ຄະນະໂຄສະນາອົບຮົມສູນກາງພັກ, ຂຽນຫຍໍ້ດ້ວຍຕົວອັກສອນ“ຄ.ອ.ສ.ພ”ແມ່ນອົງການຈັດຕັ້ງໜຶ່ງຂອງພັກຂັ້ນສູນກາງທີ່ມີຖານະເທົ່າກັນກັບຄະນະຂອງສູນກາງພັກ ແລະ ກະຊວງ–ອົງການຂອງລັດ. ຄະນະໂຄສະນາອົບຮົມສູນກາງພັກ ມີບົດບາດເປັນເສນາທິການໃຫ້ຄະນະບໍລິຫານງານສູນກາງພັກ, ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ໃນຂົງເຂດວຽກງານການເມືອງ-ແນວຄິດ, ຊີ້ແຈງອະທິບາຍໂຄສະນາເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ– ສັງຄົມ, ລະບຽບກົດໝາຍຂອງລັດ ແລະ ເຫດການສຳຄັນຕ່າງໆທີ່ກະທົບໃສ່ແນວຄິດ; ສຶກສາອົບຮົມການເມືອງ-ແນວຄິດ; ຄົ້ນຄ້ວາ ແລະ ເຜີຍແຜ່ທິດສະດີການເມືອງ.
ໃນຕົ້ນປີ 1951 ຄະນະໂຄສະນາອົບຮົມສູນກາງພັກ, ໄດ້ຮັບການຈັດຕັ້ງຂຶ້ນ ແລະ ຕັ້ງໂຮງຮຽນທິດສະດີໃສ່ຊື່ວ່າ “ ໂຮງຮຽນສາມັກຄີ ” ເພື່ອສ້າງ ແລະ ບຳລຸງພະນັກງານຫຼັກແຫຼ່ງໃຫ້ແກ່ກອງທັບ, ອຳນາດການປົກຄອງ, ອົງການຈັດຕັ້ງມະຫາຊົນ ແລະ ໃຫ້ແກ່ພັກເອງທັງຢູ່ຂັ້ນສູນກາງ ແລະ ທ້ອງຖິ່ນ.
ນັບແຕ່ຊຸມປີ 1964 ເຖິງປີ 1975 ໂຄສະນາອົບຮົມວັດທະນະທຳ, ເຊິ່ງໄດ້ຂຽນຫຍໍ້ວ່າ “ ຄ.ອ.ວ ”, ໄດ້ຕັ້ງສຳນັກງານຢູ່ຖ້ຳຫີນພູແຄ ທີ່ຂຶ້ນກັບເມືອງວຽງໄຊ, ແຂວງຫົວພັນ. ກົງຈັກການຈັດຕັ້ງຂອງຄະນະໂຄສະນາອົບຮົມວັດທະນະທຳ ປະກອບດ້ວຍ: ພະແນກ ວິທະຍຸກະຈາຍສຽງ. ພະແນກວັດທະນະທຳ, ພະແນກອົບຮົມ, ຫ້ອງການໂຄສະນາອົບຮົມວັດທະນະທຳ, ໂຮງພີມ. ຄະນະໂຄສະນາອົບຮົມວັດທະນະທໍາ ປະກອບມີ ຄະນະຊີ້ນໍາຄື:
1.ທ່ານ ສະນັ່ນ ສຸດທິຈັກ, 2. ທ່ານ ຈັນມີ ດວງບຸດດີ, 3. ທ່ານ ສີຊະນະ ສີສານ, 4. ທ່ານ ສະຫວ່າງ, 5. ທ່ານ ບຸນ ພົມມະຫາໄຊ, 6. ທ່ານ ຄໍາມາ ພົມກອງ, 7. ທ່ານ ສົມສະໜິດ ສຸດທິຈັກ, 8. ທ່ານ ສີວິໄລ ແລະ ທ່ານອື່ນໆອີກ. ໃນນັ້ນ, ຮັບຜິດຊອບວຽກງານອົບຮົມມີ ທ່ານ ສົມສະໜິດ ສຸດທິຈັກ, ທ່ານ ສະຫວ່າງ, ທ່ານ ສີວິໄລ, ທ່ານ ຈັນມີ ດວງບຸດດີ ແລະ ທ່ານອື່ນໆ.
ພາຍຫຼັງປະເທດຊາດໄດ້ຮັບການປົດປ່ອຍແລ້ວ ຄະນະ (ຄ.ອ.ວ ) ປ່ຽນມາເປັນ ຄະນະໂຄສະນາອົບຮົມສູນກາງພັກ. ຈົນເຖິງປະຈຸບັນ, ສະຖານທີ່ຕັ້ງຢູ່ (ຫຼັກ6) ບ້ານ ສີວິໄລ, ເມືອງໄຊທານີ ນະຄອນຫຼວງວຽງຈັນ.
ຫົວໜ້າຄະນະໂຄສະນາອົບຮົມສູນກາງພັກ ແຕ່ລະໄລຍະຄື:
ທ່ານ ຈັນມີ ດວງບຸດດີ ຫົວໜ້າຄະນະໂຄສະນາອົບຮົມ ພາຍຫຼັງປະເທດຊາດ ໄດ້ຮັບການປົດປ່ອຍ.
ທ່ານ ສົມລັດ ຈັນທະມາດ ຫົວໜ້າຄະນະໂຄສະນາອົບຮົມສູນກາງພັກ ກາງຊຸມປີ 80 ຫາຕົ້ນປີ 90.
ທ່ານ ໂອສະກັນ ທໍາມະເທວາ ຫົວໜ້າຄະນະໂຄສະນາອົບຮົມສູນກາງພັກ ກາງຊຸມປີ 1990 – 2004.
ທ່ານ ໝູນແກ້ວ ອໍລະບູນ ຮັກສາການ ຫົວໜ້າຄະນະໂຄສະນາອົບຮົມສູນກາງພັກ 2004 – 2005.
ທ່ານ ສີເຫຼືອ ບຸນຄ້ໍາ ຮັກສາການ ຫົວໜ້າຄະນະໂຄສະນາອົບຮົມສູນກາງພັກ 2005 – 2006.
ທ່ານ ພັນດວງຈິດ ວົງສາ ຫົວໜ້າຄະນະໂຄສະນາອົບຮົມສູນກາງພັກ 2006 ຫາກາງປີ 2011.
ທ່ານ ເຈືອງ ສົມບູນຂັນ ຫົວໜ້າຄະນະໂຄສະນາອົບຮົມສູນກາງພັກ ນັບແຕ່ກາງປີ 2011 ເຖິງ 2014
ທ່ານ ສຈ. ດຣ ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ ນັບແຕ່ປີ 2014 ເຖິງ 2019 .
ທ່ານ ປອ. ຄຳພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ ນັບແຕ່ປີ 2019 ເຖິງຕົ້ນປີ 2021
ທ່ານ ປອ. ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ຜູ້ປັດຈຸບັນ
ໃນປະຈຸບັນກົງຈັກການຕັ້ງປະກອບມີ:
1.ຫ້ອງການ
2.ກົມຈັດຕັ້ງ-ພະນັກງານ.
3.ກົມກວດກາ.
4.ກົມໂຄສະນາ.
5.ກົມອົບຮົມ.
6.ກົມຂໍ້ມູນຂ່າວສານ ແລະ ຝຶກອົບຮົມ.
7.ວາລະສານອາລຸນໃຫມ່.
8.ໜັງສືພິມປະຊາຊົນ.
9.ຫ້ອງການສະພາທິດສະດີສູນກາງພັກ.