ທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມກອງປະຊຸມ ສະຫຼຸບວຽກງານໂຄສະນາອົບຮົມທົ່ວນະຄອນຫຼວງວຽງຈັນ ປະຈຳປີ 2019 ແລະ ວາງທິດທາງແຜນການ ປີ 2020
ໃນວັນທີ 8 ມັງກອນ 2020 ຜ່ານມາ ທີ່ຫ້ອງວ່າການນະຄອນຫຼວງວຽງຈັນໄດ້ຈັດກອງປະຊຸມສະຫຼຸບວຽກງານໂຄສະນາອົບຮົມທົ່ວນະຄອນຫຼວງ ປະຈຳປີ 2019 ແລະ ວາງທິດທາງແຜນການ ປີ 2020 ໂດຍການເປັນປະທານຮ່ວມຂອງທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ເຂັມເພັດ ແພງດວງຈັນ ຫົວໜ້າຄະນະໂຄສະນາອົບຮົມນະຄອນຫຼວງວຽງຈັນ ແລະ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມມີ: ຮອງເລຂາຄະນະບໍລິຫານງານພັກນະຄອນຫຼວງວຽງຈັນ, ເລຂາຄະນະບໍລິຫານງານພັກເມືອງ, ເຈົ້າເມືອງ, ເລຂາຄະນະພັກຮາກຖານ, ຫົວໜ້າພະແນກການອ້ອມຂ້າງ, ຄະນະໂຄສະນາອົບຮົມ 9 ຕົວເມືອງ ແລະ ພະນັກງານຫຼັກແຫຼ່ງທົ່ວຄະນະໂຄສະນາອົບຮົມນະຄອນຫຼວງກໍເຂົ້າຮ່ວມຢ່າງພ້ອມພຽງ.
ໃນກອງປະຊຸມ ທ່ານ ເຂັມເພັດ ແພງດວງຈັນ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານໂຄສະນາອົບຮົມ ນະຄອນຫລວງວຽງຈັນ ປະຈຳປີ 2019 ແລະ ວາງທິດທາງແຜນການປີ 2020 ຕະຫຼອດໄລຍະ 1 ປີຜ່ານມາຄະນະພັກ, ອົງການປົກຄອງທຸກຂັ້ນໄດ້ເອົາໃຈໃສ່ເຮັດວຽກງານໂຄສະນາອົບຮົມການເມືອງ-ແນວຄິດໃຫ້ຖັນແຖວພະນັກງານ, ສະມາຊິກພັກ ແລະ ປະຊາຊົນໃນຂອບເຂດຄວາມຮັບຜິດຊອບຂອງຕົນໄດ້ຢ່າງເປັນປົກກະຕິ ພ້ອມນັ້ນ ໄດ້ບຳລຸງລະດັບທິດສະດີການເມືອງ-ການປົກຄອງໃຫ້ພະນັກງານສະມາຊິກພັກໄດ້ 19 ຊຸດ ມີຜູ້ເຂົ້າຮ່ວມ 1.060 ຄົນ ຍິງ 215 ຄົນ ໃນນີ້ ຈັດຢູ່ເມືອງ 9 ຊຸດ ແລະ ພະແນກການ 10 ຊຸດ, ຈັດສຳມະນາວິທະຍາສາດໃນໂອກາດວັນສຳຄັນທາງປະຫວັດສາດຂອງຊາດຕິດພັນກັບການຊອກວິທີແກ້ໄຂສິ່ງຫຍໍ້ທໍ້ຕ່າງໆໃນສັງຄົມ ຄຽງຄູ່ກັນນັ້ນໄດ້ເອົາໃຈໃສ່ຊີ້ນຳ-ນຳພາ ຄຸ້ມຄອງການເຄື່ອນໄຫວຂອງສື່ມວນຊົນທຸກປະເພດທີ່ຢູ່ໃນຄວາມຮັບຜິດຊອບ ໂດຍສະເພາະແມ່ນປັບປຸງເນື້ອໃນ, ວິທີການ, ຮູບການໂຄສະນາຜ່ານສື່ຕົ້ນຕໍແມ່ນວາລະສານນະຄອນຫຼວງວຽງຈັນ ສາມາດຜະລິດ ແລະ ຈຳໜ່າຍໄດ້ 6 ສະບັບ ສະບັບທີ 44-49 ລວມທັງໝົດ 16.650 ຫົວ, ໜັງສືພິມວຽງຈັນໃໝ່, ວິທະຍຸ, ໂທລະໂຄ່ງ, ເວບໄຊວຽງຈັນນິວເດ ພິເສດນະຄອນຫຼວງວຽງຈັນ ໄດ້ສ້າງສະຖານີໂທລະ ພາບ VTE9 ຜ່ານລະບົບດາວທຽມລາວແຊັດ ເຊິ່ງປັດຈຸບັນ ທົ່ວຄະນະໂຄສະນາອົບຮົມນະຄອນຫຼວງວຽງຈັນມີຜູ້ເຮັດວຽກໂຄສະນາອົບຮົມການເມືອງທັງໝົດ 139 ຄົນ ຍິງ 42 ຄົນ ແລະ ໄດ້ສ້າງຕາໜ່າງເພື່ອນຮ່ວມງານເພື່ອກຳກັບຫາສຽງສັງຄົມທີ່ປະຈຳຢູ່ເມືອງ, ຢູ່ພະແນກການ ແລະ ອົງການທຽບເທົ່າອ້ອມຂ້າງນະຄອນຫຼວງ.
ສຳລັບທິດທາງແຜນການປີ 2020 ເຊິ່ງເປັນປີໜຶ່ງທີ່ມີຄວາມສຳຄັນຫຼາຍ ດັ່ງນັ້ນ ຄະນະໂຄສະນາອົບຮົມຈະຕ້ອງ ໄດ້ອອກແຮງສູ້ຊົນຍົກສູງຄວາມຮັບຜິດຊອບຂອງຕົນ ສ້າງແຜນເຄື່ອນໄຫວ, ແນະນຳ, ກວດກາການປະຕິບັດໜ້າທີ່ ທີ່ພົວພັນເຖິງວຽກງານກໍ່ສ້າງພັກທາງດ້ານການເມືອງ-ແນວຄິດ ປະກອບສ່ວນຍົກສູງຄວາມສາມາດນຳພາຂອງພັກ, ຍົກສູງຄຸນນະພາບການຄຸ້ມຄອງຂອງລັດ, ການເຄື່ອນໄຫວຂອງແນວລາວສ້າງຊາດ, ອົງການຈັດຕັ້ງມະຫາຊົນ ພ້ອມທັງເພີ່ມທະວີການເຄື່ອນໄຫວວຽກງານໂຄສະນາອົບຮົມໃຫ້ເລິກເຊິ່ງ ທົ່ວເຖິງທຸກເປົ້າໝາຍ ເພື່ອສ້າງຄວາມຮັບຮູ້ ເຂົ້າໃຈເປັນເອກະພາບ, ມີຄວາມເຊື່ອໝັ້ນ ແລະ ສະໜັບສະໜູນແນວທາງນະໂຍບາຍ ແລະ ການນຳພາຂອງພັກ ເຮັດໃຫ້ວຽກງານໂຄສະນາມີຄຸນນະພາບໃໝ່ ຕິດພັນກັບພາລະໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການປົກປັກຮັກສາ ແລະ ພັດທະນານະຄອນຫຼວງວຽງຈັນ ເພີ່ມທະວີຄວາມແຫຼມຄົມ-ວ່ອງໄວ ທັນການຂອງບັນດາສື່ ໃນການໂຄສະນາໃນການອະທິບາຍຕອບແກ້ໄຂບັນຫາຕ່າງໆທີ່ສັງຄົມສົນໃຈ.
