ຄະນະໂຄສະນາອົບຮົມສູນກາງພັກໄດ້ຈັດພິທີການບັນລະຍາຍກ່ຽວກັບ ລະບົບບໍລິຫານລັດດ້ວຍເອເລັກໂຕຼນິກ ແລະ ການຫັນເປັນທັນສະໄໝຂອງລັດຖະບານ
ຕອນເຊົ້າວັນທີ 3 ກັນຍາ 2020 ທີ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກໄດ້ຈັດພິທີການບັນລະຍາຍກ່ຽວກັບ ລະບົບບໍລິຫານລັດດ້ວຍເອເລັກໂຕຼນິກ ແລະ ການຫັນເປັນທັນສະໄໝຂອງລັດຖະບານໂດຍການເປັນປະທານຮ່ວມ ທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ທ່ານ ປອ ທະວີສັກ ມະໂນທັມຫົວໜ້າສູນບໍລິຫານລັດດ້ວຍເອເລັກໂຕຼນິກ ພ້ອມດ້ວຍຄະນະ ມີ: ຄະນະກົມ, ຄະນະພະແນກ ພ້ອມດວ້ຍວິຊາການທັງໝົດເຂົ້າຮ່ວມຈຳນວນ 123 ທ່ານ, ຍິງ 63 ທ່ານ.
ໃນພິທີ ທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກໄດ້ເວົ້າເຖີງສະພາບລວມຂອງການນຳໃຊ້ເຕັກໂນໂລຊີເຂົ້າໃນວຽກງານການເມືອງແນວຄິດຢຢູ່ຄະນະຄະໂຄສະນາອົບຮົມສູນກາງພັກ, ຄວາມສຳຄັນ ແລະ ການຫັນປ່ຽນສູ່ທັນສະໄໝ ແລະ ພ້ອມທັງໃຫ້ກຽດກ່າວເປີດພິທີ.
ທ່ານ ປອ ທະວີສັກ ມະໂນທັມຫົວໜ້າສູນບໍລິຫານລັດດ້ວຍເອເລັກໂຕຼນິກໄດ້ຂື້ນບັນລະຍາຍທ່ານໄດ້ຍົກໃຫ້ເຫັນສະພາບການຫັນປ່ຽນເປັນທັນສະໄໝດ້ວຍລະບົບດີຈີຕອນ, ແຜນການຫັນເປັນທັນສະໄໝຂອງ ສປປ ລາວ, ແຜນພັດທະນາລັດຖະບານດີຈີຕອນ, ການເຊື່ອມໂຍງວຽກງານໄອຊີທີ (ICT) ເຂົ້າໃນທຸກຂົງເຂດວຽກງານໄປສູ່ການປະຕິຮູບພື້ນຖານຂອງການບໍລິການ, ບໍລິຫານຈັດການ, ການຜະລິດແນ່ໃສ່ການສ້າງວຽກງານການເມືອງແນວຄິດຫັນເປັນທັນສະໄໝວ່ອງໄວໂດຍການນຳໃຊ້ E-Government, IOT, ປັນຍາປະດິດ (AI), ຖານຂໍ້ມູນ(Big data) ແລະ ອຶ່ນໆ. ນອກນັ້ນຍັງມີຕາງໜ້າພະແນກໂປຼແກຼມ ແລະ ຂໍ້ມູນຂ່າວສານໄດ້ຂື້ນບັນລະຍາຍລະບົບ E-mail, Video Conference, Microsoft Teams, ລະບົບເຄືອຂ່າຍພາກລັດ, ລະບົບສື່ສານ ພາກລັດ (G-Chat), ແລະ ລະບົບແຊ ແລະ ການນຳໃຊ້ເອກະສານຮ່ວມກັນ(G-Share, G-Drive ) ເພື່ອໃຫ້ເປັນມາດຕະຖານດຽວກັນ ແລະ ຮັບປະກັນຄວາມປອດໄພແນໃສ່ການເຜີຍແຜ່ໂຄສະນາວຽກງານແນວຄິດການເມືອງ, ປະຊາສຳພັນ ແລະ ບໍລິການຂໍ້ມູນ ຂ່າວສານ ຜ່ານທາງເວັບໄຊ ໃຫ້ແກ່ປະຊາຊົນ, ພາກທຸລະກິດ ແລະ ພາກລັດດ້ວຍກັນໃຫ້ມີປະສິດທິພາບສູງ.
ໃນທ້າຍພິທີ ໃນພິທີ ທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ຍັງໄດ້ຮຽກຮ້ອງໃຫ້ບັນດາສະຫາຍ ຈົ່ງຕັ້ງໜ້າຄົ້ນຄວ້າຮຽນຮູ້ສິ່ງໃໝ່ໆໄປໜູນໃຊ້ເຂົ້າໃນວຽກງານວິຊາສະເພາະຂອງຕົນໂດຍສະເພາະການນຳໃຊ້ໄອທີເຂົ້າໃນວຽກງານການເມືອງແນວຄິດໃຫ້ນັບມື້ດີຂຶ້ນ ສ້າງຄວາມສະດວກໃນການຕິດຕໍ່, ປະສານງານ, ການໂຄສະນາເຜີຍແຜ່ແນວທາງດ້ວຍເອເລັກໂຕຼນິກໃຫ້ມີຄວາມວ່ອງໄວ ເພື່ອຮັບໃຊ້ເຂົ້າໃນວຽກງານການເມືອງແນວຄິດກ້າວໜ້ານຳໄປສູ່ຄວາມທັນສະໄໝເທື່ອລະກ້າວ.
