ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 43 ປີ.  

ວັນສ້າງຕັ້ງພັກປະຊາຊົນປະຕິວັດລາວ

ວັນສ້າງຕັ້ງພັກປະຊາຊົນປະຕິວັດລາວ

22.3.1955

  1. ການກຳເນີດພັກປະຊາຊົນປະຕິວັດລາວ.

          ຊາດລາວເປັນຊາດຫນຶ່ງ ທີ່ມີປະຫວັດສາດອັນຍາວນານ, ມີມູນເຊື້ອໃນການຕໍ່ສູ້ຕີເອົາຊະ ນະຈັກກະພັດຕ່າງດ້າວຜູ້ຮຸກຮານ, ມີມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ.

  • ປີ 1893 ຝຣັ່ງໄດ້ເຂົ້າມາຢຶດຄອງເອົາລາວເປັນຫົວເມືອງຂຶ້ນ, ປະຊາຊົນລາວຖືກກົດຂີ່ຂູດຮີດຢ່າງໜັກໜ່ວງ ແລະ ປ່າເຖື່ອນ, ຈິ່ງໄດ້ພາກັນລຸກຮື້ຂຶ້ນຕໍ່ຕ້ານແອກປົກຄອງ ຂອງພວກລ່າເມືອງຂຶ້ນຝຣັ່ງຢ່າງອົງອາດກ້າຫານ ແລະ ເປັນຂະບວນການຕໍ່ເນື່ອງ.
  •  ປີ 1930 ປະທານ ໂຮ່ຈິມິນ ໄດ້ສ້າງຕັ້ງພັກກອມມູນິດອິນດູຈີນຂຶ້ນ ເພື່ອນຳພາຂະບວນ ການຕໍ່ສູ້ຂອງປະຊາຊົນຢູ່ສາມຊາດອິນດູຈີນ.
  •  ປີ 1934 ອົງຄະນະພັກແຄວ້ນລາວ ກໍໄດ້ຮັບການສ້າງຕັ້ງຂຶ້ນ, ເມື່ອມີພັກນຳພາແລ້ວການຕໍ່ສູ້ຂອງປະຊາຊົນນັບມື້ນັບໄດ້ຮັບໄຊຊະນະເປັນກ້າວໆ ພັກເຮົາໄດ້ເດັດດ່ຽວນຳພາປວງຊົນລຸກຮືຂຶ້ນຍາດເອົາເອກະລາດຈາກຟາດຊິດຍີ່ປຸ່ນ ແລະ ພວກລ່າເມືອງຂຶ້ນຝຣັ່ງ ປະກາດຄວາມເປັນເອກະລາດຂອງປະເທດລາວຕໍ່ໂລກ ເມື່ອວັນທີ 12 ຕຸລາ 1945.
  • ປີ 1955 ຕໍ່ໜ້າຄວາມຮຽກຮ້ອງຕ້ອງການໃໝ່ຂອງການປະຕິວັດ ແລະ ໂດຍປະຕິບັດຕາມມະຕິຂອງກອງປະຊຸມໃຫຍ່ຄັ້ງທີ II ຂອງພັກກອມມູນິດອິນດູຈີນ, ບັນດານັກກອມມູນິດລາວ ກໍ່ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດພາຍຫລັງທີ່ໄດ້ກະກຽມມາໄດ້ໄລຍະໜຶ່ງ ແລະ ໄດ້ ສ້າງຕັ້ງພັກປະຊາຊົນລາວຂຶ້ນໃນວັນທີ 22 ມີນາ 1955.
  1. ຜົນສຳເລັດແຫ່ງການຊີ້ນຳ ນຳພາຂອງພັກປະຊາຊົນປະຕິວັດລາວ.

          ພາຍຫລັງພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ ກໍໄດ້ປະເຊີນໜ້າກັບ ຈັກກະພັດໂຕໃໝ່ທີ່ມີເສດຖະກິດເຂັ້ມແຂງ ແລະ ມີອາວຸດທີ່ທັນສະໄໝ ແຕ່ພັກເຮົາກໍໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳ ນຳພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກມືປະຕິການຂາຍຊາດ ຢ່າງດຸເດືອດຂ້ຽວຂາດກ້າວໄປເຖິງການປົດປ່ອຍປະເທດຊາດຢ່າງສົມບູນ ແລະ ສະຖາປະນາເປັນສປປ ລາວເຊິ່ງມີໄລຍະຂອງການສ້າງສາ ແລະ ພັດທະນາປະເທດຊາດດັ່ງນີ້:

  1. ໄລຍະຕໍ່ສູ້ປົດປ່ອຍຊາດ.

          ໄລຍະປີ 1955 - 1958 ເປັນໄລຍະທີ່ພັກນຳພາການຕໍ່ສູ້ ເພື່ອປະຕິບັດສັນຍາເຊີແນວ 1954, ເດັດດ່ຽວປົກປັກຮັກສາ 2 ແຂວງເຕົ້າໂຮມ ຫົວພັນ ແລະ ຜົ້ງສາລີ, ພັກເຮົາໄດ້ເພີ່ມທະວີການປັບປຸງ, ບຳລຸງສ້າງກຳລັງປະກອບອາວຸດ, ພື້ນຖານການເມືອງ ແລະ ເສດຖະກິດ, ປົກປັກຮັກສາ 2 ແຂວງເຕົ້າໂຮມສົມທົບກັບການຂົນຂວາຍປຸກລະດົມການຕໍ່ສູ້ທາງດ້ານການເມືອງຢູ່ 10 ແຂວງເພື່ອທັບມ້າງກົນອຸບາຍ " ຍົວະເສືອເຂົ້າຖ້ຳ " ຂອງພວກລ່າເມືອງຂຶ້ນແບບໃໝ່ ທີ່ແນໃສ່ດັບສູນກຳລັງປະຕິວັດຮັກຊາດ ເຊິ່ງພາໄປເຖິງການເຊັນສັນຍາວຽງຈັນ ປີ 1957 ແລະ ສ້າງຕັ້ງລັດຖະບານປະສົມແຫ່ງຊາດ ຄັ້ງທີ I ຂຶ້ນ ດ້ວຍການເຂົ້າຮ່ວມຂອງແນວລາວຮັກຊາດ ຫຼື ເອີ້ນວ່າລາວລວມລາວຄັ້ງທີ I.

          ປີ 1959 - 1962 ພວກຈັກກະພັດ ແລະ ລູກມືໄດ້ອອກແຮງປາບປາມຂະບວນການປະຕິວັດ ຢ່າງປ່າເຖື່ອນ, ພວກເຂົາໄດ້ມ້າງລັດຖະບານປະສົມ ແລະ ຄວາມຖືກຕ້ອງປອງດອງຊາດ, ປິດລ້ອມກອງພັນທີ 2 ຢູ່ທົ່ງໄຫຫີນ, ຈັບບັນດາຜູ້ນຳຂອງແນວລາວຮັກຊາດເຂົ້າຄຸກ ແຕ່ໃຕ້ການນຳພາອັນສະຫລາດສ່ອງໃສຂອງພັກ, ກອງພັນທີ 2 ໄດ້ຜ່າວົງລ້ອມໄປຢ່າງປອດໄພ ແລະ ບັນດາຜູ້ນຳເຮົາກໍ່ສາມາດແຫກຄຸກອອກມາໄດ້ຢ່າງມະຫັດສະຈັນ ໃນວັນທີ 24/5/1960,  ປົດປ່ອຍທົ່ງໄຫຫີນ - ຊຽງຂວາງ ໃນເດືອນ 1/1961, ປົດປ່ອຍແຂວງຫລວງນ້ຳທາໃນເດືອນ 5/1962,  ເປີດກວ້າງບັນດາຖານທີ່ ໝັ້ນ, ປົດປ່ອຍດິນແດນໄດ້ 2/3 ແລະ ມີພົນລະເມືອງ 1/2 ຂອງທົ່ວປະເທດ ເຮັດໃຫ້ດິນແດນ ເຂດປົດປ່ອຍຕິດລຽນຕໍ່ກັນແຕ່ເໜືອຮອດໃຕ້.

