ຄະນະໂຄສະນາອົບຮົມສູນກາງພັກ ມອບເຄື່ອງຊ່ວຍເຫຼືອໄພພິບັດນໍ້າຖ້ວມ ຢູ່ນະຄອນຫຼວງວຽງຈັນ
ຄະນະໂຄສະນາອົບຮົມສູນກາງພັກ ນໍາໂດຍທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ນໍາເອົາເຄື່ອງໄປມອບ ເພື່ອຊ່ວຍເຫຼືອໄພພິບັດນໍ້າຖ້ວມ, ໃນຕອນແລງ ຂອງວັນທີ 14 ກັນຍາຜ່ານມາ ທີ່ຫ້ອງວ່າການປົກຄອງນະຄອນຫຼວງວຽງຈັນ.
ເປັນກຽດມອບໂດຍ ທ່ານ ປອ ຄໍາພັນ ເຜີຍຍະວົງ, ຮັບໂດຍ ທ່ານນາງ ຫຼຽນຄໍາ ວິລະພັນ ປະທານສະຫະພັນແມ່ຍິງນະຄອນຫຼວງວຽງຈັນ. ເຄື່ອງທີ່ນໍາມາມອບ ໃນຄັ້ງນີ້ປະກອບມີ: ເງິນສົດ ຈໍານວນ 30ລ້ານກີບ, ເຂົ້າຈ້າວ, ໝີ່ໄວໆ, ນໍ້າໝາກໄມ້ ແລະ ນໍ້າດື່ມ.
ໂອກາດນີ້ ທ່ານນາງ ຫຼຽນຄໍາ ວິລະພັນ ໄດ້ກ່າວສະແດງຄວາມຂອບໃຈເປັນຢ່າງສູງ ຕໍ່ທ່ານ ປອ ຄໍາພັນ ເຜີຍຍະວົງ ພ້ອມດ້ວຍຄະນະ ຊຶ່ງຍາມໃດກໍເປັນຫ່ວງ ແລະ ໃຫ້ຄວາມໃສ່ໃຈຢ່າງຈົດຈໍ່ຕໍ່ໄພພິບັດນ້ຳຖ້ວມນະຄອນຫຼວງໃນຄັ້ງນີ້.
ຈາກນັ້ນ ຄະນະນໍາ ຄອສພ ໄດ້ເດີນທາງໄປຢ້ຽມຢາມທ່າເຮືອຫຼັກ4 ເມືອງສີສັດຕະນາກ, ນະຄອນຫຼວງວຽງຈັນ ຊຶ່ງຖືກຕ້ອບຮັບ ຈາກ ທ່ານ ເດດສົງຄາມ ທໍາມະວົງ ເຈົ້າເມືອງສີສັດຕະນາກ, ເພື່ອໃຫ້ກໍາລັງໃຈໃນການເຮັດວຽກງານ ຂອງພະນັກງານ, ປະຊາຊົນທີ່ເຝົ້າຕິດຕາມ, ເວນຍາມ ລະດັບນໍ້າຂອງ ຂຶ້ນ-ລົດ ຕື່ມອີກ. ຢູ່ທີ່ທ່າເຮືອຫຼັກ4, ພໍ່, ແມ່, ປະຊາຊົນ ໄດ້ປະກອບສ່ວນຕັ້ງຄົວເຄື່ອນທີ່ເພື່ອປຸງແຕ່ງອາຫານ, ເຄື່ອງກິນ, ເຄື່ອງດື່ມ ໄວ້ຄອຍບໍລິການພະນັກງານ ກໍຄືເຈົ້າໜ້າທີ່ຮັກສາຄວາມສະຫງົບຢູ່ໃນຂອບເຂດທີ່ຕົນຮັບຜິດຊອບຢ່າງມີບັນຍາກາດຄືກຄື້ນ.
ຂ່າວ-ພາບ: ແສງຈັນ