ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 43 ປີ.  

ເຊື່ອມຊືມມະຕິ 7 ສະໄໝທີ X

 

ເຊື່ອມຊືມມະຕິ 7 ສະໄໝທີ X

ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ສີ້ນສຸດລົງດ້ວຍຜົນສຳເລັດອັນຈົບງາມ ປັດຈຸບັນທົ່ວພັກ, ທົ່ວກອງທັບ ແລະ ທົ່ວປວງຊົນເຮົາໄດ້ສືບຕໍ່ເຊື່ອມຊືມມະຕິ 7 ສະ ໄໝທີ X ຂອງພັກເຮົາຢ່າງເປັນຂະບວນຟົດຟື້ນ.

ກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ X ເຊີ່ງໄດ້ດຳເນີນແຕ່ວັນທີ 22-30 ຕຸລາ 2018 ໄດ້ຄົ້ນຄວ້າ; ປຶກສາຫາລື ແລະ ມີຄວາມເປັນເອກະພາບກັນໃຫ້ທິດຊີ້ນຳຕໍ່ບັນຫາສຳຄັນກ່ຽວກັບແຜນພັດທະນາເສດຖະກິດ-ສັງຄົມ; ແຜນງົບປະມານແຫ່ງລັດ ແລະ ແຜນເງິນຕາປີ 2019; ພ້ອມນັ້ນຍັງໄດ້ຮັບຮອງເອົາມະຕິວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ; ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນ.

ເພື່ອເຮັດໃຫ້ເອກະສານສຳຄັນເຫຼົ່ານີ້ໄດ້ຮັບການຜັນຂະຫຍາຍເຂົ້າສູ່ຊີວິດຕົວຈິງຢ່າງຖືກຕ້ອງ; ທັນການ ແລະ ມີປະສິດທິຜົນສູງນັ້ນຄະນະເລຂາທິການສູງກາງພັກຈື່ງໄດ້ອອກຄຳສັ່ງເລກທີ 13/ຄບສພ ລົງວັນທີ 17 ທັນວາ 2018 ເຊີ່ງມີບາງຈຸດຄຳສັນດັ່ງນີ້:

  • ຈຸດປະສົງ ແລະ ລະດັບຄາດໝາຍ
  • ເຮັດໃຫ້ພະນັກງານນຳພາ-ຄຸ້ມຄອງທຸກຂັ້ນ; ພະນັກງານສະມາຊິກພັກ, ລັດຖະກອນ, ທະຫານ, ຕຳຫຼວດຕະຫຼອດຮອດປະຊາຊົນບັນດາເຜົ່າໄດ້ຮັບຮູ້ເຂົ້າໃຈແຈ້ງກ່ຽວກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນຂອງປະເທດເຮົາທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ, ກຳແໜ້ນ, ເຊື່ອມຊືມ ແລະ ເປັນເອກະພາບຢ່າງສູງກັບທັດສະນະ, ທິດທາງ, ວິທີການ ແລະ ມາດຕະການທີ່ສູນກາງພັກວາງອອກ, ສ້າງຄວາມຕັດສິນໃຈເດັດດ່ຽວແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນຕໍ່ໜ້າ.
  • ຄົ້ນຄ້ວາກຳນົດບັນດາມາດຕະການແທດຕົວຈິງ ແລະ ມີປະສິດທີຜົນສູງເພື່ອແກ້ໄຂສະພາບດັ່ງກ່າວສ້າງຂະບວນການຈັດຕັ້ງປະຕິບັດຢ່າງແຂງແຮງ, ທົ່ວເຖີງກໍ່ໃຫ້ເກີດມີການຫັນປ່ຽນຕົວຈິງທີ່ມີລັກສະນະບຸກທະລຸໃນທຸກຂົງເຂດວຽກງານເພື່ອຍູ້ແຮງການພັດທະນາໃນດ້ານຕ່າງໆໃຫ້ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ.
  • ການຈັດຕັ້ງເຊື່ອມຊືມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ X ແມ່ນຄວາມຮັບຜິດຊອບຂອງຄະນະພັກແຕ່ລະຂັ້ນໂດຍແມ່ນສະຫາຍເລຂາຄະນະພັກເປັນຜູ້ຊີ້ນຳນຳພາໂດຍກົງ, ຕ້ອງເຮັດຢ່າງເລິກເຊີ່ງ, ທົ່ວເຖີງ, ສົມທົບແໜ້ນລະຫວ່າງການເຊື່ອມຊືມກັບການປຶກສາຫາລື, ຄົ້ນຄວ້າເພື່ອຊອກຫາວິທີການ, ມາດຕະການແທດຕົວຈິງເຂົ້າໃສ່ການແກ້ໄຂບັນຫາຢ່າງມີປະສິດທີຜົນຖືເອົາການແກ້ໄຂຄວາມຫຍຸ້ງຍາກທາງດ້ານເສດຖະກິດຕິດພັນກັບການປັບປຸ່ງວຽກງານໃຫ້ປອດໃສ, ເຂັ້ມແຂງ, ໜັກແໜ້ນ, ກະກຽມເງື່ອນໄຂດ້ານຕ່າງໆເພື່ອດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ມີຄວາມໜັກແໜ້ນ.

ໃນຄຳສັ່ງແນະນຳຍັງເວົ້າເຖີງຮູບແບບໃນການຈັດຕັ້ງເຊື່ອມຊືມ ແລະ ເນື້ອໃນເອກະສານຮັບໃຊ້ການຈັດຕັ້ງເຊື່ອມຊືມ. ພາກສ່ວນອື່ນໆໃນສັງຄົມແມ່ນໃຫ້ອີງໃສ່ພາຫະນະສື່ມວນຊົນເປັນສຳຄັນ ແລະ ການຈັດຕັ້ງເວທີພົບປະໃນລະດັບຕ່າງໆທີ່ເໝາະສົມ.

ໃນມະຕິຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ X ຂອງພັກປະກອບມີ 2 ບົດຄື:

 

 

ບົດທີ 1 ມະຕິເລກທີ 056/ຄບສພ

ວ່າດ້ວຍການປັບປຸງຮາກຖານການເມືອງໃຫ້ມີຄວາມເຂັ້ມແຂງໜັກແໜ້ນ.

ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນ. ສະບັບເລກທີ 056/ຄບສພ ລົງວັນທີ 19 ທັນວາ 2018.

ມະຕິດັ່ງກ່າວນີ້ລວມມີ 3 ເນື້ອໃນຫຼັກຄື:

  1. ສະພາບຄວາມເປັນຈິງຂອງຮາກຖານການເມືອງໃນປັດຈຸບັນໃນນີ້ຍົກໃຫ້ເຫັນດ້ານດີ, ດ້ານອ່ອນ ແລະ ສາເຫດຂອງດ້ານດີ ແລະ ດ້ານອ່ອນ
  2. ທັດສະນະພື້ນຖານ ແລະ ທິດທາງ, ໜ້າທີກ່ຽວກັບການປັບປຸງຮາກຖານການເມືອງໃນຕໍ່ໜ້າເຊີ່ງໃນນັ້ນໄດ້ເວົ້າເຖີງທັດສະນະພື້ນຖານ, ທິດທາງໜ້າທີປັບປຸງຮາກຖານການເມືອງໃນຊຸມປີຕໍ່ໜ້າ.
  3. ມາດຕະການຈັດຕັ້ງປະຕິບັດ.

