ກອງປະຊຸມພິຈາລະນາ-ຮັບຮອງເນື້ອໃນຜົນການຄົ້ນຄວ້າໂຄງການຄົ້ນຄວ້າ ລະດັບຊາດ ພາຍໃນຫົວຂໍ້:“ການສ້າງເສດຖະກິດຕະຫຼາດ ຕາມທິດສັງຄົມນິຍົມ ຢູ່ ສປປ ລາວ”
ໃນວັນທີ 27 ພຶດສະພາ 2024 ທີ່ຫ້ອງປະຊຸມໃຫຍ່ຊັ້ນ 2 ສຳນັກງານສະພາທິດສະດີສູນກາງພັກ (ຫຼັກ 06)ສະພາທິດສະດີສູນກາງພັກ ໄດ້ເປີດກອງປະຊຸມວິທະຍາສາດ ເພື່ອພິຈາລະນາ-ຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໃນຫົວຂໍ້ “ການສ້າງເສດຖະກິດຕະຫຼາດ ຕາມທິດສັງຄົມນິຍົມ ຢູ່ ສປປ ລາວ” ໂດຍການເປັນປະທານ ຂອງທ່ານ ປອ. ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ເຂົ້າຮ່ວມມີຮອງປະທານສະພາທິດສະດີສູນກາງ; ຄະນະປະຈຳສະພາທິດສະດີສູນກາງພັກ; ຄະນະເລຂາວິທະຍາສາດສະພາທິດສະດີສູນກາງພັກ; ຫ້ອງການສະພາທິດສະດີສູນກາງພັກ.
ໂຄງການຄົ້ນຄວ້າລະດັບຊາດໃນຫົວຂໍ້ “ການສ້າງເສດຖະກິດຕະຫຼາດ ຕາມທິດສັງຄົມນິຍົມ ຢູ່ ສປປ ລາວ” ເປັນໜຶ່ງໃນບັນດາໂຄງການຄົ້ນຄວ້າທາງດ້ານທິດສະດີ-ພຶດຕິກຳ ທີ່ຄະນະເລຂາທິການສູນກາງພັກໄດ້ອະນຸມັດ. ໂຄງການດັ່ງກ່າວໄດ້ສຳເລັດການດຳເນີນການຄົ້ນຄວ້າ ແລະໄດ້ຜ່ານກອງປະຊຸມສຳມະນາວິທະຍາສາດເປີດກວ້າງລະດົມຄຳຄິດເຫັນ ທັງພາຍໃນຄະນະຮັບຜິດຊອບໂຄງການ ແລະ ຮ່ວມກັບຄະນະກຳມະການດ້ານເສດຖະກິດ, ຄະນະປະຈຳສະພາທິດສະດີສູນກາງພັກ ທີ່ໄດ້ປະກອບຄຳເຫັນໃສ່ໃນໄລຍະຜ່ານມາ.
ຜ່ານການຈັດຕັ້ງປະຕິບັດບັນດາໂຄງການຄົ້ນຄວ້າໃນໄລຍະຜ່ານມາ ຮອດປັດຈຸບັນນີ້ສາມາດຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໄດ້ 3 ໂຄງການ ໃນນັ້ນ ໄດ້ສະເໜີຈັດພິມເປັນສະບັບສົມບູນ 1 ໂຄງການ. ບັນດາຜະລິດຕະພັນດັ່ງກ່າວຖືໄດ້ວ່າເປັນຜົນງານການຄົ້ນຄວ້າ ຂອງສະພາທິດສະດີສູນກາງພັກ ກໍຄືບັນດາສະຫາຍໃນຄະນະຮັບຜິດຊອບໂຄງການຄົ້ນຄວ້າໃນຫົວຂໍ້ຕ່າງໆ ທີ່ໄດ້ສຸມທຸກກຳລັງສະຕິປັນຍາເຂົ້າໃນການດຳເນີນການຄົ້ນຄວ້າຈົນສາມາດນຳສະເໜີໃຫ້ສະພາທິດສະດີສູນກາງພັກພິຈາລະນາຮັບຮອງເອົາ.
ສຳລັບໂຄງການຄົ້ນຄວ້າ ຫົວຂໍ້ “ການສ້າງເສດຖະກິດຕະຫຼາດ ຕາມທິດສັງຄົມນິຍົມ ຢູ່ ສປປ ລາວ” ເຫັນໄດ້ວ່າ ຄະນະຮັບຜິດຊອບໂຄງການໄດ້ມີຄວາມເອົາໃຈໃສ່ຢ່າງຈົດຈໍ່ ເພາະເປັນຫົວຂໍ້ທີ່ສຳຄັນທັງສ່ອງແສງເຖິງທິດສະດີ-ພຶດຕິກຳ ແລະ ບົດຮຽນຕົວຈິງໃນການສ້າງເສດຖະກິດຕະຫຼາດ ຂອງບັນດາປະເທດເພື່ອນມິດຍຸດທະສາດ ເພື່ອໝູນໃຊ້ເຂົ້າໃນການສ້າງເສດຖະກິດຕະຫຼາດຢູ່ປະເທດເຮົາ ແລະ ຕອບສະໜອງໃຫ້ແກ່ການສືບຕໍ່ຄົ້ນຄວ້າສະໜອງຂໍ້ມູນຢ່າງມີວິທະຍາສາດໃນການປັບປຸງບູລະນະແນວທາງສ້າງເສດຖະກິດຂອງພັກເຮົາໃນຂັ້ນຕໍ່ໄປ.