          ຍ້ອນຖືກປະລາໄຊຢ່າງຫນັກຫນ່ວງຂອງພວກຈັກກະພັດ ແລະ ລູກແຫຼ່ງຕີນມືພວກເຂົາຈຳຕ້ອງຍອມເຊັນສັນຍາເຊີແນວ ກ່ຽວກັບລາວ ໃນວັນທີ 23 ກໍລະກົດ ປີ 1962, ໄດ້ສ້າງຕັ້ງລັດຖະບານປະສົມແຫ່ງຊາດ ຄັ້ງທີ II ຫຼື ເອີ້ນວ່າລາວລວມລາວຄັ້ງທີ II.

          ໄລຍະແຕ່ກາງປີ 1964 - 1973 ເປັນໄລຍະຕໍ່ສູ້ຜາບແພ້ຍຸດທະສາດ " ສົງຄາມພິເສດຂອງຈອນເຊິນ " ແລະ ຍຸດທະສາດ " ສົງຄາມພິເສດເພີ່ມທະວີຕາມທິດສະດີນິກເຊີນ " ຂອງຈັກກະພັດຜູ້ຮຸກແບບໃໝ່.

          ນັບແຕ່ເດືອນ 5/1964 ພວກຈັກກະພັດອາເມລິກາ ໄດ້ໃຊ້ເຮືອບິນບຸກໂຈມຕີຍິງທຳລາຍເຂດປົດປ່ອຍຢ່າງໜັກໜ່ວງ, ດຳເນີນນະໂຍບາຍປິນຂັ້ນໄດສົງຄາມເຮັດໃຫ້ສົງຄາມພິເສດຢູ່ລາວ ນັບມື້ນັບຂະຫຍາຍຕົວໃນລະດັບສູງ ດ້ວຍກົນອຸບາຍບຽດຢຶດເອົາເຂດປົດປ່ອຍຂອງກຳລັງປະຕິວັດທັງໝົດ ເຊິ່ງເລີ່ມຕົ້ນດ້ວຍການເປີດບັ້ນຮົບບຸກໂຈມຕີເຊັ່ນ: ບັ້ນຮົບສາມສອນ, ສອນໄຊ 1, ສອນໄຊ 2, ບັ້ນຮົບມັງກອນ, ໂຄດຕະບອງ... ບຸກໂຈມຕີພູພຽງຍຸດທະສາດທົ່ງໄຫຫີນ, ເຄື່ອນທັບເຂົ້າໄປບຸກຕີຢຶດທີ່ຕັ້ງຢູ່ເຂດນ້ຳບາກ; ບຸກຕີບຽດຢຶດເຂົ້າເຂດປົດປ່ອຍທາງພາກກາງ ແລະ ພາກໃຕ້ຂອງລາວ.

          ພາຍໃຕ້ການຊີ້ນຳ ນຳພາຢ່າງສະຫລາດສ່ອງໃສຂອງພັກປະຊາຊົນປະຕິວັດລາວ ກອງທັບ ແລະ ປະຊາຊົນລາວ ສາມາດຕີເອົາໄຊຊະນະການບຸກໂຈມຕີບຽດຢຶດຂອງສັດຕູທັງໝົດ ເປັນຕົ້ນແມ່ນບັ້ນຮົບນ້ຳບາກ, ຜາຖີ່ ( ປີ 1968 ), ບັ້ນຮົບທົ່ງໄຫຫີນຊຽງຂວາງ ( ປີ 1970 ) ບັ້ນຮົບລາມເຊິນ 719 (1971) ພວກເຮົາໄດ້ທັບມ້າງຍຸດທະສາດ " ສົງຄາມພິເສດຂອງຈອນເຊິນ " ແລະ ຍຸດທະສາດ   " ສົງຄາມພິເສດເພີ່ມທະວີຕາມທິດສະດີນິກເຊິນຂອງຈັກກະພັດອາເມລິກາ " ໃຫ້ຖືກປະລາໄຊຢ່າງໜັກໜ່ວງ ຢູ່ລາວກໍຄືຢູ່ພາກໃຕ້ຫວຽດນາມ ແລະ ກຳປູເຈຍ. ເຂດປົດປ່ອຍໄດ້ເປີດກວ້າງອອກກວມເນື້ອທີ່ 4/5 ຂອງດິນແດນເຊິ່ງປະກອບດ້ວຍຫລາຍບໍລິເວນທີ່ສຳຄັນກວ່າໝູ່ ແລະ ມີພົນລະເມືອງກວ່າເຄິ່ງໜຶ່ງຂອງທົ່ວປະເທດ ແລະ ສ້າງຂົງເຂດປົດປ່ອຍເປັນຄືລັດໜື່ງ ແລະ ອອກແຮງປັບປຸງກໍ່ສ້າງເຂດປົດປ່ອຍໃນທຸກດ້ານໃຫ້ກາຍເປັນລັດໜື່ງ.

          ປີ 1972 ກອງປະຊຸມໃຫຍ່ຄັ້ງທີ II ຂອງພັກໄດ້ໄຂຂຶ້ນ, ພັກໄດ້ວາງແນວທາງຕໍ່ສູ້ເພື່ອສຳເລັດໄລຍະປະຕິວັດຊາດ - ປະຊາທິປະໄຕ ໃນທົ່ວປະເທດ.

          ປີ 1973 ຍ້ອນຖືກໂຈມຕີຢ່າງແຂງແຮງ ຈັກກະພັດອາເມລິກາ ແລະ ລູກມືຈຳຕ້ອງໄດ້ຍອມເຊັນສັນຍາວຽງຈັນ ກ່ຽວກັບການຟື້ນຟູສັນຕິພາບ ແລະ ປະຕິບັດຄວາມຖືກຕ້ອງປອງດອງຊາດ ຢູ່ລາວຄັ້ງທີ III ໃນວັນທີ 21/2/1973. ສັນຍາດັ່ງກ່າວນັ້ນ ເປັນຂີດຫມາຍແຫ່ງການປະລາໄຊຢ່າງສິ້ນເຊີງ ໃນສົງຄາມຮຸກຮານລ່າເມືອງຂຶ້ນແບບໃໝ່ ຂອງຈັກກະພັດອາເມລິກາຕໍ່ປະເທດເຮົາ ຄຳສັ່ງຢຸດຍິງຢູ່ທົ່ວດິນແດນລາວໄດ້ມີຜົນສັກສິດ ນັບແຕ່ວັນທີ 22 ກຸມພາ 1973 ເປັນຕົ້ນໄປ. ໄຊຊະນະດັ່ງກ່າວນັ້ນ ເປັນໄຊຊະນະອັນໃຫຍ່ຫລວງທີ່ສຸດ, ມັນໄດ້ສ້າງເງື່ອນໄຂໃຫມ່ ທີ່ເປັນພື້ນຖານທີ່ສຸດເພື່ອນຳພາການປະຕິວັດເຮົາກ້າວຂຶ້ນຍາດເອົາໄຊຊະນະອັນສົມບູນ.

          ໄລຍະແຕ່ປີ 1973 - 1975 ເປັນໄລຍະຕໍ່ສູ້ເພື່ອສຳເລັດການປະຕິວັດຊາດ - ປະຊາທິປະໄຕ ໃນທົ່ວປະເທດ. ພາຍໃຕ້ການນຳພາຂອງພັກ, ມະຫາຊົນ, ຊັ້ນຄົນຕ່າງໆຢູ່ໃນເຂດປົກຄອງຂອງສັດຕູ ແລະ ໃນເຂດເປັນກາງ ເປັນຕົ້ນແມ່ນກຳມະກອນ, ຊາວນາ, ນັກຮຽນ, ນັກສຶກສາ ໄດ້ພ້ອມກັນລຸກຮືຂຶ້ນ ແລະ ເຂົ້າຮ່ວມຂະບວນການຕໍ່ສູ້ນັບມື້ນັບຫລາຍ, ນັບມື້ນັບຟົດຟື້ນ, ແຂງແຮງເຊັ່ນ: ການລຸກຮືຂຶ້ນ ຂອງກຳມະກອນໄຟຟ້າວຽງຈັນ, ການລຸກຮືຂຶ້ນຕໍ່ສູ້ຢ່າງໝັ້ນໜຽວທົນທານຕະຫລອດ 42 ວັນ ແລະ ຄືນຂອງປະຊາຊົນຊາວເມືອງໜອງບົກ ແຂວງຄຳມ່ວນ, ການລຸກຮືຂຶ້ນແຍກຕົວຂອງກອງພັນ 102 ຂອງຝ່າຍວຽງຈັນ, ພ້ອມກັນນັ້ນ ກໍມີຂະບວນການຕໍ່ສູ້ຂອງຊາວໜຸ່ມນັກຮຽນນັກສຶກສາຢູ່ໃນຕົວເມືອງຕ່າງໆເຊັ່ນ: ວຽງຈັນ, ປາກເຊ, ສະຫວັນນະເຂດ.

          ວັນທີ 17/4/1975 ແນວໂຮມເອກະພາບກຳປູເຈຍ ສາມາດປົດປ່ອຍທົ່ວປະເທດ; ກອງທັບ ແລະ ປະຊາຊົນຫວຽດນາມ ໄດ້ປົດປ່ອຍພາກໃຕ້ຫວຽດນາມ ໃນວັນທີ 30/4/1975. ດ້ວຍເງື່ອນໄຂອຳນວຍຄວາມສະດວກ ໃຫ້ແກ່ການປະຕິວັດລາວ, ໂດຍກຳແໜ້ນເອົາກາລະໂອກາດປະຫວັດສາດ     " ພັນປີມີເທື່ອຫນຶ່ງ " ພັກເຮົາໄດ້ຕົກ ລົງລຸກຮື້ຂຶ້ນຢຶດອຳນາດ ໃນຕົ້ນເດືອນ 5 ປີ 1975 ເປັນຕົ້ນໄປ ດ້ວຍທ່າສະໜາມທັງສາມເຂດ ( ເຂດປົດປ່ອຍ, ເຂດກວດກາຂອງຝ່າຍກົງກັນຂ້າມ ແລະ ເຂດເປັນກາງ ) ດ້ວຍ 3 ບາດຄ້ອນ ຍຸດທະສາດຄື: ການລຸກຮືຂຶ້ນຂອງປະຊາຊົນ, ການໜູນໜີບຂອງກຳລັງປະກອບອາວຸດປະຕິວັດ ແລະ ການລຸກຮືຂຶ້ນແຍກຕົວອອກຂອງທະຫານສັດຕູສົມທົບກັບ ການຕໍ່ສູ້ທາງດ້ານກົດໝາຍ. ຮອດຕົ້ນເດືອນ 9 ປີ 1975 ທົ່ວປະເທດໄດ້ປະກາດລຶບລ້າງອຳນາດການປົກ ຄອງເກົ່າທັງໝົດ ແລະ ສ້າງຕັ້ງອຳນາດການປົກຄອງປະຕິວັດຂຶ້ນແທນ ໃນຂອບເຂດທົ່ວປະເທດ. ວັນທີ 2 ທັນວາ 1975 ໄດ້ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ.

          ໄຊຊະນະດັ່ງກ່າວ ໄດ້ເປັນຂີດໝາຍແຫ່ງການສຳເລັດການປະຕິວັດຊາດ - ປະຊາທິປະໄຕ ຢ່າງສົມບູນ ແລະ ໄດ້ໄຂສັງກະລາດໃໝ່ໃນປະຫວັດສາດຂອງຊາດລາວ, ປະຊາຊົນລາວບັນດາເຜົ່າເປັນເຈົ້າຂອງປະເທດຊາດ, ເປັນເຈົ້າຊາຕາກຳຂອງຕົນຢ່າງແທ້ຈິງ, ກ້າວຂຶ້ນສູ່ເສັ້ນທາງອັນສະຫວ່າງສະໄຫວ ຂອງລັດທິສັງຄົມນິຍົມ ພາຍໃຕ້ການນຳພາຂອງພັກປະຊາຊົນປະຕິວັດລາວ.

  1. ໄລຍະປົກປັກຮັກສາ ແລະ ສ້າງສາປະເທດຊາດ.

          ນັບແຕ່ປີ 1975 ເປັນຕົ້ນມາ ສປປ ລາວ ໄດ້ກ້າວເຂົ້າສູ່ໄລຍະໃໝ່ຂອງການປະຕິວັດ, ພັກປະຊາຊົນປະຕິວັດລາວ ໄດ້ກາຍເປັນພັກກຳອຳນາດ ຊຶ່ງມີລັດປະຊາທິປະໄຕ ປະຊາຊົນ ເປັນເຄື່ອງມືອັນແຫລມຄົມເພື່ອຄຸ້ມຄອງສັງຄົມ. ໃນເງື່ອນໄຂທີ່ເປັນພັກກຳອຳນາດ ທີ່ຕັ້ງ ແລະ ບົດບາດຂອງພັກ ໄດ້ມີການປ່ຽນແປງຄື: ພັກຍັງເປັນກອງນຳໜ້າດ້ານການເມືອງ ຂອງຊົນຊັ້ນກຳມະກອນ ແລະ ຮັບຜິດຊອບຕໍ່ຊາຕາກຳຂອງປະເທດຊາດຢ່າງຮອບດ້ານຄື:

          - ພັກໄດ້ກຳນົດເອົາແນວທາງປ້ອງກັນຊາດ - ປ້ອງກັນຄວາມສະຫງົບ ເປັນວຽກງານທີ່ສຳຄັນ, ປຸກລະດົມປວງຊົນທັງຊາດເຮັດວຽກງານປ້ອງກັນຊາດ ປ້ອງກັນຄວາມສະຫງົບສາມາດປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດໄວ້ໃຫ້ໝັ້ນຄົງ.

          - ພັກໄດ້ກຳນົດເອົາແນວທາງ ແລະ ແຜນນະໂຍບາຍ ພັດທະນາເສດຖະກິດ - ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງ, ຂະຫຍາຍຕະໜ່າງການສຶກສາ, ວັດທະນະທຳ ແລະ ໄດ້ເອົາໃຈໃສ່ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.

