ຍົກລະດັບຄວາມຮູ້ທິດສະດີ-ແນວທາງນະໂຍ...

ຍົກລະດັບຄວາມຮູ້ທິດສະດີ-ແນວທາງນະໂຍບາຍໃຫ້ແກ່ພະນັກງານໂຄສະນາອົບຮົມ

ໃນວັນທີ 27 ຕຸລາ 2014 ຄະນະໂຄສະນາອົບຮົມສູນກາງພັກ ໄດ້ເປີດຊຸດອົບຮົມຍົກລະດັບຄວາມຮູ້ທິດສະດີ-ແນວທາງນະໂຍບາຍ ໃຫ້ແກ່ພະນັກງານຂອງຕົນ

ໃນທົ່ວປະເທດ, ໂດຍພາຍໃຕ້ການເປັນປະທານກ່າວເປີດຂອງ ທ່ານ ສຈ.ດຣ. ກິແກ້ວ ໄຂຄຳພິທູນ ກໍາມະການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ. ຜູ້ເຂົ້າຮ່ວມແມ່ນ ພະນັກງານຫຼັກແຫຼ່ງຂອງຄະນະໂຄສະນາອົບຮົມແຂວງ ແລະ ເມືອງໃນທົ່ວປະເທດ; ນອກນັ້ນ ຍັງມີກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ຈໍານວນ 90 ກວ່າທ່ານ. ຊຸດຝຶກອົບຮົມຄັ້ງນີ້ຈຸດປະສົງຫຼັກແມ່ນຈະໄດ້ຄົ້ນຄວ້າຮ່ຳຮຽນພື້ນຖານທິດສະດີຈໍານວນໜຶ່ງຄື: ວິຊາປັດຊະຍາ, ວິຊາເສດຖະສາດການເມືອງ, ວິຊາລັດທິສັງຄົມນິຍົມວິທະຍາສາດ, ວິຊາບໍລິຫານສາດ, ວິຊາກໍ່ສ້າງພັກ. ນອກຈາກນັ້ນ ຝຶກກ່ຽວກັບວິທີເວົ້າ ແລະ ວິທີຂຽນເອກະສານ ເພື່ອໃຫ້ຜູ້ເຂົ້າຮ່ວມມີຄວາມຮັບຮູ້, ກຳໄດ້ດ້ານທິດສະດີຂັ້ນພື້ນຖານເປັນຢ່າງດີ, ກຳໄດ້ແນວທາງການເມືອງຂອງພັກ ແລະ ກ້າສະແດງຄວາມຄິດເຫັນໃນເວລາຄົ້ນຄວ້າ ແລະ ສົນທະນາ, ເພື່ອໃຫ້ມີຄວາມຮູ້ທິດສະດີປະກອບໃສ່ການປະຕິບັດວຽກງານຕົວຈິງ.