ພິທີປະກາດແຕ່ງຕັ້ງຕຳແໜ່ງບໍລິຫານຂອງຄະນະໂຄສະນາອົບຮົມສູນກາງພັກ
ໃນຕອນເຊົ້າວັນທີ 17 ທັນວາ 2020 ທີ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກ ໄດ້ຈັດພິທີແຕ່ງຕັ້ງຕຳແໜ່ງບໍລິຫານໂດຍໃຫ້ກຽດເປັນປະທານຂອງທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ເຂົ້າຮ່ວມມີ: ຄະນະພັກ, ບັນດາກົມ ພ້ອມດ້ວຍພະນັກງານລັດຖະກອນທັງໝົດພາຍໃນ ຄອສພ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ນ. ຈັນສຸກ ພິມມະວັນ ຮອງຫົວໜ້າກົມຈັດຕັ້ງ-ພະນັກງານ ໄດ້ຂື້ນຜ່ານຂໍ້ຕົກລົງວ່າດ້ວຍການແຕ່ງຕັ້ງຕຳແໜ່ງບໍລິຫານພາຍໃນຄະນະໂຄສະນາອົບຮົມສູນກາງພັກ ສະບັບເລກທີ 206, 207/ຄອສພ, ລົງວັນທີ 15/12/2020 ໂດຍມີລາຍຊື່ດ່ັງລຸ່ມນີ້:
- ທ່ານ ນ. ສຸກສະຫວັນ ອິນຄະວິໄລ ຫົວໜ້າພະແນກອົບຮົມທິດສະດີການເມືອງ ກົມອົບຮົມ ຂື້ນເປັນ ຮອງຫົວໜ້າກົມອົບຮົມ.
- ທ່ານ ພູວັນ ສຸວັນ ຫົວໜ້າພະແນກຈັດຕັ້ງ-ພະນັກງານ, ກົມຈັດຕັ້ງ-ພະນັກງານ ຂື້ນເປັນ ຮອງຫົວໜ້າກົມຂໍ້ມູນຂ່າວສານ
- ທ່ານ ບຸນທ່ຽງ ພັນນະຈັນ ຫົວໜ້າພະແນກບັນນາທິການຕ່າງປະເທດ ວາລະສານອະລຸນໃໝ່ ຂື້ນເປັນ ຮອງຫົວໜ້າ ບ.ກ ວາລະສານໂຄສະນາ.
- ທ່ານ ປອ ວັນລາຕີ ຄຳວານວົງສາ ຮອງຫົວໜ້າກົມອົບຮົມ ຖືແຕ່ງຕັ້ງຍ້າຍໄປເປັນ ຮອງຫົວໜ້າ ບ.ກ ວາລະສານອະລຸນໃໝ່.
ໃນຕອນທ້າຍພິທີ ທ່ານ ນ. ສົມພອຍ ພົມມະຈັກ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ມີຄໍາເຫັນໂອ້ລົມເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ທ່ານຍັງໄດ້ເນັ້ນໜັກໃຫ້ຜູ້ທີ່ໄດ້ຍົກຍ້າຍ ແລະ ຮັບໜ້າທີ່ຕຳແໜ່ງໃໝ່ ຈົ່ງສືບຕໍ່ນຮັກສາມູນເຊື້ອໃນການເຮັດວຽກງານການເມືອງ-ແນວຄິດ ໃຫ້ມີຄວາມຄົມແຫຼມ ແລະ ກວ້າງຂວາງເຮັດໃຫ້ວຽກງານໂຄສະນາອົບຮົມຂອງພັກ ເປັນວຽກກົກ ເປັນວຽກແຖວໜ້າ, ລົງເຖິງທ້ອງຖິ່ນຮາກຖານ, ນໍາເອົາແນວທາງຂອງພັກ-ລັດ ໄປຜັນຂະຫຍາຍໃຫ້ດີ, ໃຫ້ໄວ, ໃຫ້ຫຼາຍ, ໃຫ້ຖືກຕ້ອງກົດໝາຍ, ສືບຕໍ່ປະຕິບັດພາລະບົດບາດ, ສິດ, ໜ້າທີ່ໃຫ້ໜັກແໜ້ນ ເອົາໃຈໃສ່ແກ້ໄຈຸດອ່ອນຂໍ້ຄົງຄ້າງ ແລະ ເສີມຂະຫຍາຍຈຸດດີ ມູນເຊື້ອຄວາມສາມັກຄີເປັນເອກະພາບພາຍໃນ ໃຫ້ເປັນປຶກແຜ່ນແໜ້ນໜາ, ມີການແບ່ງວຽກແບ່ງຄວາມຮັບຜິດຊອບ, ເອົາໃຈໃສ່ປັບປຸງແບບແຜນວິທີນໍາພາ-ວິທີເຮັດວຽກ, ເປັນເສນາທິການໃຫ້ຂັ້ນເທິງ ໃຫ້ມີຜົນສໍາເລັດ, ຕິດຕາມກວດກາ, ສະຫຼຸບລາຍງານ ແລະ ຂໍທິດຊີ້ນໍາຈາກຂັ້ນເທິງເປັນປົກກະຕິ ເພື່ອເຮັດໃຫ້ວຽກງານໂຄສະນາອົບຮົມກາຍເປັນຂອງທຸກຄົນໃນສັງຄົມ.
