ກອງປະຊຸມໃຫຍ່ຄັ້ງທີ II ຂອງກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ
ໃນຕອນເຊົ້າ ວັນທີ 25 ຕຸລາ 2024 ຢູ່ຫ້ອງປະຊຸມຊັ້ນ 5 ສໍານັກງານ ຄະນະໂຄສະນາອົບຮົມສູນກາງພັກ ( ຄອສພ ) ຫຼັກ 6 ກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ຄະນະໂຄສະນາອົບຮົມສູນກາງພັກ ໄດ້ຈັດກອງປະຊຸມໃຫຍ່ ຄັ້ງທີ II ຂຶ້ນພາຍໃຕ້ການເປັນປະທານຮ່ວມຂອງ ສະຫາຍ ວັນຕຸລາ ຣັກນຸດ ກໍາມະການຄະນະພັກ, ປະທານສະຫະພັນກໍາມະບານ ຄອສພ, ຫົວໜ້າກົມຂໍ້ມູນ-ຂ່າວສານ ແລະ ຝຶກອົບຮົມ ເຂົ້າຮ່ວມມີ: ສະຫາຍ ນ. ໄພວັນ ວັນນະໄຊ ຮອງປະທານກຳມະບານ ຄອສພ, ຕາງໜ້າ 3 ອົງການຈັດຕັ້ງມະຫາຊົນ ຂອງກົມຂໍ້ມູນຂ່າວສານ ແລະ ຝຶກອົບຮົມ, ຜູ້ຕາງໜ້າບັນດາກໍາມະບານຮາກຖານທົ່ວ ຄອສພ ແລະ ສະມາຊິກກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ເຂົ້າຮ່ວມ.
ໃນກອງປະຊຸມ, ສະຫາຍ ນ. ອິດໄຊທອງ ສົມມະນີ ປະທານຄະນະກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ໄດ້ຂຶ້ນກ່າວເປີດພິທີກອງປະຊຸມໃຫຍ່ ແລະ ຜ່ານບົດລາຍງານການເມືອງທັງ 2 ພາກ ເຊິ່ງຍົກໃຫ້ເຫັນບັນດາຜົນສຳເລັດການເຄື່ອນໄຫວວຽກງານ ໃນໄລຍະ 5 ປີ ຜ່ານມາ ນັບທັງດ້ານດີ, ດ້ານອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ2024-2029; ຈາກນັ້ນ ສະຫາຍ ບຸນເລີດ ສຸວັນນີ ຮອງປະທານຄະນະກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ໄດ້ຂຶ້ນຜ່ານບົດສໍາຫຼວດການນໍາພາລວມ ຂອງຄະນະກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມໃນຕະຫຼອດໄລຍະ 5 ປີຜ່ານມາ ແລະ ກ່າວລາໜ້າທີ່. ຫຼັງຈາກນັ້ນ ສະມາຊິກກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ກໍໄດ້ພ້ອມກັນໃຊ້ສິດປະຊາທິປະໄຕ ຂອງຕົນ ປ່ອນບັດເລືອກຕັ້ງເອົາຄະນະໜ່ວຍກຳມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມຊຸດໃໝ່, ຜົນການປ່ອນບັດ ແລະ ໃນກອງປະຊຸມຄັ້ງປະຖົມມະລຶກ ໄດ້ເປັນເອກະສັນເລືອກເອົາ ສະຫາຍ ພູວັນ ສຸວັນ ເປັນປະທານກຳມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ, ສະຫາຍ ນ. ຄຳສີ ວອນທານີ ເປັນຮອງປະທານ ແລະ ສະຫາຍ ບຸນເລີດ ສຸວັນນີ ເປັນຄະນະ.
ໃນຕອນທ້າຍກອງປະຊຸມ ສະຫາຍ ວັນຕຸລາ ຣັກນຸດ ກໍາມະການຄະນະພັກ, ປະທານສະຫະພັນກຳມະບານຄອສພ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ໄດ້ຕາງໜ້າໃຫ້ຂັ້ນເທິງໃຫ້ກຽດໂອ້ລົມ ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍຄະນະໜ່ວຍກໍາມະບານຮາກຖານກົມຂໍ້ມູນຂ່າວສານ ແລະ ຝຶກອົບຮົມ ກໍຄືສະມາຊິກກຳມະບານທຸກສະຫາຍທີ່ໄດ້ພ້ອມພຽງກັນສຸມໃສ່ປະຕິບັດວຽກງານຢ່າງຫ້າວຫັນຈົນສາມາດຍາດໄດ້ຜົນສໍາເລັດຫຼາຍຢ່າງ, ພ້ອມນີ້ສະຫາຍຍັງໄດ້ໃຫ້ທິດຊີ້ນໍາທີ່ສໍາຄັນ ສໍາລັບການຈັດຕັ້ງປະຕິບັດແຜນການເຄື່ອນໄຫວວຽກງານກຳມະບານໃນ 5 ປີຕໍ່ໜ້າ, ເອົາໃຈໃສ່ສຶກສາອົບຮົມໃຫ້ສະມາຊິກກໍາມະບານມີຄຸນທາດການເມືອງ, ມີຄຸນສົມບັດສິນທໍາປະຕິວັດໜັກແໜ້ນ, ມີຄວາມສາມັກຄີພາຍໃນໜັກແໜ້ນ, ສາມັກຄີພາຍນອກໃຫ້ດີ ແລະ ກວ້າງຂວາງ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ ແລະ ປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ດ້ວຍຄວາມຮັບຜິດຊອບສູງ ແລະ ເປັນເຈົ້າການ.
