ກອງປະຊຸມໃຫຍ່ຜູ້ແທນທົ່ວປະເທດຄັ້ງທີVII.

ສ້າງຂື້ນເມື່ອ ວັນພຸດ, 27 ມັງກອນ 2016 01:29

ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ VII ຂອງພັກ (ວັນທີ12-14/3/2001)

ວັນທີ12-14  ມີນາ 2001 ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ VII ຂອງພັກ ປປ ລາວ ໄດ້ໄຂຂື້ນຢູ່ນະຄອນຫຼວງວຽງຈັນ. ເຂົ້າຮ່ວມກອງປະຊຸມໃຫຍ່ໃນຄັ້ງນີ້ມີຜູ້ແທນ 452 ສະຫາຍ ຊື່ງເປັນຕົວແທນໃຫ້ແກ່ສະມາຊິກພັກທັງໝົດຈຳນວນໜື່ງແສນກວ່າສະຫາຍໃນທົ່ວປະເທດ. ກອງປະຊຸມໃຫຍ່ຂອງພັກຄັ້ງນີ້ໄດ້ເຊີນຄະນະຜູ້ແທນພັກຂອງປະເທດອ້າຍນ້ອງຈຳນວນໜື່ງເຂົ້າຮ່ວມເຊັ່ນ: ຄະນະຜູ້ແທນພັກກອມມູນິດຫວຽດນາມ, ຄະນະຜູ້ແທນພັກກອມມູນິດຈີນ, ຄະນະຜູ້ແທນພັກປະຊາຊົນກຳປູເຈຍ, ຄະນະຜູ້ແທນພັກຟູນ ຊິນເປັກ, ຄະນະຜູ້ແທນພັກແຮງງານເກົາຫຼີ, ຄະນະຜູ້ແທນພັກກອມມູນິດກູບາ, ຄະນະຜູ້ແທນພັກກອມມູນິດແຫ່ງສະຫະພັນລັດເຊບ ແລະ ຄະນະຜູ້ແທນພັກປະຊາຊົນປະຕິວັດມົງໂກນ.

      ກອງປະຊຸມໄດ້ຮັບຟັງລາຍງານການເມືອງຂອງຄະນະບໍລິຫານງານສູນກາງພັກ ສະໄຫມທີ VIສະເຫນີໂດຍສະຫາຍ ຄຳໄຕ ສີພັນດອນ. ລາຍງານການເມືອງໄດ້ທົບທວນຄືນຜົນງານການນຳພາຂອງພັກຕະຫຼອດໄລຍະ 45ປີຜ່ານມາ ( 1955 – 2000 ) ກອງປະຊຸມໃຫຍ່ໄດ້ຕີລາຄາການສ້າງລະບອບໃຫມ່ ( ລະບອບປະຊາທິປະໄຕປະຊາຊົນ ) ໃນ 25ປີ ແລະ ການດຳເນີນພາລະກິດປ່ຽນແປງໃຫມ່ໃນ 15ປີ ຜ່ານມາໂດຍຍືນຍັນວ່າ: ” ຖິງຈະມີຄວາມຫຍຸ້ງຍາກຢູ່ຫລາຍປະການກໍ່ຕາມ, ແຕ່ທ່າ ແລະ ກຳລັງຂອງພວກເຮົາແມ່ນໄດ້ເຕີບໃຫຍ່ເຂັ້ມແຂງກວ່າເວລາຫາກໍ່ປົດປ່ອຍໃໝ່ໃນຮອບດ້ານ ”. ພ້ອມດຽວກັນນັ້ນໄດ້ໄຈ້ແຍກສະພາບແວດລ້ອມສາກົນຢ່າງເລິກເຊີ່ງ ຊື່ງໄດ້ຊີ້ອອກວ່າ: ” ສະພາບການຂອງໂລກໃນຊຸ້ມປີຕົ້ນຂອງສະຕະວັດທີ 21, ເຖິງວ່າຈະຜັນແປໄປຢ່າງສະຫຼັບສັບຊ້ອນແລະ ມີສີ່ງທ້າທາຍທົດສອບຢູ່ກໍ່ຕາມ, ແຕ່ໂດຍທົ່ວໄປແລ້ວແມ່ນມີຂໍ້ສະດວກ ແລະ ເງື່ອນໄຂອຳນວຍເປັນຕົ້ນຕໍ ”