ໃນນັ້ນມີ 6 ຂໍ້ວາງອອກຢ່າງລະອຽດຮັດກຸມ:

  • ຍ້ອນວ່າເປັນເອກະສານທີ່ມີຄວາມຍາວ ແລະ ມີການຈັດຕັ້ງເຊື່ອມຊືມຢ່າງກ້ວາງຂວາງສະນັ້ນຂໍອະນຸຍາດເອົາຈຸດສຳຄັນມານຳສະເໜີທັດສະນະພື້ນຖານ ແລະ ທິດທາງໜ້າທີ່ກ່ຽວກັບການປັບປຸງຮາກຖານການເມືອງໃນຕໍ່ໜ້າ
  • ທັດສະນະພື້ນຖານ
  1. ການປັບປຸງຮາກຖານການເມືອງໃນໄລຍະໃໝ່ນີ້ ຕ້ອງມີລັກສະນະກວມລວມ ແລະ ດຳເນີນຢ່າງເປັນລະບົບ, ເລິກເຊີ່ງ, ຊື່ງປະກອບມີ, ການປັບປຸງດ້ານການຈັດຕັ້ງ, ພາລະບົດບາດ, ເນື້ອໃນ ແລະ ຮູບການເຄື່ອນໄຫວ ຂອງບັນດາການຈັດຕັ້ງ ທີ່ມີແລ້ວ ໃຫ້ມີຄວາມໜັກແໜ້ນ ແລະ ມີຄຸນນະພາບໃໝ່; ການສ້າງ ແລະ ຂະຫຍາຍການຈັດຕັ້ງພັກ, ການຈັດຕັ້ງມະຫາຊົນ ຫຼື ການຈັດຕັ້ງສັງຄົມ ໃນບັນດາການຈັດຕັ້ງເສດຖະກິດ-ສັງຄົມ, ລວມທັງວິສາຫະກິດເອກະຊົນ ທີ່ບໍ່ທັນມີການຂະຫຍາຍທົ່ວເຖີງໃນໄລຍະຜ່ານມາ; ພ້ອມກັນນັ້ນ ຍັງລວມທັງການເພີ່ມທະວີການເຄື່ອນໄຫວ ຂອງບັນດາການຈັດຕັ້ງພັກ, ລັດ, ອົງການມະຫາຊົນ ທີ່ກ່ຽວຂ້ອງ ໃນການສຶກສາອົບຮົມ, ຍົກລະດັບຄວາມຕື່ນຕົວ ແລະ ເປັນເຈົ້າການ ຂອງຖັນແຖວຜູ້ອອກແຮງງານ, ນັກຮຽນ-ນັກສຶກສາ, ນັກເຄື່ອນໄຫວສັງຄົມຕ່າງໆ ໃນການປະຕິບັດສິດ, ພັນທະ ແລະ ການປົກປ້ອງຜົນປະໂຫຍດອັນຊອບທຳຂອງຕົນໃນດ້ານຕ່າງໆ.
  2. ການປັບປຸງລະບົບການເມືອງຢູ່ບ້ານ ຕ້ອງສຸມໃສ່ຍົກລະດັບຄວາມສາມາດໃນການຄຸ້ມຄອງຄວາມເປັນລະບຽບຮຽບຮ້ອຍຂອງສັງຄົມ, ການນຳພາສ້າງ ແລະ ສົ່ງເສີມວິຊາອາຊີບ ກໍ່ຄືສ້າງກິດຈະກຳສາທາລະນະປະໂຫຍດໃນຊຸມຊົນ, ສົມທົບກັບການຈັດຕັ້ງຂັ້ນເທີງ ແລະ ພາກສ່ວນກ່ຽວຂ້ອງເພື່ອແກ້ໄຂຂໍ້ຂັດແຍ່ງ ແລະ ສ້າງຄວາມສະດວກ ໃນການຈັດຕັ້ງປະຕິບັດບັນດາໂຄງການພັດທະນາ ໃນພື້ນທີ່ຂອງຕົນຕິດພັນກັບການສຶກສາອົບຮົມປະຊາຊົນ ໃຫ້ມີຄວາມຕື່ນຕົວປະຕິບັດສິດ ແລະ ພັັນທະ ຂອງພົນລະເມືອງ, ພັດທະນາຕົນເອງ ແລະ ປະກອບສ່ວນພັດທະນາບ້ານຊ່ອງ, ຊຸມຊົນຕົນເອງ.
  3. ການປັບປຸງລະບົບການເມືອງຢູ່ຮາກຖານບ້ານ ໂດຍສະເພາະອຳນາດການປົກຄອງບ້ານຕ້ອງບົນພື້ນຖານກຳແໜ້ນລະຫວ່າງລັກສະນະທີ່ເປັນຂັ້ນປົກຄອງຕ່ຳສຸດ ແລະ ລັກສະນະທີ່ເປັນການຈັດຕັ້ງຄຸ້ມຄອງຕົນເອງ ຂອງປະຊາຊົນ, ຈາກນັ້ນຄົ້ນຄວ້າ ແລະ ສ້າງກົນໄກການຂັບເຄື່ອນທີ່ເໝາະສົມ, ໃນນັ້ນ ລວມທັງການປັບປຸງດ້ານ ກົດໝາຍ ຫຼື ບັນດານິຕີກຳທີ່ເຫັນວ່າມີຄວາມຈຳເປັນ.
  4. ເນື່ອງຈາກການກໍ່ສ້າງ, ປັບປຸງຮາກຖານການເມືອງ ເປັນວຽກຍຸດທະສາດຂອງພັກ ຈື່ງເປັນຄວາມຮັບຜິດຊອບໂດຍກົງຂອງຄະນະພັກ ໂດຍພາຍໃຕ້ການຊີ້ນຳຂອງສະຫາຍເລຂາຄະນະພັກຢູ່ແຕ່ລະຂັ້ນ, ແຕ່ລະບ່ອນ ແລະ ຖືການເຄື່ອນໄຫວນຳພາຊີ້ນຳ, ຕິດຕາມ ແລະ ປະເມີນຜົນວຽກງານນີ້ເປັນພາກສ່ວນໜື່ງທີ່ສຳຄັນໃນວຽກງານປົກກະຕິຂອງຕົນ.
  5. ພະນັກງານນຳພາ-ຄຸ້ມຄອງ ທຸກລະດັບທີ່ດຳເນີນຊີວິດໃນການຈັດຕັ້ງຮາກຖານຢູ່ບ່ອນໃດຕ້ອງເປັນເຈົ້າການນຳພາ-ຊີ້ນຳ ການປັບປຸງການຈັດຕັ້ງຮາກຖານຢູ່ບ່ອນນັ້ນ, ຖືອັນນີ້ເປັນຄວາມຮັບຜິດຊອບ ແລະ ການສະແດງອອກເຖີງສະຕິຕໍ່ການຈັດຕັ້ງກໍ່ຄືບົ່ງບອກເຖີງຄວາມສາມາດຕົວຈິງຂອງຜູ້ນຳພາ. ພ້ອມກັນນັ້ນກໍ່ຕ້ອງໄດ້ຮັບການຄຸ້ມຄອງຈາກການຈັດຕັ້ງຮາກຖານຢູ່ບ່ອນນັ້່ນ
  • ທິດທາງໜ້າທີ່ປັບປຸງຮາກຖານການເມືອງໃນຊຸມປີຕໍ່ໜ້າ
  1. ຮາກຖານບ້ານ: ທິດທາງລວມກໍຄືເປົ້າໝາຍໃນການປັບປຸງຮາກຖານບ້ານ

