ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 43 ປີ.  

ຖະແຫຼງການຮ່ວມມືລາວ-ຫວຽດນາມ

ຖະແຫຼງການຮ່ວມມືລາວ-ຫວຽດນາມ.

1. ຕອບ​ສະໜອງຕາມ​ຄຳ​ເຊີນ​ຂອງ​ ສະຫາຍ ຫງວຽນ​ຟູ່ຈ້ອງ, ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ ຫວຽດນາມ ​ແລະ ສະຫາຍ ​​ເຈີ​ນດ້າຍ​ກວາງ, ປະທານ​ປະ​ເທດ​ ສາທາລະນະ​ລັດ ສັງຄົມ​ນິຍົມ ຫວຽດນາມ, ສະຫາຍ ບຸນ​ຍັງ ວໍລະ​ຈິດ, ​ເລຂາທິການ​ໃຫຍ່​ຄະນະ​ບໍລິ​ຫານ​ງານ​ສູນ​ກາງ​ພັກ​

ປະຊາຊົນ ປະຕິວັດ​ລາວ, ປະທານ​ປະ​ເທດ​ ແຫ່ງ​ ສາທາລະນະ​ລັດ ປະຊາທິປະ​ໄຕ ປະຊາຊົນລາວ ພ້ອມ​ດ້ວຍຄະນະ​ຜູ້​ແທນ​ຂັ້ນ​ສູງ​ພັກ, ລັດລາວ ໄດ້​ຢ້ຽມຢາມ​ສັນຖະວະ​ໄມຕີຢ່າງ​ເປັນ​ທາງ​ການ ສາທາລະນະ​ລັດ ສັງຄົມ​ນິຍົມ ຫວຽດນາມ ​ແຕ່​ວັນ​ທີ 25-27 ​ເມສາ 2016.

ໃນ​​ໄລຍະ​ຢ້ຽມຢາມ, ເລຂາທິການ​ໃຫຍ່, ປະທານ​ປະ​ເທດ ບຸນ​ຍັງ ວໍລະ​ຈິດ ​ໄດ້​ພົບ​ປະເຈລະຈາ​ກັບ​ເລຂາທິການ​ໃຫຍ່ ຫງວຽນ​ຟູ່ຈ້ອງ,​ ແລກປ່ຽນ​ຄຳຄິດ​ເຫັນ​ກັບ​ ປະທານ​ປະ​ເທດ ​ເຈີ​ນດ້າຍ​ກວາງ;​ ນາຍົກລັດຖະມົນຕີຫງວຽນ​ຊວນ​ຟຸກ ​ແລະ ປະທານ​ສະພາ​ແຫ່ງ​ຊາດ ຫງວຽນ​ຖິກີ​ມ​ເງິນ; ຢ້ຽມ​ຢາມ ພື້ນຖານເສດຖະກິດ ແລະ ວັດທະນາທຳຈຳນວນໜຶ່ງ ຢູ່ ນະຄອນຫລວງຮ່າໂນ້ຍ ແລະ ນະຄອນ ໂຮ່ຈີ່ມິນ.

ໃນການພົບປະເຈລະຈາ ແລະ ​ແລກປ່ຽນ​ຄຳຄິດ​ເຫັນ​ໄດ້ດຳເນີນໄປພາຍ​ໃຕ້​ບັນຍາກາດ​ທີ່​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ, ຄວາມ​ສາມັກຄີ​ພິ​ເສດ ​ແລະ ​ເຊື່ອ​ໝັ້ນ​ເຊິ່ງກັນ ​ແລະ​ ກັນ, ສອງ​ຝ່າຍ ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະພາບ​ທີ່​ພົ້ນ​ເດັ່ນ​ຂອງ​ແຕ່​ລະ​ພັກ, ​ແຕ່ລະ​ປະ​ເທດ; ​ແລກປ່ຽນ​ຄຳ​ຄິດ​​ເຫັນ​ຢ່າງ​ເລິກ​ເຊິ່ງກ່ຽວ​ກັບ​ແຜນນະ​ໂຍບາຍ, ມາດ​ຕະການ​ເພື່ອສືບ​ຕໍ່​ຊຸກຍູ້​ການ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະຫວ່າງ ລາວ-ຫວຽດນາມ ​ໃຫ້ນັບ​ມື້​ໄດ້​ຮັບ​ການ​ເສີມ​ຂະຫຍາຍ​ເຂົ້າ​ສູ່​ລວງ​ເລິກ ແລະ ມີ​ປະສິດທິ​ຜົນ; ພ້ອມ​ກັນ​ນັ້ນ, ກໍ​ໄດ້​​ແລກປ່ຽນ​ຄຳ​ຄິດ​ຄຳ​ເຫັນຢ່າງກວ້າງຂວາງ ແລະ ເລິກເຊິ່ງກ່ຽວ​ກັບບັນຫາພາກພື້ນ ​ແລະ ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈ.