          - ພັກໄດ້ກຳນົດເອົາຍຸດທະສາດ ແລະ ຍຸດໂທບາຍ ດ້ານການພົວພັນຕ່າງປະເທດ ໃນແຕ່ລະໄລຍະຢ່າງຖືກຕ້ອງ, ໄດ້ນຳພາ - ຊີ້ນຳການດຳເນີນນະໂຍບາຍການຕ່າງປະເທດຢ່າງສອດຄ່ອງ ເຮັດໃຫ້ປະເທດເຮົາມີເພື່ອນມິດທັງຢູ່ໃກ້ ແລະ ໄກ ນັບມື້ນັບຫລາຍ, ບົດບາດ ແລະ ອິດທິພົນຂອງປະເທດເຮົາໃນເວທີສາກົນ ກໍໄດ້ຮັບການເຊີດຊູນັບມື້ນັບສູງຂຶ້ນ.

          - ພັກໄດ້ເປັນເຈົ້າການລິເລີ່ມ, ນຳພາການປ່ຽນແປງໃໝ່ຢ່າງຮອບດ້ານ ແລະ ມີຫລັກການ ໄດ້ຮັບຜົນສຳເລັດ ຫລາຍປະການ, ສ້າງປະຖົມປັດໄຈຂອງລະບອບສັງຄົມນິຍົມໃຫ້ປະກົດຂຶ້ນເປັນກ້າວໆ.

  1. ໄລຍະຈັດຕັ້ງປະຕິບັດແນວທາງປ່ຽນແປງໃໝ່.

          ນັບແຕ່ປີ 1986 ເປັນຕົ້ນມາ ພັກປະຊາຊົນປະຕິວັດລາວ ໄດ້ນຳພາປະຕິບັດແນວທາງປ່ຽນແປງ  ໃໝ່ຮອບດ້ານ ແລະ ມີຫຼັກການຂອງພັກເຊິ່ງມັນສະແດງອອກດັ່ງນີ້:

          ສປປ ລາວ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ; ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ ດ້ວຍຈັງຫວະສະເລ່ຍ 6,2% ຕໍ່ປີ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງຂຶ້ນລື່ນແຕ່ກ່ອນຢ່າງຈະແຈ້ງ. ອັນພົ້ນເດັ່ນແມ່ນຍອດຜະລິດຕະພັນພາຍໃນໄດ້ເພີ່ມຂຶ້ນເປັນແຕ່ລະໄລຍະຄື: ຊຸມປີ 1986 - 1990 ສະເລ່ຍ 4,8% ຕໍ່ປີ, 1991 - 1995 ເພີ່ມຂຶ້ນສະເລ່ຍ 6,4% ຕໍ່ປີ, 1996 -  2005 ໄດ້ 6,2% ຕໍ່ປີ, 2006 - 2010 ສະເລ່ຍ 7,9%, 2015 - 2016 ສະເລ່ຍ 7,8%, ປີ 2017 ໄດ້ 6,83% ລາຍຮັບຂອງປະຊາຊົນ ກໍໄດ້ເພີ່ມຂຶ້ນແຕ່ລະໄລຍະເຊັ່ນ: ປີ 1985 ລາຍຮັບສະເລ່ຍຕໍ່ຫົວຄົນ ໄດ້ 114 ໂດລາ, ປີ 1995 ບັນລຸໄດ້ 380 ໂດລາ, ປີ 2005 - 2006 ໄດ້ 534 ໂດລາ, ປີ 2012 ບັນລຸໄດ້ປະມານ 1.355 ໂດລາ, ປີ 2015 ໄດ້ 1.970 ໂດລາ ແລະ ປີ 2017 ບັນລຸໄດ້ 2.472 ໂດລາ.

ການພັດທະນາແຕ່ລະດ້ານໄດ້ຮັບການຈັດຕັ້ງປະຕິບັດຢ່າງແຂງແຮງເຊັ່ນ:

          ການພັດທະນາຊົນນະບົດ ແລະ ແກ້ໄຂຄວາມທຸກຍາກ ເປັນບັນຫາສຳຄັນ, ບັນດາຂະແໜງການນັບແຕ່ຂັ້ນສູນກາງລົງຮອດທ້ອງຖິ່ນໄດ້ເອົາໃຈໃສ່ຫັນລົງຮາກຖານສຸມໃສ່ສ້າງບ້ານ ແລະ ຈຸດສຸມພັດທະນາຕາມ 4 ເນື້ອໃນ 4 ຄາດໝາຍ ໄປຄຽງຄູ່ກັບການເຮັດທົດລອງວຽກ 3 ສ້າງ ຢູ່ 51 ເມືອງ, 109 ບ້ານເປົ້າໝາຍ ເຊິ່ງປັດຈຸບັນ ທົ່ວປະເທດມີ 148 ເມືອງ, 8.454 ບ້ານ ແລະ 1.166.239 ຄອບຄົວ. ອັດຕາສ່ວນຂອງຄວາມທຸກຍາກໄດ້ຫລຸດລົງຢ່າງຕໍ່ເນື່ອງ, ມາຮອດປີ 2017 ຍັງເຫລືອຄອບຄົວທຸກຍາກ 69.772 ຄອບຄົວ ກວມ 5,98% ໃນຈຳນວນ 1.166.239 ຄອບຄົວໃນທົ່ວປະເທດ; ບ້ານທຸກຍາກຍັງເຫລືອ 1.673 ບ້ານ ກວມ 19,55%; ເມືອງທຸກຍາກເຫລືອ 23 ເມືອງກວມ 15,54% ຂອງເມືອງທັງໝົດໃນທົ່ວປະເທດ.

          ສຳລັບບ້ານພັດທະນາໃນທົ່ວປະເທດມີ 3.917 ບ້ານ, ມີບ້ານໃຫຍ່ກາຍເປັນຕົວເມືອງນ້ອຍ 31 ບ້ານ ຊຶ່ງນອນຢູ່ໃນ 107 ເມືອງ ແລະ 16 ແຂວງ.

          ດ້ານກະສິກຳ: ການຜະລິດເຂົ້າໃນປີ 2004 ໄດ້ 2.529.000 ໂຕນ, 2012 ໄດ້ 3,489,210 ໂຕນ, ປີ 2015 ໄດ້ 4,102,000 ໂຕນ ແລະ ປີ 2017 ຜະລິດເຂົ້າໄດ້ 4.27 ລ້ານໂຕນ ເທົ່າກັບ 98,16% ຂອງແຜນການ. ໃນນັ້ນ, ເຂົ້ານາປີ 3,6 ລ້ານໂຕນ, ນາແຊງ 473.700 ໂຕນ. ການປູກຕົ້ນໄມ້ອຸດສາຫະກຳ ແລະ ການຜະລິດພືດຜັກອື່ນໆລ້ວນແຕ່ຂະຫຍາຍຕົວຢ່າງແຂງແຮງ, ການລ້ຽງສັດແບບເປັນຟາມໄດ້ມີການເພີ່ມຂຶ້ນຢ່າງໄວວາ.

