ຄະນະໂຄສະນາອົບຮົມສູນກາງພັກໄດ້ຈັດພິທີເຊື່ອມ...

ຄະນະໂຄສະນາອົບຮົມສູນກາງພັກໄດ້ຈັດພິທີເຊື່ອມຊືມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ8(ສະໄໝທີX)

 ໃນຕອນເຊົ້າວັນທີ 12 ກັນຍາ 2019 ຜ່ານມາ ຄະນະໂຄສະນາອົບຮົມສູນກາງພັກ ໄດ້ຈັດພິທີເຊື່ອມຊືມມະຕິກອງປະຊຸມຄົບຄະນະຂອງ ຄະນະບໍລິຫານງານສູນກາງພັກຄັ້ງທີ 8 ( ສະໄໝທີX ) ທີ່ສະໂມສອນຄະນະໂຄສະນາອົບຮົມສູນກາງພັກ

ໃຫ້ກຽດເປັນປະທານ ແລະ ເຜີຍແຜ່ໂດຍທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມມີ: ຄະນະພັກ, ຫົວໜ້າກົມ, ຮອງກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານວິຊາການທົ່ວ ຄອສພເຂົ້າຮ່ວມຢ່າງພ້ອມພຽງ.

       ກອງປະຊຸມເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 8 (ສະໄໝທີX)ຄັ້ງນີ້ທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກໄດ້ຍົກ 5 ເນື້ອໃນທີ່ສຳຄັນມາອະທິບາຍຊີ້ໃຫ້ເຫັນຄວາມສຳຄັນຂອງແຕ່ລະບັນຫາຄື: 1. ການແກ້ໄຂຄວາມຫຍຸ້ງຍາກທາງດ້ານເສດຖະກິດມະຫາພາກ ຕິດພັນກັບການຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X; 2. ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ; 3. ການແບ່ງຂັ້ນຄຸ້ມຄອງ; 4. ການດຳເນີນຄະດີຕາມຂະບວນຍຸດທິທຳ;       5. ໂຄງຮ່າງລາຍງານການເມືອງຕໍ່ກອງປະຊຸມໃຫຍ່ຄັ້ງທີ XI ຂອງພັກ ນອກຈາກນັ້ນຍັງໄດ້ຟັງການເຜີຍແຜ່ມະຕິເລກທີ 072/ກມສພ ລົງວັນທີ 14 ພຶດສະພາ 2019 ວ່າດ້ວຍລະບອບການຮໍ່າຮຽນທິດສະດີການເມືອງໃຫ້ກຽດເຜີຍແຜ່ໂດຍທ່ານ ສີປະເສີດ ແສນສະຫວັດ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ; ໃນຕອນທ້າຍ ທ່ານ ອານົງສັກ ອິນທະວົງ ຄະນະພັກ ຫົວໜ້າກົມຈັດຕັ້ງ-ພະນັກງານໄດ້ເຜີຍແຜ່ຂໍ້ກຳນົດວ່າດ້ວຍການຢັ້ງຢືນລະດັບທິດສະດີການເມືອງສະບັບເລກທີ 01/ຄລສພ ລົງວັນທີ 15 ພຶດສະພາ 2019 ແລະ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 03/ຄລສພ, ລົງວັນທີ 15 ພຶດສະພາ 2019 ວ່າດ້ວຍການປັບປຸງຫຼັກສູດການຮຽນ-ການສອນທິດສະດີການເມືອງໃນລະບົບໂຮງຮຽນພັກ ແລະ ລະບົບການສຶກສາແຫ່ງຊາດ.

     ຈຸດປະສົງໃນການເຜີຍແຜ່ເຊື່ອມຊຶມໃນຄັ້ງນີ້ແມ່ນເພື່ອເຮັດໃຫ້ພະນັກງານ-ລັດຖະກອນທັງໝົດໄດ້ເຊື່ອມຊຶມກຳແໜ້ນ ແລະ ເຂົ້າໃຈຢ່າງເລິກເຊິ່ງຕໍ່ກັບ ຄວາມໝາຍຄວາມສຳຄັນຂອງມະຕິດັ່ງກ່າວເພື່ອສ້າງຄວາມເປັນເອກະພາບທາງດ້ານການຮັບຮູ້, ກຳໃຫ້ແໜ້ນເຂົ້າໃຈໃຫ້ມັນເລິກເຊິ່ງ ແລະ ເປັນການກະທຳຕົວຈິງ ພ້ອມທັງຫັນເປັນອັນລະອຽດເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງ.