖະກອນ ​ເຫັນ​ໄດ້​ເຖິງ​ຕົ້ນກຳ​ເນີ​ດ, ມູນ​ເຊື້ອ​ອັນ​ດີງາມຂອງ​ພັກ​ປະຊາຊົນ​ປະຕິວັດ​ລາວ ເພື່ອ​ພ້ອມ​ກັນ​ປົກ​ປັກ​ຮັກສາ ​ແລະ ສ້າງສາ​ພັດທະ ນາ​ປະ​ເທດ​ຊາດ ​ໃຫ້ນັບ​ມື້​ຈະ​ເລີ​ນຮຸ່ງ​ເຮືອງ ​ແລະ ​ເຂັ້ມ​ແຂງ​ຂຶ້ນ​ເລື້ອຍໆ.