2. ສອງ​ຝ່າຍມີ​ຄວາມ​ເອກອ້າງ​ທະ​ນົງ​ໃຈ​ຕໍ່​ບັນດາ​ຜົນສຳ​ເລັດ​ອັນ​ໃຫຍ່​ຫລວງ, ມີ​ຄວາມ​ໝາຍ​​ປະຫວັດສາດ​ຂອງ​ແຕ່​ລະ​ພັກ, ​ແຕ່ລະ​ປະ​ເທດ​ທີ່​ຍາດ​ມາ​ໄດ້​ໃນ​ພາລະກິດ​​ປ່ຽນ​ແປງ​ໃໝ່, ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ, ມີ​ຄວາມ​ພາກພູມ​ໃຈ​ຕໍ່​​ຜົນສຳ​ເລັດອັນຈົບງາມ​ຂອງ​ກອງ​ປະຊຸມ​ໃຫຍ່ ​ຄັ້ງ​ທີ X ຂອງ​ພັກ ປະຊາຊົນ ປະຕິວັດລາວ ​ແລະ ກອງ​ປະຊຸມ​ໃຫຍ່​ຄັ້ງ​ທີ່ XII ຂອງ​ພັກ​ກອມ​ມູນິດ ຫວຽດນາມ ​ແລະ ຜົນການ​ເລືອກ​ຕັ້ງ​ຜູ້​ແທນ​ສະພາ​ແຫ່ງ​ຊາດ​ສະ​ໄໝ​ທີ VIII ຂອງ​ ສາທາລະນະ​ລັດ ປະຊາ​ທິປ​ະ​ໄຕ ປະຊາຊົນລາວ; ບັນດາ​ການ​ນຳ​ຂອງ ​ລາວ ແລະ ຫວຽດນາມ ມີຄວາມເຊື່ອໝັ້ນຢ່າງ​ໜັກ​ແໜ້ນ​ວ່າ ພາລະກິດ​ການ​ປະຕິວັດ​ຂອງ​ສອງ​ພັກ ​ແລະ ປະຊາຊົນ​ສອງ​ຊາດ ກໍ​ຄື​ສາຍ​ພົວພັນ​ຄວາມ​ສາມັກຄີ​ແບບພິ​ເສດ ລາວ-ຫວຽດນາມ ຈະ​​ໄດ້​ຮັບ​ການ​ພັດ​ທະນາຢ່າງບໍ່ຢຸດຢັ້ງຂື້ນ​ສູ່​ລະ​ດັບ​ສູງໃໝ່​.

ສະ​ຫາຍ ເລ​ຂາ​ທິການ​ໃຫຍ່ ຫງວຽນ​ຟູ້ຈ້ອງ ແລະ ກາ​ນ​ນຳ​ຂອງ ຫວຽດນາມ ອວຍພອນ​​ຢ່າງຈິງ ໃຈໃຫ້​ພັກ, ລັດ ​ແລະ ປະຊາຊົນລາວ ອ້າ​ຍນ້ອງ​ຈົ່ງ​ປະ​ສົບຜົົນສຳເລັດໃນການຈັດ​ຕັ້ງປະຕິບັດ​ມະຕິ​ຂອງ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ປະຊາຊົນ ປະຕິວັດລາວ ຢ່າງມີໄຊ, ນໍາເອົາ​ປະ​​ເທດ​ ລາວ ຫລຸດ​ພົ້ນ​ອອກ​ຈາກ​ສະຖານະ​ພາບ​​ດ້ອຍ​ພັດທະນາ​ໃນ ​ປີ 2020, ສ້າງ​​ປະ​ເທດລາວສັນຕິພາບ, ​ເອກະລາດ, ປະຊາທິປ​ະ​ໄຕ, ​ເອກະ​ພາບ ​ແລະ ວັດ​ທະນາ​ຖາວອນ ສູ່​ຈຸດໝາຍ​ສັງຄົມ​ນິຍົມ, ຍົກ​ສູງ​ຖານະບົດບາດຂອງ​ລາວ ​ໃຫ້​ນັບ​ມື້​ສູງ​​ເດັ່ນ​ຂື້ນ​ໃນ​ເວທີ​ພາກ​ພື້ນ ​ແລະ ​ໃນ​ໂລກ.

ສະ​ຫາຍ ບຸນ​ຍັງ ວໍ​ລະ​ຈິດ, ເລ​ຂາ​ທິ​ການ​ໃຫຍ່, ປະ​ທານ​ປະ​ເທດ ແຫ່ງ ສ​ປ​ປລາວ ​ອວຍພອນ​ຢ່າງຈິງໃຈໃຫ້​ພັກ, ລັດ ແລະ ປະ​ຊາ​ຊົນຫວຽດນາມອ້າຍ​ນ້ອງ ຈົ່ງ​ປະ​ສົບຜົົນສຳເລັດໃນການຈັດ​ຕັ້ງ ປະຕິບັດ​ມະຕິ​ຂອງ​ກອງ​ປະຊຸມໃຫຍ່​ຄັ້ງ​ທີ XII  ຂອງ​ພັກ​ກອມ​ມູນິດຫວຽດນາມຢ່າງ​ມີ​ໄຊ,  ນຳ​ເອົາປະ​ເທດຫວຽດນາມ ​ໃຫ້​ກາຍ​ເປັນ​ປະ​ເທດອຸດ​ສະຫະ​ກຳ​  ຕາມ​ທິດ​ທັນ​ສະ​ໄໝ​ໂດຍ​​ພື້ນຖານ​ໂດຍ​ໄວ, ຍົກ​ສູງ​ຖາ ນະ​ບົດບາດ​ຂອງ ຫວຽດນາມ ​​ນັບ​ມື້​ສູງ​​ເດັ່ນ​ຂື້ນ​ໃນ​ເວທີ​ພາກ​ພື້ນ ​ແລະ ​ໃນ​ໂລກ.

