ກົມສັງລວມ ຄະນະໂຄສະນາອົບຮົມສູນກາງພັກ ສົມທົບກັບ...

ກົມສັງລວມ ຄະນະໂຄສະນາອົບຮົມສູນກາງພັກ ສົມທົບກັບ ຄະນະໂຄສະນາອົບຮົມແຂວງວຽງຈັນ ເປີດຊຸດຝຶກອົບຮົມວຽກງານສັງລວມ-ຫາງສຽງສັງຄົມ ຊຸດທີ II ທີ່ແຂວງວຽງຈັນ.

      ໃນວັນທີ 17-19 ມິຖຸນາ2019 ຜ່ານມາ, ກົມສັງລວມ ຄະນະໂຄສະນາອົບຮົມສູນກາງພັກ ໄດ້ສົມທົບກັບຄະນະໂຄສະນາອົບຮົມແຂວງວຽງຈັນ

ຈັດຕັ້ງຊຸດຝຶກອົບຮົມວຽກງານສັງລວມ-ຫາງສຽງສັງຄົມຄັ້ງທີ II ຂຶ້ນທີ່ຫ້ອງປະຊຸມຫ້ອງວ່າການແຂວງ, ພາຍໃຕ້ການເປັນປະທານຮ່ວມຂອງທ່ານ ນ. ສິງຄໍາ ຄົງສະຫວັນ ຮອງເລຂາພັກແຂວງ ຮອງເຈົ້າແຂວງ ແຂວງວຽງຈັນ, ທ່ານ ນ. ແສງຕານ ແກ້ວອິນດາປິງ ຫົວໜ້າກົມສັງລວມ, ທ່ານ ຈັນແປງ ດວງພະຈັນກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງວຽງຈັນ; ເຂົ້າຮ່ວມມີ: ຄະນະນໍາຫຼັກແຫຼ່ງຂອງເມືອງ, ນັກສຳມະນາກອນທີ່ມາຈາກພະແນກການອ້ອມຂ້າງແຂວງ ເຂົ້າຮ່ວມຝຶກທັງໝົດ 77 ທ່ານ, ຍິງ 23 ທ່ານ.ໃນນັ້ນ ມາຈາກບັນດາພະແນກການ, ອົງການ, ກົມກອງອ້ອມຂ້າງແຂວງ 42 ທ່ານ, ຍິງ 8 ທ່ານ, ບັນດາພະນັກງານຫຼັກແຫຼ່ງຂອງເມືອງ 11ທ່ານ, ຍິງ 2 ທ່ານ ແລະ ຄະນະໂຄສະນາອົບຮົມແຂວງ 24 ທ່ານ, ຍິງ 13 ທ່ານ.

       ໃນການຈັດຝຶກອົບຮົມຄັ້ງນີ້ໄດ້ນໍາໃຊ້ເອກະສານ 4 ບົດຄື:

  1. ເອກະສານກ່ຽວກັບວຽກງານສັງລວມ.
  2. ບັນຫາພື້ນຖານກ່ຽວກັບວຽກງານຫາງສຽງສັງຄົມ.
  3. ວິທີການເກັບກຳແລະການນຳໃຊ້ຫາງສຽງສັງຄົມເຂົ້າໃນວຽກງານການເມືອງແນວຄິດ.
  4. ຕາໜ່າງເພື່ອນຮ່ວມງານ.

      ນອກນັ້ນ, ຍັງມີເອກະສານຈຳນວນໜຶ່ງທີ່ເປັນນິຕິກຳກ່ຽວພັນກັບວຽກງານຕິດຕາມ, ເກັບກຳຫາງສຽງສັງຄົມເຊັ່ນ:

1.  ເອກະສານແນະນຳຄຳສັ່ງຂອງຄະນະເລຂາທິການສູນກາງພັກວ່າດ້ວຍການເພີ່ມທະວີວຽກງານຕິດຕາມ, ເກັບກຳສະພາບແນວຄິດ-ຫາງສຽງຄົມໃນໄລຍະໃໝ່, ສະບັບເລກທີ04/ຄລສພ, ລົງວັນທີ10/07/2017

2.  ເອກະສານຄຳແນະນຳຂອງຄະນະໂຄສະນາອົບຮົມສູນກາງພັກສະບັບເລກທີ08/ຄອສພ, ລົງວັນທີ31/7/2017ກ່ຽວກັບການຈັດຕັ້ງປະຕິບັດຄຳສັ່ງສະບັບເລກທີ04/ຄລສພ ວ່າດ້ວຍການເພີ່ມທະວີວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່.

3.  ຂໍ້ກຳນົດເລກທີ133/ຄອສພກ່ຽວກັບການຈັດຕັ້ງແລະການເຄື່ອນໄຫວຂອງຕາໜ່າງເພື່ອນຮ່ວມງານ.     

ຈຸດປະສົງຂອງການຝຶກອົບຮົມຄັ້ງນີ້ແມ່ນ ເພື່ອເຮັດໃຫ້ພະນັກງານທີ່ເຮັດວຽກງານສັງລວມ ແລະ ເກັບກຳຫາງສຽງສັງຄົມ ໄດ້ຮັບຮູ້ເຂົ້າໃຈ ແລະ ກຳແໜ້ນຄວາມໝາຍ ຄວາມສຳຄັນ, ພາລະບົດບາດ, ໜ້າທີ່ຂອງຕົນໃນການຕິດຕາມ, ເກັບກຳຫາງສຽງສັງຄົມ; ກຳໄດ້ບັນດາເຕັກນິກວິທີການທີ່ນຳໃຊ້ເຂົ້າໃນການເກັບກຳຫາງສຽງສັງຄົມ ແລະ ການເຮັດວຽກງານຄົ້ນຄ້ວາສັງລວມ, ວິທີການສ້າງຕາໜ່າງເພື່ອນຮ່ວມງານເກັບກຳຫາງສຽງສັງຄົມ, ເຊິ່ງເປັນການຍົກສູງຄວາມຮູ້, ຄວາມສາມາດທາງດ້ານວິຊາສະເພາະໃຫ້ແກ່ຜູ້ເຮັດວຽກງານຄົ້ນຄ້ວາສັງລວມ ແລະ ເກັບກຳຫາງສຽງສັງຄົມໃຫ້ມີປະສິດທິຜົນສູງຂຶ້ນເລື້ອຍໆ, ສາມາດເປັນເສນາທິການໃຫ້ແກ່ຄະນະພັກ, ຄະນະນຳຂອງແຂວງໃນການເກັບກຳບັນດາຫາງສຽງສັງຄົມແລະວຽກງານຄົ້ນຄວ້າສັງລວມໄດ້ຢ່າງທັນການ.

ພາຍຫຼັງສຳເລັດຊຸດຝຶກອົບຮົມໄດ້ມີພິທີມອບໃບຢັ້ງຢືນໃຫ້ແກ່ນັກສຳມະນາກອນທີ່ເຂົ້າຮ່ວມຊຸດຝຶກອົບຮົມຄັ້ງນີ້, ຊຶ່ງໃຫ້ກຽດມອບໃບຢັ້ງຢືນ ແລະ ໂອ້ລົມໂດຍທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆວຽງຈັນ.