ກອງປະຊຸມໃຫຍ່ຄັ້ງທີ VI ຂອງສະຫະພັນກຳມະບານ ຄະນະໂຄສະນາອົບຮົມສູນກາງພັກ
ໃນຕອນເຊົ້າວັນທີ 19 ສິງຫາ 2020 ຄະນະບໍລິຫານງານກຳມະບານ ຄະນະໂຄສະນາອົບຮົມສູນກາງພັກ ໄດ້ຈັດກອງປະຊຸມໃຫຍ່ຄັ້ງທີ VI ຂຶ້ນທີ່ ຫ້ອງປະຊຸມໃຫຍ່ ຄອສພ; ໃຫ້ກຽດເຂົ້າຮ່ວມເປັນຄະນະປະທານໂດຍ: ສະຫາຍ ປອ ຄຳພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ ແລະ ທ່ານ ນ ອາລີ ວົງໜໍ່ບຸນທຳ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ເຂົ້າຮ່ວມມີ: ຄະນະພັກ ຄອສພ, ຕາງໜ້າອົງການຈັດຕັ້ງມະຫາຊົນ, ແຂກຕ່າງໜ້າສະຫະພັນກຳມະບານມາຈາກບັນດາອົງການພັກ ແລະ ສະມາຊິກກຳມະບານ ທົ່ວ ຄອສພ ທັງໝົດເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ອານົງສັັກ ອິນທະວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ ຂື້ນຜ່ານຂໍ້ຕົກລົງ ອະນຸມັດໄຂກອງປະຊຸມໃຫຍ່ຄັ້ງທີ VI ຂອງຄະນະບໍລິຫານງານກຳມະບານ ຄະນະໂຄສະນາອົບຮົມສູນກາງພັກ ສະບັບເລກທີ 44/ຄອສພ, ລົງວັນທີ 30 ກໍລະກົດ 2020 ແລະ ໄດ້ຜ່ານຂໍ້ຕົກລົງແຕ່ງຕັ້ງກອງເລຂາ ສະບັບເລກທີ 114/ສກມບ ຄອສພ ເຊິ່ງປະກອບດ້ວຍ 3 ສະຫາຍ ຄື: ສະຫາຍ ບົວວົງ ພົມພັກດີ, ສະຫາຍ ນ. ກ່າຍ ແກ້ວບົວລະພາ ແລະ ສະຫາຍ ບຸນມີ ຫຼວງປັນຍາ ເພື່ອຊ່ວຍຄະນະປະທານກອງປະຊຸມຕິດຕາມບັນທຶກການດຳເນີນກອງປະຊຸມ ແລະ ສະຫຼຸບສັງລວມ.
ຫຼັງຈາກນັ້ນ ສະຫາຍ ຄຳເຄນ ຈັນທະວົງ ປະທານສະຫະພັນກຳມະບານ ຄອສພ ໄດ້ຂຶ້ນກ່າວເປີດກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການເມືອງ, ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຂອງຄະນະບໍລິຫານງານກຳມະບານ ຄອສພ ຄັ້ງທີ V ຕໍ່ກອງປະຊຸມ. ເຊິ່ງທ່ານໄດ້ຍົກໃຫ້ເຫັນເຖິງຜົນງານ ແລະ ການເຄື່ອນການຈັດຕັ້ງປະຕິບັດໜ້າທີ່ວຽກງານຂອງ ຄະນະບໍລິຫານງານສະຫະພັນກຳມະບານ ຄອສພ ໃນໄລຍະ 5 ປີຜ່ານມາ , ທິດທາງແຜນການ ແລະ ຄາດໝາຍສູ້ຊົນໃນຕໍ່ໜ້າ( 2020-2025); ໃນຕະຫຼອດໄລຍະ 5 ປີຜ່ານມາ ໂດຍພາຍໃຕ້ການຊີ້ນໍາໆພາ ຂອງຄະນະພັກ ຄອສພ ແລະ ສູນກາງສະຫະພັນກຳມະບານລາວ ເວົ້າລວມ, ເວົ້າສະເພາະ ສະຫະພັນກຳມະບານ ຄະນະໂຄສະນາອົບຮົມສູນກາງພັກ ໄດ້ສືບຕໍ່ຈັດຕັ້ງປະຕິບັດແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກ ກໍຄື ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງສູນກາງສະຫະພັນກຳມະບານລາວ ແລະ ໂຄງການດຳເນີນງານຂອງສະຫະພັນກຳມະບານ ຄອສພ ເຂົ້າໃນທຸກຂົງເຂດວຽກງານຢ່າງເປັນຂະບວນການຟົດຟື້ນ ແລະ ຍາດໄດ້ຜົນງານອັນຕັ້ັງໜ້າໃນຫຼາຍດ້ານ ໂດຍສະເພາະແມ່ນການຈັດຕັ້ງປະ ຕິບັດເນື້ອໃນຂໍ້ແຂ່ງຂັນ 5 ເປັນເຈົ້າເຂົ້າສູ່ຊີວິດຕົວຈິງ ອັນເຮັດໃຫ້ຊີວິດການເປັນຢູ່ຂອງສະມາຊິກກຳມະບານນັບມື້ນັບໄດ້ຮັບການປັບປຸງດີຂຶ້ນ; ການເຮັດວຽກງານວິຊາສະເພາະເປັນຂະບວນນການຟົດຟື້ນປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ຄອສພ ມີຄະນະບໍລິຫານງານ 7 ສະຫາຍ, ຍິງ 2 ສະຫາຍ, ມີ 8 ໜ່ວຍກຳມະບານ, ມີສະມາຊິກທັງໝົດ 169 ສະຫາຍ, ຍິງ 86 ສະຫາຍ ສະຫະພັນກຳມະບານຄະນະໂຄສະນາອົບຮົມສູນກາງພັກ ເປັນຫົວໜ່ວຍຮາກຖານໜຶ່ງທີ່ຂຶ້ນກັບສູນກາງ ສະຫະພັນກຳມະບານລາວໂດຍກົງ ແລະ ເຄື່ອນໄຫວພາຍໃຕ້ການຊີ້ນຳຂອງຄະນະພັກ ຄະນະໂຄສະນາອົບຮົມສູນກາງພັກໂດຍກົງ.
ຫຼັງຈາກນັ້ນສະຫາຍ ຄຳກອງ ທຳມະເທວາ ຄະນະບໍລິຫານງານສະຫະພັນກຳມະບານ ຄອສພ ຂື້ນຜ່ານແຜນຍຸດທະສາດພັດທະນາວຽກງານກຳມະບານ ຄອສພ ໃນໄລຍະ 5 ປີ 2020-2025 ແລະ ວິໄສທັດ 10 ປີ 2020-2030 ເຊິ່ງໄດ້ຍົກໃຫ້ເຫັນການພັດທະນາວຽກງານກຳມະບານ ຄອສພ ໃຫ້ເຕີບໃຫຍ່ເຂັ້ມແຂງຕາມທິດ “ຍົກສູງຄຸນນະພາບເປັນເສນາທິການວຽກງານການເມືອງ-ແນວຄິດ, ເອົາໃຈໃສ່ສ້າງສະຫະພັນກຳມະບານ ຄອສພ ໃຫ້ເຂັ້ມແຂງ, ເປັນຕົວແທນໃນການປົກປ້ອງສິດຜົນປະໂຫຍດອັນຊອບທຳຂອງສະມາຊິກກະມະບານ ແລະ ກຽມພ້ອມເຮັດສຳເລັດທຸກວຽກງານທີ່ໄດ້ຮັບການມອບໝາຍ” ເຊິ່ງປະກອບດ້ວຍ 7 ແຜນງານໃຫຍ່ຄື:
- ຍົກສູງຄຸນນະພາບວຽກງານການເມືອງ-ແນວຄິດໃຫ້ຖັນແຖວສະມາຊິກກຳມະບານ.
- ປັບປຸງກົງຈັກ ແລະ ສ້າງພະນັກງານຮຸ່ນສືບທອດໃຫ້ໜັກແໜ້ນເຂັ້ມແຂງ.
- ຍົກສູງຄຸນນະພາບໃນການເປັນເສນາທິການຂອງສະມາຊິກກຳມະບານ ຄອສພ ໃຫ້ດີຂື້ນຢ່າງບໍ່ຢຸດຢັ້ງ.
- ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກຳມະບານ.
- ພັດທະນາວຽກງານຂະບວນການຂອງກຳມະບານໃຫ້ເປັນຂະບວນການຟົດຟື້ນ ແລະ ມີເນື້ອໃນເລິກເຊິ່ງ.
- ພັດທະນາລະບົບການກວດກາການຈັດຕັ້ງກຳມະບານ ຄອສພ.
- ພົວພັນຮ່ວມືກັບກະຊວງ, ອົງການອ້ອມຂ້າງສູນກາງ ແລະ ທ້ອງຖີ່ນທີ່ມີເງື່ອນໄຂ.
ຫຼັງຈາກນັ້ນຄະນະບໍລິຫານງານກຳມະບານ ຄອສພ ຊຸດເກົ່າ ໄດ້ຂຶ້ນກ່າວອຳລາໜ້າທີ່ ແລະ ກອງປະຊຸມໃຫຍ່ໄດ້ປ່ອນບັດຄັດເລືອກເອົາຄະນະບໍລິຫານງານກຳມະບານ ຄອສພ ຊຸດໃໝ່ ເຊິ່ງມີຜູ້ລົງສະໝັກເລືອກຕັ້ງເປັນ ຄະນະບໍລິຫານງານກຳມະບານ ຄອສພ ຊຸດໃໝ່ຈໍານວນ 10 ສະຫາຍ, ໃນນັ້ນເລືອກເອົາ 7 ສະຫາຍ, ຜ່ານການປ່ອນບັດເລືອກຕັ້ງບັນດາສະມາຊິກກຳມະບານ ຄອສພ ໄດ້ໃຊ້ສິດປະຊາທິປະໄຕຂອງຕົນຢ່າງເຕັມທີ ແລະ ເລືອກໄດ້ 7 ສະຫາຍ ສະນັ້ນ, ໃນກອງປະຊຸມຄັ້ງປະຖົມມະລຶກໄດ້ເລືອກເອົາ:
- ສະຫາຍ ວັນຕຸລາ ຣັກນຸດ ເປັນປະທານສະຫະພັນກຳມະບານ ຄອສພ ຊຸດໃໝ່.
- ສະຫາຍ ນ. ໄພວັນ ວັນນະໄຊ ເປັນຮອງປະທານທັງເປັນປະທານກວດກາ
- ສະຫາຍ ປອ ວັນລາຕີ ຄຳວານວົງສາ ເປັນຮອງປະທານ
- ສະຫາຍ ບົວໄລ ຊົມພູແກ້ວ ເປັນຮອງປະທານກວດກາ
- ສະຫາຍ ຄຳກອງ ທຳມະເທວາ ເປັນຄະນະ
- ສະຫາຍ ສາຄອນ ພົມມະລາດ ເປັນຄະນະ
- ສະຫາຍ ນ. ບຸນມາລີ ສິລິດາວົງ ເປັນຄະນະ
ໄດ້ຄັດເລືອກເອົາຜູ້ແທນສົມບູນ ແລະ ສຳຮອງໄປຮ່ວມກອງປະຊຸມສະຫະພັນກຳມະບານທົ່ວປະເທດທີ່ຈະຈັດຂື້ນໃນຕໍ່ໜ້ານີ້ມີ: ຜູ້ແທນສົມບູນ 1 ສະຫາຍ ສະຫາຍ ວັນຕຸລາ ຣັກນຸດ, ສຳຮອງ 1 ສະຫາຍ ສະຫາຍ ນ. ໄພວັນ ວັນນະໄຊ
ຄະນະບໍລິຫານງານສະຫະພັນກຳມະບານ ຄອສພ ຊຸດເກົ່າ
ຄະນະບໍລິຫານງານສະຫະພັນກຳມະບານ ຄອສພ ຊຸດໃໝ່
ຫຼັງຈາກນັ້ນ ສະຫາຍ ວັນຕຸລາ ຮັກນຸດ ປະທານສະຫະພັນກຳມະບານ ຄອສພຊຸດໃໝ່ ຕາງໜ້າໃຫ້ຄະນະບໍລິຫານງານສະຫະພັນກຳມະບານ ຄອສພ ໄດ້ຂື້ນກ່າວຮັບໜ້າທີ່ ແລະ ປະຕິຍານຕົນກ່ອນອຶ່ນໄດ້ສະແດງຄວາມຂອບໃຈຕໍ່ຄະນະພັກ-ຄະນະນຳ ແລະ ສະມາຊິກກຳມະບານ ຄອສພ ທັງໝົດທີ່ໃຫ້ຄວາມໄວ້ວາງໃຈໃນການສືບຕໍ່ຊີ້ນຳນຳວຽກງານກຳມະບານ ຄອສພ ໃນຕໍ່ໜ້າ.
ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ນ. ອາລີ ວົງໜໍ່ບຸນທຳ ຮອງປະທານຄະນະບໍລິ ຫານງານສູນກາງສະຫະພັນກຳມະບານລາວ ຕໍ່ກອງປະຊຸມກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຄະ ນະບໍລິຫານງານສະຫະພັນກຳມະບານ ຄອສພ ຍາດມາໄດ້ໃນໄລຍະ5 ປີຜ່ານມາຢ່າງສຸດອົກສຸດໃຈ ພ້ອມທັງເນັ້ນໜັກໃຫ້ຄະນະບໍລິຫານງານກຳມະບານຊຸດໃໝ່ ເອົາໃຈໃສ່ສືບຕໍ່ຊີ້ນໍາໆພາວຽກງານຂອງກຳມະບານ ໃຫ້ມີຄວາມກ້າວໜ້າ, ມີບາດກ້າວໃໝ່ໃຫຍ່ຫຼວງກວ່າເກົ່າ, ສ້າງແຜນງານ ແລະ ແບ່ງໜ້າທີ່ເຊິ່ງກັນ ແລະ ກັນດ້ວຍຄວາມຮັບຜິດຊອບສູງ, ນໍາເອົາມະຕິກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍ ໃຫ້ໄດ້ຮັບຜົນສໍາເລັດ, ເພີ່ມທະວີຄວາມສາມັກຄີໃຫ້ແໜ້ນແຟ້ນ, ພັດທະນາ ແລະ ເປັນເຈົ້າການຫັນມະຕິກອງປະຊຸມຄັ້ງນີ້ເປັນແຜນງານ, ໂຄງການລະອຽດຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ຂອງ ສູນກາງສະຫະພັນກໍາມະບານລາວ, ພ້ອມທັງປຸກລະດົມສະມາຊິກກຳມະບານ ເປັນເຈົ້າການຈັດຕັ້ງປະຕິບັດໃຫ້ປະກົດຜົນເປັນຈິງ.
ກ່ອນສິ້ນສຸດກອງປະຊຸມ ຕາງໜ້າຄະນະບໍລິຫານງານກຳມະບານ ຄອສພຊຸດໃໝ່ໄດ້ຂື້ນມອບກະຕ່າດອກໄມ້ໃຫ້ ສະຫາຍ ຫົວໜ້າ ຄອສພ ແລະ ສະຫາຍ ນ. ອາລີ ວົງໜໍ່ບຸນທຳ ຮອງປະທານຄະນະບໍລິຫານງານສູນກາງສະຫະພັນກຳມະບານລາວເພື່ອສະແດງຄວາມຮູ້ບຸນຄຸນຕໍ່ການຊີ້ນຳ-ນຳພາຈົນກອງປະຊຸມໃຫຍ່ສຳເລັດຜົນຢ່າງຈົບງາມ.