ສະຫາຍ ຄໍາພັນ ເຜີຍຍະວົງ ເລຂາທິການສູນກາງພັກ,
ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ
ໃຫ້ສຳພາດຕໍ່ບັນດາສໍານັກສື່ມວນຊົນຫວຽດນາມປະຈໍາລາວ, ເນື່ອງໃນໂອກາດສະເຫຼີມສະຫຼອງວັນປົດປ່ອຍພາກໃຕ້ຫວຽດນາມ, ທ້ອນໂຮມປະເທດຊາດຫວຽດນາມ ເປັນເອກະພາບ ຄົບຮອບ 50 ປີ (30/4/1975-30/4/2025)
ສະຫາຍຕີລາຄາສູງຕໍ່ໄຊຊະນະປົດປ່ອຍພາກໃຕ້ຫວຽດນາມ ແລະ ທ້ອນໂຮມປະເທດຊາດ ຫວຽດນາມເປັນອັນໜຶ່ງອັນດຽວ ໃນວັນທີ 30/4/1975 ແມ່ນມີຄວາມໝາຍສຳຄັນອັນໃຫຍ່ຫຼວງຕໍ່ສອງພັກ, ສອງລັດ ແລະ ປະຊາຊົນ ສອງຊາດລາວ-ຫວຽດນາມ, ເຊິ່ງເປັນໄຊ ຊະນະຂອງຍຸກສະໄໝທີ່ເລິກເຊິງທີ່ສຸດເຊິ່ງທີ່ສຸດເຊັ່ນ:
– ແມ່ນມະຫາໄຊຊະນະ ຂອງກອງທັບ ແລະ ປະຊາຊົນຫວຽດນາມ ນັບພັນປີ ແຫ່ງການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດຫວຽດນາມ. ໄຊຊະ ນະດັ່ງກ່າວ ແມ່ນການທັບມ້າງກົງຈັກການທະຫານອັນໃຫຍ່ໂຕ, ເຂັ້ມແຂງ ແລະ ທັນສະໄໝກວ່າໝູ່ໝົດ ຂອງລັດທິລ່າເມືອງຂຶ້ນແບບໃໝ່ໄດ້ຢ່າງສົມບູນ, ປະເທດຊາດທີ່ຖືກແບ່ງເປັນ 2 ພາກ ໄດ້ຮັບການເຕົ້າໂຮມເປັນອັນດຽວກັນ.
– ແມ່ນການປະລາໄຊອັນໜັກໜ່ວງທາງດ້ານການທະຫານ ແລະ ການເມືອງທີ່ບໍ່ເຄີຍມີມາກ່ອນຂອງຈັກກະພັດອາເມລິກາ, ເຮັດໃຫ້ກົນອຸບາຍຢາກຫັນເອົາພາກໃຕ້ຫວຽດ ນາມເປັນຫົວເມືອງຂຶ້ນແບບໃໝ່ ແລະ ເປັນຖານທັບການທະຫານ ຂອງພວກເຂົາຖືກທັບມ້າງ ທັງແມ່ນການປະລາໄຊຄັ້ງທຳອິດ ຂອງລັດທິລ່າເມືອງຂຶ້ນແບບໃໝ່ໃນໂລກ.
– ແມ່ນໄຊຊະນະລວມແຫ່ງກ້ອນກຳລັງສາມັກຄີພິເສດ, ຮ່ວມສຳພັນສູ້ຮົບລະ ຫວ່າງ ຫວຽດນາມ, ລາວ ແລະ ກຳປູເຈຍ ອ້າຍນ້ອງ ແມ່ນສະໜາມຮົບຢູ່ບົນດິນແດນແຫຼມອິນດູຈີນອັນດຽວກັນ, ຕ້ານສັດຕູຜູ້ຮຸກຮານໂຕດຽວກັນ, ໄຊຊະນະດັ່ງກ່າວແມ່ນປັດໄຈ, ທີ່ເປັນທ່າແຮງຊຸກດັນໄຊຊະນະເຊິ່ງກັນ ແລະ ກັນ.