3. ສອງ​ຝ່າຍ ສືບຕໍ່​ຢືນຢັນ​ວ່າ​ ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ​ແລະ ການ​ຮ່ວມ​ມື​ຮອບດ້ານ ລາວ-ຫວຽດນາມ, ຫວຽດນາມ-ລາວ ​ໂດຍ​ແມ່ນ​ປະ​ທານ ​ໂຮ່ຈີມີ​ງ ຜູ້​ຍິ່ງ​ໃຫຍ່, ປະທານ ​ໄກສອນ ພົມວິຫານ ​ແລະ ປະທານ ສຸພານຸວົງ ທີ່​ເຄົາ​ລົບ​ຮັກ ໄດ້ກໍ່ຕັ້ງຂຶ້ນ ແລະ​ ບັນດາ​​ການ​ນຳ​ຮຸ່ນຕ່າງໆຂອງ​ສອງພັກ-ລັດ ​ແລະ ປະຊາຊົນ​ສອງ​ຊາດ ໄດ້​ອອກ​ເຫື່ອ​ເທ​ແຮງເພີ່ມ​ພູນ​ຄູນ​ສ້າງ ​ ​ໄດ້​ກາຍ​ມາ​ເປັນ​ມໍລະດົກ​ອັນ​ລໍ້າ​ຄ່າ​ລວມ​ຂອງສອງ​ພັກ, ສອງ​ລັດ ແລະ ​​ເປັນ​ກົດ​ເກນ​ແຫ່ງ​ການ​ຄົງ​ຕົວ ​ແລະ ຂະຫຍາຍຕົວ​ຂອງ​ພາລະກິດ​ປະຕິວັດ​ຂອງ ​ປະຊາຊົນ ​ແຕ່ລະປະ​ເທດ, ​ເປັນ​ສາຍ​ພົວພັນ​ທີ່​ມີ​ລັກສະນະ​ເປັນຕາ​ຍ ​ແລະ ​ເປັນ​​ແຫ່​ລງກໍາລັງ​ທີ່​ສຳຄັນສຳລັບ​ພາລະກິດ​ປົກ​ປັກ​ຮັກສາ​, ສ້າງ​ສາ ແລະ ພັດ​ທະ​ນາ​ຢູ່​ແຕ່​ລະ​ປະ​ເທດ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​​ໃນພາລະກິດສັນຕິພາບ, ສະເຖຍລະ​ພາບ ​ແລະ ການ​ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ; ​ສອງ​ຝ່າຍ​ໝັ້ນ​ໝາຍຈະ​ພ້ອມ​ກັນອອກແຮງ​​ເພີ່ມພູນ​ຄູນ​ສ້າງ, ​ເສີມຂະ​ຫຍາ​ຍ ແລະ ຖ່າຍທອດ​ສາຍ​ພົວພັນສາມັກຄີ​ພິເສດດັ່ງກ່າວໃຫ້ແກ່ຄົນຮຸ່ນ​ຫລັງ​ສືບ​ຕໍ່​ໄປ.

ສອງ​ຝ່າຍ​ເຫັນ​ດີ ​ເປັນ​ເອກະ​ພາບ​ກັນ​ຊຸກຍູ້​​ການ​ພົວພັນ​ຮ່ວມ​ມື​ຮອບດ້ານ ລາວ-ຫວຽດນາມ, ຫວຽດນາມ-ລາວ ບົນ​ພື້ນຖານເສີມຂະຫຍາຍຈິດໃຈ​ແຫ່ງ​ຄວາມ​ເປັນ ເອກະລາດ, ເປັນເຈົ້າຕົນເອງ, ຮ່ວມມືແບບສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ປະສົມ​ປະ​ສານ​ ລະ​ຫວ່າງ ລັກສະນະ ພິເສດຂອງການພົວພັນ ລາວ - ຫວຽດນາມ ກັບປະ​ເພ​ນີ​ຂອງສາກົນຢ່າງ​ສົມ​ເຫດ​ສົມ​ຜົນ, ໃຫ້ບູລິມະສິດເຊິ່ງກັນ ແລະ ກັນ, ຊ່ວຍໜູນ ແລະ ສ້າງເງື່ອນໄຂສະດວກໃຫ້ແກ່ກັນ ​ແລະ ກັນ ​ເພື່ອຄວາ​ມວັດ ທະນາ​ຖາວອນ​ຂອງ​ແຕ່ລະ​ປະ​ເທດ, ​ ເພື່ອ​ສັນຕິພາບ, ສະເຖຍ​ລະ​ພາບ, ການຮ່ວມມື ​ແລະ ການ​ພັດ ທະນາ​ຢູ່​​ໃນ​ອາຊີ​ຕາ​ເວັນ​ອອກ​ສ່ຽງ​ໃຕ້ ​ແລະ ​ໃນ​ໂລກ.​ 

