ມອບ-ຮັບ ຄະນະບໍລິຫານງານຊາວໜຸ່ມ ຄອສພ ລະຫວ່າງ ຊຸດເກົ່າ (IV) ແລະ ຊຸດໃໝ່ (V)
ພິທີດັ່ງກ່າວ ໄດ້ຈັດຂຶ້ນໃນວັນທີ 01 ເມສາ 2025 ທີ່ຫ້ອງປະຊຸມຊັ້ນ2 ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ສາຄອນ ພົມມະລາດ ກຳມະການຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະບໍລິຫານງານຊາວໜຸ່ມ ຄອສພ ຊຸດເກົ່າ ແລະ ຊຸດໃໝ່ ແລະ ຕາງໜ້າສະມາຊິກບັນດາໜ່ວຍພາຍໃນ ຄະນະໂຄສະນາອົບຮົມເຂົ້າຮ່ວມ.
ໃນໂອກາດດັ່ງກ່າວ ປະທານ ກໍ່ໄດ້ມີຄຳເຫັນໂອ້ລົມ ໄດ້ເນັ້ນໜັກໃຫ້ ຄະນະບໍລິຫານການຊາວໜຸ່ມຊຸດໃຫມ່ຊຸດທີ(V) ສືບຕໍ່ຊີ້ນຳ ນຳພາສຶກສາອົບຮົມການເມືອງແນວຄິດໃຫ້ສະມາຊິກຊາວໜຸ່ມທົ່ວ ຄອສພຢ່າງເປັນປົກກະຕິ, ເອົາໃສ່ໃຈຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກຊາວໜຸ່ມທີ່ມີຄຸນທາດການເມືອງໜັກແໜ້ນ, ມີຄຸນສົມບັດ ສິນທຳປະຕິວັດ, ກ້າຄິດ, ກ້າເຮັດ, ກ້າຮັບຜິດຊອບ, ຕັ້ງໜ້າປະກອບສ່ວນເຂົ້າໃນຂະບວນການເຄື່ອນໄຫວຂອງສູນກາງຊາວໜຸ່ມ ໃຫ້ເປັນປົກກະຕິແຂງແຮງເພື່ອສາມາດກາຍເປັນກຳລັງແຮງອັນສຳຄັນ ຂັບເຂື່ອນວຽກງານຊາວໜຸ່ມ ທັງ ສືບຕໍ່ປະຕິບັດຂໍ້ແຂ່ງຂັນ ຊາວໜຸ່ມ 4 ບຸກ ໃຫ້ເປັນຂະບວນການຟົດຟື້ນໃນອະນາຄົດ.
