ຮອງຫົວໜ້າຄະນະໂຄສະນາອົບຮົມສູນກາງພັກ
ລົງເຄື່ອນໄຫວຕິດຕາມ, ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່ແຂວງສະຫວັນນະເຂດ
ໃນລະຫວ່າງວັນທີ 15-16 ສິງຫາ 2024, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະວິຊາການ ໄດ້ລົງເຄື່ອນໄຫວຕິດຕາມ, ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່ແຂວງສະຫວັນນະເຂດ ເພື່ອຕິດ ຕາມ, ເກັບກຳສະພາບແນວຄິດ-ຫາງສຽງສັງຄົມທີ່ພົ້ນເດັ່ນຂອງຖັນແຖວພະນັກງານ-ລັດຖະກອນ, ສະມາ ຊິກພັກ, ກຳລັງປະກອບອາວຸດ ແລະ ປະຊາຊົນລາວບັນດາເຜົ່າ ໃນການຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ lX ຂອງລັດ ໃນທ້າຍສະໄໝ ກໍຄືແຜນພັດທະນາເສດຖະກິດ-ສັງຄົມຂອງທ້ອງຖິ່ນໃນແຕ່ລະໄລຍະ, ຕິດຕາມການກະກຽມດໍາເນີນກອງປະຊຸມໃຫຍ່ 3 ຂັ້ນ; ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ຂອງບັນດາຊັ້ນຄົນຕ່າງໆ ຕໍ່ສະພາບຄວາມຫຍຸ້ງຍາກທາງດ້ານເສດຖະກິດ ແລະ ບັນຫາເຄັ່ງຮ້ອນທີ່ປະເທດເຮົາພວມປະເຊີນໜ້າຢູ່ໃນປັດຈຸບັນ ເພື່ອຄົ້ນຄວ້າຊອກວິທີການສຶກສາອົບຮົມການເມືອງ-ແນວຄິດ, ຊີ້ແຈງອະທິບາຍ ແລະ ສະເໜີແນະມາດຕະການແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການ. ໃນວັນທີ 15 ສິງຫາ 2024 ກອງປະຊຸມຮັບສ່ອງແສງສະພາບແນວຄິດ-ຫາງສຽງສັງຄົມ ທົ່ວແຂວງສະຫວັນນະເຂດ ໄດ້ຈັດຂຶ້ນຢູ່ທີ່ສະໂມສອນຂອງພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ໂດຍການເປັນປະທານຮ່ວມຂອງສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ແລະ ອົງການຈັດຕັ້ງມະຫາຊົນ ໂດຍມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ, ຄະນະວິຊາການຈາກຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ ແລະ ຫົວໜ້າ-ຮອງຫົວໜ້າຄະນະໂຄສະນາອົບຮົມບັນດາເມືອງຈໍານວນໜຶ່ງ ເຂົ້າຮ່ວມທັງໝົດຈໍານວນ 68 ສະຫາຍ, ຍິງ 19 ສະຫາຍ;
