ທ່ານສຈ ປອ ກິແກ້ວ ໄຂຄຳພິທູນ ເລຂາທິການສູນ...

ທ່ານສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກພ້ອມດ້ວຍຄະນະຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ

ໃນວັນທີ 23 ສິງຫາ 2019 ທີ່ຜ່ານມາ. ສະຫາຍ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວ ໜ້າຄະນະໂຄສະນາອົບຮົມສູນ ກາງພັກ ຜູ້ປະຈໍາການອະນຸ

ກໍາມະການເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ພ້ອມດ້ວຍຄະນະ ໄດ້ລົງຊຸກຍູ້ວຽກງານການກະກຽມດໍາເນີນກອງປະຊຸມໃຫຍ່ 3 ຂັ້ນຂອງແຂວງ ໄຊຍະບູລີ ໃຫ້ການຕ້ອນຮັບໂດຍ ສະຫາຍ ພົງສະຫວັນ ສິດທະວົງ ກໍາມະການສູນກາງ ເລຂາ ພັກແຂວງເຈົ້າແຂວງໄຊຍະບູລີ ພ້ອມດ້ວຍການນໍາຂອງແຂວງ, ການນໍາຂອງເມືອງ 11 ເມືອງ ແລະ ພະນັກງານຫຼັກແຫຼ່ງ ຂອງແຂວງໃຫ້ການຕ້ອນຮັບຢ່າງອົບອຸ່ນ. ໂອກາດດັ່ງກ່າວ ສະຫາຍ ພົງສະຫວັນ ສິດທະວົງ ໄດ້ລາຍງານສະພາບທີ່ພົ້ນເດັ່ນໃນການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ, ງົບປະມານ 6 ເດືອນຕົ້ນປີ ຜ່ານມາ ແລະ ການດຳເນີນກອງປະຊຸມໃຫຍ່ 3 ຂັ້ນຢູ່ ແຂວງໄຊຍະບູລີ. ມາຮອດປດຈຸບັນ ການດໍາເນີນກອງປະຊຸມໃຫຍ່ ຂອງອົງການຈັດຕັ້ງມະຫາຊົນ, ຊາວໜຸ່ມ, ແມ່ຍິງ, ກໍາມະບານ, ນັກຮົບເກົ່າ ຢູ່ບັນດາເມືອງໄດ້ສໍາເລັດ 100%, ສໍາເລັດການທາບທາມດ້ານບຸກຄະລາກອນ, ເນື້ອໃນບົດລາຍງານການເມືອງ, ການສ້າງຂະບວນການດ້ານຕ່າງໆ ແລະ ການກະກຽມດໍາເນີນກອງປະຊຸມໃຫຍ່ອົງຄະນະພັກແຕ່ລະເມືອງໃນທ້າຍປີ 2019 ຫາຕົ້ນປີ 2020ໃຫ້ສໍາເລັດ ແລະ ໃນເດືອນມິຖຸນາ 2020 ຈະໃຫ້ໄດ້ດໍາເນີນກອງປະຊຸມອົງຄະນະພັກແຂວງ. ປັດຈຸບັນແຂວງໄຊຍະບູລີມີສະຖຽນລະພາບ ທາງດ້ານການເມືອງ, ມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດ, ການຜະລິດເປັນສີນຄ້າຂອງປະຊາຊົນ ສືບຕໍ່ເປັນຂະບວນການຕໍ່ເນື່ອງ ແລະ ມີບັນຍາກາດຟົດຟື້ນດີ, ແຕ່ໄລຍະຫຼັງ ເນື່ອງຈາກໄດ້ຮັບຜົນກະທົບຈາກໄພແຫ້ງແລ້ງແກ່ຍາວ ແລະ ສັດຕູພືດທໍາລາຍຜົນລະປູກຂອງປະຊາຊົນ ເປັນບໍລິເວນກວ້າງ, ອັນເຮັດໃຫ້ການເຕີບໂຕເສດຖະກິດຂອງແຂວງ ຈະບໍ່ບັນລຸຄາດໝາຍວາງໄວ້ຄື 8,7%, ການເກັບລາຍຮັບເຂົ້າງົບປະມານຮອດປັດຈຸບັນ ລວມທັງພູດສູນກາງປະຕິບັດໄດ້ 536,94 ຕື້ກີບ ເທົ່າກັບ 55,83% ຂອງແຜນປີ, ທຽບໃສ່ໄລຍະດຽວກັນຂອງປີຜ່ານມາ ເທົ່າກັບ 92,87%, ໃນນີ້ພູດສູນກາງປະຕິບັດໄດ້ 58,19% ຂອງແຜນປີ, ສໍາຫຼັບພູດທ້ອງຖິ່ນປະຕິບັດໄດ້ 49,23% ຂອງແຜນປີ, ສາມາດເບີກຈ່າຍເງິນເດືອນໃຫ້ພະນັກງານ-ລັດຖະກອນສໍາເລັດເດືອນ 7, ການປັກດໍາເຂົ້ານາປີສໍາເລັດ 81,41% ຂອງເນື້ອທີ່ນາ 34,287 ເຮັກຕາ, ສ່ວນທີ່ຍັງຄ້າງບໍ່ທັນປັກດໍານັ້ນແມ່ນຈະໄດ້ເຮັດເປັນນາຫວ່ານ, ນາຢອດ ຫຼື ຫັນໄປປູກພືດຊະນິດອື່ນທົດແທນ, ເນື້ອທີ່ປູກມັນຕົ້ນ 29.303,92 ເຮັກຕາ, ຄາດວ່າຈະໄດ້ຜົນຜະລິດ (ມັນຕົ້ນດິບ) 1 ລ້ານກວ່າໂຕນ, ເນື້ອທີ່ປູກສາລີແຂງ 38.424,84 ເຮັກຕາ, ສາລີຫວານ 1.563,91 ເຮັກຕາ ຄາດວ່າຜົນຜະລິດ 200.000 ກວ່າໂຕນ. ຍ້ອນວ່າໄດ້ຮັບຜົນກະທົບຈາກບົ້ງຝຸງທໍາລາຍ, ເນື້ອທີ່ປູກໝາກເດືອຍ 25.098,81 ເຮັກຕາ, ຄາດວ່າຈະໄດ້ຜົນຜະລິດປະມານ 78.000 ກວ່າໂຕນ; ຈາກນັ້ນ ສະຫາຍ ກິແກ້ວ ໄຂຄໍາພິທູນ ກໍໄດ້ເນັ້ນໜັກໃຫ້ການນໍາຂອງແຂວງ ແລະ ບັນດາເມືອງ ຈົ່ງສືບຕໍ່ໃນການສ້າງຂະບວນການດ້ານຕ່າງໆໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໃຫ້ປະກົດຜົນເປັນຈິງທຸກດ້ານ, ຄັດເລືອກໃຫ້ໄດ້ບຸກຄະລາກອນທີ່ດີ, ມີມາດຖານຄົບຖ້ວນ, ໃຫ້ມີທັງຜູ້ໜຸ່ມ, ເພດ, ເຜົ່າ ແລະ ຕີລາຄາຄືນບັນດາເນື້ອໃນຂອງບົດລາຍງານການເມືອງໃຫ້ເລິກເຊິ່ງຖືກຕາມຄວາມເປັນຈິງ ໂດຍຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້;  ເອົາໃຈໃສ່ຕໍ່ການສຶກສາອົບຮົມການເມືອງແນວຄິດໃຫ້ກັບພະນັກງານຫຼັກແຫຼ່ງ ແລະ ປະຊາຊົນບັນດາເຜົ່າໃນທົ່ວແຂວງໃຫ້ທົ່ວເຖິງ, ເອົາໃຈໃສ່ໃນການດໍາເນີນຊີວິດການເມືອງຂອງແຕ່ລະໜ່ວຍພັກເພື່ອໃຫ້ໜ່ວຍພັກກາຍເປັນໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນແນ່ໃສ່ເພື່ອເຮັດໃຫ້ການດຳເນີນກອງປະຊຸມໃຫຍ່ 3 ຂັ້ນໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້ທຸກປະການ.