          ດ້ານພະລັງງານ ແລະ ບໍ່ແຮ່: ມີການພັດທະນາທີ່ຕັ້ງໜ້າການເພີ່ມຂຶ້ນຂອງໄຟຟ້າສະເລ່ຍ 29,61% ຕໍ່ປີ. ປີ 2013 ສາມາດສະໜອງກະແສໄຟ້າໃຫ້ທຸກເທດສະບານແຂວງ ແລະ ເມືອງ. ປີ 2014 ບ້ານມີຕາຂ່າຍໄຟຟ້າ ເຂົ້າເຖິງ ແລະ ສາມາດຊົມໃຊ້ໄດ້ 6.366 ບ້ານ, ກວມ 74,77% ຂອງບ້ານໃນທົ່ວປະເທດ. ປີ 2015 ພວກເຮົາມີເຂື່ອນໄຟຟ້າປະມານ 30 ເຂື່ອນ ແລະ ມາຮອດປີ 2017 ມີເຂື່ອນໄຟຟ້າທັງໝົດ 50 ເຂື່ອນ ສາມາດຜະລິດໄຟຟ້າໄດ້ 7.555.58 ລ້ານກິໂລວັດໂມງ, ເມືອງທີ່ໄດ້ໃຊ້ໄຟຟ້າແລ້ວ 148 ເມືອງ ເທົ່າກັບ 100%, ໃນຈຳນວນບ້ານ 8.544 ບ້ານ ມີໄຟຟ້າໃຊ້ຖາວອນ 7.554 ບ້ານ, ເທົ່າກັບ 88,41%, ຈຳນວນຄອບຄົວ 1.167.607 ຄອບຄົວ ມີໄຟຟ້າໃຊ້ແລ້ວ 1.074.789 ຄອບຄົວ, ເທົ່າກັບ 92,05%.

          ການຂະຫຍາຍຕົວຂອງບໍ່ແຮ່ເພີ່ມຂຶ້ນ 15 - 20% ຕໍ່ປີ. ປະເພດແຮ່ທາດທີ່ຖືກຂຸດຄົ້ນໃນ ສປປ ລາວ ມີ: ຄຳ, ທອງແດງ, ຖ່ານຫີນ, ກົ່ວ, ແກ້ວປະເສີດ, ຫີນປູນຜະລິດຊີມັງ, ຫີນກາວ, ສັງກະສີ, ຟົດຟໍ, ເກືອ ແລະ ອື່ນໆ.

          ດ້ານອຸດສາຫະກຳ ແລະ ການຄ້າ: ໄລຍະຕົ້ນຂອງການປ່ຽນແປງໃໝ່ 1986 - 1990 ອຸດສາຫະກຳມີການຂະຫຍາຍຕົວຕໍ່ເນື່ອງ ເພີ່ມຂຶ້ນສະເລ່ຍ 8% ຕໍ່ປີ, ຕົ້ນຕໍແມ່ນຂະແໜງການຜະລິດປຸງແຕ່ງ ໄລຍະ 2006 - 2010 ສະເລ່ຍອັດຕາການຂະຫຍາຍຕົວຂອງອຸດສາຫະກຳ 12% ຕໍ່ປີ.

          ດ້ານການຄ້າ: ໄດ້ມີການຂະຫຍາຍຕົວຢ່າງກວ້າງຂວາງ, ໃນປີ 2017 ທົ່ວປະເທດມີຕະຫລາດທັງໝົດ 733 ແຫ່ງ, ໃນນັ້ນມີສູນການຄ້າ 28 ແຫ່ງ, ຕະຫລາດໃຫຍ່ 53 ແຫ່ງ, ຕະຫລາດກາງ 115 ແຫ່ງ, ຕະຫລາດນ້ອຍ 387 ແຫ່ງ, ຕະຫລາດນັດ 187 ແຫ່ງ ຊຶ່ງໄດ້ເຮັດໃຫ້ການຈໍລະຈອນແຈກຢາຍສິນຄ້າລົງເຖິງຊົນນະບົດ, ເຂດຫ່າງໄກສອກຫລີກ.

          ດ້ານການຄົມມະນາຄົມຂົນສົ່ງ: ໄດ້ຮັບການປັບປຸງ ແລະ ຂະຫຍາຍຕົວຫລາຍສົມຄວນ, ມີບັນດາເສັ້ນທາງທີ່ເຊື່ອມຕໍ່ກັບອະນຸພາກພື້ນ, ເສັ້ນທາງແລວເສດຖະກິດຕາເວັນອອກ - ຕາເວັນຕົກ ໄດ້ເປີດໃຊ້ບໍລິການລົດໄຟລະຫວ່າງ ທ່ານາແລ້ງ ນະຄອນຫລວງວຽງຈັນ - ແຂວງໜອງຄາຍ ປະເທດໄທ, ພວມປະຕິບັດໂຄງການກໍ່ສ້າງທາງລົດໄຟຄວາມໄວສູງແຕ່ບໍ່ເຕັນ - ນະຄອນຫລວງວຽງຈັນ ຄວາມຍາວ 427 ກິໂລແມັດ. ປີ 2017 ເສັ້ນທາງມີຄວາມຍາວທັງໝົດ 58.885.56 ກິໂລແມັດ, ປີ 1976 ມີຄວາມຍາວຂອງເສັ້ນທາງພຽງ 11.504 ກິໂລແມັດ, ມີຂົວ 2.802 ແຫ່ງ ໃນນັ້ນຂົວຂ້າມນ້ຳຂອງທີ່ເປີດໃຊ້ບໍລິການແລ້ວມີ 9 ແຫ່ງ.        

ລະບົບນ້ຳປະປາ ກໍໄດ້ຂະຫຍາຍຕົວຈາກນະຄອນຫລວງວຽງຈັນ ລົງສູ່ບັນດາແຂວງ ແລະ ເມືອງໃນທົ່ວປະເທດ, ປີ 2016 ມີກຳລັງການຜະລິດ 188.249.115 m3/ປີ, ສາມາດສະໜອງນ້ຳປະປາໃຫ້ເທດສະບານທຸກແຂວງໄດ້ຊົມໃຊ້ຢ່າງທົ່ວເຖິງ.

          ດ້ານໄປສະນີ, ໂທລະຄົມມະນາຄົມ: ໄດ້ຂະຫຍາຍຕົວໄວ ແຕ່ລະເມືອງສາມາດນຳໃຊ້ໂທລະສັບໄດ້ 100%, ໃນປີ 2004 ມີໂທລະສັບຕັ້ງໂຕະ ແລະ ມືຖືທັງໝົດ 441.113 ໝາຍເລກ, ເທົ່າກັບ 7,74% ຂອງຜູ້ຊົມໃຊ້, ເພີ່ມສູນກາງໂທລະສັບອັດຕະໂນມັດຂຶ້ນ 23 ແຫ່ງ, ເພີ່ມສູນກາງໂທລະສັບມືຖືຂຶ້ນຈາກ 1 ແຫ່ງໃນປີ 2001 ເປັນ 4 ແຫ່ງໃນປີ 2005;