4.  ສອງຝ່າຍ​ເຫັນ​ດີ​ເປັນ​ເອກະ​ພາບ​​ເພີ່ມ​ທະວີ​ບັນດາ​ການ​ພົບ​ປະ, ຢ້ຽມຢາມ​ໄປມາຫາສູ່​ກັນເປັນປະຈຳ ແລະ ດ້ວຍ​ຫລາຍ​ຮູບ​ການລະຫ່ວາງ​ການ​ນຳ​ຂັ້ນ​ສູງ​ຂອງ​ສອງພັກ, ສອງ​ປະ​ເທດ; ​ເປີດ​ກ້ວາງ​ການ​ພົວພັນ​ຮ່ວມ​ມື, ຊ່ວຍ​ເຫລືອ​ເຊິ່ງກັນ ​ແລະ ​ກັນ​ ລະຫວ່າງ​ບັນດາຄະ​ນະ​ຂອງ​ພັກ, ບັນ​ດາ​ກະຊວງ, ຂະ​ແໜງການ, ອົງການ​ຈັດ​ຕັ້ງ ​ແລະ ກຳມາ​ທິການ​ຂອງ​ສະພາແຫ່ງຊາດ, ​ແນວ​​ໂຮມ, ອົງການ​ຈັດ​ຕັ້ງ​ມະຫາ​ຊົນ ​ແລະ ບັນດາ​ທ້ອງ​ຖິ່ນ​ຂອງ​ສອງ​ປະ​ເທດ; ລົງ​ເລິກ​ການ​ແລກປ່ຽນບົດຮຽນ​ດ້ານ​ທິດ​ສະ​ດີ-ພຶດ​ຕິ​ກຳ, ຊ່ວຍໜູນ​ເຊິ່ງກັນ ​ແລະ ກັນ​ໃນ​ວຽກງານ​ກໍ່ສ້າງ​ພັກ, ຄຸ້ມ​ຄອງ​ລັດ ​ແລະ ພັດທະນາ​ປະ​ເທດ​ຊາດ; ​ຖື​ສຳ​ຄັນ​ການກໍ່ສ້າງ, ບໍາລຸງ​ສ້າງ​ພະນັກງານ​ການ​ນຳ ​ແລະ ພະ​ນັກ​ງານ​ຄຸ້ມ​ຄອງ; ຍູ້​ແຮງ​ການໂຄສະນາ​ ແລະ​ສຶກສາອົບຮົມ​ໃຫ້​ແກ່​ບັນດາ​ພະນັກງານ, ສະມາຊິກ​ພັກ ​ແລະ ບັນດາ​ຊັ້ນ​ຄົນ ​ໂດຍ​ສະ​ເພາ​ແມ່ນ​ຄົນ​ຮຸ້ນ​ໜຸ່ມ​ຂອງ​ສອງ​ປະ​ເທດ​ກ່ຽວ​ກັບມູນ​ເຊື້ອ​ສາຍ​ພົວພັນ​ພິ​ເສດ ລະ​ຫວ່າງ ລາວ-ຫວຽດນາມ; ປະສານ​ສົມ ທົບ​ກັນ​ເປັນຢ່າງດີໃນການຈັດ​ຕັ້ງບັນດາກິດຈະກຳ​ເພື່ອສະ​ເຫລີ​ມສະຫລອງ​ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ຄົບ​ຮອບ 55 ປີ ​ແລະ ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື ​ຄົບ​ຮອບ 40 ປີ ​ໃນ​ ປີ 2017; ປະສານ​ສົມທົບ​ກັນ​ສ້າງ​ບັນດາ​ໂຄງການ ​ແລະ ປັບປຸງ​ບູລະນະບັນດາ​​ເຂດ​ອະນຸສອນ​ສະຖານ​ທາງ​ດ້ານ​ປະຫວັດສາດກ່ຽວ​ກັບ​ສາຍ​ພົວພັນ​ ລາວ-ຫວຽດນາມ ຢູ່​ແຕ່ລະ​ປະ​ເທດ.