ແມ່ນເຮັດໃຫ້ການຈັດຕັ້ງ, ເຄື່ອນໄຫວຂອງຮາກຖານພັກ, ອຳນາດການປົກຄອງ ແລະ ການຈັດຕັ້ງມະຫາຊົນຢູ່ຂັ້ນບ້ານ ໄດ້ຮັບການປັບປຸງດ້ານການຈັດຕັ້ງໃຫ້ເຂັ້ມແຂງ, ສາມາດເຄື່ອນໄຫວປະຕິບັດພາລະບົດບາດ, ໜ້າທີ ແລະ ຄວາມຮັບຜິດຊອບຂອງຕົນ ຢ່າງມີປະສິດທິຜົນ ຕິດພັນກັບການສືບຕໍ່ຈັດຕັ້ງປະຕິບັດ 4 ເນື້ອໃນ 4ຄາດໝາຍ, ໂດຍສຸມໃສ່ປັບປຸງບາງດ້ານດັ່ງນີ້:

  • ປັບປຸງຮາກຖານພັກ ຕາມາດຕະຖານໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ເສີມຂະຫຍາຍປະຊາທິປະໄຕຢູ່ພາຍໃນ ຢ່າງແຂງແຮງ, ເພີ່ມທະວີຄວາມສາມັກຄີ ແລະ ປະຕິບັດກົດລະບຽບພັກ ຢ່າງເຂັ້ມງວດ; ຖືການກວດການການປະຕິບັດບັນດາຫຼັກການຂອງພັກ, ການຮັບປະກັນຄວາມເປັນແບບຢ່າງນຳໜ້າ ແລະ ປະສິດທິຜົນການເຄື່ອນໄຫວຕົວຈິງຂອງສະມາຊິກພັກ ເປັນໜື່ງໃນເນື້ອໃນຕົ້ນຕໍ ຂອງການປັບປຸງການຈັດຕັ້ງພັກ.
  • ປັບປຸງໂຄງປະກອບການຈັດຕັ້ງ ຂອງອຳນາດການປົກຄອງບ້ານ ໃຫ້ເໝາະສົມກັບຂອບເຂດຮັບຜິດຊອບ ແລະ ຄວາມຈຳເປັນຕົວຈິງໃນການຄຸ້ມຄອງແຕ່ລະດ້ານ ແລະ ສອດຄ່ອງກັບຄວາມສາມາດດ້ານບຸກຄະລາກອນ ຂອງແຕ່ລະບ້ານ; ຮັບປະກັນການຄຸ້ມຄອງຄວາມເປັນລະບຽບຮຽບຮ້ອຍພາຍໃນບ້ານ, ຄຸ້ມຄອງການເຄື່ອນໄຫວປະກອບອາຊີບກໍ່ຄື ການເຄື່ອນໄຫວດ້ານວັດທະນະທຳ-ສັງຄົມພາຍໃນບ້ານ ສອດຄ່ອງຕາມກົດໝາຍທັງສາມາດປະຕິບັດກົດລະບຽບຂອງບ້ານ ທີ່ໄດ້ຮັບການສ້າງຂື້ນໂດຍຜ່ານຄວາມເຫັນດີຈາກທຸກການຈັດຕັ້ງພາຍໃນບ້ານຢ່າງຖຶກຕ້ອງ.
  • ປັບປຸງອົງການແນວລາວສ້າງຊາດ, ບັນດາການຈັດຕັ້ງມະຫາຊົນ ໃຫ້ສາມາດກາຍເປັນບ່ອນເຕົ້າໂຮມຄວາມສາມັກຄີປອງດອງ, ສ້າງເງື່ອນໄຂຕົວຈິງຜ່ານແຕ່ລະອົງການມະຫາຊົນ ເພື່ອໃຫ້ປະຊາຊົນທຸກຊັ້ນຄົນ, ເພດ, ໄວ ເຂົ້າຮ່ວມວຽກງານຕ່າງໆພາຍໃຕ້ການນຳພາຂອງການຈັດຕັ້ງພັກ ແລະ ແຜນການຂອງອຳນາດການປົກຄອງວາງອອກ.
  • ການປັບປຸງທຸກພາກສ່ວນໃນລະບົບການເມືອງຢູ່ບ້ານ ຕ້ອງຕິດພັນກັບການສ້າງ, ຈັດຕັ້ງນຳພາຂະບວນການຜະລິດ, ບໍລິການ, ສ້າງຄອບຄົວຕົວແບບການພັດທະນາ, ອານຸລັກ ແລະ ສົ່ງເສີມການພັດທະນາດ້ານວັດທະນະທຳ-ສັງຄົມ, ຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພດ້ານຊີວິດ ແລະ ຊັບສີນຂອງຊາວບ້ານ, ສະກັດກັ້ນແກ້ໄຂບັນຫາຢາເສບຕິດ, ຄຸ້ມຄອງແຮງງານຈາກຕ່າງປະເທດ ສອດຄ່ອງກັບລະບຽບກົດໝາຍ...
  • ບັນດາການຈັດຕັ້ງໃນລະບົບການເມືອງຢູ່ຮາກຖານຕ້ອງເປັນເຈົ້າການເຮັດໜ້າທີ່ສຶກສາອົບຮົມໃຫ້ປະຊາຊົນມີສະຕິ ຕໍ່ການໂຄສະນາປັ່ນປ່ວນ ຂອງກຸ່ມຄົນບໍ່ດີ, ພ້ອມທັງຈັດຕັ້ງນຳພາມະຫາຊົນສະກັດກັ້ນ, ຕີຖ່ອຍບັນດາປະກົດການຫຍໍ້ທໍ້ຕ່າງໆ ຢູ່ໃນຂອບເຂດຂອງບ້ານ, ປະສານສົມທົບກັບບ້ານໃກ້ຄຽງ ເພື່ອຮ່ວມກັນແກ້ໄຂສະພາບການທີ່ມີສ່ວນກ່ຽວຂ້ອງກັນ..
  1. ຮາກຖານສຳນັກງານ, ອົງການ, ສະຖາບັນການສຶກສາ, ໂຮງຮຽນ, ໂຮງໝໍ ແລະ ວິສາຫະກິດຂອງລັດ

ນີ້ແມ່ນຮາກຖານ ທີ່ມີລັກສະນະສະເພາະເຊິ່ງຖັນແຖວສະມາຊິກພັກຂອງບັນດາການຈັດຕັ້ງຮາກຖານພັກ, ບັນຫົວໜ່ວຍການຈັດຕັ້ງຂັ້ນລຸ່ມ ຂອງກົງຈັກສຳນັກງານ-ອົງການ ແລະ ຂອງອົງການມະຫາຊົນ, ລ້ວນແຕ່ເປັນພະນັກງານ, ລັດຖະກອນໃນລະບົບການຈັດຕັ້ງຂອງພັກ ແລະ ລັດ. ການປັບປຸງລະບົບການເມືອງຂັ້ນຮາກຖານຂອງບັນດາສຳນັກງານ, ອົງການກໍ່ຄືຢູ່ຫົວໜ່ວຍເສດຖະກິດ-ສັງຄົມເຫຼົ່ານີ້ ຕ້ອງຕິດພັນກັບການສ້າງຄວາມປອດໃສຂາວສະອາດໃນກົງຈັກ, ການຍົກສູງຄວາມສູງຄວາມສາມາດເປັນເສນາທິການໃຫ້ການນຳ ຂອງໜ່ວຍງານຕ່າງໆ ແລະ ສ້າງບັນດາປັດໄຈຄ້ຳປະກັນຄຸນນະພາບ ແລະ ປະສິດທິພາບການເຄື່ອນໄຫວນຳພາ-ຄຸ້ມຄອງ ຂອງຄະນະພັກ, ຄະນະນຳແຕ່ລະບ່ອນ. ການປັບປຸງຮາກຖານການເມືອງໃນຂົງເຂດນີ້ ຕ້ອງສຸມໃສ່ບາງດ້ານຄື:

