ກອງປະຊຸມບັ້ນດຳເນີນຊີວິດການເມືອງໜ່ວຍຮາກຖານຊາວໜຸ່ມ ຂອງຄະນະໂຄສະນາອົບຮົມແຂວງ ຫຼວງພະບາງ.

ສ້າງຂື້ນເມື່ອ ວັນອັງຄານ, 23 ເມສາ 2019 05:44
ຂຽນໂດຍ ຄະນະໂຄສະນາອົບຮົມແຂວງຫລວງພະບາງ

 

ກອງປະຊຸມບັ້ນດຳເນີນຊີວິດການເມືອງໜ່ວຍຮາກຖານຊາວໜຸ່ມ ຂອງຄະນະໂຄສະນາອົບຮົມແຂວງ ຫຼວງພະບາງ.

      ໃນຕົ້ນເດືອນ ເມສາ 2019 ຜ່ານມາ, ໜ່ວຍຮາກຖານຊາວໜຸ່ມຄະນະໂຄສະນາອົບຮົມແຂວງ ຫຼວງພະບາງ ໄດ້ເປີດກອງປະຊຸມບັ້ນດຳເນີນຊີວິດການເມືອງຂື້ນທີ່ ຫ້ອງປະຊຸມຄະນະໂຄສະນາອົບຮົມແຂວງຫຼວງພະບາງ ເພື່ອກະກຽມໃຫ້ກອງປະຊຸມໃຫຍ່ທີ່ຈະຈັດຂື້ນໃນມໍ່ໆນີ້; ໂດຍການເປັນປະທານຂອງ ສະຫາຍ ຄຳຫຼ້າ ລຽນປະດິດ ກຳມະການປະ ຈຳພັກແຂວງ ເລຂາໜ່ວຍພັກ ຫົວໜ້າຄະນະໂຄສະນາອົບຮົມແຂວງ ຫຼວງພະບາງ, ເຂົ້າຮ່ວມມີ:  ບັນດາສະມາຊິກຊາວ ໜຸ່ມຂອງ ໜ່ວຍພັກ ຄອຂ ຫຼວງພະບາງ ທົ່ວຄະນະໂຄສະນາອົບຮົມແຂວງເຂົ້າຮ່ວມຢ່າງພ້ອມພຽງ.

        ໃນພິທີ ສະຫາຍ ທອງຈັນ ພົມມະຈັນ ຮອງຫົວໜ້າຫ້ອງການບໍລິຫານ - ຈັດຕັ້ງ ໄດ້ຂຶ້ນຜ່ານມະຕິຕົກລົງ ຂອງໜ່ວຍພັກຄະນະໂຄສະນາອົບຮົມແຂວງ ວ່າດ້ວຍການອະນຸມັດເປີດກອງປະຊຸມບັ້ນດຳເນີນຊີວິດການເມືອງ ຂອງໜ່ວຍຮາກຖານຊາວໜຸ່ມ ຈາກນັ້ນກໍໄດ້ເລີ່ມດຳເນີນການສຳຫຼວດບຸກຄົນ ໂດຍການຜ່ານບົດສຳຫຼວດຂອງຕົນເອງ ແລະ ພ້ອມກັນປະກອບຄຳເຫັນຂອງສະມາຊິກພາຍໃນໜ່ວຍເພື່ອຊ່ວຍເຫຼືອກໍ່ສ້າງເຊິ່ງກັນ ແລະ ກັນດ້ວຍຄວາມຈິງໃຈ. ຜ່ານບັ້ນດຳເນີນຊີວິດການເມືອງຂອງໜ່ວຍ ສາມາດຕີລາຄາຈັດປະເພດສະມາຊິກຊາວໜຸ່ມປະ ເພດແຂງ ໄດ້ 14 ສະຫາຍ, ກວມເອົາ 100% ຂອງສະມາຊິກຊາວໜຸ່ມທັງໝົດ; ຫຼັງຈາກນັ້ນ ສະຫາຍ ວອນຈັນ ແພງສຸວັນ ປະທານໜ່ວຍຮາກຖານຊາວໜຸ່ມ ຂອງຄະນະໂຄສະນາອົບຮົມແຂວງ ຂື້ນຜ່ານບົດລາຍງານການເມືອງ ແລະ ບົດນຳພາລວມຂອງໜ່ວຍ ເພື່ອໃຫ້ຄະນະພັກ ແລະ ສະມາຊິກຊາວໜຸ່ມໄດ້ປະກອບຄຳຄິດ - ຄຳເຫັນໃສ່ບົດດັ່ງກ່າວໃຫ້ມີເນື້ອໃນຮັດກຸ້ມ ແລະ ອຸດົມສົມບູນຂຶ້ນຕື່ມ.

       ໃນຕອນທ້າຍຂອງພິທີ ເພື່ອເຮັດໃຫ້ກອງປະຊຸມມີຄວາມໝາຍ ຄວາມສຳຄັນ ສະຫາຍ ຄຳຫຼ້າ  ລຽນປະດິດ ໄດ້ໃຫ້ກຽດມີຄຳເຫັນໂອ້ລົມ ເຊິ່ງທ່ານໄດ້ ແນະນຳແນວທາງໃນການປະຕິບັດຮັກສາມູນເຊື້ອ ແລະ ເສີມຂະ ຫຍາຍຜົນງານອັນດີງາມທີ່ໜ່ວຍຮາກຖານຊາວໜຸ່ມຍາດມາໄດ້ໃນໄລຍະຜ່ານມາ ພ້ອມທັງໃຫ້ສືບຕໍ່ປັບປຸງບັນຫາທີ່ຍັງຄົງຄ້າງໃຫ້ດີຂື້ນກວ່າເກົ່າ ແລະ ເນັ້ນໜັກໃຫ້ສະມາຊິກຊາວໜຸ່ມທຸກສະຫາຍ ເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາ, ປະ ຕິບັດລະບຽບລັດຖະກອນ, ກົດໝາຍຂອງພັກ - ລັດໄດ້ວາງອອກໃຫ້ເຂັ້ມງວດ ເອົາໃຈໃສ່ຄົ້ນຄວ້າຊອກຮູ້ຮ່ຳຮຽນເພື່ອພັດທະນາຕົນເອງໃຫ້ດີຂື້ນໄປເທື່ອລະກ້າວໃຫ້ສົມກັບຄຳວ່າ: ຊາວໜຸ່ມຄືກຳລັງແຮງຂອງຊາດ ແລະ ເປັນແຂນຂວາຂອງພັກ.

ຂຽນໂດຍ: ນາງ ເພັດພິມໃຈ