ກົມໂຄສະນາ ຄະນະໂຄສະນາສູນກາງພັກ ຮ່ວມກັບ ຄະນະໂຄສະນາອົບຮົມແຂວງ​...

ກົມໂຄສະນາ ຄະນະໂຄສະນາສູນກາງພັກ ຮ່ວມກັບ ຄະນະໂຄສະນາອົບຮົມແຂວງ ບໍ່ແກ້ວເປີດຊຸດຝຶກອົບຮົມວຽກງານໂຄສະນາ-ປາຖະກະຖາ ຊຸດທີ I ໃຫ້​​ພະນັກງານຫຼັກແຫຼ່ງ.                                         

      ໃນ​ວັນ​ທີ 27-29 ພຶດ​ສະ​ພາ 2019 ຜ່ານມາ ກົມ​ໂຄ​ສະ​ນາ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ ໄດ້​ສົມ​ທົບ​ກັບ ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ​ ບໍ່​ແກ້ວ ​ຈັດຊຸດ​ຝຶກ​ອົບ​ຮົມ​ວຽກ​ງານ​ໂຄ​ສະ​ນາ-ປາ​ຖ​ະ​ກະ​ຖ​າ​ຊຸດ​ທີ I ​ຂຶ້ນທີ່​ຫ້ອງ​ປະ​ຊຸມ​ ຄະ​ນະ​ໂຄ​ສະ​ນາອົບ​ຮົມ​ແຂວງ ​ບໍ່​ແກ້ວ; ໃຫ້​ກຽດ​ເປັນ​ປະ​ທານ ແລະ ​ກ່າວ​ເປີ​ດ​ພິ​ທີ​ໂດຍ ທ່ານສົມ​ລິດ​ ສີ​ພາ​ວັນ ຄະ​ນະ​ປະ​ຈຳ​ພັກ​ແຂວງ, ປະ​ທານ​ສະ​ພາ​​ປະ​ຊາ​ຊົນ​ແຂວງບໍ່​ແກ້ວ

, ທ່ານ ​ນາງ ບົວ​ລີ ບັນ​ຊາ​ລິດ ຫົວ​ໜ້າ​ກົມ​ໂຄ​ສະ​ນາ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ, ເຂົ້າຮ່ວມມີ​: ທ່ານສອນ​ດາ​ເພັດ​ ດາ​ລາ​ວັນ ກຳ​ມະ​ການ​ພັກ​ແຂວງ, ຫົວ​ໜ້າຄະ​ນະ​ໂຄ​ສະ​ນາ​ອົບ​ຮົມ​ແຂວງ ພ້ອມ​ດ້ວຍ​ຄະ​ນະ​ຮັ​ບ​ຜິດ​ຊອບຂອງ ຄະ​ນະ​ໂຄ​ສະ​ນາ​ອົບ​ຮົມ​ແຂວງ​ບໍ່​ແກ້ວ ແລະ ບັນດາຫົວໜ້າ-ຮອງຫົວໜ້າ​ພະ​ແນ​ກ​ການ, ອົງ​ການ​ຈັດ​ຕັ້ງ​ມະ​ຫາ​ຊົນ​ຂັ້ນ​ແຂວງ ແລະ ຄະ​ນະ​ໂຄ​ສະ​ນາ​ອົບ​ຮົມ​ເມືອງອ້ອມ​ຂ້າງ​ແຂວງ ເຂົ້າຮ່ວມຈຳ​ນວນ 70 ທ່ານ, ຍິງ 11 ​ທ່ານ.

     ໃນພິທີທ່ານ ນາງ ບົວ​ຄົມ ຂານ​ສຸ​ວົງ ຮອງ​ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ແຂວງບໍ່ແກ້ວ, ຄະ​ນະ​ຮັບ​ຜິດ​ຊອບຊຸດ​ຝຶກ​ອົບ​ຮົມ ໄດ້​ຂຶ້ນກ່​າວວ່າຈຸດ​ປະ​ສົງ​ໃນການຈັດຝຶກ​ອົບ​ຮົມ​ໃນ​ຄັ້ງ​ນີ້ ​ແມ່ນ​ເພື່ອ​ຍົກ​ລະ​ດັບ​ຄວາມ​ຮູ້​, ​ຄວາມ​ສາ​ມາດໃນ​ການໂຄ​ສະ​ນາ-​ປາ​ຖະ​ກະ​ຖາ, ສ້າງ​ທັກ​ສະ​ໃໝ່​ໃນ​ການ​​ເວົ້າ ແລະ ການ​ຂຽນ​ເອ​ກະ​ສານຈຳນວນໜຶ່ງຂອງ​ພັກ.