      ກອງປະຊຸມໃຫຍ່ໄດ້ວາງຄາດໝາຍສູ້ຊົນສຳລັບໄລຍະ 5ປີ ຕໍ່່ຫນ້າ ( 2001 – 2005 ) ຄື :ຮັບປະກັນໃຫ້ປະເທດຊາດຂອງພວກເຮົາສືບຕໍ່ມີຄວາມສະຫງົບທາງສັງຄົມ ແລະ ມີສະຖຽນລະພາບ ທາງດ້ານການເມືອງອັນໜັກແໜ້ນຂື້ນຕື່ມ; ຮັບປະກັນເສດຖະກິດຂະຫຍາຍຕົວຕໍ່ເນື່ອງໃນລະດັບສະເລ່ຍບໍ່ຫຼຸດ 7%ຕໍ່ປີ ທັງມີຄວາມໝັນທ່ຽງແລະ ຖືກທິດ; ແກ້ໄຂຄວາມທຸກຢາກຂອງປະຊາຊົນ ໃຫ້ໄດ້ກວ່າເຄີ່ງໜື່ງຂອງຈຳນວນຄອບຄົວທີ່ທຸກຍາກໃນປະຈຸບັນ; ຢຸດຕິການຖາງປ່າເຮັດໄຮ່ປູກເຂົ້າໃຫ້ໄດ້ໂດຍພື້ນຖານ ແລະ ຢຸດຕິການປູກຝີ່ນໃຫ້ໄດ້ຢ່າງສິ້ນເຊີງ; ສ້າງກິດຈະການອັນເປັນພື້ນຖານໃຫ້ໄດ້ຈຳນວນໜື່ງ ເພື່ອການກ້າວສູ່ການຫັນເປັນອຸດສະຫະກຳ ແລະ ທັນສະໄໝໃນຂັ້ນຕໍ່ໄປ; ສ້າງພົນລະເມືອງລາວໃຫ້ເປັນຜູ້ທີ່ມີຄຸນສົມບັດສິນທຳ, ຮູ້ຈັກກົດໝາຍ ແລະ ເຄົາລົບກົດໝາຍ, ຮັກຫອມຄວາມເປັນທຳ ແລະ ຈິດໃຈມະນຸດສະທຳ, ມີນ້ຳໃຈເພີ່ງຕົນເອງ, ຮູ້ທຳມາຫາກິນຜະລິດເປັນສີນຄ້າ ໃນອັນທີ່ກົດໝາຍບໍ່ເກືອດຫ້າມ, ມີສຸຂະພາບແຂງແຮງ ແລະ ທົນທານຕໍ່ການເຮັດວຽກໄດ້ດີກວ່າເກົ່າ. ສ້າງບຸກຄະລາກອນໃຫ້ພຽງພໍຕໍ່ຄວາມຕ້ອງການຂອງການປະຕິບັດສອງໜ້າທີ່ຍຸດທະສາດ. ສຳຫຼັບພະນັກງານຕ້ອງມີຄວາມໜັກແໜ້ນດ້ານການເມືອງແນວຄິດ, ມີຄຸນສົມບັດສິນທຳປະຕິວັດ, ມີຄວາມຮູ້ວິຊາສະເພາະອັນຈຳເປັນເພື່ອຮັບປະກັນປະສິດທິຜົນຂອງວຽກງານ; ກ່ຽວກັບວຽກງານການເມືອງຕ້ອງຮັກສາ ແລະ ເຊີດຊູບົດບາດການນຳພາຂອງພັກໃຫ້ສູງຂື້ນຕື່ມອີກ,ສ້າງລັດເຮົາໃຫ້ມີຄວາມສັກສິດໃນການບໍລິຫານ, ມີຄວາມກະທັດຮັດລົງຕື່ມ, ມີລະບອບແບບແຜນເຮັດວຽກທີ່ມີປະສິດທິຜົນ, ຕິດແທດຕົວຈິງ, ຫຼຸດຜ່ອນປະກົດການຫຍໍ້ທໍ້ຕ່າງໆໃຫ້ໄດ້; ກ່ຽວກັບຂົງເຂດການຕ່າງປະເທດ, ພວກເຮົາມີການພົວພັນກັບນາໆຊາດ ແລະ ມີການຮ່ວມມືກັບເພື່ອນມິດໃນໂລກຢ່າງກວ້າງຂວາງ.

      ເພື່ອຈັດຕັ້ງປະຕິບັດຄາດຫມາຍສູ້ຊົນທີ່ວາງອອກນັ້ນໃຫ້ປະກົດຜົນເປັນຈິງ, ກອງປະຊຸມໃຫຍ່ໄດ້ວາງທິດທາງໜ້າທີ່ລວມຄື: ເພີ່ມທະວີຄວາມສາມັກຄີເປັນເອກະພາບພາຍໃນພັກ ແລະ ໃນທົ່ວປວງຊົນ, ເສີມຂະຫຍາຍນ້ຳໃຈຮັກຊາດ,ເ ອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຂຸດຄົນຄວາມສາມາດບົ່ມຊ້ອນຢູ່ພາຍໃນຢ່າງສຸດຂີດສົມທົບກັບການຍາດແຍ່ງເອົາການຮ່ວມມືຊ່ວຍເຫລືອຈາກພາຍນອກຢ່າງຕັ້ງໜ້າ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ແລະ ສືບຕໍ່ດຳເນີນການປ່ຽນແປງໃຫມ່ຢ່າງແຂງແຮງ.