5. ສອງ​ຝ່າຍ​ເຫັນ​ດີ​​ເປັນ​ເອກະ​ພາບ​ເປີດ​ກ້ວາງ ​ແລະ ຍົກ​ສູງ​ປະສິດທິ​ຜົນ​ຂອງ​ການ​ຮ່ວມ​ມືທາງດ້ານ​ເສດຖະກິດ, ວັດທະນະທຳ, ວິທະຍາສາດ-​ເຕັກນິກ.... ບົນ​ພື້ນຖານການ​ເສີມ​ຂະຫຍາຍ​ຄວາມ​ອາດ​ສາມາດ ​ແລະ ທ່າ​ແຮງ​ບົ່ມ​ຊ້ອນຂອງ​ແຕ່ລະ​ປະ​ເທດຢ່າງ​ເຕັມສ່ວນ; ຊຸກຍູ້​ຢ່າງ​ແຂງ​ແຮງ​ການຈັດ​ຕັ້ງ​ຜັນ​ຂະຫຍາຍ​ບັນດາ​ສັນຍາ ​ແລະ ຂໍ້​ຕົກລົງ​ຮ່ວມ​ມື​ລະຫວ່າງ​ສອງ​ລັດຖະບານຢ່າງ​ມີ​ປະສິດທິ​ຜົນ,​ ໂດຍເນັ້ນໃສ່ ການ​ປະ​ຕິ​ບັດ​ບັນ​ດາ​ໂຄງ​ການ​ລົງ​ທຶນ​ຂອງ ຫວຽດ​ນາມ ຢູ່ລາວ ໃຫ້​ຮັບ​ປະ​ກັນ​ຕາມ​ກຳ​ນົດເວ​ລາ ແລະ​ ມີຄຸນ​ນະ​​ພາບ; ເພີ່ມ​ທະ​ວີ​ການ​ເຊື່ອມ​ຈອດ​ພື້ນ​ຖານ​ເສດ​ຖະ​ກິດ​ຂອງ​ສ​ອງ​ປະ​ເທດ, ພື້ນ​ຖານ​ໂຄງ​ລ່າງ ທາງ​ດ້ານ​ຄົມ​ມະ​ນາ​ຄົມ ແລະ ພະ​ລັງ​ງານ; ປັບປຸງ ​ແລະ ປ່ຽນ​ແປງໃໝ່​ຢ່າງ​​ຕັ້ງໜ້າ​ການ​ເຄື່ອນ​ໄຫວ​ຂອງ​ຄະນະ​ກຳມະການ​ຮ່ວມ​ຂອງລັດຖະບານ​ຂອງ​ສອງ​ປະ​ເທດ​ກ່ຽວກັບການຮ່ວມມືສອງຝ່າຍ; ສືບ​ຕໍ່​ເປີດ​ກ້​ວາງ ແລະ ຍົກ​ສູງ​ຄຸນ​ນະ​ພາບການ​ຮ່ວມ​ມື​ໃນ​ຂົງ​ເຂດ​ການ​ສຶກສາ, ​ບໍາລຸງສ້າງ ​ແລະ ພັດທະນາ​ແຫ​ລ່ງ ຊັບພະຍາກອນ​ມະນຸດ; ໂດຍ​ສະ​ເພາະ​ແມ່ນ​ການ​ກໍ່​ສ້າງ​ຊັບ​ພະ​ຍາ​ກອນ​ມະ​ນຸດ​ທີ່​ມີ​ຄຸນ​ນະ​ພາບ​ສູງ, ສືບ​ຕໍ່​ສ້າງ​ເງື່ອນ​ໄຂ​ສະດວກໃຫ້​ແກ່ ປະຊາຊົນ​ ຂອງ​ກັນ​​ ແລະ ກັນ ໃນການ​ດຳລົງ​ຊີວິດ, ​ທຳ​ມາ​ຫາ​ກິນ ​ແລະ ສຶກສາຮໍ່າຮຽນ​ຢູ່​ແຕ່​ລະ​ປະ​ເທດ ໂດຍສອດ​ຄ່ອງ​ກັ​ບ​ລະ​ບຽບ​ກົດ​ໝາຍ​ຂອງ​ແຕ່​ລະ​ປະ​ເທດ; ຈັດ​ຕັ້ງປະ​ຕິ​ບັດ​​ສັນ​ຍາ​ກ່ຽວ​ກັບ​ແຮງ​ງານຢ່າງ​ມີ​ປະ​ສິດ​ທິ​ຜົນ; ປະ​ສານ​ສົມ​ທົບ​ຢ່າງ​ແໜ້ນ​ແ​ຟ້ນ​ໃນ​ການ​ຄຸ້ມ​ຄອງ​ພົນ​ລະ​ເມືອງຂອງ​ກັນ ແລະ ກັນ ​ຢູ່​ແຕ່​ລະ​ປະ​ເທດ.