ກອງປະຊຸມໄດ້ຮັບຟັງການສະເໜີລາຍງານຫຍໍ້ບົດສັງລວມເນື້ອໃນໂຄງການຄົ້ນຄວ້າຈາກຄະນະຮັບຜິດຊອບໂຄງການ ເຊິ່ງເປັນການສ່ອງແສງໃຫ້ເຫັນໄດ້ເຖິງເນື້ອໃນທາງດ້ານທິດສະດີ-ພຶດຕິກຳ ແລະບັນດາບົດຮຽນຕ່າງໆໃນການສ້າງເສດຖະກິດຕະຫຼາດ ຕາມທິດສັງຄົມນິຍົມ; ບັນດາສະຫາຍຄະນະກຳມະການໄດ້ພ້ອມກັນມີຄຳເຫັນຢ່າງກົງໄປກົງມາຢ່າງມີວິທະຍາສາດ ຕໍ່ກັບບັນດາເນື້ອໃນຕ່າງໆ ຂອງບົດຄົ້ນຄວ້າ ເຊິ່ງບັນດາຄຳເຫັນສ່ວນໃຫຍ່ໄດ້ມີຄວາມເປັນເອກະພາບ ແລະ ສະເໜີໃຫ້ຄະນະຮັບຜິດຊອບຄົ້ນຄວ້ານຳໄປປັບປຸງບາງເນື້ອໃນໃຫ້ຈະແຈ້ງຕື່ມ. ພ້ອມດຽວກັນນັ້ນ, ກອງປະຊຸມໄດ້ຕົກລົງເຫັນດີເປັນເອກະພາບລົງຄະແນນສຽງຮັບຮອງເອົາຜົນ ຂອງການຄົ້ນຄວ້າ.
ຜ່ານການຮັບຮອງເອົາຜົນຂອງການຄົ້ນຄວ້າລະດັບຊາດໃນຫົວຂໍ້ດັ່ງກ່າວ ປະທານກອງປະຊຸມ ໄດ້ມີຄຳເຫັນເພີ່ມເຕີມບາງປະການ ດັ່ງນີ້:
1). ຄະນະຮັບຜິດຊອບໂຄງການດັ່ງກ່າວ ຈົ່ງໄດ້ເຊີດຊູຄວາມຮັບຜິດຊອບ ແລະສຸມໃສ່ໃນການນຳເອົາເນື້ອໃນຄຳເຫັນ ຂອງຄະນະກຳມະການວິທະຍາສາດທີ່ໄດ້ມີຄຳເຫັນໃນການຕີລາຄາເນື້ອໃນບົດຄົ້ນຄວ້າໄປປັບປຸງ ແລະລາຍງານມາຍັງສະພາທິດສະດີສູນກາງພັກຢ່າງເປັນລາຍລັກອັກສອນ ເພື່ອສະເໜີຕໍ່ຄະນະປະຈຳສະພາທິດສະດີສູນກາງພັກມີຄຳເຫັນ ແລະຈັດພິມເປັນສະບັບສົມບູນ.
2). ຄະນະຮັບຜິດຊອບໂຄງການປະສານກັບຫ້ອງການສະພາທິດສະດີສູນກາງພັກສຸມໃສ່ໃນການກວດກາດ້ານເຕັກນິກ-ໄວຍະກອນ, ການສ້າງມາແກັດເປັນປື້ມແລ້ວສົ່ງໃຫ້ຫ້ອງການສະພາທິດສະດີສູນກາງພັກກວດກາຄືນ.
3). ຫ້ອງການສະພາທິດສະດີສູນກາງພັກເປັນໃຈກາງໃນການຕິດຕາມ ແລະຊຸກຍູ້ການຈັດຕັ້ງປະຕິບັດບັນດາໜ້າວຽກຕ່າງໆ ເພື່ອເຮັດໃຫ້ການດຳເນີນໂຄງການໄດ້ສຳເລັດຕາມລະດັບຄາດໝາຍ ພ້ອມນັ້ນ ກໍຮ່າງຂໍ້ຕົກລົງວ່າດ້ວຍການຮັບຮອງເນື້ອໃນຜົນການຄົ້ນຄວ້າໂຄງການ ເພື່ອສະເໜີຕໍ່ສະພາທິດສະດີສູນກາງພັກລົງລາຍເຊັນຢ່າງເປັນທາງການ.
ກອງປະຊຸມໄດ້ດຳເນີນເປັນເວລາເຄິ່ງວັນ ແລະ ປິດລົງໃນເວລາ 11:30 ຂອງວັນດຽວກັນດ້ວຍຜົນສຳເລັດຢ່າງຈົບງາມ.