  • ເພີ່ມທະວີຄຸນນະພາບຂອງການດຳເນີນຊີວິດ ຂອງການຈັດຕັ້ງພັກ ແລະ ການຈັດຕັ້ງມະຫາຊົນ ໂດຍຕິດພັນກັບການກວດກາ, ຕີລາຄາຄວາມເປັນແບບຢ່າງນຳໜ້າ ຂອງສະມາຊິກ; ເພີ່ມມະວີກຳລັງແຮງໃນການຕໍ່ສູ້ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ໃນກົງຈັກການຈັດຕັ້ງ, ສ້າງການຫັນປ່ຽນບຸກທະລຸແບບກົນໄກ ແລະ ແບບແຜນການເຄື່ອນໄຫວນຳພາຄຸ້ມຄອງ.
  • ຈັດຕັ້ງນຳພາຂະບວນການແຂ່ງຂັນພັດທະນາຕົນເອງ ຂອງພະນັກງານ-ລັດຖະກອນ ກໍ່ຄືການພັດທະນາໜ່ວຍງານ ດ້ວຍການຍ້ອງຍໍຜູ້ທີ່ມີຜົນງານອັນແທ້ຈິງ, ເລືອກບັນຈຸເອົາຄົນເກັ່ງ, ມີຄວາມຮັບຜິດຊອບ, ຊື່ສັດບໍລິສຸດ ແລະ ເຄື່ອນໄຫວວຽກງານມີປະສິດທິຜົນຕົວຈິງເຂົ້າໃນຕຳແໜ່ງໜ້າທີ່ ທີ່ສຳຄັນ.
  • ພະນັກງານການນຳແຕ່ລະຂັ້ນ, ແຕ່ລະບ່ອນ ທີ່ດຳເນີນຊີວິດຢູ່ໜ່ວຍພັກ ຫຼື ໜ່ວຍຂອງອົງການມະຫາຊົນ ຂອງສຳນັກງານອົງການ ຕ້ອງເຊີດຊູຄວາມເປັນແບບຢ່າງນຳໜ້າ ໃນການດຳເນີນຊີວິດ ແລະ ການເຄື່ອນໄຫວ, ຕ້ອງຖືວ່າການນຳພາ, ຊີ້່ນຳເພື່ອສ້າງຄວາມເຂັ້ມແຂງຂອງຮາກຖານບ່ອນຕົນສັງກັດຢູ່ເປັນພາກສ່ວນໜື່ງທີ່ສຳຄັນໃນຄວາມຮັບຜິດຊອບການເມືອງ ແລະ ເປັນບ່ອນພິສູດຄວາມສາມາດ, ສະຕິຕໍ່ການຈັດຕັ້ງ, ບົດບາດ ແລະ ຄວາມເຊື່ອໝັ້່ນຂອງມະຫາຊົນຕໍ່ຕົນເອງ.
  • ປັບປຸງການຈັດຕັ້ງພັກ, ອົງການຈັດຕັ້ງມະຫາຊົນໃນບັນດາລັດວິສາຫະກິດໃຫ້ຕິດພັນກັບເນື້ອໃນນຳພາ ແລະ ຄຸນນະພາບການດຳເນີນຊີວິດ, ສຸມໃສ່ສ້າງຄວາມໂປ່ງໃສໃນການບໍລິຫານຈັດການ, ຕ້ານການຟຸມເຟືອຍ, ປົກປ້ອງຜົນປະໂຫຍດຂອງລັດ ແລະ ລວມໝູ່, ມີສ່ວນຮ່ວມຂອງມະຫາຊົນ ໃນການແກ້ໄຂບັນຫາ ຂອງວິສາຫະກິດແນໃສ່ບັນລຸປະສິດທິຜົນທາງທຸລະກິດ
  1. ຮາກຖານກຳລັງປະກອບອາວຸດ
  • ການປັບປຸງຮາກຖານການເມືອງໃນກຳລັງ ປກຊ-ປກສ ຕ້ອງຕິດພັນກັບການສຶກສາອົບຮົມມູນເຊື້ອອັນສະຫງ່າອົງອາດຂອງພັກ ແລະ ກຳລັງປະກອບອາວຸດປະຊາຊົນ, ເພີ່ມທະວີການມີລະບຽບວິໄນ, ຮັບປະກັນປະຕິບັດການສ້າງກົມກອງໃຫ້ເຂັ້ມແຂງ, ກ້າວສູ່ທັນສະໄໝ, ຕ້ານສະກັດກັ້ນບັນດາປະກົດການຫຍໍ້ທໍ້ໃນຖັນແຖວພະນັກງານນັກຮົບ.
  • ດຳເນີນການກໍ່ສ້າງພັກ-ພະນັກງານ ແລະ ອົງການຈັດຕັ້ງມະຫາຊົນ ຕິດພັນກັບຂະບວນການສ້າງກອງແຂງ-ໜ່ວຍພັກປອດໃສ, ເຂັ້ມແຂງ; ເສີມຂະຫຍາຍບົດບາດນຳພາ, ບັນຊາຢ່າງຕໍ່ເນື່ອງຕໍ່ຂະບວນການແຂ່ງຂັນປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ; ສ້າງພາລາທິການ ແລະ ແກ້ໄຂຊີວິດການເປັນຢູ່ໃຫ້ແກ່ພະນັກງານ-ນັກຮົບຮາກຖານ.
  1. ຮາກຖານການເມືອງໃນບັນດາການຈັດຕັ້ງເສດຖະກິດ-ສັງຄົມ, ຫົວໜ່ວຍວິສາຫະກິດເອກະຊົນ

ສືບຕໍ່ດຳເນີນການກໍ່ສ້າງ, ປັບປຸງ, ເສີມຂະຫຍາຍ ບັນດາການຈັດຕັ້ງຂອງພັກ, ການຈັດຕັ້ງມະຫາຊົນ ຫຼື ການຈັດຕັ້ງສັງຄົມ-ວິຊາອາຊີບ ເພື່ອເຕົ້າໂຮມຖັນແຖວຜູ້ອອກແຮງງານ ກໍ່ຄືຜູ້ປະກອບການພາກເອກະຊົນ, ດຳເນີນການສຶກສາອົບຮົມຍົກລະດັບຍົກຄວາມຕື່ນຕົວ ໃນການປະຕິບັດສິດ, ພັນທະປົກປ້ອງສິດຜົນປະໂຫຍດອັນຊອບທຳຂອງຕົນ.

ທັງໝົດນີ້ຄືເນື້ອໃນຂອງມະຕິເລກທີ 056 ທີ່ຄວນເຊື່ອມຊືມ ແລະ ກຳແໜ້ນ.

 

 

ບົດທີ 2 ມະຕິເລກທີ 057/ຄບສພ

ວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ.

ຂະບວນການຮ່ຳຮຽນເຊື່ອມຊືມມະຕິ 7 ສະໄໝທີ X ຂອງພັກເຮົາແມ່ນພວມດຳເນີນໄປເປັນຂະບວນກວ້າງຂວາງ ແລະ ຟົດຟື້ນທີ່ສຸດນັບແຕ່ສູນກາງລົງຮອດທ້ອງຖິ່ນ.

