ສະຫາຍ ສຈ ປອ ກິແກ້ວ ໄຂຄໍາພິທູນ...

ສະຫາຍ ສຈ ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມກອງປະຊຸມລັດຖະບານເປີດກ້ວາງຄັ້ງທີ I ປີ 2019.

          ໃນຕອນເຊົ້າວັນທີ 26 ມິຖຸນາ 2019 ທີ່ຜ່ານມາ, ສະຫາຍ ສຈ ປອ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມກອງປະຊຸມລັດຖະບານເປີດກ້ວາງຄັ້ງທີ

I ປີ 2019 ທີ່ຫໍປະຊຸມແຫ່ງຊາດ ນະຄອນຫຼວງຈັນ ໃຫ້ກຽດເປັນປະທານໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ເຂົ້າຮ່ວມມີສະພາແຫ່ງຊາດ, ອົງການນິຕິບັນຍັດ, ອົງການຕຸລາການ,ອົງການຈັດຕັ້ງສູນກາງພັກ, ເຈົ້າຄອງນະຄອນຫຼວງວຽງຈັນ, ບັນດາລັດຖະມົນຕີ, ບັນດາເຈົ້າແຂວງ ແລະ ອົງການຈັດຕັ້ງມະຫາຊົນເຂົ້າຮ່ວມຢ່າງພ້ອມພຽງ.

          ກອງປະຊຸມສະຫຼຸບຜົນສຳເລັດທີ່ໄດ້ຮັບ ແລະ ຕີລາຄາວຽກງານການເຄື່ອນໄຫວຂອງລັດຖະບານໃນໄລຍະຜ່ານມາ, ໂດຍສະເພາະແມ່ນແຜນພັດທະນາເສດຖະກິດ-ສັງຄົມແຫ່ງຊາດ ປີ 2019 ໂດຍເນັ້ນໃສ່ຈຸດສຸມແຜນພັດທະນາໃນ 6 ເດືອນທ້າຍປີ 2019 ໃຫ້ບັນລຸເປົ້າໝາຍທີ່ກຳນົດໄວ້. ນອກຈາກນີ້ ຍັງໄດ້ປຶກສາຫາລືວຽກງານແຜນການລົງທືນ, ແຜນງົບປະມານແຫ່ງລັດ ປີ 2020, ສະຫຼຸບຕີລາຄາສະພາບການຄຸ້ມຄອງເງີນຕາ 6 ເດືອນຕົ້ນປີ 2019 ແລະ ວຽກຈຸດສຸມຄຸ້ມຄອງເງີນຕາໃນ 6 ເດືອນທ້າຍປີ 2019, ສະຫຼຸບຕີລາຄາຈັດຕັ້ງປະຕິບັດ ຄຳສັ່ງເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານ ໃນການດຳເນີນທຸລະກິດຢຸ່ ສປປ ລາວ, ລາຍງານຄວາມຄືບໜ້າຂອງການແກ້ໄຂໄພພິບັດ ໃນຂອບເຂດທົ່ວປະເທດ, ສະຫຼຸບຕີລາຄາ ຄຳສັ່ງເລກທີ 15/ນຍ ວ່າດ້ວຍເພີມທະວີເຂັ້ມງວດໃນການຄຸ້ມຄອງການຂຸດຄົ້ນໄມ້-ທຸລະກິດໄມ້ ໃນໄລຍະ 3 ປີ ແລະ ການລາຍງານເພີ່ມເຕີ່ມບາງຂະແໜງການກ່ຽວກັບການແກ້ໄຂວຽກງານພົ້ນເດັ່ນຈຳນວນໜຶ່ງ.

          ນອກນັ້ນ ກອງປະຊຸມຍັງໄດ້ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາພາຍໃຕ້ຫົວຂໍ້ “ການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ” ພ້ອມທັງຊຸກຍູ້ໃຫ້ພາກທຸລະກິດເຂົ້າຮ່ວມໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນນຳອີກ.

          ເພື່ອເຮັດໃຫ້ກອງປະຊຸມມີປະສິດທິຜົນ ແລະ ບັນລຸຕາມລະດັບຄາດໝາຍ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຈື່ງໄດ້ຮຽກຮ້ອງບັນດາທ່ານຜູ້ແທນຍົກສູງຄວາມຮັບຜິດຊອບຂອງຕົນຕໍ່ບົດລາຍງານໃຫ້ກະທັດຮັດ ແລະ ຊັດເຈນ ມີຈຸດສຸມໃນຂອບເຂດທີ່ກຳນົດ ເພື່ອຄົ້ນຄວ້ານຳໄປຕີລາຄາຜັນຂະຫຍາຍ ແລະ ຈັດຕັ້ງປະຕິບັດໃຫ້ມີປະສິດທິຜົນ.