- ໄຊຊະນະແຫ່ງການປົດປ່ອຍພາກໃຕ້ຫວຽດນາມ ສະແດງໃຫ້ເຫັນນ້ຳໃຈຮັກຊາດ, ຮັກເອກະລາດ ຂອງປະຊາຊົນຫວຽດນາມ ທີ່ປະທານ ໂຮ່ຈີ່ມິນ ໄດ້ຢືນຢັນວ່າ: “ບໍ່ມີຫຍັງຈະປະເສີດເລີດລ້ຳກວ່າເອກະລາດ ແລະ ເສລີພາບ” ທັງສະແດງໃຫ້ເຫັນເຖິງການນຳພາອັນປີຊາສາມາດ, ຍຸດທະສາດທີ່ເດັດດ່ຽວໜຽວແໜ້ນ, ຍຸດໂທບາຍທີ່ຄ່ອງແຄ້ວ ແລະ ວິທີປະຕິວັດທີ່ສະຫຼາດສ່ອງໃສຂອງພັກກອມມູນິດຫວຽດນາມ ໂດຍມີປະທານ ໂຮ່ຈິມິນ ຜູ້ຍິ່ງໃຫຍ່.
– ແມ່ນການປະກອບສ່ວນອັນຍິ່ງໃຫຍ່ຂອງພັກ, ລັດ ແລະ ປະຊາຊົນຫວຽດນາມ ເຂົ້າໃນສັນຕິພາບໂລກ, ປຸກລະດົມບັນດາປະຊາຊາດທີ່ຖືກກົດຂີ່ຂູດຮີດຮຽນຮູ້ຕົວແບບລັດທິວິລະຊົນປະຕິວັດ ຂອງຫວຽດນາມ, ກ້າຫານຕໍ່ສູ້ຕ້ານຈັກກະພັດ ເພື່ອປົດປ່ອຍຕົນເອງອອກຈາກການກົດຂີ່ຂູດຮີດ, ສ້າງຄວາມເຊື່ອໝັ້ນໃຫ້ທົ່ວໂລກຮັບຮູ້ພະລັງແຮງທີ່ຮັກຊາດ, ຮັກເອກະລາດ, ສັນຕິພາບ, ປະຊາທິປະໄຕ ແລະ ຄວາມກ້າວໜ້າໃນໂລກ.
– ຈາກໄຊຊະນະປົດປ່ອຍພາກໃຕ້ຫວຽດນາມ ເປັນການໄຂສັງກາດໃໝ່ ໃຫ້ປະ ເທດຫວຽດນາມ ມີສັນຕິພາບ, ເອກະພາບ ແລະ ກ້າວຂຶ້ນສັງຄົມນິຍົມ, ຊຶ່ງປະທານ ໄກສອນ ພົມວິຫານ ໄດ້ຕີລາຄາ ວ່າ: “ ໄຊຊະນະອັນໃຫຍ່ຫຼວງ ໃນປະຫັວດສາດຫວຽດນາມ, ປະຫວັດສາດ ຂອງຊາດວິລະຊົນ, ເປັນເຫດການສະເທືອນໂລກ ທີ່ເກີດຂຶ້ນຢູ່ຫວຽດນາມ ໃນວັນທີ 30 ເດືອນ 4 ປີ 1975 ນັ້ນ ໄດ້ບັນທຶກໄຊຊະນະຢ່າງສົມບູນແຫ່ງພາລະກິດປົດປ່ອຍພາກໃຕ້ຫວຽດນາມ, ທ້ອນໂຮມປະເທດຊາດຫວຽດນາມ ເປັນເອກະພາບ, ເຮັດໃຫ້ພິໄນກຳອັນສັກກະລະບູຊາ ຂອງປະທານ ໂຮ່ຈິມິນ ປະກົດເປັນຈິງ. ໄຊຊະນະອັນໃຫຍ່ຫຼວງ ຂອງປະຊາຊົນຫວຽດນາມ ນັ້ນ ໄດ້ເຮັດໃຫ້ການຕໍ່ສູ້ເດັດຂາດ ບໍ່ອ່ອນຍອມຕະຫຼອດ 45 ປີ ພາຍໃຕ້ຄັນທຸງອັນມີກຽດ ຂອງພັກນຳໜ້າການປະຕິວັດຫວຽດນາມ ຍາດໄດ້ໄຊຊະນະອັນສະຫງ່າງາມ ແລະ ສົມບຸນ ໃນສົງຄາມປະຕິວັດຕ້ານຈັກກະພັດ ທີ່ດຸເດືອດ, ຢືດເຢື້ອ, ຍາວນານ ເປັນເວລາ 30 ປີ ອັນໄດ້ໄຂສາກດ້ວຍການປະຕິວັດເດືອນ ສິງຫາ ທີ່ສະທ້ານຟ້າສະເທືອນດິນ ແລະ ສິ້ນສຸດລົງດ້ວຍບັ້ນຮົບບັ້ນສຸດທ້າຍ ໃນວັນທີ 30/4/1975 ທີ່ໃສ່ຊື່ປະທານ ໂຮ່ຈິມິນ ຜູ້ຍິ່ງໃຫຍ່ ແລະ ກາຍເປັນຜົນງານອັນມະຫັດສະຈັນ ທີ່ດັງກ້ອງກັງວານໄປທົ່ວ 4 ມະຫາສະໝຸດ ແລະ 5 ທະວີບ, ເປັນປະຫວັດສາດທີ່ພິດສະດານທີ່ສຸດ ແລະ ມິຄວາມໝາຍຍຸກສະໄໝທີ່ເລິກເຊິ່ງທີ່ສຸດ ”.
ໄຊຊະນະອັນສົມບູນ ຂອງປະຊາຊົນຫວຽດນາມ ໃນເດືອນເມສາ 1975 ໄດ້ໄດ້ສົ່ງຜົນກະທົບ ກໍຄື ສ້າງກາລະໂອກາດປະຫວັດສາດ ທີ່ຫາຍາກໃຫ້ການປະຕິວັດລາວ. ໂດຍຖືເອົາໂອກາດທີ່ສັດຕູພ່າຍແພ້ການຕໍ່ສູ້ ຢູ່ພາກໃຕ້ຫວຽດນາມ, ກຳລັງ ຂອງສັດຕູອ່ອນເພຍລົງ ແລະ ຕົກສູ່ສະພາບວິກິດການຢ່າງຮ້າຍແຮງທາງດ້ານການເມືອງ, ເສດຖະກິດ, ແນວຄິດຈິດຕະສາດ ຂອງປະຊາຊົນ ແລະ ທະຫານຜ່ານເສິກອາເມລິກາ ເກີດຄວາມອົນລະເວນ ແລະ ເຊື່ອມໂຊມ ມັນໄດ້ສ້າງກາລະໂອກາດອຳນວຍ “ພັນປີມີເທື່ອໜຶ່ງ” ໃຫ້ພັກປະຊາຊົນ ປະຕິວັດລາວ ໄດ້ນຳພາກອງທັບ ແລະ ປະຊາຊົນລາວໃນທົ່ວປະເທດລຸກຮື້ຂຶ້ນຢືດອຳນາດການປົກຄອງມາມືປະຊາຊົນ ດ້ວຍການປະຕິວັດ 3 ບາດຄ້ອນຍຸດທະສາດ ຢຶດອຳນາດທົ່ວປະເທດ ໃນປີ 1975 ອັນໄດ້ພາໄປເຖິງການເປີດກອງປະຊຸມໃຫຍ່ຜູ້ແທນທົ່ວປະເທດ ເພື່ອລົບລ້າງລະບອບລ່າເມືອງຂຶ້ນແບບໃໝ່ ແລະ ສ້າງຕັ້ງສາທາລະນະລັດ ປະຊາທິປະໄຕ ປະຊາຊົນ ຂຶ້ນໃນວັນທີ 2 ທັນວາ ປີ 1975 ແລະ ນໍາເອົາປະເທດຊາດກ້າວຂຶ້ນຕາມຈຸດໝາຍທີ່ພັກໄດ້ກໍານົດໄວ້.