ເມື່ອເວົ້າເຖີງການເພີ່ມທະວີການນຳພາຂອງພັກຕໍ່ຂົງເຂດເສດຖະກິດນັ້ນເປັນໜື່ງໃນເນື້ອໃນຍົກສູງຄວາມສາມາດນຳພາຂອງພັກເຊິ່ງກອງປະຊຸມໃຫຍ່ຄັ້ງທີ X ວາງອອກ.

ເພື່ອສຸມໃສ່ແກ້ໄຂຄວາມຫຍຸ້ງຍາກທີ່ກຳລັງເກີດຂື້ນທາງດ້ານເສດຖະກິດ-ການເງິນຂອງປະເທດພ້ອມກັນນັ້ນກໍ່ເປັນການປັບປຸງຄວາມເຂັ້ມແຂງໃນການຄຸ້ມຄອງມະຫາພາກທາງດ້ານເສດຖະກິດເພື່ອເຮັດໃຫ້ເສດຖະກິດແຫ່ງຊາດຂະຫຍາຍຕົວຕາມທິດຍືນຍົງ; ສາມາດຂຸດຄົ້ນ ແລະ ເສີມຂະຫຍາຍບັນດາທ່າແຮງບົ່ມຊ້ອນຂອງຊາດ ແລະ ເປັນເຈົ້າການປະຕິບັດການເຊື່ອມໂຍງເສດຖະກິດກັບພາກພື້ນ ແລະ ສາກົນ, ໂດຍສະເພາະຫັນເປັນປະເທດໃຫ້ກາຍເປັນປະເທດເຊື່ອມຈອດ ແລະ ເປັນໜື່ງໃນຈຸດດືງດູດການລົງທືນເພື່ອພັດທະນານັ້ນຄືຈິດໃຈລວມຂອງມະຕິດັ່ງກ່າວ

ໃນມະຕິໄດ້ເວົ້າເຖີງຄວາມຫຍຸ້ງຍາກດ້ານເສດຖະກິດ-ການເງິນ ແລະ ບັນດາສາເຫດຕົ້ນຕໍ ແຕ່ໃຫ້ພວກເຮົາກຳແໜ້ນສາຍເຫດຕົ້ນຕໍທີ່ພາໃຫ້ເພີ່ມຄວາມຫຍຸ້ງຍາກດັ່ງກ່າວ

ບັນຫາສາເຫດຕົ້ນຕໍມີບາງຈຸດຄວນເຊື່ອມຊືມຄື:

  • ໃນຫຼາຍສິບປີຜ່ານມາ ການພັດທະນາເສດຖະກິດຂອງປະເທດ ຍັງຂາດນະໂຍບາຍທີ່ເປັນລະບົບ ກໍ່ຄືມາດຕະການຕົວຈິງ ກ່ຽວກັບການນຳໃຊ້ຊັບພະຍາກອນທຳມະຊາດແບບປະຢັດ ທີ່ເນັ້ນໃສ່ການສ້າງເປັນແຫຼ່ງທືນຮອນໃຫ້ແກ່ການພັດທະນາ ແລະ ຮັບປະກັນຄວາມຍືນຍົງ ກໍ່ຄືໃນການພັດທະນາຂະແໜງເສດຖະກິດ ທີ່ເປັນປາຍແຫຼມ ບົນພື້ນຖານການເສີມຂະຫຍາຍຄວາມອາດສາມາດບົ່ມຊ້ອນ ແລະ ທ່າແຮງທີ່ມີຂອງຊາດ. ຈາກນັ້ນ ດ້ານໜື່ງ, ເຮັດໃຫ້ການພັດທະນາ ຕົ້ນຕໍອີງໃສ່ການຂຸດຄົ້ນ ແລະ ການນຳໃຊ້ຊັບພະຍາກອນທຳມະຊາດ, ໃນນັ້ນ ສ່ວນໃຫຍ່ກໍ່ແມ່ນເລັ່ງໃສ່ການຂຸດຄົ້ນ ແລະ ຂາຍຊັບພະຍາກອນປ່າໄມ້, ດິນດອນ, ບໍ່ແຮ່, ແຫຼ່ງນ້ຳ ແລະ ຊັບໃນດິນສິນໃນນ້ຳອຶ່ນໆ...

ດ້ານໜື່ງອີກ, ບັນດາຄວາມອາດສາມາດບົ່ມຊ້ອນອື່ນໆເຊັ່ນ: ທີ່ຕັ້ງເປັນໃຈກາງຂອງອະນຸພາກພື້ນ ທີ່ເອື້ອອຳນວຍການພັດທະນາລະບົບໂລຈິດສ໌ຕິກ; ທຳມະຊາດອັນສວຍງາມ ແລະ ຄວາມອຸດົມສົມບູນຂອງວັດທະນະທຳບັນດາເຜົ່າ ທີ່ສາມາດພັດທະນາເປັນແຫຼ່ງທ່ອງທ່ຽວທຳມະຊາດ ແລະ ວັດທະນະທຳ; ທ່າແຮງດ້ານດິນກະສິກຳທີ່ສາມາດຂະຫຍາຍການຜະລິດພືດຜັກ ແລະ ອາຫານສົດ, ສະອາດ... ທີ່ເປັນມູນເຊື້ອຂອງປະຊາຊົນສ່ວນໃຫຍ່ພັດບໍ່ທັນໄດ້ຮັບການເອົາໃຈໃສ່ສົ່ງເສີມດ້ວຍນະໂຍບາຍ ແລະ ໂຄງການພັດທະນາ ທີ່ເປັນລະບົບຈະແຈ້ງແທ້ຈື່ງເຮັດໃຫ້ບັນດາຜູ້ປະກອບການໃນຂົງເຂດນີ້ບໍ່ທັນມີຫຼາຍ, ສີ່ງເຫຼົ່ານີ້ ເປັນໜື່ງໃນສາເຫດສຳຄັນທີ່ສຸດທີ່ເຮັດໃຫ້ພື້ນຖານການຜະລິດ ແລະ ການບໍລິການເຊີ່ງເປັນແຫຼ່ງລາຍຮັບພາຍໃນຍັງອ່ອນແອດັ່ງໃນປັດຈຸບັນ

