ກົມຂໍ້ມູນຂ່າວສານ ຄະນະໂຄສະນາ...

ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກມອບສິດ​ນຳ​ໃຊ້​ເວັບໄຊໃຫ້ຄະນະໂຄສະນາອົບຮົມແຂວງໄຊຍະບູລີ

    ໃນວັນທີ 2-7 ກັນ 2019 ຜ່ານມາ. ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ໄດ້ລົງມອບສິດ​ນຳ​ໃຊ້​ເວັບໄຊ ພ້ອມ​ທັງ​ຝຶກ​ອົບຮົມວິທີການ​ນຳ​ໃຊ້

​ແລະ ການຄຸ້ມ​ຄອງໃຫ້ຄະນະໂຄສະນາອົບຮົມແຂວງ ໄຊຍະບູລີ ນໍາໂດຍ ທ່ານ ວັນຕຸລາ ຣັກນຸດ ວ່າຫົວໜ້າກົມຂໍ້ມູນຂ່າວສານ ພ້ອມດ້ວຍຄະນະ,  ທ່ານ ທອງເລືອນ ອິນປັນຍາ, ຫົວໜ້າຄະນະໂຄສະນາອົບຮົມແຂວງໄຊຍະບູລີ  ແລະ ນັກສຳມະນາກອນຂອງຄະນະໂຄສະນາອົບຮົມແຂວງ ເຂົ້າຮ່ວມທັງໝົດມີ 18 ທ່ານ, ຍິງ 10 ທ່ານ.

        ຈຸດປະສົງໃນການລົງ​ໄປ​​ເຄື່ອນໄຫວວຽກງານຢູ່ແຂວງໃນ​ຄັ້ງນີ້ ແມ່ນເພື່ອມອບສິດນຳໃຊ້ເວັບໄຊ, ໃຫ້ຄະນະໂຄສະນາອົບຮົມແຂວງເພື່ອນຳໃຊ້ເຂົ້າໃນການໂຄສະນາການເຄືອນໄຫວວຽກງານໂຄສະນາອົບຮົມແຂວງ,ເພື່ອເປັນການຍົກສູງຄຸນນະພາບວຽກງານໂຄສະນາອົບຮົມໃນໄລຍະໃຫມ່ ແລະ ຫັນເປັນທັນສະໄໝ ທາງດ້ານຂໍ້ມູນຂ່າວສານ. ການຝຶກອົບຮົມໃນຄັ້ງນີ້ເປັນການຍົກລະດັບຄວາມຮູ້ຄວາມສາມາດທາງດ້ານການນຳໃຊ້ ແລະ ການຄຸ້ມຄອງເວັບໄຊໃຫ້ແກ່ພະນັກງານໂຄສະນາອົບຮົມແຂວງ ໄດ້ຮຽນຮູ້ກ່ຽວກັບການປ້ອນຂ່າວ, ຮູບພາບ, ວີດີໂອ ຂື້ນເວັບໄຊ ແລະ ການແກ້ໄຂໂມດູນຕ່າງໆເທິງໜ້າເວັບໄຊ. ນອກຈາກນັ້ນຍັງເຮັດໃຫ້ພະນັກງານວິຊາການໄອທີຂອງແຂວງໄດ້ເຂົ້າໃຈເລິກເຊິ່ງ ເຖິງບົດບາດຂອງເຕັກໂນໂລຢີ, ຂໍ້ມູນຂ່າວສານ (ເວັບໄຊ), ເພື່ອນຳໃຊ້ເຂົ້າໃນວຽກງານວິຊາສະເພາະຂອງຕົນເວົ້າລວມ, ເວົ້າສະເພາະ ແມ່ນການໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງກວ້າງຂວາງ ແລະ ທົ່ວເຖິງໂດຍການຜ່ານໜ້າກະດານເອເລັກໂຕຼນິກ (ເວັບໄຊ) ໃຫ້ມີບາດກ້າວຂະຫຍາຍຕົວຂື້ນເລື້ອຍໆ.

      ໃນ​ໂອກາ​ດດັ່ງກ່າວ ​​ທີ​ມງານ​ທີ່​ລົງ​ໄປກໍ່​ໄດ້​ມອບ​​ເງິນ ສົມທົບ​ໃຫ້​ຄະນະ​ໂຄສະນາ​ອົບຮົມ​ແຂວງ ຈຳນວນ 3.000.000 ກີບ ​ເພື່ອ​ໝູນໃຊ້ເຂົ້າໃນວຽກງານເວັບໄຊ ຂອງແຂວງ ​ໃຫ້​ມີ​ຄວາມ​ສະດວກ ​ແລ​ະ ທັນ​ສະ​ໄໝຂຶ້ນ​ເປັນ​ກ້າວໆ

          ພາຍຫຼັງສິ້ນສຸດການຝືກອົບຮົມແລ້ວ ທ່ານ ວັນຕຸລາ ຣັກນຸດ ວ່າຫົວໜ້າກົມຂໍ້ມູນຂ່າວສານ, ຄະນະໂຄສະນາອົບຮົມສູນກາງພັກ ໄດ້ຕາງໜ້າໃຫ້ຄະນະນຳຂັ້ນສູນກາງມອບສິດນຳໃຊ້ເວັບໄຊໃຫ້ແກ່ຄະນະໂຄສະນາອົບຮົມແຂວງໄຊຍະບູລີ ຢ່າງເປັນທາງການ