6. ສອງ​ຝ່າຍ​​ເຫັນ​ດີ​ເປັນ​ເອກະ​ພາບ​ກັນ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື ​​ໃນ​ຂົງ​ເຂດ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ, ​​ຮັບປະກັນ​ສະ​ເຖຍລະ​ພາບ​ທາງ​ການ​ເມືອງ, ຄວາມ​ເປັນ​ລະບຽບ​ຮຽບຮ້ອຍ​ທາງ​ດ້ານ​ສັງຄົມ​ຢູ່​ແຕ່ລະ​ປະ​ເທດ; ສ້າງ​ເສັ້​ນ​ຊາຍ​ແດນ ລາວ-ຫວຽດ​ນາມ, ຫວຽດນາມ-ລາວ ໃຫ້​ມີ​ສັນ​ຕິ​ພາບ, ສະ​ເຖຍ​ລະ​ພາບ, ການ​ຮ່ວມ​ມື ແລະ ພັດ​ທະ​ນາ​ແບບ​ຢືນ​ຍົງ, ປະສາ​ນສົມທົບ​ກັນ​ຢ່າງ​ແໜ້ນ​ແຟ້ນ​ໃນ​ການຕ້ານ​, ສະກັດ​ກັ້ນ ​​ແລະ ຕໍ່ສູ້ກັບ​ບັນດາອາ​ສະ​ຍາ​ກຳ​ຂ້າມ​ຊາດຢ່າງ​ມີ​ປະສິດທິ​ຜົນ; ສືບ​ຕໍ່​​ອອກ​ແຮງປະສານ​ສົມທົບໃນ​ການ​ຊອກ​ຄົ້ນຫາ​ ແລະ ຈັດ​ສົ່ງ​ອັດ​ຖິຂອງ​ທະຫານ​ອາສາ​ສະໝັກ ແລະ ຊ່ຽວ​ຊານ ຫວຽດນາມ ທີ່​ເສຍ​ຊີວິດໃນປາງສົງຄາມ​ຢູ່ ລາວ ກັບ​ຄື​ນປະ​ເທດ, ປະ​ສານ​ສົມ​ທົ​ບ​ກັນ​​ປັບ​ປຸງ​ບັນ​ດາ​ເອກ​ກະ​ສານ​ນິ​ຕິ​ກຳ​ໃຫ້​ສົມ​ບູນ ແລະ ຈັດ​ຕັ້ງ​ຜັນ​ຂະ​ຫຍາຍ​​ອາ​ນຸ​ສັນ​ຍາ ກ່ຽວ​ກັບ​ເສັ້ນ​ຊາຍ​ແດນ ແລະ ປັກ​ຫລັກ​ໝາຍ​ຊາຍ​ແດນ​ ແລະ ສັນ​ຍາ​ວ່າ​ດ້​ວຍ​ລະ​ບຽບການ​ຄຸ້ມ​ຄອງ​ເສັ້ນ​ຊາຍ​ແດນ ແລະ   ດ່າ​ນ​ຊາຍແດນ​ທີ່​ເຊັນ​ກັນ ໃນ​ວັນ​ທີ 16/3/2016 ໃຫ້ມີ​ປະ​ສິດ​ທິ​ຜົນ.

7. ສອງ​ຝ່າຍ​ໄດ້​ແລກປ່ຽນ​ຄຳ​ຄິດ​ເຫັນ​ຢ່າງ​ເລິກ​ເຊີ່ງ ​ແລະ ​ເປັນ​​ເອກະ​ພາບ​​​ກັນກ່ຽວ​ກັບ​ບັນດາ​ບັນ ຫາ​ພາກ​ພື້ນ ​ແລະ ສາ​ກົນ​ທີ່​ຕ່າງ​ຝ່າຍ​ໃຫ້​ຄວາມ​ສົນ​ໃຈ; ​ຢືນຢັນສືບ​ຕໍ່​ປະ​ສານສົມທົບ​ກັນ​ຢ່າງ​ແໜ້ນ​ແຟ້ນ​ໃນ​ເວ​ທີພາກ​ພື້ນ ​ແລະ ສາກົນ ​ເປັນ​ຕົ້​ນ​ແມ່ນ​ໃນ​ອົງການ​ສະຫະ​ປະຊາ​ຊາດ, ອາ​ຊຽນ ​ແລະ ບັນດາ​ກົນ​ໄກ​ການຮ່ວມ​ມື​ອະນຸ​ພາກ​ພື້ນ; ​ປະກອບສ່ວນ​ເຂົ້າໃນ​ການ​ສ້າງ​ປະຊາ​ຄົມອາ​ຊຽນ ໃຫ້​ມີ​ຄວາມ​ເຂັ້ມ​ແຂງ; ເພີ່ມ​ທະ​ວີ​ຄວາມ​ສາ​ມັກ​ຄີ ແລະ ​ເສີມຂະຫຍາຍ​ບົດບາດ​ຄວາມ​ເປັນ​​ແກນ​ກາງຂອງອາ​ຊຽນ. ຫວຽດ​ນາມ​ ໃຫ້​ການ​ສະ​ໜັບ​ສະ​ໜູນຢ່າງ​ຕັ້ງ​ໜ້າ ແລະ ຮອບ​ດ້ານ​ຕໍ່​ການ​ເປັນ​ປະ​ທານອາ​ຊຽນຂອງ​ລາວ.

ສອງ​ຝ່າຍ​ຊົມ​ເຊີຍ​ຜົນສຳ​ເລັດ​ຂອງກອງ​ປະຊຸມ​ສຸດ​ຍອດກ່ຽວ​ກັບ​ການ​ຮ່ວມ​ມື ລ້ານ​ຊ້າງ-​ແມ່​ນໍ້າ ຂອງ ​ຄັ້ງ​ທຳ​ອິດ; ບົນ​ພື້ນ​ຖານ​ສືບ​ຕໍ່​ປະ​ຕິ​ບັດ​ຂໍ້​ຕົກ​ລົງ​ຂອງ​ສອງ​ປະ​ເທດ, ສອງ​ຝ່າຍ​ເຫັນ​ດີ​ເພີ່ມ​ທະວີ​ການ​ປະສານ​ສົມທົບ​ກັນ​ຢ່າງ​ແໜ້ນ​ແຟ້ນນຳ​ກັນກັບ​ບັນດາ​ປະ​ເທດ ​ແລະ ບັນດາ​ອົງການ​ທີ່​ກ່ຽວຂ້ອງ​ໃນ​ການ​ຄຸ້ມ​ຄອງ, ນໍາ​ໃຊ້​ແມ່​ນໍ້າຂອງ​ຢ່າງ​ມີ​ປະສິດທິ​ຜົນ ​ແລະ ຍືນ​ຍົງ; ພ້ອມ​ກັບ ກຳປູ​ເຈຍ ຊຸກຍູ້​ການຈັດ​ຕັ້ງປະຕິບັດ​ບັນດາ​ໂຄງການ​ຮ່ວມ​ມື​​ໃນ​ເຂດ​ສາມ​ຫລ່ຽມ​ພັດ​ທະນາ ກໍາປູ​ເຈຍ-ລາວ-ຫວຽດນາມ ​ຢ່າງ​ມີ​ປະສິດທິ​ຜົນ. 

ສອງ​ຝ່າຍ​ເນັ້ນ​ໜັກ​ເຖິງ​ຄວາມ​ສຳ​ຄັນ​ຂອງ​ການ​ປົກ​ປັກ​ຮັກ​ສາ​ສັນ​ຕິ​ພາບ, ສະ​ເຖຍລະ​ພາບ, ຄວາມສະຫງົບ​ປອດ​ໄພ​ຢູ່ ທະ​ເລ​ຈີນ​ໃຕ້​ (ຫວຽນາມເອີ້ນວ່າ ທະເລຕາເວັນອອກ); ເປັນ​ເອກ​ພາບ​ກັນ​ຊຸກ​ຍູ້​ການ​ແກ້​ໄຂ​ບັນ​ຫ​າຂໍ້​ຂັດແຍ່ງ ໃນ​ທະ​ເລ​ຈີນ​ໃຕ້ ໂດຍ​ສັນ​ຕິ​ວິ​ທີ, ​ບົນ​ພື້ນ​ຖານ​​ກົດ​ໝາຍ​ສາ​ກົນ; ຮ່ວມ​ກັບ​​ຝ່າຍ​ຕ່າງໆປະ​ຕິ​ບັດ​ຖະ​ແຫລງ​ການ​ກ່ຽວ​ກັບ​ການ​ປະ​ພຶດ​ຂອງ​ບັນ​ດາ​ຝ່າ​ຍ​ທີ່​ກ່ຽວ​ຂ້ອງ​ຢູ່ ທະ​ເລ​ຈີນ​ໃຕ້ (DOC) ​ຢ່າງຄົບ​ຖ້ວນ ແລະ ມີ​ປະ​ສິດ​ທິ​ຜົນ ແລະ ກ້າວ​ໄປສູ່​ການ​ບັນ​ລຸ​ຫລັກ​ການ​ກ່ຽວ​ກັບ​ການ​ປະ​ພຶດ​ຂອງ​ບັນ​ດາ​ຝ່າຍ​ທີ່​ກ່ຽວ​ຂ້ອງ​ໃນ​ທະ​ເລ​ຈີນ​ໃຕ້ (COC) ແນ​ໃສ່​ການ​ປົກ​ປັກ​ຮັກ​ສາ​ສັນ​ຕິ​ພາບ, ສະ​ເຖຍລະ​ພາບ, ກາ​ນ​ຮ່ວມ​ມື ແລະ​ ການ​ພັດ​ທະ​ນາ​​ຢູ່​ໃນພາກ​ພື້ນ ແລະ ໃນ​ໂລກ.

8. ສອງ​ຝ່າຍ​ຕີລາຄາສູງຕໍ່ຜົນສຳເລັດອັນຈົບງາມ ແລະ ມີຄວາມໝາຍຢ່າງເລິກເຊິ່ງຂອງການ ຢ້ຽມຢາມ​ສັນຖະວະ​ໄມຕີ​ ສສ ຫວຽດນາມຢ່າງ​ເປັນ​ທາງ​ການ ຂອງ ​ສະຫາຍ ບຸນ​ຍັງ ວໍລະ​ຈິດ,​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະຊາຊົນ ປະຕິວັດ​ລາວ, ປະທານ​ປະ​ເທດ​ແຫ່ງ​ ສາທາລະນະ​ລັດ ປະຊາທິປະ​ໄຕ ປະຊາຊົນລາວ ​​ເຊິ່ງ​ເປັນ​ການປະກອບສ່ວນ​ອັນ​ສຳຄັນ​​​ເຂົ້າໃນການ ເຮັດໃຫ້ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລາວ-ຫວຽດນາມ, ຫວຽດນາມ-ລາວ ​ໃຫ້​ນັບ​ມື້​ນັບ​​ໄດ້​ຮັບ​ການ​​ເສີມ​ຂະຫຍາຍເຂົ້າສູ່ລວງເລິກ​, ແທດ​ຕົວ​ຈິງ ແລະ ມີປະສິດທິຜົນ, ຕອບ​ສະໜອງຕາມ​ຄວາ​ມມຸ່ງມາດ​ປາດ​ຖະໜາ​ຂອງ​ ປະຊາຊົນ​ສອງ​ປະ​ເທດ, ເພື່ອສັນຕິພາບ, ສະເຖຍລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

