ພິທີໂອ້ລົມຂອງທ່ານຮອງຫົວໜ້າຄະນະໂຄສະນາອົບຮົມສູນກາງພັກ.
ໃນຕອນເຊົ້າວັນທີ 6 ພະຈິກ 2020 ທີ່ສະໂມສອນໃຫຍ່ຄະນະໂຄສະນາອົບຮົມສູນກາງພັກ ໄດ້ຈັດພິທີຮັບຟັງການໂອ້ລົມ ແລະ ອຳລາຂອງທ່ານ ຄຳເຈນ ວົງໂພສີ ກຳມະການສູນກາງພັກ, ອະດີດຮອງຫົວໜ້າຄະນະໂຄສະນາອົບຮົມສູນກາງພັກທີ່ຍ້າຍໄປຮັບໜ້າທີ່ຢູ່ບ່ອນໃໝ່ເຂົ້າຮ່ວມໃນພິທີມີ: ທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຕາງໜ້າຈາກຄະນະຈັດຕັ້ງສູນກາງພັກ, ຫົວໜ້າກົມ, ຮອງກົມ, ຫົວໜ້າພະແນກ, ຮອງຫົວໜ້າພະແນກ ພ້ອມທັງວິຊາການທັງໝົດທົ່ວຄອສພ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ນ. ໄພວັນ ວັນນະໄຊ ຮອງຫົວໜ້າກົມຈັດຕັ້ງ-ພະນັກງານໄດ້ຂື້ນກ່າວຈຸດປະສົງຂອງພິທີຫຼັງຈາກນັ້ນ ທ່ານ ນ. ວິໄລວັນ ເພັງສະຫວັດ ຕາງໜ້າຈາກຄະນະຈັດຕັ້ງສູນກາງພັກໄດ້ຂື້ນຜ່ານຂໍ້ຕົກລົງວ່າດ້ວຍການຍົກຍ້າຍ ທ່ານ ຄຳເຈນ ວົງໂພສີ ກຳມະການສູນກາງພັກ, ອະດິດຮອງຫົວໜ້າຄະນະໂຄສະນາອົບຮົມສູນກາງພັກໄປຮັບໜ້າທີ່ໃໝ່ຢູ່ສຳນັກງານນາຍົກລັດຖະມົນຕີ.
ຫຼັງຈາກນັ້ນ ທ່ານ ຄຳເຈນ ວົງໂພສີ ກຳມະການສູນກາງພັກ, ອະດີດຮອງເລຂາຄະນະພັກ, ອະດີດຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຂື້ນກ່າວສະແດງຄວາມຂອບໃຈຕໍ່ພະນັກງານຫຼັກແຫຼ່ງຂັ້ນຕ່າງໆ, ເພື່ອນມິດສະຫາຍຕະຫຼອດຮອດອ້າຍນ້ອງວິຊາການທັງໝົດທີ່ຮ່ວມອາຊີບດຽວກັນໃນຕະຫຼອດໄລຍະ 1 ປີ ທີ່ຜ່ານມາ ແລະ ຍັງເຊື່ອໝັ້ນຢ່າງໜັກແໜ້ນວ່າບັນດາສະຫາຍນັກຮົບແນວຄິດຈະສືບທອດຮັກສາມູນເຊື້ອສາມັກຄີຮັກແພງອັນເປັນມູນເຊື້ອເວົ້າລວມ ເວົ້າສະເພາະກໍແມ່ນການເຮັດວຽກງານການເມືອງ-ແນວຄິດໃຫ້ດີ ແລະ ສືບຕໍ່ກັນປັບປຸງແກ້ໄຂ ເພື່ອນໍາພາວຽກງານດັ່ງກ່າວໃຫ້ຢູ່ແຖວໜ້າ. ນອກນັ້ນ ໄດ້ເນັ້ນໜັກໃຫ້ສະມາຊິກພັກ-ພະນັກງານ ທຸກສະຫາຍ ຈົ່ງພ້ອມກັນສືບຕໍ່ເສີມຂະຫຍາຍມູນເຊື້ອຄວາມສາມັກຄີໃຫ້ເປັນປຶກແຜ່ນ ແລະ ສືບທອດມູນເຊື້ອຂອງພັກ ເຂົ້າໃນການຝຶກຝົນຫຼໍ່ຫຼອມຕົນເອງໃນການຈັດ ຕັ້ງປະຕິບັດໜ້າທີ່ການເມືອງທີ່ການຈັດຕັ້ງມອບໝາຍໃຫ້ໄດ້ຮັບຜົນສໍາເລັດຢ່າງຈົບງາມ.