ຕະຫຼອດໄລຍະແຫ່ງການຕໍ່ສູ້ຕ້ານຈັກກະພັດຜູ້ຮຸກຮານກູ້ເອົາເອກະລາດ ແລະ ປົດປ່ອຍປະເທດຊາດ ອັນດຸເດືອດຂ້ຽວຂາດ ແລະ ຍາວນານນັ້ນ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໂດຍສະເພາະແມ່ນ ກຳລັງປະກອບອາວຸດ ຂອງສອງປະເທດ ໄດ້ສາມັກຄີກັນຮ່ວມສໍາພັນສູ້ຮົບຊ່ວຍເຫຼືອຊຶ່ງກັນ ແລະ ກັນ ໂດຍນຳໃຊ້ກຳລັງທະຫານ ແລະ ການທູດໄປພ້ອມໆກັນ ດ້ວຍຫຼາຍຮູບແບບ, ຫຼາຍລະ ດັບ, ຫຼາຍເຫດການ ແລະ ຫຼາຍສະຖານທີ່ແຕກຕ່າງກັນ ຍາດເອົາໄຊຊະນະນີ້ໄປສູ່ໄຊຊະນະໃໝ່ທີ່ນັບມື້ກວ້າງຂວາງ ຈົນຮອດໄຊຊະນະສຸດທ້າຍ ຄື: ສາມາດປົດປ່ອຍພາກໃຕ້ຫວຽດນາມ, ທ້ອນໂຮມປະເທດຊາດຫວຽດນາມ ເປັນເອກະພາບ ໃນວັນທີ 30/4/1975 ແລະ ຢູ່ລາວ ກໍ່ສາມາດປົດປ່ອຍປະເທດຊາດຢ່າງສົມບູນ ແລະ ສະຖາປານາ ສປປ ລາວ ໃນວັນທີ 2 ທັນວາ ປີ 1975.
ໄຊຊະນະການປົດປ່ອຍພາກໃຕ້ຫວຽດນາມ ແລະ ໄຊຊະນະແຫ່ງການປົດປ່ອຍ ປະເທດລາວ ໄດ້ກາຍເປັນມູນເຊື້ອ, ບົດຮຽນ ແລະ ປະສົບການ ໃນການຮ່ວມສຳພັນສູ້ຮົບ ລາວ-ຫວຽດນາມ ໃນເມື່ອກ່ອນ ແລະ ເປັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານໃນປັດຈຸບັນ. ໄຊຊະນະດັ່ງກ່າວ ແມ່ນໄຊຊະນະ ຂອງລັດທິມາກ-ເລນິນ ໃນປະເທດນ້ອຍ, ເສດຖະກິດ, ວັດທະນະທຳຂະຫຍາຍຕົວຊ້າ ຄືປະເທດລາວ; ແມ່ນໄຊຊະນະແຫ່ງການວາງແນວທາງຢ່າງຖືກຕ້ອງ, ປະຕິວັດ ແລະ ປະດິດສ້າງ ຂອງພັກກອມມູນິດຫວຽດນາມ ແລະ ພັກປະຊາຊົນລາວ ທີ່ໄດ້ສືບທອດພາລະກິດອັນສະຫງ່າງາມ ຂອງພັກກອມມູນິດອິນດູຈີນ ເຊິ່ງມີປະທານ ໂຮ່ຈິມິນ ຜູ້ຍິ່ງໃຫຍ່ເປັນຜູ້ກໍ່ຕັ້ງຂຶ້ນ.
ໄຊຊະນະດັ່ງກ່າວ ແມ່ນໝາກຜົນແຫ່ງການຕໍ່ສູ້ຢ່າງຍືດເຍື້ອຍາວນານ, ທຸກຍາກ, ລໍາບາກ, ທຸລະກັນດານ ເຕັມໄປດ້ວຍການເສຍສະຫຼະ ແລະ ເຕັມໄປດ້ວຍກຽດສະຫງ່າງາມ ຂອງປະຊາຊົນລາວບັນດາເຜົ່າ ແລະ ຂອງກອງທັບປົດປ່ອຍປະຊາຊົນລາວ ເພື່ອຄວາມເປັນເອກະລາດ, ເອກະພາບ ແລະ ອະທິປະໄຕ ຂອງປະເທດຊາດ ແລະ ຢູ່ເຢັນເປັນສຸກ ຂອງປະຊາຊົນລາວ ບັນດາເຜົ່າ; ແມ່ນໄຊຊະນະແຫ່ງນໍ້າໃຈມິດຕະພາບ ແລະ ຄວາມສາມັກຄີສູ້ຮົບ ຢ່າງເດັດດ່ຽວໜຽວແໜ້ນ ລະຫວ່າງ ປະຊາຊົນລາວ ແລະ ປະຊາຊົນຫວຽດນາມ, ແມ່ນໄຊຊະນະແຫ່ງຄວາມສາມັກຄີແບບພິເສດທີ່ຫາຍາກມີໜຶ່ງບໍ່ມີສອງລະຫວ່າງ ປະຊາຊົນລາວ ກັບປະຊາຊົນຫວຽດນາມອ້າຍນ້ອງ.
