ເມືອງຊຽງຮ່ອນ ເປີດຝຶກອົບຮົມຄວາມຮູ້ພື້ນຖານວຽກງານໂຄສະນາ-ປາຖະກະຖາ ຊຸດທີ I ໃຫ້ແກ່ການນໍາຂັ້ນເມືອງ, ພະນັກງານຫຼັ້ກແຫຼ່ງ ແລະ ອົງການປົກຄອງບ້ານ
ພາບ-ຂ່າວ: ຈິງອັ່ງ ຄໍາບານນ້ອຍ
ໃນວັນທີ 17 ພຶດສະພາ 2022 ກົມໂຄສະນາ ຄະນະໂຄສະນາອົບຮົມສູນກາງພັກ ໄດ້ສົມທົບ ຫ້ອງການຄະນະໂຄສະນາອົບຮົມເມືອງຊຽງຮ່ອນ ແຂວງໄຊຍະບູລີ ຈັດຕັ້ງຊຸດຝຶກອົບຮົມວຽກງານໂຄສະນາ-ປາຖະກະຖາໃຫ້ແກ່ການນຳຂັ້ນເມືອງ, ພະນັກງານຫຼັກແຫຼ່ງ ແລະ ອົງການປົກຄອງບ້ານເທດສະບານ ເຊິ່ງຈັດຂຶ້ນຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງຊຽງຮ່ອນ ພາຍໃຕ້ການເປັນປະທານ ແລະ ກ່າວເປີດຂອງທ່ານ ອິນຕາ ນີ້ມນວນ ຮັກສາການເລຂາພັກເມືອງ, ຮັກສາການເຈົ້າເມືອງຊຽງຮ່ອນ, ຜູ້ຊີ້ນຳວຽກງານພັກ-ພະນັກງານຂັ້ນເມືອງ, ເປັນກຽດເຂົ້າຮ່ວມຂອງ ທ່ານນາງ ບົວລີ ບັນຊາລິດ ຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ, ມີທ່ານ ສົມປະສົງ ໄຊຍະລາດ ຮອງຫົວໜ້າຄະນະໂຄສະນາອົບຮົມແຂວງໄຊຍະບູລີ, ພ້ອມດ້ວຍການນຳຂັ້ນເມືອງ ພະນັກງານຫຼັກແຫຼ່ງອ້ອມຂ້າງເມືອງ ແລະ ອົງການປົກຄອງຂັ້ນບ້ານ 14 ບ້ານ ເຂົ້າຮ່ວມຢາ່ງພ້ອມພຽງ.
ຊຸດຝຶກອົບຮົມໃນຄັ້ງນີ້ ມີນັກສໍາມະນາກອນ ເຂົ້າຮ່ວມທັງໝົດ 60 ທ່ານ, ຍິງ 10 ທ່ານ ທີ່ມາຈາກ ຫຼາຍພາກສ່ວນຂອງເມືອງ, ການຝຶກອົບຮົມວຽກງານດັ່ງກ່າວແມ່ນຈະໄດ້ຮຽນຮູ້ກ່ຽວກັບຄວາມຮູ້ພື້ນຖານ ວຽກງານໂຄສະນາ-ປາຖະກະຖາ ເຊິ່ງປະກອບມີ 3 ບົດຄື: ບົດທີ 1: ບັນຫາພື້ນຖານຂອງວຽກງານໂຄສະນາ, ບົດທີ 2: ຄຸນລັກສະນະ, ສິລະປະໃນການປາກເວົ້າ ແລະ ບາງບົດຮຽນໃນການປາຖະກະຖາ ແລະ ບົດທີ 3: ແນະນໍາ ແລະ ເຕັກນິກໃນການຂຽນເອກະສານ, ຈຸດປະສົງຂອງການຝຶກອົບຮົມ ແມ່ນເພື່ອຍົກລະດັບຄວາມຮູ້ ເພີ່ມຄວາມສາມາດ, ໃນການຂຶ້ນປາຖະກະຖາຕົວຈິງ, ສ້າງທັກສະໃນການປາກເວົ້າ ແລະ ການຂຽນເອກະສານຕ່າງໆ ໃຫ້ແກ່ພະນັກງານຫຼັກແຫຼ່ງ ໃນການປະຕິບັດໜ້າທີ່ວຽກງານການເມືອງຂອງຕົນ. ພ້ອມນີ້, ຍັງເປັນການຫັນເອົາວຽກງານໂຄສະນາ-ປາຖະກະຖາ ຫັນລົງສູ່ຮາກຖານ ສ້າງໃຫ້ມີນັກປາຖະກະຖາ ເຄື່ອນໄຫວ ເຜີຍແຜ່ຄວາມຮູ້, ສະຕິປັນຍາ ສະພາບການ ຄຸນຄ່າທາງດ້ານຈິດໃຈ ປຸກລະດົມ ແລະ ຂົນຂວາຍມະຫາຊົນ ໃຫ້ມີຄວາມຕື່ນຕົວໃນການຈັດຕັ້ງປະຕິບັດໜ້າທີ່ວຽກງານ ຕາມຄວາມຮຽກຮ້ອງຕ້ອງການ ແລະ ໜ້າທີ່ການເມືອງໃນໄລຍະໃໝ່.
ໂອກາດນີ້, ທ່ານ ອິນຕາ ນີ້ມນວນ ຮັກສາການເລຂາພັກເມືອງ, ຮັກສາການເຈົ້າເມືອງຊຽງຮ່ອນ ໄດ້ກ່າວວ່າ: ການເປີດຊຸດຝຶກອົບຮົມໃນຄັ້ງນີ້ ແມ່ນມີຄວາມໝາຍຄວາມສໍາຄັນຫຼາຍ ໃຫ້ແກ່ນັກສໍາມະນາກອນ ທີ່ຈະໄດ້ພົບປະແລກປ່ຽນບົດຮຽນຮ່ວມກັນ. ສະນັ້ນ, ຮຽກຮ້ອງໃຫ້ນັກສໍາມະນາກອນ ຈົ່ງພ້ອມກັນເອົາໃຈໃສ່ຢ່າງຕັ້ງໜ້າ ແລະ ເກັບກໍາເອົາບົດຮຽນທິດສະດີ ທີ່ໄດ້ ນໍາໄປຈັດຕັ້ງປະຕິບັດເຂົ້າໃນວຽກງານຂອງແຕ່ລະຄົນໃຫ້ໄດ້ຮັບຜົນດີ.
