ສະຫາຍ ສຈ. ປອ ກິແກ້ວ ໄຂຄຳພິທູນ ເລຂາທິການສູນ...

ສະຫາຍ ສຈ. ປອ ກິແກ້ວ ໄຂຄຳພິທູນ ​ເລຂາທິການ​ສູນ​ກາງ​ພັກ ຫົວໜ້າຄະນະໂຄສະນາອົບຮົມສູນກາງພັກ

ລົງຊຸກຍູ້ການ​ຜະລິດ​ເປັນ​ສິນຄ້າຢູ່ 3 ແຂວງພາກເໜືອ

ໃນວັນທີ 19-23/8/2019 ທີ່ຜ່ານມາ ສະຫາຍ ສຈ. ປອ ກິແກ້ວ ໄຂຄຳພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ລົງຕິດຕາມ

ຊຸກຍູ້ການດໍາເນີນກອງປະຊຸມ 3 ຂັ້ນຢູ່ ແຂວງໄຊຍະບູລີ, ແຂວງຫຼວງນໍ້າທາ ແລະ ແຂວງບໍ່ແກ້ວ ແລະ ໄດ້ລົງຊຸກຍູ້ສົ່ງເສີມໃຫ້ຊາວກະສິກອນເຮັດການຜະລິດກະສິກໍາ ແລະ ລ້ຽງສັດໃຫ້ກາຍເປັນສິນຄ້າ.

          ຈຸດປະສົງກໍ່ເພື່ອເປັນຂວັນກໍາລັງໃຈ ໃຫ້ແກ່ພໍ່ແມ່ປະຊາຊົນທີ່ເຮັດການຜະລິດຕົວຈິງ ແລະ ລົງໄກ້ຊິດຕິດແທດກັບປະຊາຊົນ, ຊຸກຍູ້ ແລະ ສົ່ງເສີມ ໃຫ້ຊາວກະສິກອນ ປູກຝັງ ແລະ ລ້ຽງສັດ ໃຫ້ເປັນສິນຄ້າໃຫ້ຫຼາຍຂຶ້ນ ສາມາດຕອບສະໜອງກັບຄວາມຮຽກຮ້ອງຕ້ອງການຂອງທ້ອງຕະຫຼາດ ຫຼຸດຜ່ອນການນໍາເຂົ້າສິນຄ້າຈາກຕ່າງປະເທດ, ນອກຈາກນີ້ ຍັງໄດ້ເຂົ້າຢ້ຽມຊົມການເຮັດຫັດຖະກໍາ ແລະ ບັນດາໂຮງຈັກ ໂຮງງານ ທີ່ຜະລິດສິນຄ້າສົ່ງອອກທັງພາຍໃນ ແລະ ຕ່າງປະເທດຈໍານວນໜຶ່ງ, ພ້ອມທັງຮັບຟັງການລາຍງານສະພາບໂດຍລວມຂອງການຜະລິດ, ບັນຫາ ແລະ ຂໍ້ຫຍຸ້ງຍາກທີ່ມັກເກີດຂຶ້ນ ແລະ ທີ່ສົ່ງຜົນສະທ້ອນໃຫ້ແກ່ການຜະລິດບໍ່ໄດ້ຮັບຜົນດີເທົ່າທີ່ຄວນ ແລະ ຮັບຟັງບັນດາຂໍ້ສະເໜີຕ່າງໆ ຈາກບັນດາຜູ້ທີ່ເຮັດການຜະລິດຕົວຈິງ ທີ່ຕ້ອງການໃຫ້ພາກລັດເຂົ້າຊ່ວຍເຫຼືອ ແລະ ຫາວິທີແກ້ໄຂໃຫ້. ນອກຈາກນີ້ ສະຫາຍ ຍັງໄດ້ລົງໄປຢ້ຽມຢາມບາງໂຄງການກໍ່ສ້າງຂອງລັດ ເພື່ອຕິດຕາມຄວາມຄືບໜ້າຂອງການກໍ່ສ້າງ ແລະ ຮັບຟັງບັນຫາຕ່າງໆຈາກຜູ້ຮັບເໝົາໂຄງການ.

          ສະຫາຍໄດ້ຍ້ອງຍໍຊົມເຊີຍຜົນສໍາເລັດຂອງບັນດາຊາວກະສິກອນ ທີ່ມີຄວາມດຸໝັ່ນຂະຫຍັນພຽນ, ມີຄວາມຫ້າວຫັນເຮັດການຜະລິດເປັນສິນຄ້າ ເພື່ອນໍາພາຄອບຄົວຂອງຕົນຫຼຸດພົ້ນອອກຈາກຄວາມທຸກຍາກ ເປັນພື້ນຖານໜຶ່ງຊ່ວຍຜັກດັນເສດຖະກິດຂອງແຂວງໃຫ້ມີການຂະຫຍາຍຕົວ ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ, ພ້ອມທັງໄດ້ເນັ້ນໃຫ້ ບັນດາຂະແໜງການຕ່າງໆທີ່ມີສ່ວນກ່ຽວຂ້ອງທີ່ຢູ່ພາຍໃນສາມແຂວງດັ່ງກ່າວ ຈົ່ງໄດ້ເກັບເອົາບັນຫາ ແລະ ຂໍ້ສະເໜີຕ່າງໆຂອງຊາວກະສິກອນ ນໍາໄປພິຈາລະນາ, ແກ້ໄຂ ແລະ ອໍານວຍຄວາມສະດວກໃນດ້ານຕ່າງໆ ເພື່ອເຮັດໃຫ້ການຜະລິດມີປະສິດທິພາບສູງ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຕະຫຼາດພາຍໃນ ແລະ ຕ່າງປະເທດໄດ້.