          ປີ 2017 ສາມາດຂະຫຍາຍຕາໜ່າງໄປສະນີໄດ້ 128 ເມືອງ ໃນທົ່ວປະເທດ, ຂະຫຍາຍເຄືອຂ່າຍສາຍສົ່ງດ້ວຍສາຍກາບໄຍແສງໄດ້ 73,039 ກິໂລແມັດ, ຕາໜ່າງໂທລະຄົມມະນາຄົມກວມເອົາ 80 ກວ່າຕົວເມືອງໃນທົ່ວປະເທດ; ໃນທົ່ວປະເທດມີໂລະສັບມືຖື ແລະ ຕັ້ງໂຕະ 4,857,837 ລ້ານເລກໝາຍ, ສັນຍານຄວບຄຸມບ້ານໄດ້ 91%, ນັບແຕ່ປີ 2012 ເປັນຕົ້ນມາໄດ້ນຳໃຊ້ມືຖືລະບົບ 4g, ວັນທີ 21 ພະຈິກ 2015 ສຳເລັດການສົ່ງດາວທຽມຂອງ ສປປ ລາວ ຄັ້ງທຳອິດໃນຕຳແໜ່ງວົງໂຄຈອນ 128 E

          ຄຽງຄູ່ກັບການພັດທະນາດ້ານເສດຖະກິດ,  ຂົງເຂດວັດທະນະທຳ  -  ສັງຄົມ ກໍໄດ້ຮັບການ

ພັດທະນາດີຂຶ້ນຢ່າງຕໍ່ເນື່ອງ ເຊິ່ງສະແດງອອກດັ່ງນີ້:

          ດ້ານການສຶກສາ: ການສຶກສາໄດ້ຮັບການພັດທະນາເປັນກ້າວໆ ນັບທັງດ້ານປະລິມານ ແລະ ຄຸນນະພາບ. ໃນປີ 2000 ໂຮງຮຽນອະນຸບານທັງພາກລັດ ແລະ ເອກະຊົນ 741 ແຫ່ງ, ປີ 2018 ມີ 3.211 ແຫ່ງ, ມີນັກຮຽນທັງໝົດ 229.892 ຄົນ.

          ປີ 2017 ອັດຕາເຂົ້າຮຽນສຸດທິຊັ້ນປະຖົມໄດ້ 98,7%, ອັດຕາການເຂົ້າຮຽນຊັ້ນມັດທະຍົມຕອນຕົ້ນໄດ້ 82,9%; ອັດຕາເຂົ້າຮຽນຊັ້ນມັດທະຍົມຕອນປາຍ ໄດ້ 51,4%; ອັດຕາການຮູ້ໜັງສືໃນກຸ່ມອາຍຸ 15 - 24 ປີ ບັນລຸໄດ້ 84,7%.

          ປະຖົມສຶກສາ: ໃນປີ 1975 - 1976 ໂຮງຮຽນປະຖົມ 4.444 ແຫ່ງ, ສົກປີ 2017 - 2018 ມີ 8.857 ແຫ່ງ, ມີນັກຮຽນທັງໝົດ 786.246 ຄົນ. ອັດຕາສະເລ່ຍຂອງນັກຮຽນຊັ້ນປະຖົມເພີ່ມຂຶ້ນຈາກ 79,6% ເປັນ 81,1%.

          ມັດທະຍົມສຶກສາ: ໃນປີ 1975 - 1976 ມີ 83 ແຫ່ງ ສົກຮຽນປີ 2009 - 2010 ໄດ້ເພີ່ມຊັ້ນຮຽນຂຶ້ນຕື່ມຄື: ( ມ. 7 ), ສົກປີ 2017 - 2018 ມີມັດທະຍົມ 1.758 ແຫ່ງ, ມີນັກຮຽນທັງໝົດ 671.064 ຄົນ. ອັດຕາເຂົ້າຮຽນຂອງຊັ້ນມັດທະຍົມຕອນຕົ້ນໄດ້ເພີ່ມຂຶ້ນຈາກ 82,2% ເປັນ 82,9% ແລະ ອັດຕາເຂົ້າຮຽນຂອງມັດມະຍົມຕອນປາຍເພີ່ມຂຶ້ນຈາກ 47,8% ເປັນ 51,4%.

          ການສຶກສານອກລະບົບ: ໃນສົກປີ 2016 - 2017 ມີຜູ້ຈົບລົບລ້າງຄວາມບໍ່ຮູ້ໜັງສືໃນເກນອາຍຸ 15 - 40 ປີ 22.458 ຄົນ, ຍິງ 12.901 ຄົນ; ຈົບປະຖົມບຳລຸງ 58.121 ຄົນ, ຍິງ 32.064 ຄົນ; ມີ 82 ຕົວເມືອງ, ມີ 2 ແຂວງ ແລະ ນະຄອນຫລວງສາມາດປະກາດຈົບຊັ້ນມັດທະຍົມຕົ້ນບຳລຸງ.

          ອະຊີວະສຶກສາ ແລະ ສູນອົບຮົມວິຊາຊີບ: ປີ 2017 ມີໂຮງຮຽນອະຊີວະສຶກສາ 23 ແຫ່ງ, ມີນັກຮຽນ 33.114 ຄົນ. ມີໂຮງຮຽນວິຊາຊີບ 101 ແຫ່ງ ໃນນັ້ນພາກເອກະຊົນມີ 73 ແຫ່ງ, ມີ 4 ລະບົບຄື: ຊັ້ນຕົ້ນ, ຊັ້ນກາງ, ຊັ້ນສູງ ແລະ ເຊື່ອມຕໍ່ປະລິນຍາຕີ.

          ການສຶກສາຊັ້ນສູງ ແລະ ມະຫາວິທະຍາໄລ: ສົກປີ 2016 - 2017 ທົ່ວປະເທດມີມະຫາວິ ທະຍາໄລທັງໝົດ 5 ແຫ່ງ, ໃນນັ້ນ 4 ແຫ່ງຂຶ້ນກັບກະຊວງສຶກສາທິການ, 1 ແຫ່ງຂຶ້ນກັບກະຊວງສາທາລະນະສຸກ; ໂຮງຮຽນ ວິທະຍາໄລ ມີ 133 ແຫ່ງ, ໂຮງຮຽນ ສ້າງຄູ 12 ແຫ່ງ ນັບທັງຄະນະສຶກສາສາດຂອງມະຫາວິທະຍາໄລແຫ່ງຊາດ.

          ດ້ານສາທາລະນະສຸກ: ຕາໜ່າງສາທາລະນະສຸກ ໄດ້ຂະຫຍາຍຕົວໄປເຖິງກຸ່ມບ້ານ; ໃນປີ 2015 ຈຳນວນບ້ານທີ່ປະຊາຊົນໄດ້ໃຊ້ນ້ຳສະອາດບັນລຸໄດ້ 85,7%; ປີ 2016 ບັນລຸໄດ້ 86,7% ແລະ ປີ 2017 ບັນລຸໄດ້ 89,3% ແລະ ອັດຕາການນຳໃຊ້ວິດຖ່າຍ 72,3%; ມີໂຮງໝໍສູນກາງ 5 ແຫ່ງ, ໂຮງໝໍຊຸມຊົນ 135 ແຫ່ງ, ສຸກສາລາ 1.020 ແຫ່ງ ແລະ ບ້ານແບບຢ່າງສາທາລະນະສຸກມີ 5.942 ບ້ານເທົ່າກັບ 70.15% ອັດຕາການຕາຍຂອງແມ່ ແລະ ເດັກ ກໍໄດ້ຫລຸດລົງເຊັ່ນ: ອັດຕາການຕາຍຂອງເດັກລຸ່ມ 1  ປີ  48/1.000 ຄົນ,  ອັດຕາການຕາຍຂອງແມ່  339/100.000  ຄົນ.  ອາຍຸຍືນສະເລ່ຍຂອງຄົນລາວ

ແມ່ນ 65 ປີ ( ແມ່ຍິງປະມານ 66,7 ປີ, ຜູ້ຊາຍປະມານ 64 ປີ ).

