ຄະນະຊາວໜຸ່ມ ຄະນະໂຄສະນາອົບຮົມສູນກາງພັກເຂົ້າຮ່ວມພິທີລະນຶກວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ
ໃນຕອນເຊົ້າວັນທີ 12 ທັນວາ 2024. ຄະນະຊາວໜຸ່ມ ຄະນະໂຄສະນາອົບຮົມສູນກາງພັກເຂົ້າຮ່ວມພິທີລະນຶກວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ, ຢູ່ທີ່ ຫໍພິພິທະພັນ ໄກສອນ ພົມວິຫານ (ຫຼັກ6) ນຳພາໂດຍ ສະຫາຍ ພຸວຽງ ພົງສະຫວັດດີ ຄະນະບໍລິຫານງານຊາວໜຸ່ມ ຄອສພ ພ້ອມດ້ວຍຄະນະ. ໃນພິທີດ່ັງກ່າວປະກອບມີຫຼາຍພາກສ່ວນເຂົ້າຮ່ວມໃນນັ້ນມີ ນັກຮຽນ, ນັກສຶກສາພາຍໃນນະຄອນຫຼວງວຽງຈັນ, ພະນັກງານທະຫານຕຳຫຼວດ, ພະນັກງານລັດຖະກອນຕະຫຼອດຮອດປະຊາຊົນ.
ໃນພິທີໄດ້ຮັບຟັງການປາຖະກະຖາລະນຶກເລົ່າມູນເຊື້ອຊີວິດ ແລະ ພາລະກິດປະຕິວັດ ຂອງປະທານ ໄກສອນ ພົມວິຫານ, ພ້ອມນັ້ນຍັງໄດ້ເຂົ້າຢ້ຽມຊົມ ທັດສະນະສຶກສາ ອານຸສອນສະຖານ ຂອງປະທານໄກສອນ ພົມວິຫານ ເພື່ອສ້າງຄວາມຮັບຮູ້ ແລະ ຮໍ່າຮຽນເອົາແບບແຜນດຳລົງຊີວິດ, ພາລະກິດການເຄື່ອນໄຫວ, ອຸດົມການຂອງເພິ່ນທີ່ມີຕໍ່ປະ ເທດຊາດ, ຕໍ່ປະຊາຊົນ. ປະທານ ໄກສອນ ພົມວິຫານ ເປັນຜູ້ນຳທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ ຕໍ່ສູ້ຢ່າງອົງອາດກ້າແກ່ນ ແລະ ພິລະອາດຫານ, ເດັດດ່ຽວໜ້ຽວແໜ້ນ ຍາມໃດກໍຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະມີຄວາມສາມັກຄີຮັກແພງເພື່ອນມິດສະຫາຍດ້ວຍຄວາມຈິງຈັງ ແລະ ຈິງໃຈ, ມີແບບແຜນການດຳລົງຊີວິດແບບລຽບງ່າຍ ແລະ ຊື່ສັດສຸດຈະລິດ, ເປັນນັກປັນຍາຊົນຜູ້ຍິ່ງໃຫຍ່ ທີ່ມີຄວາມມານະອົດທົນ ທັດສະນະຫຼັກໝັ້ນ ແລະ ນ້ຳໃຈຮັກຊາດອັນດູດດື່ມ, ມີຈິດໃຈຕໍ່ສູ້ຢ່າງອົງອາດກ້າຫານ, ມີນ້ຳໃຈເສຍສະລະອັນສູງສົ່ງເພື່ອປະເທດຊາດ ແລະ ປະ ຊາຊົນ. ໃນຕະຫຼອດຊີວິດການປະຕິວັດພາລະກິດຂອງເພິ່ນບໍ່ວ່າຈະຢູ່ໃນຕຳແໜ່ງໃດ ໃນຄວາມຮັບຜິດຊອບອັນໃດ ເພິ່ນກໍໄດ້ອຸທິດເຫື່ອແຮງ, ສະຕິປັນຍາ ໝົດຈິດໝົດໃຈດ້ວຍຫົວຄິດປະດິດສ້າງຂອງຕົນເອງໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເອກະລາດອະທິປະໄຕຂອງຊາດ ແລະ ຄວາມອຸດົມ ສົມບູນພູນສຸກຂອງປະຊາຊົນລາວ.
ຫຼັງຈາກນັ້ນຍັງມີກິດຈະກຳຖາມ-ຕອບແລກຂອງລາງວັນ, ວາງສະແດງຈຳໜ່າຍປຶ້ມ ແລະ ເຄື່ອງຫັດຖະກຳລາວຈຳນວນໜຶ່ງອີກດ້ວຍ.
