ເສີມຂະຫຍາຍສາຍພົວພັນສາມັກຄີແບບພິເສດລາວ – ຫວຽດນາມ ແລະ ແລກປ່ຽນບົດຮຽນລະຫວ່າງ ຄະນະຜູ້ແທນ ຄະນະໂຄສະນາອົບຮົມສູນກາງພັກ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ.
ໃນຕອນບ່າຍວັນທີ16/7/2024, ຄະນະຜູ້ແທນ ຄະນະໂຄສະນາອົບຮົມສູນກາງພັກ ໄດ້ໄປເຄື່ອນໄຫວຢ້ຽມຢາມ ແລກປ່ຽນບົດຮຽນ ຢູ່ ສສ ຫວຽດນາມ ນຳໂດຍ ສະຫາຍ ສາຄອນ ພົມມະລາດ, ຮອງຫົວໜ້າຄະນະໂຄສະນາອົບຮົມສູນກາງ ພ້ອມດ້ວຍຄະນະ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ສະຫາຍ ຫງວຽນ ຈ້ອງ ເຫງຍ ເລຂາທິການສູນກາງພັກກອມມູນິດຫວຽດນາມ ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ພ້ອມດ້ວຍຄະນະໄດ້ໃຫ້ການຕ້ອນຮັບໃນໂອກາດມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມ.
ໃນການຢ້ຽມຢາມຄັ້ງນີ້ ສະຫາຍ ຫງວຽນ ຈ້ອງ ເຫງຍ ໄດ້ສະແດງຄວາມປິຕິຊົມຊື່ນຕໍ່ບັນດາຜົນງານເຊິ່ງພັກ, ລັດ ແລະ ປະຊາຊົນລາວ ບັນລຸໄດ້ໃນທ້າຍສະໄໝຂອງການປະຕິບັດມະຕິກອງປະຊຸມໃຫຍ່ຄັ້ງທີ XIຂອງພັກ. ເຊື່ອໝັ້ນວ່າ, ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ແລະ ການຄຸ້ມຄອງລັດຂອງລັດຖະບານຢ່າງເຂັ້ມງວດ, ປະເທດລາວຈະຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ ແລະ ສືບຕໍ່ບັນລຸໄດ້ຜົນສຳເລັດອັນໃໝ່ ແລະ ຍິ່ງໃຫຍ່ກວ່າອີກຫຼາຍດ້ານ, ພ້ອນກັນນັ້ນສະຫາຍຍັງເນັ້ນຢ້ຳເນື້ອໃນທີ່ ສະຫາຍ ເລຂາທິການໃຫຍ່ ຫງວຽນ ຟູ໋ ຈ້ອງ ຢືນຢັນວ່າ: ພັກ ແລະ ລັດຖະບານ ຫວຽດນາມ ຍາມໃດກໍ່ຖືເປັນສຳຄັນ ແລະ ໃຫ້ບຸລິມະສິດສູງສຸດໃນການຮັດແໜ້ນ ແລະ ເພີ່ມທະວີການພົວພັນແບບພິເສດຫວຽດນາມ – ລາວ, ພ້ອມກັນນັ້ນ ຫວຽດນາມ ຈະສືບຕໍ່ສົມທົບກັບພັກ, ລັດ ແລະ ປະຊາຊົນລາວ ໃນການຮັກສາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ.
ໃນໄລຍະການຢ້ຽມຢາມ ສະຫາຍ ສາຄອນ ພົມມະລາດ, ຮອງຫົວໜ້າຄະນະໂຄສະນາອົບຮົມສູນກາງ ໄດ້ລາຍງານຜົນການແລກປ່ຽນບົດຮຽນລະຫວ່າງຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ເຊິ່ງພິເສດ ສອງຝ່າຍໄດ້ສຸມໃສ່ແລກປ່ຽນບັນດາເນື້ອໃນກ່ຽວກັບວຽກງານຄຸ້ມຄອງຂ່າວ, ໃນສະພາບທີ່ພັກປະຊາຊົນປະຕິວັດລາວ ພວມປະຕິບັດການແນວທາງປ່ຽນແປງໃໝ່ ແລະ ເພີ່ມທະວີວຽກງານໂຄສະນາອົບຮົມຂອງພັກ. ຜ່ານການແລກປ່ຽນຖອດຖອນບົດຮຽນ ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວໄດ້ຮັບເອົາບົດຮຽນເພື່ອຄົ້ນຄວ້າໝູນໃຊ້ໃນພາກປະຕິບັດ, ພ້ອມດຽວກັນນັ້ນໃນຕໍ່ໜ້າ 2 ຝ່າຍຕ້ອງສືບຕໍ່ສົມທົບກັນຢ່າງແໜ້ນແຟ້ນ ແລະ ຕັ້ງໜ້າຜັນຂະຫຍາຍບັນດາຂໍ້ຕົກລົງຮ່ວມມືລະຫວ່າງຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄລຍະ 2022 – 2026, ເພີ່ມທະວີການແລກປ່ຽນ ແລະ ແບ່ງປັນບົດຮຽນຂອງສອງພັກ ແລະ ສອງຄະນະ, ພິເສດແມ່ນການເມືອງ ທິດສະດີ, ການໂຄສະນາເຜີຍແຜ່, ວາລະສານ-ການພິມຈຳໜ່າຍ; ຍູ້ແຮງການປະດິດສ້າງບັນດາວິທີການຮ່ວມມື, ສຸມໃສ່ຍົກສູງຄຸນນະພາບ ແລະ ປະສິດທິຜົນ, ປະກອບສ່ວນນຳການພົວພັນຮ່ວມມືລະຫວ່າງສອງປະເທດໃນຂົງເຂດວຽກງານໂຄສະນາອົບຮົມໃຫ້ຂຶ້ນສູ່ລະດັບສູງໃໝ່.