ຊາວໜຸ່ມ ຄອສພໄປທັດສະນະສຶກສາທີ່ຫໍພິພິຕະພັນປະທານ ສຸພານຸວົງ...

ສ້າງຂື້ນເມື່ອ ວັນຈັນ, 01 ກໍລະກົດ 2019 02:25
ຂຽນໂດຍ ຄອນສະຫວັນ

ຊາວໜຸ່ມ ຄອສພໄປທັດສະນະສຶກສາທີ່ຫໍພິພິຕະພັນປະທານ ສຸພານຸວົງ ເນື່ອງໃນວັນຄ້າຍວັນເກີດຄົບຮອບ 110ປີ.

          ໃນຕອນບ່າຍທີ 25 ມິຖຸນາ 2019 ທີ່ຜ່ານມາ. ຄະນະບໍລິຫານງານຊາວໜຸ່ມໄດ້ນໍາພາ​ສະ​ມາ​ຊິກ​ຊາວ​ໜຸ່ມ ຄະນະໂຄສະນາອົບຮົມສູນກາງພັກ ເຂົ້າຮ່ວມ​ທັດ​ສະ​ນະ​ສຶກ​ສາ

ແລະ ​ຢ້ຽມ​ຊົມສະ​ຖານ​ທີ່​ອະ​ນຸ​ສອນ​ສະ​ຖານ​ປະ​ທານ ສຸ​ພາ​ນຸ​ວົງ ທີ່​ບ້ານ​ໂພນ​ສະ​ອາດ, ເມືອງ​ໄຊ​ເສດ​ຖາ, ນະ​ຄອນຫຼວງວຽງ​ຈັນ.  ເນື່ອງ​ໃນ​ໂອ​ກາດ​ຂໍ່​ານັບ​ຮັບ​ຕ້ອນ, ສະ​ເຫຼີມ​ສະຫຼອງວັນ​ຄ້າຍ​ວັນ​ເກີດ ປະ​ທານ ສຸ​ພາ​ນຸ​ວົງ ຜູ້​ນຳ​ທີ່​ແສນ​ເຄົາ​ລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ ຄົບ​ຮອບ 110 ປີ (13 ກໍ​ລະ​ກົດ 1909 – 13 ກໍ​ລະ​ກົດ 2019).

          ຈຸດປະສົງ ການໄປຢ້ຽມຊົມໃນຄັ້ງນີ້ ກໍ່ເພື່ອໃຫ້ຊາວໜຸ່ມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ​ສະ​ແດງ​ຄວາມ​ເຄົາ​ລົບ​ຮັກ​ຕໍ່​ບຸນ​ຄຸນ ແລະ ຜົນ​ງານ​ອັນ​ຍິ່ງ​ໃຫ​ຍ່ຫຼວງ​ຂອງ​ປະ​ທານ ສຸ​ພາ​ນຸ​ວົງ ທີ່​ໄດ້​ອຸ​ທິດ​ຕະຫຼອດ​ຊີ​ວິດ​ຂອງ​ຕົນ​ເພື່ອ​ພາ​ລະ​ກິດ​ປົດ​ປ່ອຍ​ຊາດ, ປົກ​ປັກ​ຮັກ​ສາ ແລະ ສ້າງ​ສາ​ປະ​ເທດ​ຊາດ, ແນ່​ໃສ່​ເພື່ອ​ປູກ​ຈິດ​ສຳ​ນຶກ​ໃຫ້​ຊາວ​ໜຸ່ມ​ລາວ​ບັນ​ດາ​ເຜົ່າ​ສຶກ​ສາ​ຮ່ຳ​ຮຽນແບບຢ່າງທີ່ດີ, ແບບແຜນການດຳລົງຊີວິດ, ການສຶກສາຮຽນຮູ້ ແລະ ນ້ຳໃຈເສຍສະຫຼະອັນສູງສົ່ງຕໍ່ປະຊາຊົນຕໍ່ປະເທດຊາດ.

13 ກໍລະກົດ 1909 ມື້ໃຫ້ກຳເນີດວີລະບູລຸດແຫ່ງຊາດລາວ
ສາຍານາມ " ເຈົ້າຊາຍແດງ "

ມື້ນີ້ 13 ກໍລະກົດ 2019 ໄດ້ໝູນວຽນມາບັນຈົບອີກວາລະໜຶ່ງ
ວັນຄ້າຍວັນເກີດ ປະທານສຸພານຸວົງ ຄົບຮອບ 110 ປີ!

ປະທານສຸພານຸວົງ ປະທານປະເທດຜູ້ທຳອິດ ແຫ່ງ ສປປ ລາວ
ຈະຍືນຍົງຢູ່ໃນຄວາມຊົງຈຳຂອງປະຊາຊົນລາວ ຊົ່ວກາລະນານ!