ກົມຂໍ້ມູນຂ່າວສານຄະນະໂຄສະນາອົບຮົມສູນກາງພັກມອບໃບຢັ້ງຢືນໃຫ້ແກ່ນັກສຶກສາຝຶກງານ.

ກົມຂໍ້ມູນຂ່າວສານຄະນະໂຄສະນາອົບຮົມສູນກາງພັກມອບໃບຢັ້ງຢືນໃຫ້ແກ່ນັກສຶກສາຝຶກງານ.

      ໃນຕອນເຊົ້າຂອງວັນທີ 8 ເມສາ 2019 ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກໄດ້ຈັດພິທີມອບໃບຢັ້ງຢືນໃຫ້ແກ່ນັກສຶກສາຝຶກງານ 2 ນ້ອງ ຂຶ້ນທີ່ຫ້ອງປະຊຸມຊັ້ນ 5 ຂອງຄະນະໂຄສະນາອົບຮົມສູນກາງພັກ. ໃຫ້ກຽດເປັນປະທານໂດຍ ທ່ານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວ ສານ. ເຂົ້າຮ່ວມມີ:ຫົວໜ້າພະແນກ, ຮອງຫົວໜ້າພະແນກ, ພະນັກງານວິຊາການຂອງກົມຂໍ້ມູນຂ່າວ ສານທັງໝົດ ພ້ອມດ້ວຍນັກສຶກສາຝຶກງານ.

      ໃນພິທີມອບໃບຢັ້ງຢືນດັ່ງກ່າວ ທ່ານ ນາງ ຈັນສຸກ ເພັງດາລິດ ຫົວໜ້າພະແນກຫໍສະໝຸດ ແລະ ສຳເນົາ ກໍໄດ້ຂື້ນຜ່ານບົດລາຍງານການລົງຝຶກງານ ຂອງ ນັກສຶກສາຝຶກງານ 2 ທ່ານ ທີ່ມາຈາກມະຫາວິທະຍາໄລແຫ່ງຊາດ ພາກວິຊາພູມສາດ ແລະ ສາລະເທດສາດ ສາຂາບັນນາຮັກສາດ ແລະ ສາລະສົນເທດສາດ ທີ່ມາຝຶກງານເປັນເວລາ 2 ເດືອນແຕ່ວັນທີ 4/2-7/4-2019 ຢູ່ພະແນກຫ້ອງສະໝຸດ ແລະ ສໍາເນົາ ໂດຍນໍາໃຊ້ທິດສະດີທີ່ຮຽນມາເຂົ້າສູ່ການປະຕິບັດຕົວຈິງ ເຂົ້າໃນວຽກງານການສຳເນົາເອກະສານ, ການແປງປື້ມເກົ່າເຮັດໃຫ້ເປັນປື້ມໃໝ່ໂດຍນຳໃຊ້ໂປຣແກມ Photoshop, ວຽກງານປະຈຳວັນແຕ່ລະມື້ໂດຍສະເພາະກໍ່ຄືການແຈກຢາຍໜັງສືພິມ, ເອກະສານຕ່າງໆໃຫ້ແກ່ແຕ່ລະກົມ ແລະ ຮຽນຮູ້ວຽກໄອທີຂັ້ນຕົ້ນຕື່ມອີກ ເຊິ່ງຖືກກັບສາຂາວິຊາທີ່ຮຽນມາ.

      ຫຼັງຈາກນັ້ນ ນັກສຶກສາຝຶກງານ ກໍ່ໄດ້ຂຶ້ນຜ່ານບົດລາຍງານຜົນສໍາເລັດ ຈຸດດີ, ຈຸດອ່ອນ ບົດຮຽນທີ່ຖອດຖອນໄດ້ຂອງ ການລົງຝຶກງານຕົວຈິງໃນໄລຍະເວ ລາ 2 ເດືອນທີ່ຜ່ານມາ.

      ໃນຕອນທ້າຍຂອງພິທີ ປະທານກອງປະຊຸມໄດ້ມີຄໍາເຫັນໂອ້ລົມຕໍ່ນັກສຶກສາຝຶກງານ ຈົ່ງນໍາເອົາບົດຮຽນ, ຄວາມຮູ້ທີ່ໄດ້ມາຝຶກງານຢູ່ ກົມຂໍ້ມູນຂ່າວສານ ໄປໝູນໃຊ້ເຂົ້າໃນວຽກງານຕົວຈິງ ຂອງບັນດາທ່ານໃຫ້ປະສົບຜົນສໍາເລັດ ພ້ອມທັງໄດ້ມອບໃບຢັ້ງຢືນການລົງຝຶກງານໃຫ້ແກ່ນັກສຶກສາທັງສອງນ້ອງ.