ໃນທ້າຍພິທີທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ກ່າວສະແດງຄວາມຂອບໃຈ ແລະ ຕີລາຄາສູງຕໍ່ອະດີດຮອງຫົວໜ້າຄະນະໂຄສະນາອົບຮົມສູນກາງພັກ ທີ່ໄດ້ຮັບຄວາມໄວ້ວາງໃຈຈາກຂັ້ນເທິງ ແລະ ມີຜົນງານພົ້ນເດັ່ນໃນການເຄື່ອນໄຫວວຽກງານໃນໄລຍະທີ່ຜ່ານມາເຊິ່ງເພີ່ນໄດ້ຍົກໃຫ້ເຫັນເຖິງຜົນງານອັນໃຫຍ່ຫຼວງໃນຫຼາຍໆດ້ານເຊັ່ນ: ການຈັດຕັ້ງປະຕິບັດມະຕິ, ຄຳສັ່ງຕ່າງໆຂອງພັກ, ການຊີ້ນຳ-ນຳພາວຽກງານການເມືອງແນວຄິດໃຫ້ພະນັກງານ ໂດຍສະເພາະວຽກງານກໍ່ສ້າງພັກກໍ່ສ້າງພະນັກງານ, ສ້າງພະນັກງານຫຼັກແຫຼ່ງໃຫ້ມີຄວາມຮູ້ຄວາມສາມາດ, ເປັນແບບຢ່າງທາງທີ່ດີໃນການເຮັດວຽກງານວິຊາສະເພາະ, ແບບແຜນການດຳລົງຊີວິດທີ່ປອດໃສຂາວສະອາດ. ນອກນັ້ນທ່ານຍັງໄດ້ຮຽກຮ້ອງໃຫ້ສະມາຊິກພະນັກງານລັດຖະກອນທັງໝົດໃຫ້ເພີ່ມຄວາມບຸກບືນເປັນເຈົ້າການປະຕິບັດໜ້າທີ່ວຽກງານທີ່ຮັບຜິດຊອບ ແລະ ເພີ່ມຄວາມເອົາໃຈໃສ່ໃນການປະຕິບັດໜ້າທີ່ຂອງຕົນໃຫ້ດີຂື້ນ ເພື່ອຄຳນັບຮັບຕ້ອນການດຳເນີນກອງປະຊຸມຂອງໜ່ວຍພັກແຕ່ລະໜ່ວຍ ແລະ ກອງປະຊຸມໃຫຍ່ອົງຄະນະພັກຂອງຄະນະໂຄສະນາອົບຮົມສູນກາງພັກຄັ້ງທີ V ໃນຕໍ່ໜ້າຢ່າງມີຜົນສຳເລັດ.
ໃນຕອນແລງຂອງວັນດຽວກັນ ຢູ່ທີ່ຫ້ອງຮັບແຂກຄະນະໂຄສະນາອົບຮົມສູນກາງພັກ ໄດ້ມີພິທີມອບ-ຮັບເຄື່ອງອຸປະກອນດົນຕຼີ ຈາກຄອບຄົວທ່ານ ຄຳເຈນ ວົງໂພສີ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ເຊິ່ງໄດ້ນຳເອົາເຄື່ອງອຸປະກອນດົນຕຼີ (ຄີບອດ) ລວມມູນຄ່າ: 20.800.000 ກີບ ມອບໃຫ້ຄະນະໂຄສະນາອົບຮົມສູນກາງພັກ ເພື່ອເປັນການປະກອບສ່ວນຊຸກຍູ້ສົ່ງເສີມກອງສິລະປະຄະນະຊາວໜຸ່ມຄະນະໂຄສະນາອົບຮົມສູນກາງພັກ ໃຫ້ກຽດມອບໂດຍ ທ່ານ ຄຳເຈນ ວົງໂພສີ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໃຫ້ກຽດຮັບໂດຍ ທ່ານ ອານົງສັກ ອິນທະວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ, ມີຮັກສາການຫົວໜ້າຫ້ອງການ ແລະ ຕາງໜ້າອົງການຈັດຕັ້ງຊາວໜຸ່ມ ຂອງຄະນະໂຄສະນາອົບຮົມສູນກາງພັກ ເຂົ້າຮ່ວມນຳ.
