ຮອງຫົວໜ້າຄະນະໂຄສະນາອົບຮົມສູນກາງພັກ
ລົງເຄື່ອນໄຫວຕິດຕາມ, ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່ແຂວງຈໍາປາສັກ
ໃນລະຫວ່າງວັນທີ 12-14 ສິງຫາ 2024, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະວິຊາການ ໄດ້ລົງເຄື່ອນໄຫວຕິດຕາມ, ຊຸກຍູ້ວຽກງານແນວຄິດ-ຫາງສຽງສັງຄົມ ຢູ່ແຂວງຈໍາປາສັກ ເພື່ອຕິດຕາມ,ເກັບກຳສະພາບແນວຄິດ-ຫາງສຽງສັງຄົມທີ່ພົ້ນເດັ່ນທາງດ້ານຕັ້ງໜ້າ ແລະ ດ້ານຫຍໍ້ທໍ້ທີ່ເກີດຂຶ້ນໃນທ້ອງ ຖິ່ນຕ່າງໆ ໃນການຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ lX ຂອງລັດ ໃນທ້າຍສະໄໝ ກໍຄືແຜນພັດທະນາເສດຖະກິດ-ສັງຄົມຂອງທ້ອງຖິ່ນໃນແຕ່ລະໄລຍະ ແລະ ຂະບວນການກະກຽມດໍາເນີນກອງປະຊຸມໃຫຍ່ 3 ຂັ້ນ; ສະ ພາບແນວຄິດ-ຫາງສຽງສັງຄົມຂອງຖັນແຖວພະນັກງານ-ລັດຖະກອນ, ສະມາຊິກພັກ, ກຳລັງປະກອບອາ ວຸດ ແລະ ປະຊາຊົນລາວບັນດາເຜົ່າ ຕໍ່ສະພາບຄວາມຫຍຸ້ງຍາກທາງດ້ານເສດຖະກິດ ແລະ ບັນຫາເຄັ່ງ ຮ້ອນທີ່ປະເທດເຮົາພວມປະເຊີນໜ້າຢູ່ໃນປັດຈຸບັນ ເພື່ອຄົ້ນຄວ້າຊອກວິທີການສຶກສາອົບຮົມການເມືອງ-ແນວຄິດ, ຊີ້ແຈງອະທິບາຍ ແລະ ສະເໜີແນະມາດຕະການແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການ. ໃນວັນທີ 12 ສິງຫາ 2024 ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ເປັນປະທານກອງປະຊຸມຮັບສ່ອງແສງສະພາບແນວຄິດ-ຫາງສຽງສັງຄົມ ທົ່ວແຂວງຈໍາປາສັກ ຢູ່ທີ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງຈໍາປາສັກ ໂດຍມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ, ຄະນະວິຊາການຈາກຄະນະໂຄສະນາອົບຮົມສູນກາງພັກ, ຄະ ນະໂຄສະນາອົບຮົມແຂວງ ແລະ ຫົວໜ້າ-ຮອງຫົວໜ້າຄະນະໂຄສະນາອົບຮົມບັນດາເມືອງທົ່ວແຂວງຈໍາປາສັກ ເຂົ້າຮ່ວມທັງໝົດຈໍານວນ 79 ສະຫາຍ, ຍິງ 30 ສະຫາຍ;
ໃນກອງປະຊຸມດັ່ງກ່າວ ສະຫາຍ ປອ ສຸປານີ ສິລິປຸນໂຍ ຄະນະປະຈຳພັກແຂວງ, ຫົວໜ້າໂຄສະ ນາອົບຮົມແຂວງຈໍາປາສັກ ໄດ້ຂຶ້ນລາຍງານສະພາບແນວຄິດ-ຫາງສຽງສັງຄົມທີ່ພົ້ນເດັ່ນຂອງແຂວງ ໃຫ້ທີ່ປະຊຸມໄດ້ຮັບຊາບ; ຫຼັງຈາກນັ້ນ, ບັນດາຜູ້ແທນກອງປະຊຸມ ກໍໄດ້ຜັດປ່ຽນກັນຂຶ້ນລາຍງານສະພາບແນວຄິດ-ຫາງສຽງສັງຄົມ ທີ່ເກີດຂຶ້ນຢູ່ພາຍໃນຂະແໜງການຂອງຕົນ ກໍຄືຢູ່ພາຍໃນແຂວງ, ພ້ອມທັງນໍາສະເໜີແນວທາງວິທີການແກ້ໄຂໃຫ້ສອດຄ່ອງ ແລະ ທັນການ ເພື່ອພ້ອມກັນນໍາພາແນວຄິດສັງຄົມໃຫ້ມີຄວາມຮັບຮູ້ ເຂົ້າໃຈທີ່ຖືກຕ້ອງ ແລະ ເປັນເອກະພາບກັນໃນທົ່ວສັງຄົມ; ຕອນທ້າຍຂອງກອງປະຊຸມ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ຍັງໄດ້ໃຫ້ກຽດໂອ້ລົມ ໂດຍສະຫາຍໄດ້ເນັ້ນໜັກໃຫ້ຄະນະພັກ, ອົງການປົກຄອງແຂວງຕ້ອງຖືສຳຄັນວຽກງານການເມືອງ-ແນວຄິດ ເວົ້າລວມ, ເວົ້າສະເພາະ ກໍແມ່ນວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່ນີ້, ເອົາໃຈໃສ່ສ້າງເງື່ອນໄຂໃນການຍົກລະດັບຄວາມຮູ້ຄວາມສາ ມາດຂອງຜູ້ຮັບຜິດຊອບ ຕິດພັນກັບການສະໜອງງົບປະມານຢ່າງເໝາະສົມ ເພື່ອເຮັດໃຫ້ການຈັດຕັ້ງປະຕິວຽກງານມີຄວາມສະດວກ ແລະ ມີປະສິດທິພາບສູງຂຶ້ນ, ເພີ່ມທະວີການສຶກສາອົບຮົມນຳພາແນວຄິດໃຫ້ຖັນແຖວສະມາຊິກພັັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາລາວເຜົ່າພາຍໃນແຂວງໃຫ້ມີຄວາມຮັບຮູ້-ເຂົ້າໃຈຕໍ່ສະພາບການທີ່ເກີດຂຶ້ນ, ເຊື່ອໝັ້ນ ແລະ ໃຫ້ການສະໜັບສະໜູນຕໍ່ມາດຕະການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດຂອງຂັ້ນເທິງ; ເປັນເຈົ້າການເກັບກຳ, ວິເຄາະ, ວິໄຈສະພາບແນວຄິດ-ຫາງສຽງສັງຄົມທີ່ມີຕໍ່ການນຳພາຂອງພັກ ແລະ ການຄຸ້ມຄອງຂອງລັດໃຫ້ເລິກເຊິ່ງ, ເພີ່ມຄວາມແຫຼມຄົມໃນການອະທິບາຍຕອບແກ້ບັນຫາຕ່າງໆ ທີ່ສັງຄົມໃຫ້ຄວາມສົນໃຈໃຫ້ທ່ວງທັນສະພາບການ ໂດຍສະເພາະ ໃນໄລຍະປັດຈຸບັນນີ້ ຕ້ອງສຸມໃສ່ການກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນ, ການສະເຫຼີມສະຫຼອງ 3 ວັນປະຫວັດສາດ ແລະ ການກະກຽມເປັນປະທານກອງປະ ຊຸມອາຊຽນ ໃນປີ 2024;
ໃນຕອນບ່າຍຂອງວັນດຽວກັນ ສະຫາຍ ລາວປາວຊົ່ງ ນະວົງໄຊ ຍັງໄດ້ສືບຕໍ່ເປັນປະທານກອງປະຊຸມແລກປ່ຽນບົດຮຽນທາງດ້ານວິຊາການຮ່ວມກັບ ຄະນະໂຄສະນາອົບຮົມແຂວງ ແລະ ຄະນະໂຄສະນະອົບຮົມເມືອງຈໍານວນໜຶ່ງ; ໂດຍສະຫາຍ ປອ ສຸປານີ ສິລິປຸນໂຍ ຄະນະປະຈຳພັກແຂວງ, ຫົວໜ້າໂຄ ສະນາອົບຮົມແຂວງຈໍາປາສັກ ໄດ້ລາຍງານສະພາບການຈັດຕັ້ງປະຕິບັດວຽກງານໂຄສະນາອົບຮົມໃນໄລ ຍະຜ່ານມາ, ເຊິ່ງມີທັງດ້ານດີ-ຜົນສໍາເລັດທີ່ຄວນເສີມຂະຫຍາຍ, ດ້ານຄົງຄ້າງ-ບັນຫາທ້າທາຍຕ່າງໆ ແລະ ທິດທາງແຜນການໃນການຈັດຕັ້ງປະຕິບັດວຽກງານໂຄສະນາອົບຮົມໃນຕໍ່ໜ້າ; ພ້ອມດຽວກັນນັ້ນ, ບັນດາຜູ້ຕາງໜ້າຂອງຄະນະໂຄສະນາອົບຮົມເມືອງ 5 ເມືອງ ກໍໄດ້ຜັດປ່ຽນກັນຂຶ້ນປະກອບຄຳເຫັນໃນການຈັດຕັ້ງປະຕິບັດວຽກງານຢູ່ພາຍໃນເມືອງຂອງຕົນໃຫ້ທີ່ປະຊຸມໄດ້ຮັບຊາບ; ພ້ອມດຽວກັນນັ້ນ, ຄະນະວິຊາການຂອງຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ-ເມືອງ ກໍໄດ້ລົງເລິກແລກປ່ຽນບົດຮຽນທາງດ້ານວິຊາການເຊິ່ງກັນ ແລະ ກັນ ໂດຍສະເພາະ ວຽກງານແນວຄິດ-ຫາງສຽງສັງ ຄົມ, ວຽກງານຄົ້ນຄວ້າ-ສັງລວມ ແລະ ວຽກງານຈັດຕັ້ງ-ພະນັກງານ ເພື່ອແນໃສ່ເຮັດໃຫ້ການຈັດຕັ້ງປະຕິ ບັດວຽກງານໂຄສະນາອົບຮົມ ມີປະສິດທິພາບ ແລະ ຫັນປ່ຽນໄປສູ່ຄຸນນະພາບໃໝ່ຢ່າງແຂງແຮງຂຶ້ນກວ່າເກົ່າ; ໃນຕອນທ້າຍ ປະທານກອງປະຊຸມ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ໂດຍສະຫາຍໄດ້ເນັ້ນໃຫ້ພວກເຮົາຕ້ອງຖືສໍາຄັນ ແລະ ຄວາມຈໍາເປັນຂອງວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່, ຍົກສູງຄຸນນະພາບທາງດ້ານເນື້ອໃນໃນການສ່ອງແສງລາຍງານ ແລະ ວິທີການ ຈັດຕັ້ງເຄື່ອນໄຫວໃຫ້ເປັນລະບົບ, ປັບປຸງກົນໄກການປະສານງານ, ການແລກປ່ຽນຂໍ້ມູນຕ່າງໆ ເພື່ອຮັບ ປະກັນການເປັນເສນາທິການຊ່ວຍຄະນະພັກ, ອົງການປົກຄອງແຕ່ລະຂັ້ນໄດ້ຢ່າງມີປະສິດທິພາບ;
ວັນທີ 13-14 ສິງຫາ 2024, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະວິຊາການ ໄດ້ສືບຕໍ່ເຄື່ອນໄຫວເຮັດວຽກຮ່ວມກັບຄະນະພັກ-ອົງການປົກຄອງເມືອງ, ຄະນະໂຄສະນາອົບຮົມເມືອງໂພນທອງ, ຄະນະພັກ-ອົງການປົກຄອງເມືອງ, ຄະນະໂຄສະນາອົບຮົມເມືອງຊະນະສົມບູນ ແລະ ຄະນະຄຸ້ມຄອງດ່ານສາກົນວັງເຕົ່າ-ຊ່ອງເມັກ, ສະມາຄົມຫັດຖະກໍາຕໍ່າຫູບທໍໄໝ ແລະ ຄອບຄົວພົ້ນເດັ່ນໃນການສ້າງເສດຖະ ກິດຄອບຄົວ ຂອງແຂວງຈໍາປາສັກ ເພື່ອຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານການເມືອງ-ແນວຄິດ ກໍຄືວຽກງານໂຄສະນາອົບຮົມ ໃຫ້ມີການຈັດຕັ້ງຢ່າງເປັນປົກກະຕິ, ຕໍ່ເນື່ອງ ມີຜົນສໍາເລັດດ້ວຍຄຸນນະພາບສູງ ແລະ ຫັນປ່ຽນໄປສູ່ຄຸນນະພາບໃໝ່ຢ່າງຕັ້ງໜ້າ.
ພາບໂດຍ ສຸກັນຍາ ເນື່ອງມະນີ & ຂ່າວໂດຍ ຄອນສະໄໝ ກາວັນ