​ສະ​ຫາຍ ບຸນ​ຍັງ ວໍລະ​ຈິດ, ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະຊາຊົນປະຕິວັດ​ລາວ, ປະທານ​ປະ​ເທດ ​ແຫ່ງ ​ສາທາລະນະ​ລັດ​ ປະຊາທິປະ​ໄຕ ປະຊາຊົນລາວ ໄດ້​ສະ​ແດງຄວາ​ມຂອບ​ອົກ​ຂອບ​ໃຈ​ຢ່າງ​ຈິງ​​ໃຈ​ຕໍ່ພັກ, ລັດ ແລະ ປະຊາຊົນ ຫວຽດນາມ,​ ສະ​ແດງຄວາ​ມຂອບ​ໃຈ​ເລຂາທິການໃຫຍ່ ຫງວຽນຟູ່ຈ້ອງ, ປະທານປະເທດ ເຈີ່ນດ່າຍກວາງ ແລະ ບັນດາການນໍາຂັ້ນ​ສູງຂອງ ຫວຽດນາມ ທີ່​ໄດ້​ໃຫ້ການ​ຕ້ອນຮັບຢ່າງ​ສົມ​ກຽດ ​ແລະ ​ເຕັມ​ໄປ​ດ້ວຍ​ຄວາມ​ຮັກ​ແພງ​ຖານ​ສະຫາຍ​ອ້າຍ​ນ້ອງ,​ ເຊິ່ງ ສະ​ແດງ​ເຖິງ​ຄວາມ​ມີ​ຊີວິດ​ຊີວາແຫ່ງສາຍ​ພົວພັນ​ທີ່​ສະໜິດແໜ້ນ, ບໍລິສຸດພຸດຜ່ອງ ແລະ ເຫລື້ອມ​ໃສ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ.

ສະ​ຫາຍ ບຸນ​ຍັງ ວໍລະ​ຈິດ  ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ ປະຊາຊົນ ປະຕິວັດລາວ, ປະທານ​ປະ​ເທດ ​ແຫ່ງ ສາທາລະນະ​ລັດ ປະຊາທິປະ​ໄຕ ປະຊາ​ຊົນ ລາວ ໄດ້​ເຊື້​ອ​ເຊີນ ​ເລຂາທິການ​ໃຫຍ່ ຫງວຽນຟູ່ຈ້ອງ ພ້ອມດວ້ຍພັນລະຍາ ​ແລະ ປະທານ​ປະ​ເທດ ເຈີນດ່າຍກວາງ ພ້ອມ ດ້ວຍພັນລະຍາ ແລະ ເຊື້ອເຊີນບັນດາສະຫາຍການນຳຂັ້ນ​ສູງຂອງພັກ, ລັດຫວຽດນາມ ​ໄປ​ຢ້ຽມຢາມ​ສັນຖະວະ​ໄມຕີ ສາທາລະນະ​ລັດ ປະຊາທິປະ​ໄຕ ປະຊາຊົນລາວ ​ຢ່າງ​ເປັນ​ທາງ​ການ. ​ເລຂາທິການ​ໃຫຍ່ ຫງວຽນຟູ່ຈ້ອງ ​ແລະ ປະທານ​ປະ​ເທດ ເຈີນດ່າຍກວາງ ແລະ ບັນດາການນຳຂັ້ນສູງຂອງ ຫວຽດນາມ ​ໄດ້​ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ​ແລະ ຕອບ​ຮັບ​ຄຳ​ເຊີນ​ດ້ວຍ​ຄວາມ​ຍິນ​ດີ, ວັນເວລາ​ຂອງ​ການ​ຢ້ຽມຢາມ​ຈະ​​ແຈ້ງ​ຜ່ານ​ທາງ​ການ​ທູດ.

 

ກົດໝາຍແຫ່ງ ສປປ ລາວ

ຄໍາເຫັນຂອງ ທ່ານ ສຈ.ດຣ ກິແກ້ວ ໄຂຄຳພິທູນ ຫົວໜ້າ ຄອສພ ຕໍ່ເວັບໄຊສ

ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ຊົມເຊີມວັນສ້າງຕັ້ງ ສປປ ລາວ ຄົບຮອບ 43 ປີ ຢ່າງສຸດໃຈ.

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

ເຊື່ອມຕໍ່ເວັບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624