      ທົ່ວພັກ, ທົ່ວປວງຊົນຕ້ອງພ້ອມກັນສຸມເຫື່ອແຮງ ແລະ ສະຕິປັນຍາໃສ່ການຂະຫຍາຍເສດຖະກິດໂດຍຖືເອົາການສ້າງສາພັດທະນາເສດຖະກິດ ເປັນໜ້າທີ່ໃຈກາງຕິດພັນກັບການແກ້ໄຂບັນຫາສັງຄົມ ແລະ ການພັດທະນາຄົນລາວໃຫ້ມີຄວາມກ້າວໜ້າໄປພ້ອມແຕ່ຫົວທີ; ມີມາດຕະການອັນຄົບຊຸດເພື່ອແກ້ໄຂຄວາມທຸກຍາກຂອງປະຊາຊົນໃຫ້ດີຂື້ນເປັນກ້າວໆຢ່າງຈະແຈ້ງ.

ພ້ອມກັນນີ້ກໍ່ຕ້ອງເພີ່ມທະວີບົດບາດນຳພາຂອງພັກໃນທຸກຂົງຂຽດວຽກງານໄປຄຽງຄູ່ກັບການປັບປຸງກົງຈັກລັດໃຫ້ມີຄວາມສັກສິດ ແລະ ມີປະສິດທິພາບ. ຊຸກຍູ້ວຽກງານແນວໂຮມແລະການເຄື່ອນໄຫວຂອງອົງການຈັດຕັ້ງມະຫາຊົນ, ເສີມຂະຫຍາຍສິດເປັນເຈົ້າຂອງປະຊາຊົນຢ່າງຕັ້ງໜ້າ.

ກອງປະຊຸມໃຫຍ່ໄດ້ຮອງຮັບເອົາກົດລະບຽບຂອງພັກສະບັບປັບປຸງໃຫມ່ ( ກົດລະບຽບຂອງພັກສະໄຫມທີVII ) ປະກອບດ້ວຍ 11ໝວດ 41ມາດຕາ. ໃນກົດລະບຽບຂອງພັກສະບັບປັບປຸງນີ້ໄດ້ເນັ້ນໜັກຕື່ມອີກເຖິງລັກສະນະຊົ້ນຊັ້ນ, ອຸດົມການ ແລະ ທາດແທ້ຂອງພັກກົດລະບຽບຂອງພັກສະບັບປັບປຸງສືບຕໍ່ຢືນຢັນ 3ທິດ ຊີ້ນຳໃນການສ້າງພັກຄື:

1. ສຶກສາອົບຮົມ, ກໍ່ສ້າງພັກໃຫ້ເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນການນຳພາຂອງພັກ.

2. ສົມທົບລະຫວ່າງການເພີ່ມທະວີການນຳພາຂອງພັກກັບການເຊີດຊູຄວາມສັກສິດໃນການຄຸ້ມຄອງຂອງລັດ ແລະ ເສີມຂະຫຍາຍບົດບາດເປັນເຈົ້າການຂອງບັນດາອົງການຈັດຕັ້ງມະຫາຊົນ.

3. ການປັບປຸງກໍ່ສ້າງພັກຕ້ອງຖືເອົາຄຸນນະພາບເປັນກົກ ຮັບເອົາຜູ້ດີເດັ່ນທີ່ມີເງື່ອນໄຂມາດຖານຄົບຖ້ວນເຂົ້າພັກ, ເດັດດ່ຽວເອົາຜູ້ເຊື່ອມຄຸນປ່ຽນທາດອອກຈາກພັກ.

      ກອງປະຊຸມໃຫຍ່ໄດ້ເລືອກຕັ້ງຄະນະບໍລິຫານງານສູນກາງພັກສະໄຫມທີVII ປະກອບດ້ວຍ 53ສະຫາຍ, ເພດຍິງ 3ສະຫາຍ; ໃນກອງປະຊຸມຄັ້ງປະຖົມມະລຶກຂອງຄະນະບໍລິຫານງານສູນກາງພັກໄດ້ເລືອກຕັ້ງກົມການເມືອງສູນກາງພັກເຊີ່ງປະກອບດ້ວຍ 11ສະຫາຍ ແລະ ໄດ້ເລືອກຕັ້ງ ສະຫາຍ ຄຳໄຕ ສີພັນດອນ ເປັນປະທານຄະນະບໍລິຫານງານສູນການພັກອີກຄັ້ງໜື່ງ.