ໃນຕອນເຊົ້າຂອງວັນທີ 28 ຕຸລາ 2025, ຄະນະນໍາ ຄະນະໂຄສະນາອົບຮົມແຂວງ ສາລະວັນ ນໍາໂດຍ ສະຫາຍ ມະໄລວອນ ສີປະເສີດ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ ສາລະວັນ ພ້ອມດ້ວຍຄະນະ ໄດ້ເຂົ້າພົບປະກັບ ຄະນະນໍາ ຄະນະໂຄສະນາອົບຮົມສູນກາງພັກ ເຊິ່ງນໍາໂດຍ ສະຫາຍ ລາວປາວຊົງ ນະວົງໄຊ ກໍາມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ທີ່ຫ້ອງຮັບແຂກຊັ້ນ 5 ຄະນະໂຄສະນາອົບຮົມສູນກາງພັກ.
ໃນໂອກາດດັ່ງກ່າວ ສະຫາຍ ລາວປາວຊົງ ນະວົງໄຊ ກໍາມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງ ຕໍ່ການມາຢ້ຽມຢາມ ພົບປະຂອງ ຄະນະນໍາ ຄະນະໂຄສະນາອົບຮົມແຂວງ ສາລະວັນ ຄັ້ງນີ້ ເພື່ອຮັດແໜ້ນຄວາມສາມັກຄີລະຫວ່າງສູນກາງ ແລະ ທ້ອງຖິ່ນ ເວົ້າລວມ ເວົ້າສະເພາະ ແມ່ນການເຄື່ອນໄຫວວຽກງານໂຄສະນາອົບຮົມກໍຄືຂົງເຂດວຽກງານການເມືອງ-ແນວຄິດ ຈາກນັ້ນ ສະຫາຍໄດ້ລາຍງານສະພາບການປັບປຸງກົງຈັກການຈັດຕັ້ງພາຍໃນ ຄອສພ ຫຼັງໄດ້ຮັບການມອບໂອນວຽກງານຖະແຫຼງຂ່າວ-ສື່ມວນຊົນ ມາຂຶ້ນກັບຄະນະໂຄສະນາອົບຮົມສູນກາງພັກ ແລະ ສະພາບລວມໃນການເຄື່ອນໄຫວວຽກງານໃນໄລຍະຜ່ານມາ ຕໍ່ສະຫາຍ ມະໄລວອນ ສີປະເສີດ ຊາບ.
ໃນການເຂົ້່່າພົບປະຄະນະນໍາ ຄອສພ ຄັ້ງນີ້: ສະຫາຍ ມະໄລວອນ ສີປະເສີດ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ ສາລະວັນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນພ້ອມທັງລາຍງານກ່ຽວກັບການຍົກຍ້າຍມາປະຈໍາການຢູ່ຄະນະໂຄສະນາອົບຮົມແຂວງ ຕໍ່ ຄອສພ; ພ້ອມທັງ ລາຍງານການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການເຄື່ອນໄຫວໃນຕໍ່ໜ້າກ່ຽວກັບການປັບປຸງກົງຈັກການຈັດຕັ້ງ, ການຊັບຊ້ອນພະນັກງານພາຍໃນຄອຮ.ຂ.
ພາຍຫຼັງ ຄະນະໂຄສະນາອົບຮົມແຂວງ ເຮັດວຽກກັບ ຄະນະນໍາ ຄອສພ ສໍາເລັດ ໃນຕອນບ່າຍໄດ້ສືບຕໍ່ເຮັດວຽກຮ່ວມກັບ ບັນດາກົມ ຂອງຄະນະໂຄສະນາອົບຮົມສູນກາງພັກ ເຊັ່ນ: ກົມອົບຮົມ, ກົມໂຄສະນາ ແລະ ກົມຈັດຕັ້ງ-ພະນັກງານ.