ໃນກອງປະຊຸມ ສະຫາຍ ຄໍາຫຼ້າ ພະພິທັກ ຮອງຫົວໜ້າໂຄສະນາອົບຮົມແຂວງສະຫວັນນະເຂດ ໄດ້ລາຍງານກ່ຽວກັບການຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ທີ່ພົ້ນເດັ່ນທັງດ້ານຕັ້ງໜ້າ ແລະ ດ້ານຫຍໍ້ທໍ້ທີ່ຄວນສືບຕໍ່ປັບປຸງແກ້ໄຂຂອງແຂວງ ໃຫ້ທີ່ປະຊຸມໄດ້ຮັບຊາບໂດຍສັງເຂດ; ຫຼັງຈາກນັ້ນ, ບັນດາຜູ້ແທນກອງປະຊຸມ ກໍໄດ້ຜັດປ່ຽນກັນຂຶ້ນລາຍງານສະພາບແນວຄິດ-ຫາງສຽງສັງຄົມ ທີ່ເກີດຂຶ້ນຢູ່ພາຍໃນຂະແໜງການຂອງຕົນ, ພ້ອມທັງນໍາສະເໜີແນວທາງວິທີການແກ້ໄຂທີ່ສອດຄ່ອງ ແລະ ທັນການ ເພື່ອພ້ອມກັນນໍາພາແນວຄິດສັງຄົມໃຫ້ມີຄວາມຮັບຮູ້ ເຂົ້າໃຈທີ່ຖືກຕ້ອງ ແລະ ເປັນເອກະພາບກັນໃນທົ່ວສັງຄົມ; ຕອນທ້າຍຂອງກອງປະຊຸມ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ຍັງໄດ້ໃຫ້ກຽດໂອ້ລົມ ໂດຍໄດ້ເນັ້ນໜັກຄະນະພັກ-ອົງການປົກຄອງແຕ່ລະຂັ້ນ ຕ້ອງເພີ່ມທະວີການສຶກສາອົບຮົມນໍາພາແນວຄິດໃຫ້ພະນັກງານ, ທະ ຫານ, ຕໍາຫຼວດ ແລະ ປະຊາຊົນບັນດາເຜົ່າ ທີ່ຢູ່ໃນຂົງເຂດຄວາມຮັບຜິດຊອບຂອງຕົນ ມີແນວຄິດທຸ່ນທ່ຽງ, ຮັບຮູ້ເຂົ້າໃຈເລິກເຊິ່ງກ່ຽວກັບສະພາບຄວາມຫຍຸ້ງຍາກ, ບັນຫາເຄັ່ງຮ້ອນທີ່ປະເທດເຮົາກໍາລັງປະເຊີນໜ້າຢູ່ ແລະ ເປັນເອກະພາບສູງກັບທິດທາງແກ້ໄຂຂອງຂັ້ນເທິງ, ມີສະຕິຕື່ນຕົວເປັນເຈົ້າການປະກອບສ່ວນເຂົ້າໃນການປົກປັກຮັກສາ ແລະ ພັດທະນາແຂວງໃຫ້ມີບາດກ້າວຂະຫຍາຍຕົວ, ຕ້ອງຖືຄວາມສໍາຄັນວຽກງານການ ເມືອງ-ແນວຄິດ ເວົ້າລວມ, ເວົ້າສະເພາະ ວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນແຕ່ລະໄລຍະ ເພື່ອກໍາໄດ້ສະພາບຄວາມເປັນຈິງທີ່ເກີດຂຶ້ນ, ເປັນເຈົ້າການວິເຄາະ, ວິໄຈສະພາບແນວຄິດ-ຫາງສຽງສັງຄົມທີ່ມີຕໍ່ການນຳພາຂອງພັກ ແລະ ການຄຸ້ມຄອງຂອງລັດໃຫ້ເລິກເຊິ່ງ, ເພີ່ມຄວາມແຫຼມຄົມໃນການອະທິບາຍຕອບແກ້ບັນຫາຕ່າງໆ ທີ່ສັງຄົມໃຫ້ຄວາມສົນໃຈໃຫ້ທ່ວງທັນສະພາບການ;