     ເອກະສານທີ່ນໍາໃຊ້ເຂົ້າໃນການຝຶກອົບຮົມປະກອບມີ  ​4 ບົດຄື:

ບົດ​ທີ 1:  ບັນ​ຫາ​ພື້​ນ​ຖານ​ວຽກ​ງ​ານ​ໂຄ​ສະ​ນາ.

ບົດ​ທີ 2:  ຝຶກ​ຝົນ​ຄ​ວາມ​ສາ​ມາດ​ໃນ​ການ​ຂຽນ​ເອ​ກະ​ສານ.

ບົດທີ 3:  ຄຸນລັກ​ສະ​ນະ ແລະ ສີ​ລະ​ປະ​ໃນ​ການ​ປາກ​ເວົ້າ.

ບົດ​ທີ 4: ບັນ​ດາ​ນິ​ຕິ​ກຳແລະບາງ​ບົດ​ຮຽນ​ໃນ​ການ​ເຄື່ອນ​ໄຫວ​ວຽກ​ງານ​ໂຄ​ສະ​ນາ.

      ພາຍຫຼັງຮຽນຮູ້ທິດສະດີ ນັກຝຶກອົບຮົມຍັງໄດ້ທົດລອງຂຶ້ນຫ້ອງປາຖະກະຖາວັນປະຫວັດສາດສຳຄັນຕ່າງໆຂອງພັກ, ຂອງຊາດ ແລະ ສາກົນ ພ້ອມກັນ​ປະ​ກອບຄຳຄິດຄຳເຫັນແລ​ກ​ປ່​ຽນ​ບົດ​ຮຽນເຊິ່ງກັນ ແລະ ກັນຢ່າງກົງໄປກົງມາ ທັງເປັນການສ້າງໃຫ້ນັກຝຶກອົບຮົມກາຍເປັນນັກປາຖະກະຖາ ຂອງແຂວງເພື່ອນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງ ລັດ ນໍາໄປໜູນໃຊ້ເຂົ້າໃນວຽກງານໂຄສະນາປາຖະກະຖາ ເພື່ອເຜີຍແຜ່ໃຫ້ບັນດາເປົ້າໝາຍຮັບຮູ້, ເຂົ້າໃຈຢ່າງເລິກເຊິ່ງ, ກວ້າງຂວາງ ແລະ ທົ່ວເຖິງ. ​

      ໃນຕອນທ້າຍຂອງພິທີ ຍັງໄດ້​ມີການຈັດ​ພິ​ທີ​ມອບ​ໃບ​ຢັ້ງ​ຢືນ​ໃຫ້​ແກ່​ນັກ​ຝຶກ​ອົບ​ຮົມ​ ໃຫ້ກຽດມອບໂດຍ ທ່ານ ສົມ​ລິດ​ ສີ​ພາ​ວັນຄະ​ນະ​ປະ​ຈຳ​ພັກ​ແຂວງ, ປະ​ທານ​ສະ​ພາ​​ປະ​ຊາ​ຊົນ​ແຂວງບໍ່​ແກ້ວ ແລະ ມີ​ຄຳ​ເຫັນ​ຕໍ່​ຊຸດ​ຝຶກ​ອົບ​ຮົມ​ ເຊິ່ງທ່ານໄດ້ເນັ້ນໜັກ​ໃຫ້​ນັກ​ຝຶກ​ອົບ​ຮົມ​ ທັງໝົດ ຈົ່ງພ້ອມກັນສືບຕໍ່ນໍາ​ເອົາ​ບົດ​ຮຽນ, ຄວາມຮູ້ ຄວາມສາມາດ ​ທີ່​ໄດ້​ຮຽນ​ມານັ້ນ ນໍາໄປ​ໝູນ​ໃຊ້​ເຂົ້າ​ໃນ​ການປະຕິບັດໜ້າທີ່ວຽກງານວຽກ​ງານ​ຂອງ​ຕົ​ນ ດ້ວຍຄວາມ​ຮັບ​ຜິດ​ຊອບສູງ ແລະ ມີຜົນສໍາເລັດຂຶ້ນເປັນກ້າວໆ.