ກົມໂຄສະນາ ຄອສພ ແລະ ກົມອົບຮົມ ສຊປລ ແລກປ່ຽນບົດຮຽນການເຄື່ອນໄຫວວຽກງານວິຊາສະເພາະ
ໃນວັນທີ 04 ກໍລະກົດ 2025 ທີ່ຫ້ອງປະຊຸມໂຕະມົນຊັ້ນ 2 ຂອງຄະນະໂຄສະນາອົບຮົມສູນກາງພັກ (ຄອສພ), ກົມໂຄສະນາ ແລະ ກົມອົບຮົມຂອງສູນກາງຊາວໜຸ່ມປະຊາຊົນປະຕິວັດລາວ (ສຊປລ) ໄດ້ພົບປະແລກປ່ຽນ ແລະ ຖອດຖອນບົດຮຽນ ການເຄື່ອນໄຫວວຽກງານວິຊາສະເພາະ ເຊິ່ງກັນ ແລະ ກັນ, ເປັນກຽດເຂົ້າຮ່ວມມີ ທ່ານ ອານົງສັກ ອິນທະວົງ ຄະນະພັກ ຫົວໜ້າກົມໂຄສະນາ, ທ່ານ ສຸລິຍາ ແກ້ວພິລາວົງ ເລຂາທິການ ຄະນະພັກ ຫົວໜ້າກົມອົບຮົມ ສຊປລ ແລະ ພະນັກງານທີ່ກ່ຽວຂ້ອງ ຂອງທັງສອງຝ່າຍເຂົ້າຮ່ວມ.
ໃນກອງປະຊຸມ, ທ່ານ ອານົງສັກ ອິນທະວົງ ໄດ້ກ່າວວ່າ: ອີງໃສ່ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ໂດຍສະເພາະວຽກງານໂຄສະນາອົບຮົມການເມືອງ-ແນວຄິດ, ກົມໂຄສະນາພວກເຮົາໃນນາມກົມວິຊາການຫຼັກຂອງ ຄອສພ ໄດ້ສຸມໃສ່ເຄື່ອນໄຫວວຽກງານຂອງຕົນ ຕາມພາລະບົດບາດທີ່ຂັ້ນເທິງໄດ້ມອບໝາຍໃຫ້ດ້ວຍຄວາມຮັບຜິດຊອບສູງ ໂດຍຜ່ານການໂຄສະນາ-ປາຖະກະຖາ, ໂຄສະນາຜ່ານສື່, ໂຄສະນາທາງເອເລັກໂທຣນິກ, ໂຄສະນາເຄື່ອນທີ່ ແລະ ໂຄສະນາທາງວາລະສານໂຄສະນາ. ພ້ອມກັນນີ້, ທ່ານຫົວໜ້າກົມໂຄສະນາ ຄອສພ ຍັງໄດ້ຍົກໃຫ້ເຫັນບາງບັນຫາທີ່ຈະຕ້ອງໄດ້ປັບປຸງແກ້ໄຂ ແລະ ທິດທາງແຜນການເຄື່ອນໄຫວວຽກງານວິຊາສະເພາະຂອງກົມໃນຕໍ່ໜ້າ.
ຫຼັງຈາກນັ້ນ, ທ່ານ ສຸລິຍາ ແກ້ວພິລາວົງ ໄດ້ກ່າວວ່າ: ກົມອົບຮົມພວກເຮົາ ກໍເປັນກົມວິຊາການຫຼັກຂອງ ສຊປລ ມີພາລະບົດບາດໂຄສະນາອົບຮົມການເມືອງ-ແນວຄິດ ໃຫ້ແກ່ຖັນແຖວຊາວໜຸ່ມ-ເຍົາວະຊົນລາວຜູ້ໜຸ່ມນ້ອຍ ໃນທົ່ວສັງຄົມ ໂດຍອີງໃສການເຜີຍແຜ່ເອກະສານ ແລະ ວິທະຍາກອນຂຶ້ນຫ້ອງຝຶກອົບຮົມ ຈາກຄະນະໂຄສະນາອົບຮົມສູນກາງພັກ ເວົ້າລວມ, ເວົ້າສະເພາະ ຈາກກົມໂຄສະນາ ຄອສພ ທີ່ພວກເຮົາຖືເປັນແມ່ແບບໃນການເຄື່ອນໄຫວວຽກງານວິຊາສະເພາະໃນໄລຍະທີ່ຜ່ານມາ ແລະ ກໍ່ປາສະຈາກບໍ່ໄດ້ກໍຄືຂໍ້ຫຍຸ້ງຍາກ ທີ່ຈະຕ້ອງໄດ້ສືບຕໍ່ປັບປຸງແກ້ໄຂ ແລະ ທິດທາງແຜນການໃນຕໍ່ໜ້າຈໍຈະສືບຕໍ່ຮ່ວມມືປະທານສານກັບກົມໂຄສະນາ ຄອສພ ຕໍ່ໄປ.
ໃນຕອນທ້າຍພິທີ, ຕາງໜ້າກົມອົບຮົມ ສຊປລ ໄດ້ມອບເຄື່ອງອຸປະຖໍາໃຫ້ແກ່ກົມໂຄສະນາ ຄອສພ ເພື່ອນໍາໄປມອບເປັນລາງ ວັນຖາມ-ຕອບຄໍາຖາມ ໃນເວລາລົງເຄື່ອນໄຫວວຽກງານໂຄສະນາເຄື່ອນທີ່ຢູ່ທ້ອງຖິ່ນຈໍານວນໜຶ່ງ ເຊິ່ງລວມມູນຄ່າ 17,000,000 ກວ່າກີບ ແລະ ຕາງໜ້າກົມໂຄສະນາ ຄອສພ ໄດ້ມອບໃບກຽດຕິຄຸນໃຫ້ແກ່ກົມອົບຮົມ ສຊປລ.
(ພາບ: ດາວ-ຂ່າວ: ມີໄຊ)