ໃນຕອນບ່າຍຂອງວັນດຽວກັນ ສະຫາຍ ລາວປາວຊົ່ງ ນະວົງໄຊ ຍັງໄດ້ສືບຕໍ່ເປັນປະທານກອງປະຊຸມແລກປ່ຽນບົດຮຽນທາງດ້ານວິຊາການຮ່ວມກັບ ຄະນະໂຄສະນາອົບຮົມແຂວງ ແລະ ຄະນະໂຄສະນະອົບຮົມເມືອງຈໍານວນໜຶ່ງ; ໂດຍສະຫາຍ ຄໍາວິໃສ ຜຸຍຍະວົງ ຄະນະປະຈຳພັກແຂວງ, ຫົວໜ້າໂຄສະ ນາອົບຮົມແຂວງສະຫວັນນະເຂດ ໄດ້ລາຍງານສະພາບການຈັດຕັ້ງປະຕິບັດວຽກງານການເມືອງ-ແນວຄິດ ກໍຄືວຽກງານໂຄສະນາອົບຮົມໃນໄລຍະຜ່ານມາ, ເຊິ່ງມີທັງດ້ານດີ-ຜົນສໍາເລັດທີ່ຄວນເສີມຂະຫຍາຍ, ດ້ານຄົງຄ້າງ-ສິ່ງທ້າທາຍຕ່າງໆ ແລະ ທິດທາງແຜນການໃນການຈັດຕັ້ງປະຕິບັດວຽກງານໂຄສະນາອົບຮົມໃນຕໍ່ໜ້າ; ພ້ອມດຽວກັນນັ້ນ, ບັນດາຜູ້ຕາງໜ້າຂອງຄະນະໂຄສະນາອົບຮົມເມືອງ ກໍໄດ້ຜັດປ່ຽນກັນຂຶ້ນປະ ກອບຄຳເຫັນໃນການຈັດຕັ້ງປະຕິບັດວຽກງານຢູ່ພາຍໃນເມືອງຂອງຕົນໃຫ້ທີ່ປະຊຸມໄດ້ຮັບຊາບ ຕິດພັນກັບການລົງເລິກແລກປ່ຽນບົດຮຽນທາງດ້ານວິຊາການກັບ ຄະນະວິຊາການຂອງຄະນະໂຄສະນາອົບຮົມສູນກາງພັກ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານໂຄສະນາອົບຮົມ ມີປະສິດທິພາບ ແລະ ຫັນ ປ່ຽນໄປສູ່ຄຸນນະພາບໃໝ່ຢ່າງແຂງແຮງຂຶ້ນກວ່າເກົ່າ; ໃນຕອນທ້າຍ ປະທານກອງປະຊຸມ ໄດ້ມີຄໍາເຫັນຊີ້ ນໍາຕໍ່ກອງປະຊຸມ ໂດຍສະຫາຍໄດ້ເນັ້ນໃຫ້ພວກເຮົາຕ້ອງຖືສໍາຄັນການເມືອງ-ແນວຄິດ ເວົ້າລວມ, ເວົ້າສະ ເພາະ ວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່, ຍົກສູງຄຸນນະພາບທາງດ້ານເນື້ອໃນໃນການສ່ອງແສງລາຍງານ ແລະ ວິທີການຈັດຕັ້ງເຄື່ອນໄຫວໃຫ້ເປັນລະບົບ, ປັບປຸງກົນໄກການປະສານງານ, ການແລກປ່ຽນຂໍ້ມູນຕ່າງໆ ເພື່ອຮັບປະກັນການເປັນເສນາທິການຊ່ວຍຄະນະພັກ, ອົງການປົກຄອງແຕ່ລະຂັ້ນໄດ້ຢ່າງມີປະສິດທິພາບ ສາມາດກໍາໄດ້ສະພາບແນວຄິດ-ຫາງສຽງສັງຄົມຂອງບັນດາຊັ້ນຄົນຕ່າງໆໃນສັງຄົມ ຕໍ່ການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເພື່ອສຶກສາອົບຮົມນໍາພາແນວຄິດ, ສ້າງຄວາມຮັບຮູ້ ເຂົ້າໃຈທີ່ເປັນເອກະພາບກັນໃນທົ່ວສັງຄົມ;
ພ້ອມກັນນັ້ນ, ໃນວັນທີ 16 ສິງຫາ 2024, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະວິຊາການ ຍັງໄດ້ສືບຕໍ່ເຄື່ອນໄຫວເຮັດວຽກຢູ່ດ່ານສາກົນຂົວມິດຕະພາບລາວ-ໄທ 2 ແລະ ຢ້ຽມຊົມໂຮງງານ ນໍ້າດື່ມ ແລະ ນໍ້າກ້ອນໂລມາຄໍາ ຢູ່ແຂວງສະຫວັນນະເຂດອີກດ້ວຍ.
ພາບໂດຍ ສຸກັນຍາ ເນື່ອງມະນີ.
ຂ່າວໂດຍ ຄອນສະໄໝ ກາວັນ.