ໄຊຊະນະນັ້ນກໍ່ບໍ່ອາດຈະແຍກອອກຈາກການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ແລະ ຈາກບັນດາປະເທດສັງຄົມນິຍົມອື່ນໆ ແລະ ການເປັນໃຈສະໜັບສະໜູນ ຢ່າງກວາງຂວາງຂອງປະຊາຊົນຜູ້ຮັກຫອມສັນຕິພາບ ແລະ ຄວາມເປັນທຳໃນທົ່ວໂລກ.
ມາໃນໄລຍະໃໝ່ນີ້ປະເທດ ຂອງພວກເຮົາ ໄດ້ຮັບການປົດປ່ອຍໂດຍສົມບູນແລ້ວ ແລະ ປະ ຊາຊົນສອງປະເທດ ກໍ່ພວມສືບຕໍ່ດໍາເນີນພາລະກິດການສ້າງສາປະເທດຊາດໃຫ້ຈະເລີນຮຸ່ງເຮືອງ. ສອງພັກສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈະສືບ ຕໍ່ເສີມຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ຮ່ວມມືຮອບດ້ານທີ່ ປະທານ ໂຮ່ຈິມິນ ຜູ້ຍິ່ງໃຫຍ່ ແລະ ປະທານ ໄກສອນ ພົມວິ ຫານ ຜູ້ກໍ່ຕັ້ງໃຫ້ນັບມື້ໜັກແໜ້ນ, ໝັ້ນຄົງຢືນຍົງ ແລະ ແຕກດອກອອກຜົນ ນໍາເອົາຜົນປະໂຫຍດຕົວຈິງມາໃຫ້ປະຊາຊົນ ສອງຊາດລາວ-ຫວຽດນາມ.
ຂ້າພະເຈົ້າເຫັນວ່າ ມິດຕະພາບຖານອ້າຍນ້ອງ ແລະ ຄວາມສາມັກຄີແບບພິເສດ ນັ້ນເປັນສົມບັດທີ່ລ້ຳຄ່າ ທີ່ພວກເຮົາຕ້ອງພ້ອມກັນຮັກສາໄວ້ເໝືອນດັ່ງແກ້ວຕາ ຂອງຕົນ ແລະ ເດັດຂາດຈະບໍ່ຍອມປະໃຫ້ຜູ້ໃດມາທຳລາຍມ້າງເພໄດ້.
ເນື່ອງໃນໂອກາດການສະເຫຼີມສະຫຼອງວັນປົດປ່ອຍພາກໃຕ້ຫວຽດນາມ ຄົບຮອບ 50 ປີນີ້ ຂ້າພະເຈົ້າ ຂໍຕາງໜ້າໃຫ້ຄະນະໂຄສະນາອົບຮົມສູນກາງພັກ ກໍຄືພັກ, ລັດ ແລະ ປະຊາຊົນລາວບັນດາເຜົ່າ ຂໍອວຍພອນໄຊອັນປະເສີດແດ່ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ພາຍໃຕ້ການນໍາພາອັນສະຫຼາດສ່ອງໃສ ຂອງພັກກອມມູນິດຫວຽດ ນາມ ນຳໂດຍສະຫາຍ ໂຕເລີມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຈົ່ງໄດ້ຮັບຜົນສຳເລັດອັນໃໝ່ໃຫຍ່ຫຼວງກວ່າເກົ່າໃນພາລະກິດກໍ່ສ້າງສັງຄົມນິຍົມ ຢູ່ຫວຽດນາມ.
ອວຍພອນແດ່ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ຈົ່ງໝັ້ນຄົງຈະນົງແກ່ນຕະຫຼອດໄປ.