  • ການພັດທະນາ ຂອງແຕ່ລະຂະແໜງເສດຖະກິດ-ສັງຄົມໂດຍລວມຍັງຂາດຍຸດທະສາດທີ່ເປັນລະບົບ ແລະ ຂາດຈຸດສຸມ, ແຜນພັດທະນາເສດຖະກິດ-ສັງຄົມຂອງລັດ ແຕ່ລະສະບັບກໍ່ຍັງເປັນພຽງແຜນການທີ່ສ້າງຂື້ນບົນພື້ນຖານ”ລວບລວມ” ທີ່ແຕ່ລະຂະແໜງການສະເໜີເປັນຕົ້ນຕໍຂາດການວິເຄາະ, ວິໄຈລະອຽດ, ເລິກເຊີ່ງບັນດາປັດໄຈພື້ນຖານຕ່າງໆທັງໃນດ້ານບວກ ແລະ ດ້ານລົບ, ບໍ່ທັນເຫັນໂອກາດໃນຄວາມຫຼາກຫຼາຍ ຂອງການພົວພັນເສດຖະກິດ ໃນພາກພື້ນ ແລະ ໃນໂລກ; ບໍ່ທັນຕີລາຄາຖືກຕ້ອງ ຕໍ່ອຸປະສັກໃນການແຂ່ງຂັນ ເພື່ອພັດທະນາ, ຈື່ງບໍ່ທັນຊອກໄດ້ໂຄງຮ່າງເສດຖະກິດທີ່ສອດຄ່ອງ, ການບໍລິຫານເສດຖະກິດກໍ່ຕົກໃນທ່າຮັບຫຼາຍກ່ວາທ່າບຸກ, ຈື່ງບໍ່ສາມາດກຳນົດວັດຖຸປະສົງ, ມາດຖານເງື່ອນໄຂ ແລະ ບັນດາຄາດໝາຍລວມເພື່ອໃຫ້ທຸກຂະແໜງການຕ້ອງມີການພັດທະນາໄປຕາມທິດທາງທີ່ເອກະພາບ, ຊ່ວຍໜູນເຊີ່ງກັນ ແລະ ກັນ ແລະ ບັນລຸການສ້າງປັດໄຈຕົວຈິງຍູ້ດັນການພັດທະນາ ຕາມທ່າແຮງ ແລະ ທິດຍືນຍົງ
  • ກຸ່ມສາເຫດທີ່ສົ່ງຜົນໂດຍກົງ ຕໍ່ການເກີດຄວາມຫຍຸ້ງຍາກດ້ານການເງິນ-ງົບປະມານໃນປັດຈຸບັນ ແມ່ນການລະເມີດວິໄນແຜນການ-ການເງິນ

ການກຳນົດອັດຕາຂາດດຸນລາຍຮັບ-ຈ່າຍງົບປະມານ ບໍ່ອີງໃສ່ຄວາມສາມາດຂອງລາຍຮັບພາຍໃນ ແລະ ການຊ່ວຍເຫຼືອລ້າຕົວຈິງ, ຍັງເອົາການກູ້ຢືມຈາກທາງນອກເພື່ອມາດຸ່ນດ່ຽງລາຍຈ່າຍ

ບໍ່ເຄົາລົບບັນດາຂັ້ນຕອນຂອງການພິຈາລະນາ, ຮັບຮອງ ແລະ ດຳເນີນການຈັດຕັ້ງປະຕິບັດບັນດາໂຄງການລົງທືນຂອງລັດ, ເຮັດໃຫ້ມູນຄ່າຂອງໂຄງການລົງທືນສ່ວນຫຼາຍສູງເກີນຄວາມເປັນຈິງຫຼາຍເທົ່າ.

ການກຳນົດກົນໄກ ແລະ ມາດຕະການຄຸ້ມຄອງລາຍຮັບ-ຈ່າຍງົບປະມານທີ່ຍັງມີຊ່ອງວ່າງຫຼາຍ ໃຫ້ເຈົ້າໜ້າທີ່ ສວຍໃຊ້ສິດອຳນາດ ເພື່ອຫາຜົນປະໂຫຍດສ່ວນຕົວ, ການສວຍໃຊ້ໜ້າທີ່-ຕຳແໜ່ງ ໃນຂົງເຂດຄຸ້ມຄອງລາຍຮັບ-ຈ່າຍງົບປະມານ ໄດ້ກໍ່ໃຫ້ເກີດປະກົດການຫຍໍ້ທໍ້ກ້ວາງຂວາງ, ແກ່ຍາວເຊີ່ງບໍ່ສະເພາະແຕ່ບັນທອນປະສິດທິພາບຂອງກົງຈັກຄຸ້ມຄອງລາຍຮັບໂດຍກົງເທົ່ານັ້ນ ຫາກຍັງເຮັດໃຫ້ເກີດການຮົ່ວໄຫຼງົບປະມານ ຢ່າງກ້ວາງຂວາງໃນກົງຈັກລັດຢູ່ແຕ່ລະຂັ້່ນອີກດ້ວຍ.

  • ກົງຈັກບໍລິຫານທີ່ໃຫຍ່ໂຕ, ນອກຈາກເຮັດໃຫ້ມີການຟຸມເຟືອຍໃຊ້ຈ່າຍບໍລິຫານ, ເປັນພາລະແບກຫາບໜັກໜ່ວງ ຂອງງົບປະມານແຕ່ລະປີ, ຍັງກໍ່ໃຫ້ເກີດບັນຫາຫຼາຍຂື້ນຫຼາຍຂອດຢ່າງຄຸມເຄືອ, ສັບສົນ, ບັນທອນຄວາມສາມາດ ໃນການສ້າງສະພາບແວດລ້ອມເອື້ອອຳນວຍຕໍ່ການເຄື່ອນໄຫວທາງເສດຖະກິດ, ທັງເປັນອຸປະສັກໃຫຍ່ໃນການຫັນສູ່ກົງຈັກຄຸ້ມຄອງກະທັດລັດ, ເຂັ້ມແຂງ, ເຄື່ອນໄຫວໂປ່ງໃສ ແລະ ມີປະສິດທິພາບ.
  • ໃນຊຸມປີຜ່ານມາການກຳນົດແຜນການແກ້ໄຂບັນຫາຍັງບໍ່ທັນສົມທົບກົມກຽວລະຫວ່າງການແກ້ໄຂບັນຫາພື້ນຖານຈາກຕົ້ນເຫດແທ້ຈິງ ທີ່ຕ້ອງມີການປະຕິບັດໃນໄລຍະຍາວ ແລະ ຕໍ່ເນື່ອງ ກັບການແກ້ໄຂບັນຫາແບບສຸກເສີນສະເພາະໜ້າ ທີ່ຕ້ອງປະຕິບັດຢ່າງມີຈຸດສຸມ ແລະ ຮອບຄອບ. ນອກນັ້ນໃນການຊີ້ນຳບັນຊາທັງຈາກສູນກາງພັກ, ລັດຖະບານ, ສະພາແຫ່ງຊາດ ແລະ ການຈັດຕັ້ງອື່ນໆ ເພື່ອແກ້ໄຂປະກົດການຫຍໍ້ທໍ້, ຂອດອັດຕັນຕ່າງໆກໍ່ຍັງຂາດລັກສະນະຈິງຈັງ ແລະ ບໍ່ທັນແຂງແຮງແທ້ຈື່ງເຮັດໃຫ້ການປັບປຸງບັນຍາກາດ, ເງື່ອນໄຂດຶງດູດການລົງທືນ ຈາກເອກະຊົນພາຍໃນ ແລະ ຕ່າງປະເທດບໍ່ທັນມີການຫັນປ່ຽນອັນຈະແຈ້ງໃນພາກປະຕິບັດ.
  • ຄວາມຮັບຜິດຊອບ ຂອງພະນັກງານນຳພາ ແຕ່ລະຂັ້ນ, ແຕ່ລະບ່ອນ ບໍ່ທັນສູງ; ບໍ່ທັນສຸມການນຳພາຄົ້ນຄວ້າ ເພື່ອແກ້ໄຂບັນຫາຕົວຈິງ. ພ້ອມກັນນັ້ນຍັງຂາດແບບແຜນເຮັດວຽກທີ່ຖືກຕ້ອງ, ເຮັດໃຫ້ບັນດາມະຕິ, ຄຳສັ່ງ ຫຼື ນິຕິກຳຕ່າງໆທີ່ວາງອອກບໍ່ໄດ້ຮັບການຈັດຕັ້ງຜັນຂະຫຍາຍຢ່າງເປັນລະບົບດ້ວຍການແບ່ງງານຊີ້ນຳ, ບັນຊາທີ່ຈະແຈ້ງ; ພ້ອມກັນນັ້ນການແກ້ໄຂຄວາມຮັບຜິດຊອບການເມືອງ ຂອງຄະນະພັກ, ຜູ້ບໍລິຫານຂອງຂະແໜງການ ແລະ ທ້ອງຖິ່ນຍັງບໍ່ເດັດຂາດ, ເຂັ້ມງວດ ຈີ່ງບໍ່ສາມາດສ້າງເປັນຂະບວນຂອງມະຫາຊົນທີ່ແຂງແຮງ ແລະ ບໍ່ສາມາດສ້າງການຫັນປ່ຽນທີ່ແທ້ຈິງ.

