ພະນັກງານຂອງມະຫາວິທະຍາໄລ ສຸພານຸວົງ ເຂົ້າຢ້ຽມຊົນ ແລະ ເກັບກຳຂໍ້ມູນຢູ່ ຫ້ອງສະໝຸດ
ຄະນະໂຄສະນາອົບຮົມສູນກາງພັກ
ໃນຕອນບ່າຍຂອງວັນທີ 26 ສິງຫາ 2024 ທີ່ຫ້ອງສະໝຸດ ຄະນະໂຄສະນາອົບຮົມສູນກາງພັກ ຕາງໜ້າໃຫ້ພະແນກສຳເນົາ ແລະ ຫ້ອງສະໜຸດ ໂດຍທ່ານນາງ ທິບພະຈັນ ວົງລໍຄຳ ໄດ້ໃຫ້ການຕອນຮັບຄະນະພະນັກງານ ມະຫາວິທະຍາໄລ ສຸພານຸວົງ ແຂວງຫຼວງພະບາງ ນຳພາໂດຍທ່ານ ສອນສະນິດ ບຸນຕາວົງ ພ້ອມຄະນະຈຳນວນ 4 ທ່ານ ເພື່ອມາຢ້ຽມຊົມຫ້ອງສະໝຸດ ຄອສພ ແລະ ເກັບກຳຂໍ້ມູນເຂົ້າໃນການຄົ້ນຄວ້າວິທະຍາສາດ.
ໃນການມາຄັ້ງນີ້ ທ່ານ ສອນສະນິດ ບຸນຕາວົງ ກໍໄດ້ສະເໜີຈຸດປະສົງຂອງການລົງເກັບກຳຂໍ້ມູນ ເພື່ອປະກອບການຄົ້ນຄວ້າ ວິທະຍາສາດໃນຫົວຂໍ້ຕາມຮອຍ ປະທານ ສຸພານຸວົງ ກໍລະນີສືກສາ: ການຮຽນຮູ້ແບບຢ່າງທີ່ດີ ເພື່ອການພັດທະນາ ເປັນຕົ້ນແມ່ນ: ບັນດາຮູບພາບ, ວິດີໂອ, ເອກະສານ ແລະ ຮູບຖ່າຍພາບຕ່າງໆກ່ຽວກັບຊີວິດ ແລະ ຜົນງານ ຂອງປະທານ ສຸພານຸວົງ, ໃນນັ້ນພະນັກງານທີ່ຮັບຜິດຊອບ ວຽກງານຫ້ອງສະໝຸດກໍໄດ້ຕອບສະໝອງ ແລະ ແນະນຳເອກະສານຈຳນວນໜຶ່ງເພື່ອເປັນຂໍ້ມູນ ໃນການສືກສາຄົ້ນຄ້ວາ ເປັນຕົ້ນແມ່ນ: ປຶ້ມສູນທອນພົດ ຂອງສະຫາຍ ສຸພານຸວົງ ກຳມະການກົມການເມືອງ ຄະນະບໍລິຫານງານສູນກາງພັກ ໃນພິທີໄຂກອງປະຊຸມໃຫຍ່ຄັ້ງທີ lll ຂອງພັກປະຊາຊົນປະຕິວັດລາວ; ປຶ້ມລະນຶກວັນເກີດຄົບຮອບ 100 ປີ ປະທານ ສຸພານຸວົງ ແລະ ຂໍ້ມູນອື່ນໆກ່ຽວຂ້ອງຈໍານວນໜຶ່ງ.
ໃນໂອກາດການມາຢ້ຽມຊົມຫ້ອງສະໝຸດ ຄອສພ ແລະ ເກັບກຳຂໍ້ມູນໃນຄັ້ງນີ້ ຕາງໜ້າໃຫ້ຄະນະລົງເກັບກຳຂໍ້ມູນໂດຍແມ່ນທ່ານ ສອນສະນິດ ບຸນຕາວົງ ຫົວໜ້າພະແນກພັກ ແລະ ອົງການຈັດຕັ້ງມະຫາຊົນ ຈາກມະຫາວິທະຍາໄລ ສຸພານຸວົງ ໄດ້ກ່າວສະແດງຄວາມຂອບໃຈເປັນຢ່າງສູງ ຕໍ່ຄະນະພັກ, ຄະນະນຳ ຄະນະໂຄສະນາອົບຮົມສູນກາງພັກ ທີ່ໄດ້ໃຫ້ການຕ້ອນຮັບ ແລະ ອຳນວຍຄວາມສະດວກແກ່ຄະນະຂອງພວກເຮົາໃນການລົງມາເກັບກຳຂໍ້ມູນໃນຄັ້ງນີ້ ເພື່ອເປັນຂໍ້ມູນໃນການຄົ້ນຄວ້າວິທະຍາສາດໃນຫົວຂໍ້: ຕາມຮອຍປະທານ ສຸພານຸວົງ ກໍລະນີສືກສາ: ການຮຽນຮູ້ແບບຢ່າງທີ່ດີເພື່ອການພັດທະນາ.
ຂ່າວ: ພອນວິໄລ