          ດ້ານແຮງງານ - ສະຫວັດດີການສັງຄົມ: ໄດ້ຮັບການປັບປຸງດີຂຶ້ນເປັນກ້າວໆ, ລັດຖະບານໄດ້ປັບປຸງຄ່າແຮງງານຕ່ຳສຸດຂອງຜູ້ອອກແຮງງານ ໃຫ້ຖືກກັບສະພາບການພັດທະນາເສດຖະກິດ - ສັງຄົມໃນແຕ່ລະໄລຍະ, ເອົາໃຈໃສ່ສ້າງບັນດານິຕິກຳເປັນຕົ້ນ ກົດໝາຍວ່າດ້ວຍປະກັນສັງຄົມ, ດຳລັດວ່າດ້ວຍການສ້າງ ແລະ ພັດທະນາສືມືແຮງງານ, ດຳລັດວ່າດ້ວຍການສົງເຄາະ, ດຳລັດວ່າດ້ວຍກອງທຶນປະກັນ ແລະ ຄຸ້ມຄອງໄພພິບັດ, ປັບປຸງດຳລັດວ່າດ້ວຍການປົກປ້ອງ ແລະ ສິດຜົນປະໂຫຍດຂອງຄົນພິການ, ກົດໝາຍວ່າດ້ວຍການຄຸ້ມຄອງແຮງງານ, ກົດໝາຍວ່າດ້ວຍການຈັດຫາງານ ເພື່ອປົກປ້ອງສິດ ແລະ ຜົນປະໂຫຍດ ຂອງຜູ້ອອກແຮງງານ. ໄດ້ປັບປຸງ ແລະ ກໍ່ສ້າງສູນພັດທະນາສີມືແຮງງານ ໃນຂອບເຂດທົ່ວປະເທດ ເພື່ອຕອບສະໜອງແຮງງານທີ່ມີມາດຕະຖານໃຫ້ແກ່ສັງຄົມ.

          ການພັດທະນາສີມືແຮງງານໄດ້ມີການປັບປຸງດີຂຶ້ນຢ່າງຕໍ່ເນື່ອງ, ທົ່ວປະເທດມີສູນພັດທະ ນາສີມືແຮງງານ ແລະ ສູນວິຊາຊີບທັງໝົດ 153 ກວ່າ ແຫ່ງ ຊຶ່ງສາມາດຝຶກວິຊາຊີບໄດ້ຫລາຍໝື່ນຄົນ, ຈັດຫາວຽກເຮັດງານທຳໃຫ້ຄົນລາວໄດ້ຈຳນວນຫລາຍເປັນຕົ້ນການຈັດຫາວຽກເຮັດງານທຳພາຍໃນປະເທດ, ການສ້າງແຮງງານສົ່ງໄປຕ່າງປະເທດ, ການຄຸ້ມຄອງແຮງງານຕ່າງປະເທດ ແລະ ແກ້ໄຂຄົນຕ່າງປະເທດທີ່ມາອອກແຮງງານທຳມາຫາກິນຢູ່ ສປປ ລາວ ທີ່ບໍ່ຖືກຕ້ອງຕາມລະບຽບກົດໝາຍ ແລະ ຄວບຄຸມອັດຕາຫວ່າງງານບໍ່ໃຫ້ກາຍ 2%.

          ດ້ານຖະແຫລງຂ່າວ ແລະ ວັດທະນະທຳ: ສະຖານີວິທະຍຸກໍໄດ້ມີການເຕີບໃຫຍ່ຂະຫຍາຍ ຕົວເປັນກ້າວໆມາຈາກ 43 ສະຖານີໃນປີ 2010 ເປັນ 53 ສະຖານີໃນປີ 2013 ແລະ ໃນປີ 2017 ມີ 64 ສະຖານີ, ໃນນັ້ນ ຢູ່ສູນກາງມີ 9 ສະຖານີ; ສະຖານີໂທລະພາບ ໃນປີ 2010 ມີ 32 ສະຖານີ, ຮອດປີ 2017 ມີ 37 ສະຖານີ, ຢູ່ສູນກາງມີ 9 ສະຖານີສາມາດກະຈາຍສັນຍານຜ່ານດາວທຽມ, ລະບົບອິນເຕີເນັດ ແລະ ຜ່ານເຄື່ອງສົ່ງທາງໜ້າດິນກວມ 80% ຂອງພື້ນທີ່ທົ່ວປະເທດ; ໜັງສືພິມ ແລະ ວາລະ ສານມີ 133 ສະບັບ ໃນນັ້ນ, ໜັງສືພິມ 27 ສະບັບ, ວາລະສານ 102 ສະບັບ, ເປັນພາສາຕ່າງປະເທດ 4 ສະບັບ, ມີຄອບຄົວວັດທະນາທຳ 890,821 ຄອບຄົວ ເທົ່າກັບ 76,29%, ບ້ານວັດທະນະທຳ 5853 ບ້ານ ເທົ່າກັບ 68.89% ແລະ ມີກຸ່ມບ້ານວັດທະນະທຳ 138 ກຸ່ມ ເທົ່າກັບ 13.19% ຂອງກຸ່ມບ້ານໃນທົ່ວປະເທດ.

          ວຽກງານຍຸຕິທຳ: ບັນດາຂະແໜງການໄດ້ເອົາໃຈໃສ່ເຮັດພາລະບົດບາດຄຸ້ມຄອງມະຫາພາກ, ຫັນແນວທາງ, ນະໂຍບາຍຂອງພັກ - ລັດ ເປັນກົດໝາຍ, ເປັນລະບຽບການ, ເປັນນິຕິກຳ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ - ສັງຄົມ ເຂົ້າສູ່ລະບຽບກົດໝາຍເທື່ອລະກ້າວ, ຮອດປີ 2017 ພວກເຮົາມີກົດໝາຍທີ່ປະກາດໃຊ້ທັງໝົດ 121 ສະບັບ, ລັດຖະບັນຍັດ 43 ສະບັບ, ດຳລັດ 143 ສະບັບ ແລະ ນິຕິກຳອື່ນໆ 189 ສະບັບ.

          ວຽກງານປ້ອງກັນຊາດ - ປ້ອງກັນຄວາມສະຫງົບ: ປະເທດເຮົາໄດ້ຮັບການຍ້ອງຍໍຊົມເຊີຍຈາກສາກົນວ່າ ເປັນປະເທດທີ່ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ; ປະຊາຊົນມີນ້ຳໃຈເອື້ອເຟື້ອ ເພື່ອແຜ່ ແລະ ມີໄມຕີຈິດ, ເປັນປະເທດທີ່ມີຄວາມສະຫງົບ ແລະ ໜ້າທ່ອງທ່ຽວ.