ສຳລັບທິດທາງ ແລະ ມາດຕະການແກ້ໄຂ.

ບັນດາມາດຕະການທີ່ຕ້ອງປະຕິບັດຢ່າງຮີບດ່ວນ ແລະ ມີຈຸດສຸມມີດັ່ງນີ້:

  1. ໃນສະເພາະໜ້າ, ການລົງທຶນໃໝ່ຂອງລັດຕ້ອງສຸມໃສ່ບັນດາໂຄງການທີ່ມີປະສິດທີຜົນທາງເສດຖະກິດໂດຍກົງ, ຍົກເວັ້ນສຳລັບໂຄງການແກ້ໄຂໄພພິບັດ, ແຕ່ຕ້ອງບົນພື້ນຖານການໄລ່ລຽງຢ່າງຖືກຕ້ອງ ເຖີງຄວາມສາມາດສຳລະສະສາງຂາດຕົວ ມູນຄ່າໂຄງການຕາມໄລຍະເວລາທີ່ກົດໝາຍກຳນົດ, ສະກັດກັ້ນການເກີດໜີ້ສິນຄຸມເຄືອແຕ່ຫົວທີ.
  2. ແກ້ໄຂບັນຫາຮົ່ວໄຫຼຂອງງົບປະມານ ກວດກາຄືນບັນດານິຕິກຳ ທີ່ພົວພັນເຖີງການເກັບລາຍຮັບ ເພື່ອປັບປຸງໃຫ້ມີຄວາມຮັດກຸມ, ສອດຄ່ອງກັບທັດສະນະ ຫຼື ທິດທາງແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ທັງຮັບປະກັນການປະຕິບັດເຂັ້ມງວດ, ແກ້ໄຂຊ່ອງຫວ່າງ ທີ່ພາໃຫ້ເກີດການຍັກຍອກຂອງເຈົ້າໜ້າທີ່, ການຫຼົບຫຼີກພາສີ-ອາກອນຂອງບຸກຄົນ ຫຼື ລວມໝູ່ ທີ່ມີພັນທະມອບພາສີ-ອາກອນ ໃຫ້ລັດຕາມກົດໝາຍ, ຫັນການຈັດເກັບລາຍຮັບ ໄປສູ່ທັນສະໄໝ, ຜ່ານລະບົບທະນາຄານ
  3. ດຳເນີນມາດຕະການປະຢັດການໃຊ້ຈ່າຍບໍລິຫານ ຢ່າງເຂັ້ມງວດ ດ້ວຍຮູບການຕ່າງໆເຊັ່ນ:

ໂຈະ ຫຼື ຫຼຸດຜ່ອນສຸດໆ ການກໍ່ສ້າງອາຄານສຳນັກງານ, ຊື້ພາຫະນະ, ອຸປະກອນ...ດັດສົມການນຳໃຊ້ລົດບໍລິຫານ

ຈຳກັດການຮັບລັດຖະກອນໃໝ່, ຈັດອົບຮົມລັດຖະກອນທີ່ມີເພື່ອສາມາດສັບຊ້ອນເຂົ້າສູ່ຕຳແໜ່ງງານໃໝ່, ແກ້ສະພາບລັດຖະກອນ “ເຫຼືອ-ບໍ່ພໍ”, ທັງດຳເນີນການຫຼຸດຈຳນວນລັດຖະກອນໃຫ້ສົມເຫດສົມຜົນເທື່ອລະກ້າວ, ປັບປຸງກົງຈັກບັນດາອົງການຂອງພັກ, ລັດ ແລະ ອົງການຈັດຕັ້ງມະຫາຊົນໃຫ້ກະທັດລັດ, ເນັ້ນປະສິດທິພາບໃນການເຄື່ອນໄຫວຕົວຈິງ.

ຄົ້ນຄວ້າຫັນກິດຈະກຳຈຳນວນໜື່ງຂອງລັດ ໄປສູ່ການໄລ່ລຽງ ແລະ ກຸ້ມຕົນເອງຈາກລາຍຮັບວິຊາການ, ໂດຍສະເພາະບາງສະຖາບັນການສຶກສາ, ໂຮງໝໍ, ບາງຂະແໜງສື່ໂຄສະນາ...

  1. ສືບຕໍ່ປັບປຸງຍົກລະດັບການຄຸ້ມຄອງແຫຼ່ງລາຍຮັບງົບປະມານ ໄປພ້ອມໆກັບການຫັນສູ່ການຖືບັນຊີວິສາຫະກິດ, ການຫັນສູ່ການຄຸ້ມຄອງການເຄື່ອນໄຫວທຸລະກິດ ແລະ ມອບອາກອນໂດຍຜ່ານລະບົບເອເລັກໂຕຣນິກ.
  2. ກ່ຽວກັບການແກ້ໄຂໜີ້ສີນສາທາລະນະ
  • ກວດຄືນມູນຄ່າ ຂອງບັນດາໂຄງການລົງທືນຂອງລັດ ທີ່ມີມູນຄ່າສູງເກີນຄວາມເປັນຈິງເພື່ອເຈລະຈາກັບຜູ້ຮັບເໝົາແນໃສ່ປັບມູນຄ່າໜີ້ສີນໂຄງການຄືນໃໝ່ໃຫ້ແທດກັບຕົວຈິງ.
  • ດຳເນີນການບໍລິຫານຈັດການໜີ້ສີນໂດຍເລີ່ມຈາກການວິເຄາະ, ໄຈ້ແຍກ, ແບ່ງປະເພດໜີ້ສີນ ຕາມກຳນົດເວລາສຳລະສະສາງໃຫ້ຈະແຈ້ງ, ແລ້ວຈັດແຜນສຳລະສະສາງ ຢ່າງເປັນລະບົບ.
  • ດຳເນີນການສຳລະສະສາງ ດ້ວຍແຫຼ່ງທືນສະເພາະ ຈາກການກູ້ຢືມດອກເບ້ຍຕ່ຳ, ໄລຍະຍາວ, ຈາກການຂາຍຊັບສີນຂອງລັດ ຫຼື ຮູບການອື່ນໆທີ່ສອດຄ່ອງ, ເຮັດແນວໃດ ເພື່ອໃຫ້ດ້ານໜື່ງຮັບປະກັນສຳລະສະສາງຕາມແຜນການທີ່ວາງອອກ, ນັບທັງໜີ້ສີນຕໍ່ຕ່າງປະເທດ ແລະ ໜີ້ສີນຄ້າງສຳລະຕໍ່ບັນດາວິສາຫະກິດຢູ່ພາຍໃນປະເທດ.
  1. ດຳເນີນການຄຸ້ມຄອງເງິນຕາຕ່າງປະເທດເປັນລະບົບ ດ້ວຍການດຳເນີນມາດຕະການອັນຈຳເປັນ ເພື່ອເພີ່ມຄັງສຳຮອງໃຫ້ຢູ່ໃນສະພາບທີ່ປອດໄພ, ສາມາດເປັນເຄື່ອງມີອັນມີປະສິດທິພາບຂອງລັດ ເພື່ອຮັກສາສະຖຽນລະພາບຂອງອັດຕາແລກປ່ຽນ, ສະກັດກັ້ນການເກີດເງິນເຟີ້ ທີ່ອາດເກີນຄວາມສາມາດຄວບຄຸມ, ທັງປ້ອງກັນການເກີດສະພາບເງິນຝືດອີກດ້ວຍ.
  2. ສືບຕໍ່ປັບປຸງລັດວິສາຫະກິດ ທີ່ມີແລ້ວໃຫ້ເຄື່ອນໄຫວມີປະສິດທິຜົນກວ່າເກົ່າດ້ວຍການຫັນສູ່ການຫຸ້ນສ່ວນ ກັບບໍລິສັດພາຍໃນ ແລະ ຕ່າງປະເທດ; ຄົ້ນຄວ້າສ້າງຕັ້ງລັດວິສາຫະກິດ ຈຳນວນໜື່ງທີ່ຈຳເປັນ ເພື່ອພັດທະນາເຂດຈຸດສຸມຜະລິດສີນຄ້າດ້ານກະສິກຳ ສົ່ງອອກ, ການບໍລິການຜ່ານ ຫຼື ຂົນສົ່ງຜ່ານແດນ... ເພື່ອເປັນຫົວແຖວເບື້ອງຕົ້ນ ສຳລັບການພັດທະນາບັນດາຂະແໜງເສດຖະກິດປາຍແຫຼມຂອງຊາດ ເວົ້າລວມ ກໍ່ຄືເພື່ອດຶງດູດ, ສົ່ງເສີມການລົງທືນຈາກສັງຄົມ ໃນບັນດາຂະແໜງເສດຖະກິດດັ່ງກ່າວ.
  3. ກ່ຽວກັບການສະໜອງທືນໃຫ້ພາກທຸລະກິດ
  • ຮີບຮ້ອນຄົ້ນຄວ້າ ແລະ ກຳນົດບັນດາມາດຕະການອັນຈຳເປັນເພື່ອໃຫ້ບັນດາທະນາຄານທຸລະກິດຂອງລັດ ສາມາດຮັບການສະໜັບສະໜູນແຫຼ່ງທຶນ ທີ່ມາຈາກເງິນກູ້ດອກເບ້ຍຕ່ຳຈາກທະນາຄານກາງ ເພື່ອຫຼຸດຜ່ອນດອກເບ້ຍປ່ອຍກູ້ໃຫ້ສັງຄົມ, ອັນຈະກາຍເປັນຫົວຫອກໃນການປັບຫຼຸດດອກເບ້ຍ ຂອງບັນດາທະນາຄານທຸລະກິດເອກະຊົນ, ທັງສົ່ງເສີມໃຫ້ສົງຄົມ ນຳທຶນຮອນເຂົ້າສູ່ການຜະລິດ-ທຸລະກິດ, ແທນການຝາກເງິນເພື່ອສ້າງກຳໄລດອກເບ້ຍເງິນຝາກສູງໃນປັດຈຸບັນ.
  • ວາງບັນດາມາດຕະການ ເພື່ອຂຸດຄົ້ນນຳໃຊ້ແຫຼ່ງທຶນຈາກບັນດາກອງທຶນ ທີ່ລະດົມທຶນຈາກຜູ້ປະກອບການທີ່ມີທ່າແຮງ ທັງພາຍໃນ ແລະ ຕ່າງປະເທດ, ຈາກບັນດາກອງທຶນບຳນານ ແລະ ກອງທຶນສະຫວັດດີການອຶ່ນໆ ທີ່ສາມາດນຳເອົາເງິນໄປລົງທຶນ ເພື່ອສ້າງຜົນປະໂຫຍດ ຫຼື ສ້າງມູນຄ່າເພີ່ມໃຫ້ຊັບສີນ, ເຮັດໃຫ້ປະຊາຊົນ ມີຊ່ອງທາງໃນການລົງທືນຕື່ມ ແລະ ຜູ້ທີ່ຕ້ອງກູ້ຢືມ ກໍ່ມີແຫຼ່ງໃຫ້ກູຢືມ ຈະເຮັດໃຫ້ມີການແຂ່ງຂັນໃນຕະຫຼາດການເງິນ ເພີ່ມຂື້ນເຊີ່ງເປັນຜົນດີຕໍ່ປະຊາຊົນໂດຍລວມ.
  1. ລັດຖະບານຕ້ອງດຳເນີນການຢ່າງເປັນລະບົບ ເພື່ອສະໜອງກຳລັງແຮງງານໃຫ້ບັນດາໂຄງການລົງທຶນຈາກພາຍໃນ ແລະ ຕ່າງປະເທດ ດ້ວຍການຈັດຝຶກອົບຮົມບຸກຄະລາກອນເພື່ອສະໜອງໃຫ້ພາກທຸລະກິດ, ເຊັ່ນ: ສ້າງນັກບໍລິຫານ, ນັກພັດທະນາ, ພະນັກງານວິຊາການ, ນາຍຊ່າງ, ຜູ້ຊຳນານງານດ້ານການຕະຫຼາດ...; ພ້ອມນັ້ນ ກໍ່ດຳເນີນການປົກປ້ອງຕຳແໜ່ງງານໃຫ້ແຮງງານລາວ ແລະ ຄຸ້ມຄອງຢ່າງເຂັ້ມງວດ, ຈິງຈັງການນຳໃຊ້ແຮງງານຈາກຕ່າງປະເທດ ສອດຄ່ອງຕາມກົດໝາຍ, ທັງນີ້ເພື່ອຮັບປະກັນໃຫ້ແຮງງານລາວ ມີວຽກເຮັດງານທຳ, ຮັບປະກັນລາຍໄດ້ທີ່ໝັ້ນຄົງ ແລະ ເພື່ອສ້າງແຫຼ່ງລາຍຮັບຈາກອາກອນແຮງງານໃຫ້ລັດອີກ, ສະກັດກັ້ນການໄຫຼອອກຂອງເງິນທຶນ ທີ່ນັກລົງທຶນນຳເຂົ້າມາລົງທຶນຢູ່ປະເທດເຮົາ

ທັງໝົດນີ້ຄືສິ່ງທີຢາກໃຫ້ເພື່ອນຜູ້ອ່ານໄດ້ເຊື່ອມຊືມກຳແໜ້ນມະຕິສຳຄັນທີ່ພົວພັນທາງດ້ານເສດຖະກິດມານຳສະເໜີເປັນການສະເພາະ.

 

ກົດໝາຍແຫ່ງ ສປປ ລາວ

ຄໍາເຫັນຂອງ ທ່ານ ສຈ.ດຣ ກິແກ້ວ ໄຂຄຳພິທູນ ຫົວໜ້າ ຄອສພ ຕໍ່ເວັບໄຊສ

ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ຊົມເຊີມວັນສ້າງຕັ້ງ ສປປ ລາວ ຄົບຮອບ 43 ປີ ຢ່າງສຸດໃຈ.

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

ເຊື່ອມຕໍ່ເວັບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624

ຈຳນວນຄົນອອນໄລ໌ທ

ມີ 92  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

1224039
ມື້ນີ້ມື້ນີ້104
ມື້ວານນີ້ມື້ວານນີ້105
ອາທິດນີ້ອາທິດນີ້500
ເດືອນນີ້ເດືອນນີ້2124
ທັງໝົດທັງໝົດ1224039