          ວຽກງານພົວພັນຕ່າງປະເທດ: ພັກເຮົາໄດ້ຢຶດໝັ້ນແນວທາງການຕ່າງປະເທດ ສັນຕິພາບ ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ຕັ້ງໜ້າເປັນເຈົ້າການສົ່ງເສີມການພົວພັນຮ່ວມມືກັບຕ່າງປະເທດ ແບບຫລາຍທິດ, ຫລາຍຝ່າຍ, ຫລາຍລະດັບ ແລະ ຫລາຍຮູບແບບບົນພື້ນຖານຫລັກການເຄົາລົບເຊິ່ງກັນ ແລະ ກັນ ແລະ ຕ່າງຝ່າຍ ຕ່າງມີຜົນປະໂຫຍດ. ປະເທດເຮົາໄດ້ປະສົບຜົນສຳເລັດອັນໃຫຍ່ຫລວງຫລາຍປະການໃນກອບການຮ່ວມມືສອງຝ່າຍກວມເອົາ 60% ຂອງການຮ່ວມມືກັບຕ່າງປະເທດທັງໝົດ, ການຮ່ວມມືໃນກອບຫລາຍຝ່າຍ, ການຮ່ວມມືອາຊຽນ, ການຮ່ວມມືໃນຂົງເຂດລຸ່ມແມ່ນ້ຳຂອງ ແລະ ອື່ນໆ... ໄດ້ເຂົ້າຮ່ວມເປັນສະມາຊິກຫລາຍອົງການຈັດຕັ້ງສາກົນ ແລະ ພາກພື້ນ ເຊັ່ນ: ອົງການສະຫະປະຊາຊາດ, ສະມາຄົມບັນດາປະເທດອາຊີຕາເວັນອອກສ່ຽງໃຕ້ ( ອາຊຽນ ), ອົງການບໍ່ຮ່ວມກຸ່ມ, ອົງການຈັດຕັ້ງປະເທດບໍ່ມີຊາຍແດນຕິດກັບທະເລ, ກຸ່ມປະເທດທີ່ໃຊ້ພາສາຝຣັ່ງ, ອົງການການຄ້າໂລກ... ໄດ້ປະສົບຜົນສຳເລັດໃນການເປັນເຈົ້າພາບຈັດກອງປະຊຸມ, ງານມະຫາກຳຕ່າງໆ ໃນລະດັບພາກພື້ນ ແລະ ສາກົນເຊັ່ນ: ກອງປະຊຸມສຸດຍອດອາຊີຕາເວັນອອກສ່ຽງໃຕ້ ຄັ້ງທີ 10, ກອງປະຊຸມ ບັນດາປະເທດໃຊ້ພາສາຝຣັ່ງ, ເວທີລັດຖະສະຖາອາຊີ - ປາຊີຟິກ, ອັນພົ້ນເດັ່ນແມ່ນການເປັນເຈົ້າພາບ ຈັດກອງປະຊຸມອາເຊັບ 7 , ອາເຊັບ 9 ແລະ ກອງປະຊຸມປິ່ນອ້ອມຕ່າງໆ, ງານມະຫາກຳກິລາບັນດາປະເທດ ອາຊີຕາເວັນອອກສ່ຽງໃຕ້ ຄັ້ງທີ 25, ກອງປະຊຸມອາຊຽນຄັ້ງທີ 29 - 30 ແລະ ອື່ນໆ... ຮອດປີ 2017 ສປປ ລາວ ມີການພົວພັນການທູດກັບ 140 ປະເທດ ເຊິ່ງທັງໝົດນັ້ນ ລ້ວນແຕ່ເປັນການເຊີດຊູບົດບາດອິດທິພົນຂອງປະເທດເຮົາຂຶ້ນໃນເວທີພາກພື້ນ ແລະ ສາກົນ, ທັງສ້າງຄວາມເຊື່ອໝັ້ນຂອງຕ່າງປະເທດຕໍ່ປະເທດເຮົາ, ທັງເປັນກາລະໂອກາດໃໝ່ໃຫ້ປະເທດເຮົາກ້າວຂຶ້ນສູ່ເວທີໂລກ.

  1. ເສີມຂະຫຍາຍມູນເຊື້ອຂອງພັກປະຊາຊົນປະຕິວັດລາວ.
  1.  ສຶກສາອົບຮົມຈິດໃຈຮັກຊາດ,  ຮັກລະບອບປະຊາທິປະໄຕ  ປະຊາຊົນກ້າວຂຶ້ນສັງຄົມນິຍົມພາຍໃຕ້ການນຳພາຂອງພັກ, ມີແຕ່ຢູ່ໃຕ້ການນຳພາຂອງພັກ ປະເທດຊາດພວກເຮົາຈຶ່ງໄດ້ຮັບການພັດທະນາ, ປະຊາຊົນຫຼຸດພົ້ນອອກຈາກຄວາມທຸກຍາກ.
  2. ຕັ້ງຫນ້າປຸກລະດົມຂະບວນການເຄື່ອນໄຫວ ຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ - ສັງຄົມ ຂອງລັດໃຫ້ປະກົດຜົນເປັນຈິງ.
  3. ຊຸກຍູ້ການຫັນລົງຮາກຖານ ເຊີດຊູຄວາມຮັບຜິດຊອບປະຕິບັດຫນ້າທີ່ພັດທະນາຊົນນະບົດ,

ສ້າງບ້ານພັດທະນາຕາມ 4 ເນື້ອໃນ 4 ຄາດຫມາຍ, ຍູ້ຂະບວນການຜະລິດເປັນສິນຄ້າ, ສຸມໃສ່ແກ້ໄຂຄວາມທຸກຍາກຂອງປະຊາຊົນໃຫ້ເປັນຈິງ.

  1.  ສືບຕໍ່ປະຕິບັດວຽກງານປ້ອງກັນຊາດ - ປ້ອງກັນຄວາມສະຫງົບ ທົ່ວປວງຊົນ, ມີສະຕິຕໍ່ກົນອຸບາຍຫັນປ່ຽນໂດຍສັນຕິ ທີ່ຫວັງມ້າງເພທຳລາຍພວກເຮົາ.
  2.  ຕັ້ງຫນ້າປັບປຸງ, ຮັດແຫນ້ນຄວາມສາມັກຄີປອງດອງທົ່ວປວງຊົນ ພາຍໃຕ້ຮົ່ມທຸງຂອງພັກ. ເອົາໃຈໃສ່ຈຳກັດແກ້ໄຂສິ່ງຫຍໍ້ທໍ້ສັງຄົມ, ສ້າງບັນຍາກາດສົດໃສ, ສະຫງ່າຜ່າເຜີຍຂອງສັງຄົມລາວ ແລະ ຄົນລາວ.
  3.  ສືບຕໍ່ປະຕິບັດນະໂຍບາຍຕ່າງປະເທດຂອງ ພັກ ແລະ ລັດ ຢ່າງຖືກຕ້ອງ, ຮັດແໜ້ນຄວາມສາມັກຄີພິເສດ ລາວ - ຫວຽດນາມ, ຄວາມສາມັກຄີກັບປະເທດເພື່ອນມິດຍຸດທະສາດ ແລະ ເພື່ອນມິດໃນໂລກ.
  4. ຕັ້ງຫນ້າປັບປຸງພາຍໃນພັກໃຫ້ເປັນພັກກຳອຳນາດທີ່ເຂັ້ມແຂງ ໜັກແໜ້ນ ແລະ ປອດໃສ; ຍົກສູງຄວາມເປັນແບບຢ່າງນຳໜ້າຂອງພະນັກງານ ແລະ ສະມາຊິກພັກ.

 

ກົດໝາຍແຫ່ງ ສປປ ລາວ

ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ

ຊົມເຊີມວັນສ້າງຕັ້ງ ສປປ ລາວ ຄົບຮອບ 43 ປີ ຢ່າງສຸດໃຈ.

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

ເຊື່ອມຕໍ່ເວັບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624